Ыдыктыг хоойлуну катаптааны 22:25—27-де бижээн айтыышкынның кол сорулгазы — эр кижиниң буруулуг болганын хынаары-даа эвес (ооң буруузун бадыткап каан турган), а кыс кижиниң буруу чогун хынаары турган. Ол үзүндүнүң долу утказын көрүптээлиңер.

Мурнунда шүлүктерде хоорайга болган чүүлдү бижип турар: эр кижи өске кижиниң дүгденишкен кызы-биле хойгажырга, ол кыс уруг дуза дилеп, алгырбаан. Бо таварылгада эр кижи самыын чорукка буруулуг турган, чүге дээрге ол үелерде дүгденишкен кыс өгленип алган кылдыр санаттынар чораан. Ол кышкырып турган болза, долгандыр улус ону дыңнап кааш, камагалаптар ийик. Ынчалза-даа кыс кижи алгырбаан болганда, ону самыын чорукка буруудадыр турган. Ынчап кээрге, оларның кайызы-даа буруулуг турган (Ы. х. к. 22:23, 24).

Хоойлуда улаштыр мындыг таварылга бижиттинген: «Кандыг-бир эр кижи өске эр кижиниң дүгденишкен аныяк кызы-биле ажык шөлге ужуражы бергеш, аңаа күш дөгеп, хойгажыр болза, чүгле ол кыс-биле хойгажып чыткан эр кижини өлүрүп каар ужурлуг; а кыстың бодун канчанма-даа — ону өлүрүп шиитки дег кем-бурууну ол үүлгетпээн-дир; кандыг-бир кижиниң өске кижиже халдап, өлүрүп кааны ышкаш таварылга болган-дыр. Ол эр кижи дүгденишкен эштиг аныяк кыс-биле ажык шөлге ужуражы берген болгай, демги кыс дуза дилеп алгырарга-даа, аңаа болчуп кээр кижи чок болган-дыр» (Ы. х. к. 22:25—27).

Ындыг таварылгада хоойлу кыс уругнуң талазында турган. Чүге дээрге «кыс дуза дилеп алгырарга-даа, аңаа болчуп кээр кижи чок болган». Ынчангаш ол самыын чорукка буруулуг эвес турган. Аңаа бодаарга, эр кижи күчүлел-күштээшкинге болгаш самыын чорукка буруулуг турган, чүге дээрге ол дүгденишкен уругну күш-биле сегирип алгаш, ооң-биле хойгажып чыдыпкан.

Ынчап кээрге, ол хоойлунуң сорулгазы — кыстың буруу чогун бадыткаарында болганда, ында эр кижини күштээшкинге болгаш самыын чорукка буруулуг деп анаа сагындырып бижээн. Чигзиниг чок, шииткекчилер шупту чүвени эки истеп хынааш, Бурганның Хоойлузунда тода болгаш чаңгыс удаа эвес чугаалаан дүрүмнеринге даянмышаан, шиитпирни үндүрүп турган (Ы. х. к. 13:14; 17:4; Хост. 20:14).