14-кү ӨӨРЕНИР СТАТЬЯ
Бараан болуушкунуңну эчизинге чедир күүседип турар сен бе?
«Буянныг Медээни суртаалдаар ажыл-херээңни шуудадыр, бараан болуушкунуңну эчизинге чедир күүседир ужурлуг сен» (2 ТИМ. 4:5).
ЫРЫ: 57 Проповедуем людям всякого рода
ДОПЧУЛАЛ a
Дирлип келген соонда Иисус эдерикчилеринге: «Барыңар... бүгү чоннарны... Мээң өөреникчилерим боор кылдыр ээлдириңер» — деп айтыышкын берген. (1-ги абзацты көрүңер.)
1. Бурганның шупту бараалгакчылары чүнү күзеп турарыл? Чүге? (Журналдың даштында чурукту көрүңер.)
ИИСУС ХРИСТОС өөреникчилеринге чагаан: «Барыңар... бүгү чоннарны... Мээң өөреникчилерим боор кылдыр ээлдириңер» (Мф. 28:19). Бурганның шупту шынчы бараалгакчылары ол даалганы «эчизинге чедир» канчаар күүседирин өөренип алыксап турар (2 Тим. 4:5). Ол ажылды чылдырып болбас болганда, аңаа шыңгыы хамаарылгалыг бис. Ынчанмыже суртаал ажылынга, күзээнивис ышкаш, хөй үени үндүрери чамдыкта биске берге бооп болур.
2. Кандыг бергелерге таваржып турар бис?
2 Үевисти болгаш күжүвүстү оон-даа өске чугула чүүлдерже үндүрүп турар бис. Бодун база өг-бүлезин хандырар дээш, чамдыывыс хөй ажылдап турар. А өскелеривис өг-бүледе хүлээлгелерин күүседип, берге аарыг-биле демисежип, депрессиялап азы назылап кырааш, хилинчектенип чоруур. Бергелерге торулбайн, бараан болуушкунувусту эчизинге чедир канчаар күүседип болур бис?
3. Матфей 13:23-те бижээн Иисустуң сөстеринден кандыг түңнелди үндүрүп болурул?
3 Күзээнивис дег, Бурганга хөй бараалгап шыдавас болзувусса, муңгараан херээвис чок. Эккээр «дүжүдүвүстүң» хемчээли аңгы-аңгы боор деп, Иисус билир турган. (Номчуптуңар: Матфей 13:23.) Бар шаавыс-биле кызып турар болзувусса, Иегова ажыл-херээвисти бедик үнелеп турар (Евр. 6:10—12). Ындыг-даа болза, «оон-даа хөй бараалгап болур мен» деп бодап болур бис. Бурганга бараалгалды канчаар кол черге салырын, чуртталганы канчаар бөдүүнчүдерин, ол ышкаш суртаалдаар болгаш улусту алыс шынга өөредир арга-мергежиливисти канчаар бедидерин бо статьяга сайгарар бис. Бурганга бараан болуушкунну эчизинге чедир күүседири дээрге чүү дээни ол? Ону сайгарыптаалыңар.
4. Бурганга бараан болуушкунну эчизинге чедир күүседири дээрге чүү дээни ол?
4 Бурганга бараан болуушкунну эчизинге чедир күүседир дизивиссе, суртаал ажылынга киржип, улусту библейжи алыс шынга өөредир дээш, болдунар-ла чүвени кылыр болзувусса эки. Ынчалза-даа Иеговага суртаалче үндүрүп турар үе-шагывыстан аңгыда, ону кандыг хөөн-биле кылып турарывыс база чугула. Бис Иеговага болгаш чанывыста кижилерге ынак болгаш, бүгү чүлдү-чүрээвис-биле бараалгалга b киржип турар бис (Мк. 12:30, 31; Кол. 3:23). Иеговага бүгү чүлдү-чүрээ-биле бараалгаары дээрге чүү дээни ол? Ол дээрге Ооң биске дагзып каан даалгазын эң-не эки арга-биле кылыр дээш, бүгү күжүвүстү үндүрери-дир. Суртаал ажылын үнелээр болзувусса, арга тыптып кээрге-ле, буянныг медээни улуска чугаалаар бис.
5, 6. Чай чок кижи безин суртаал ажылын кол черге салып болур деп көргүскен чижекти чугаалап көрүңер.
5 Гитаралаарынга ынак аныяк оолду сагыштаалап көрүңер даан. Ол дүн-хүн дивейн, аңаа ойнаарынга белен. Ол кафеге дыштаныр хүннерде гитарист кылдыр ажылдаар дээш кирип алган. Ынчалза-даа шалыңы дыка эвээш боорга, ол понедельниктен пятницага чедир садыгда кассирлеп ажылдап турар. Үезиниң хөй кезиин ол садыгда ажылдап турар-даа болза, ооң ал-сагыжы чүгле музыкада. Профессионал хөгжүмчү апаар дээш, оол арга-мергежилин үргүлчү бедидип алырын кызып турар. Ынчангаш, арга тыптып кээрге-ле, каш минута-даа болза, ол гитарага ойнап ап турар.
6 Ооң-биле дөмей, суртаал ажылынче хөй үени үндүрери силерге болдунмайн турар чадавас. Ынчалза-даа ол ажылга дыка ынак силер. Буянныг медээ улустуң чүрээнге дээштиг болзун дээш, суртаалдаар арга-мергежилиңерни экижидерин кызып чоруур силер. Ындыг-даа болза, ажыл-херээңер хөй боорга, «суртаал ажылын кол черге канчаар салырыл?» деп айтырыг силерни дүвүредип турар чадавас.
СУРТААЛДЫ КОЛ ЧЕРГЕ КАНЧААР САЛЫРЫЛ?
7, 8. Иисус суртаалга кандыг хамаарылгалыг турган? Ооң үлегерин канчаар эдерип болур бис?
7 Иисус Христос суртаалга хамаарыштыр тергиин үлегерни көргүскен. Бурганның Чагыргазының дугайында суртаалдаары аңаа чүден артык чугула турган (Ин. 4:34, 35). Иисус буянныг медээни, аргалыг-ла болза, хөй улус дыңназын дээш, чүс-чүс километр чадаг кылаштап келген. Ол чаңгыс-даа арга эрттирбейн, улус-биле чугаалажып турган. Шынап-ла, суртаал Иисустуң чуртталгазынга чугула черни ээлеп турган.
8 Арга тыптып кээрге-ле, улуска буянныг медээни чугаалаар болзувусса, Христостуң үлегерин эдерип турарывыс ол. Дыжывысты бодавайн, суртаалдаарынга белен бис (Мк. 6:31—34; 1 Пет. 2:21). Чамдык акы-угбалар дузаламчы, доктаамал, безин тускай эгелекчилер кылдыр бараалгап турар. Өскелери даштыкы дыл өөренип алган азы суртаалчылар чедишпес черлерже көже берген. Ынчалза-даа суртаал ажылының хөй кезиин шыдаар шаа-биле Бурганга бараалгап чоруур акы-угбалар кылып чоруур. Хөй-даа, эвээш-даа суртаалдап турар болзувусса, Иегова бистиң кылып шыдавас чүвевисти негевес. «Ачы-буянныг Бурганның алдарлыг Буянныг Медээзин» суртаалдап тура, өөрүшкүнү минниривисти Бурган күзеп турар (1 Тим. 1:11; Ы.х.к. 30:11).
9. а) Павелге суртаалдаары ажылындан чугула турган деп чүге чугаалап болур? б) Ажыл-чорудулга 28:16, 30, 31-ден алырга, Павелдиң суртаалга хамаарылгазы кандыг турган?
9 Павел элчин суртаалды кол черге салырынга хамаарыштыр кайгамчык үлегерни арттырган. Ол ийиги миссионер аян-чоруунуң үезинде Коринф хоорайга чурттап турган. Ооң амыдыраар акшазы көңгүс эвээш боорга, ол майгыннар даараар ужурга таварышкан. Ынчалза-даа ажыл Павелдиң чуртталгазынга кол турбаан. Ол коринфичилерге буянныг медээни суртаалдап, оларга аартык болбазы-биле бодун хандырар дээш, ажылдап турган (2 Кор. 11:7). Суртаал ажылы аңаа чугула хевээр турган, ынчангаш ол амыр-дыш хүнү кээрге-ле, суртаалдап турган. А кажан байдал өскерли бээрге, Павел бараалгалче оон-даа хөй үени үндүрүп эгелээн. «Павел бодун суртаал кылырынга бараалгадып, иудейлерге „Иисус дээрге Христос ол-дур“ дээрзин херечилеп турган» (Аж.-ч. 18:3—5; 2 Кор. 11:9). Үе эрткенде, ону Римге бажыңга ийи чыл ишти хоругдалга олуртуп каан. Аңаа ол чагаалар бижип, келген улуска суртаалдап турган. (Номчуптуңар: Ажыл-чорудулга 28:16, 30, 31.) Бараалгалынга чүү-даа шаптыктавас кылдыр, Павел хөөнненип алган. Ол мынча дээн: «Шак ындыг бараан болуушкуннуг... улус, сорук-күжүвүс кошкаш дивес бис» (2 Кор. 4:1). Павел ышкаш хөй ажылдап-даа турар болзувусса, суртаал ажылы дөмей-ле чуртталгавыска бирги черни ээлеп болур.
Бараан болуушкунувусту эчизинге чедир күүседир аргалар хөй (10, 11-ги абзацтарны көрүңер.)
10, 11. Кадыыңар багай-даа болза, Бурганга долузу-биле канчаар бараалгап болур силер?
10 Назылап кырааныңардан азы кадыкшылыңарның кошкай бергенинден силерге бажыңнар кезип суртаалдаары берге болза, өске аргаларны чүге шенеп болбас деп? Бирги векте христианнар кижи бар черлерге-ле суртаалдап турган. Олар Чагырга дугайында медээни «хөй улус мурнунга база бажыңнар кезип», ол ышкаш, арга тыптып кээрге-ле, тарадып турганнар (Аж.-ч. 17:17; 20:20). Силерге үр кылаштаары берге болза, улус хайнып турар черге эрткен-дүшкен улуска суртаалдап болур. Оон ыңай чагаалар болгаш телефон таварыштыр азы каяа-даа чорааш, буянныг медээ-биле үлежип болур. Бажыңнар кезип, үр суртаалдап шыдавас акы-угбаларның хөй кезии бараалгалдың өске хевирлеринден дөмей-ле өөрүшкүнү миннип чоруур.
11 Кадыыңар багай-даа болза, Бурганга бараан болуушкунуңарны долузу-биле күүседип шыдаар силер. Павелдиң чижээнче катап эглип кээлиңер. Ол: «Дээди күштүң бистен эвес, а Бургандан кээп турары илдең-дир» — дээн (2 Кор. 4:7). Павел миссионер аян-чоруунуң үезинде аарый бээрге, шак ол күш аңаа дузалаан. «Эң баштай силерге келгенимде, чүгле аарый берген ужурумдан Буянныг Медээни силерге суртаалдаар аргалыг болган мен» — деп, ол галатчыларга бижээн (Гал. 4:13). Павелди канчаар өттүнүп болур силер? Эмчилерге болгаш медсестраларга суртаалдаңар, олар колдуунда бажыңынга олурбас болгай.
ЧУРТТАЛГАНЫ КАНЧААР БӨДҮҮНЧҮДЕРИЛ?
12. Карактарывыс кандыг уткалыг кадык болур ужурлуг?
12 «Мага-боттуң чырыткызы — карак ол-дур. Ынчангаш карактар-ла кадык болза, бүгү мага-бодуңну чырык дола бээр» — деп, Иисус чугаалаан (Мф. 6:22). Ол сөстерниң утказы кандыгыл? Бис өскээр чардыкпайн, кичээнгейивисти чүгле салган чаңгыс сорулгавысче угландырар ужурлуг бис дээни ол. Аңаа хамаарыштыр Иисус биске дыка эки үлегерни көргүскен: Бурганга бараалгал ооң чуртталгазынга эң-не чугула черни ээлеп турган. Иеговага бараалгал болгаш Бурганның Чагыргазы ооң өөреникчилериниң чуртталгазынга база кол черни ээлээр ужурлуг деп, Иисус өөредип турган. Христосту өттүнер дизе, чүнү-даа мурнай Бурганның Чагыргазынга башкартырын кызып, Бурганның чөптүг-шынныг деп санаан чүвезинче чүткүвүшаан, суртаалды кол черге салыры чугула (Мф. 6:33).
13. Суртаалче оон-даа хөй үени үндүреринге биске чүү дузалаар?
13 Чуртталгавысты бөдүүнчүдүп алыр болзувусса, улуска Иегованы билип алырынга болгаш Аңаа ынак апаарынга дузалаар үевис тыптып кээр c. Чижээ, ажыл хүннеринде оон-даа хөй суртаалдаар дээш, ажылыңарның графигин эде көрүп ап шыдаар силер бе? А бир эвес үеңер дыштанырынче азы оюн-тоглааже хөй үнүп турар болза, чүнү кылып болур силер?
14. Бир өг-бүле оон-даа хөй бараалгаар дээш, чүнү кылганыл?
14 Элайас дээр хуралдың удуртукчузу биле ооң кадайы оон-даа хөй бараалгаар дээш, чүнү кылганыл? Акывыс үлешкен: «Эгелекчилер бооп бараалгап шыдавас турган-даа болзувусса, суртаалче оон-даа хөй үени үндүрүп болурувусту билип турган бис. Ынчангаш оон-даа хөй суртаалдаар дээш, чоорту ол сорулганы боттандырып эгелээн бис. Чарыгдалдарывысты кызырып, дыштанырынче болгаш оюн-тоглааже үндүрүп турган үевисти эвээжедип алган бис (ынаар дыка хөй үе үнүп турган). Оон аңгыда даргаларывыстан ажылывыстың графигин өскертип бээрин дилээн бис. Түңнелинде бис кежээлерде суртаалдап, хөй библейжи кичээлдерни эрттирип, безин айда ийи катап ажыл хүннеринде хүндүс суртаалдап турар апарган бис. Өөрүшкүвүстү чүү дээр ону!»
СУРТААЛДААР БОЛГАШ ӨӨРЕДИР АРГА-МЕРГЕЖИЛДИ КАНЧААР ЭКИЖИДЕРИЛ?
Ажыл хүннеринде эртер ужуражылгада берип турар сүмелер суртаалдаар арга-мергежиливисти бедидеринге дузалаар (15, 16-гы абзацтарны көрүңер.) d
15, 16. 1 Тимофейге 4:13, 15-те сүме биске оон-даа арга-дуржулгалыг суртаалчы болурунга канчаар дузалаар? (« Эчизинге чедир суртаалдаарынга дузалаар сорулгаларым» деп көзенекти көрүңер.)
15 Бараалгалывысты эчизинге чедир күүседиринге биске оон ыңай чүү дузалаар? Чамдык профессияларда үргүлчү билиин бедидери негеттинер. Суртаал ажылы база шак ындыг. Суртаалдаар арга-мергежиливисти үргүлчү бедидер дээш, кызар ужурлуг бис (У.ч. 1:5; Номчуптуңар: 1 Тимофейге 4:13, 15).
16 Аңаа биске чүү дузалаар? Неделя санында эртер «Чуртталгавыс болгаш бараалгалывыс» деп ужуражылгага дыңнап турар сүмелерни ажыглаар херек. Суртаалдаар арга-мергежиливисти үргүлчү экижидерин ында өөредип турар. Чижээ, ужуражылганың эрттирикчизи даалгазын күүсеткен улуска сүмелер берип турда, суртаалга ону ажыглаар дээш, боттарывыска демдеглеп ап болур бис. Ол ышкаш бодунуң суртаал бөлүүнүң эрттирикчизинден дузаны дилеп азы ооң-биле кады суртаалдап болур. Оон аңгыда дуржулгалыг бараалгакчы, эгелекчи азы кожуун хайгааракчызы-биле бараалгап тургаш, хөйнү өөренип алыр бис. Суртаалдаар херекселдерни эки ажыглап өөренген тудум, суртаалдаар болгаш улусту алыс шынга өөредир ажыл биске оон-даа хөй өөрүшкү эккээр.
17. Иеговага эчизинге чедир бараалгап турар болзувусса, кандыг йөрээлдерни алыр бис?
17 «Бис Бурган-биле кады чаңгыс ажыл-херек кылып турар бис» (1 Кор. 3:9). А ол дээрге улуг алдар-хүндү-дүр! «Боттарывыска эң эки чүүлдү билип ап», суртаалды кол черге салыр болзувусса, аас-кежиктиг болур бис (Флп. 1:10; Ыд.ыр. 99:2). Кандыг-даа бергелер турза, суртаалдаарынга херек күштү Иегова биске бээр дээрзинге чигзинмейн барып болур бис (2 Кор. 4:1, 7; 6:4). Суртаал ажылынче киирип турар үлүүвүс кандыг-даа бол, бүгү сеткиливистен аңаа киржип турар болзувусса, «чедиишкиннеривиске чоргаарланып шыдаар» бис (Гал. 6:4). Иеговага эчизинге чедир бараалгап тургаш, Аңаа болгаш чанывыста кижилерге ынакшылывысты көргүзер бис. Ынчалдыр «бодувусту-даа, дыңнакчыларывысты-даа айыылдан кадагалап алыр» бис (1 Тим. 4:16).
ЫРЫ: 58 Ищите друзей мира
a Иисус биске Чагырга дугайында буянныг медээни суртаалдап, өөреникчилер белеткээр даалга берген. Амыдыралывыста бергелер турза-даа, Бурганга бараан болуушкунувусту эчизинге чедир канчаар күүседип болурун бо статьяга сайгарар бис. Оон ыңай суртаалдаар арга-мергежиливисти бедидеринге база бараалгалдан оон-даа хөй өөрүшкүнү алырынга биске чүү дузалаарын көөр бис.
b ТАЙЫЛБЫР. Бурганга бараалгалче суртаал ажылы, кижилерни библейжи алыс шынга өөредири, организациявыстың тудугларынга киржири болгаш оларны эки байдалга тудуп хандырары, ол ышкаш бойдус халавындан когараан улуска дузалаары кирип турар (Аж.-ч. 11:29; 2 Кор. 5:18, 19).
c 2016 чылдың июль айның «Таңныыл суургазында» «Как упростить жизнь» деп көзенекти көрүңер, ар. 10.
d Чуруктарда: угбавыс кижиге катап келгеш, чугааны канчаар чорударын «Чуртталгавыс болгаш бараалгалывыс» деп ужуражылгада көргүзүп турар. «Арга-мергежилиңни сайзырат» деп брошюразынга угбавыс ужуражылганың эрттирикчизиниң берген сүмелерин бижип ап турар. Дыштаныр хүннерде суртаалдап тургаш, угбавыс чыыштан билип алган чүүлүн ажыглап турар.
