1. Иегованың Херечилери үш аңгы байдалда Бурганга канчаар шынчы артып турарыл?

 ҮШ АҢГЫ байдалды көрээлиңер. 1) Кыс дуңмавыстың башкызы удавас болур байырлалга шупту өөреникчилер киржир ужурлуг деп чарлаан. Дуңмавыс ол байырлалдың Бурганга таарышпазын билир болгаш, аңаа киришпезин эвилең-ээлдек тайылбырлаан. 2) Ыядыычал оол дуңмавыс бажыңнар кезип, суртаалдап турар. Дараазында бажыңда Иегованың Херечилерин кыжырар чаңгысклассчызы чурттап турар деп билир-даа болза, ол ооң эжиин соктап турар. 3) Акывыс өг-бүлезин азыраар дээш, хөй ажылдап чоруур. Бир катап даргазы мегелептер азы хоойлуну хажыдыптар кылдыр ону ыдалаан. Даргазын дыңнавас болза, ажылын чидирип ап болур деп, ол билир. Ынчалза-даа Бурган бараалгакчыларындан шынчы болурун болгаш хоойлуну хүндүлээрин негеп турар деп, ол даргазынга тайылбырлаан (Рим. 13:1—4; Евр. 13:18).

2. Кандыг айтырыгларны сайгарар бис база чүге?

² Бо үш акы-дуңмавыс кандыг шынарны көргүскенил? Оларның эрес-дидимин болгаш шынчызын эскерген чадавас силер. Оон аңгыда оларның кайызы-даа дыка үнелиг шынарны — кем-буруу чок чорукту — көргүскен. Олар Иеговага шынчы артып, Ооң негелделерин хажытпааннар. Чүге? Олар Бурганның мурнунга кем-буруу чок артарын күзээн. Чугаажок, Иегова олар дээш чоргаарланып турар. Дээрде Адавыс биске база чоргаарланыр кылдыр күзээр бис. Ынчангаш: «Кем-буруу чок болуру дээрге чүү дээни ол? Ол шынар чүге чугула? Бо берге үеде кем-буруу чок артарынга биске чүү дузалаар?» деп айтырыгларны сайгарып көрээлиңер.

3. а) Бурганның бараалгакчыларының кем-буруу чогу чүүден көскү? б) Бүдүн-бүрүн болгаш долу деп сөстерниң утказы кандыг чижектерден көскү?

³ Кем-буруу чок чорукту Иеговага бүгү чүлдү-чүрээвистен ынак бооп, Аңаа долузу-биле бердинип, кандыг-даа шиитпир хүлээрде Ооң күзел-соруун кичээнгейге ап тургаш, көргүзүп турар бис. Библияда «кем-буруу чок» деп сөс бүдүн-бүрүн болгаш долу дээн уткалыг. Чижээ, Хоойлу ёзугаар, израильчилерниң Иеговага өргүл кылдыр эккээр малы «четпес-дудуу эвес» болур ужурлуг турган b (Лев. 22:21, 22). Бурганга өргүл кылдыр аскак-бүскек, согур, аарыг мал эккээрин Хоойлу хоруп турган. Оон алырга, Иеговага малдың кадык болгаш бүдүн-бүрүнү чугула турган (Мал. 1:6—9). Ында кайгамчык чүве чок. Чүге дизе бис кажан-даа үрелик ногаа-чимисти, арыннары орлуп калган номну азы кандыг-бир кезээ чедишпес херекселди садып албас болгай бис. Биске шынарлыг бараан херек. Иегова бистиң Аңаа ынакшылывыска болгаш бердинген чоруувуска база шак ындыг хамаарылгалыг: ол четпес-дудуу эвес болур ужурлуг.

4. а) Бачыттыг кижи кем-буруу чок болуп шыдаар бе? Тайылбырлаптыңар. б) Ырлар 102:12—14-тен алырга, Иегова бистен чүнү негевейн турарыл?

⁴ Бачыттыг кижиге кем-буруу чок болуру болдунмас ышкаш сагындырар. Ынчалза-даа ынчаар бодавас болза эки. Аңаа хамаарыштыр ийи чылдагаанны көрээлиңер. Бирээде, Иегова бистиң частырыгларывысче болгаш четпес талаларывысче кол кичээнгейни салбайн турар. Ооң Сөзүнде: «Кем-буруулуг херектеривисти сагыжыңга шыгжап алгаш, өршээвейн турган болзуңза, шыдажып үнер кижи бар бе, Дээрги-Чаяакчы?» — дээн (Ыд.ыр. 129:3). Ол бисти бачыттыг деп билир болгаш, сеткилинден өршээп чоруур (Ыд.ыр. 85:5). Ийиде, Иегова арга-шинээвисти билир болганда, кылып шыдавас чүүлүвүстү бистен негевейн турар. (Номчуптуңар: Ырлар 102:12—14.) Ынчаарга Бурганның мурнунга кем-буруу чок болуру дээрге чүү дээни ол?

5. Кем-буруу чок артар дизе, Иеговага ынак болуру чүге чугула?

⁵ Кем-буруу чок артар дизе, Бурганга ынак болуру чугула. Аңаа бүгү-ле чүлдү-чүрээвистен ынак бооп, бүрүнү-биле бердинген болур ужурлуг бис. Шак ындыг ынакшылды шенелделер үезинде безин илередир болзувусса, Бурганның мурнунга кем-буруу чок артар бис (1 Чыл. 28:9; Мф. 22:37). Статьяның эгезинде чугаалашканывыс үш кижини сактып кээлиңер. Кыс дуңмавыс чаңгысклассчылары-биле чүге хөглексевес деп? Оол дуңмавыска кыжыртыры эки деп бе? Өг-бүлелиг акывыс ажылын чидирип аарындан дүвүреп турбайн канчаар. Олар Иегованың чөптүг-шынныг негелделерин эки билир болгаш, дээрде Адазының чүрээн өөртүрүн күзеп турарлар. Иеговага ынакшыл оларны Ооң күзел-соруун кичээнгейге албышаан, шын шиитпирни хүлээринче деткип турар. Шак ынчаар олар Бурганның мурнунга кем-буруу чогун көргүзүп чоруур.

6. а) Биске кем-буруу чок болуру чүге чугула? б) Ада́м биле Ева чүге кем-буруу чок артып шыдавааныл?

⁶ Биске кем-буруу чок болуру чүге чугула? Чүге дээрге Эрлик Иегованы-даа, бисти-даа нүгүлдепкен. Ол Эдем сесерлиинге-ле Бурганның «дайзыны», азы Эрлик, апарган. Иегованы бодун бодаар, шынчы эвес, багай чагырыкчы кылдыр нүгүлдээш, ол Ооң адын баксыраткан. Харааданчыг чүүл, Ада́м биле Ева Эрликти деткип, Бурганга удур тура халаан (Э.д. 3:1—6). Эдем сесерлиинге  оларның Иеговага ынакшылын сайзырадыр аргалары хөй турган. Ынчалза-даа Эрлик Иеговага удур үймээн үндүрүптерге, оларның Бурганга бүгү-ле сеткил-чүрээнден, долузу-биле ынак болбааны көстүп келген. Сөөлзүредир, Иовтуң хүннеринде, база бир маргыштыг айтырыг көдүрүлген: Иеговага ынак болуп, Аңаа бердинген оода-ла чаңгыс кижи артар бе? Өскээр чугаалаарга, кижилер Бурганның мурнунга кем-буруу чок артып шыдаар бе?

7. Иов 1:8—11-ден алырга, Иегова биле Эрлик Иовтуң дугайында чүнү бодап турганыл?

⁷ Иов израильчилерниң Египетке турган үезинде чурттап чораан. Ол үеде Бурганга, Иов дег, бердинген кижи турбаан. Ол, бис ышкаш, тергиин эвес болганда, частырыгларны кылып чораан. Ынчалзажок Иов кем-буруу чок боорга, Иегова аңаа ынак турган. Эрлик Иегованы ооң мурнунда-ла бак сөглеп, кижилерниң кем-буруу чогунга хамаарыштыр айтырыгны көдүрүп турган чадавас. Ынчангаш Бурган ооң кичээнгейин Иовче угландырган. Иов бодунуң чурттап чорууру-биле Эрликтиң мегезин сойгалаан. Ынчан ол үймээнчи дээрниң төлээзи Иовту шенээрин саналдаан. Иегова өңнүүнге бүзүрээр болгаш, Эрликке ону шенээрин чөпшээрээн. (Номчуптуңар: Иов 1:8—11.)

8. Эрлик Иовче канчаар халдап турганыл?

⁸ Эрлик — дыка каржы өлүрүкчү-дүр. Ол Иовтуң бүгү өнчүзүн чок кылып, чалчаларын өлүрүп, ооң эки адын баксырадып каапкан. Иовтуң өг-бүлези база когараан: Эрлик ооң эргим ынак ажы-төлүн база чок кылып каан. А Иовтуң бодунга таваңгайындан эгелээш, тейинге чедир коргунчуг оюлганнар чыпшырып каан. Иовтуң кадайы ажыг-шүжүгге  алзып, аңаа: «Бурганны бак сөглепкеш, өлү бер!» — дээн. Иов боду база чурттаксавайн турган-даа болза, Бурганның мурнунга кем-буруу чок арткан. Ынчан Эрлик өске арганы ажыглапкан. Ол Иовче ооң эштерин таварыштыр халдаарын шенээн. Олар Иовка келгеш, ооң чанынга элээн хөй хонук ишти турганнар. Эжиниң човалаңын үлежип, оожургадыр хамаанчок, ажыы чок сөстер сөглеп, ону каржызы-биле буруудадып турган. Оларныы-биле алырга, Иовче шупту хай-халапты Бурган чоргускан база ооң кем-буруу чогу Аңаа чүү-даа эвес. Ол бачыттыг боорга, Бурган ону кезедип турары ол деп, Иовтуң эштери даап бодааннар (Иов 1:13—22; 2:7—11; 15:4, 5; 22:3—6; 25:4—6).

9. Иов шенелделерге таварышкаш, канчалганыл?

⁹ Иов бо бүгү човалаңга таварышкаш, канчалганыл? Тергиин эвес болгаш, ол меге оожургадыкчыларынга доңгун сөстерни чугаалап турган. Аңаа Бурганның эвес, а бодунуң чөптүг-шынныын камгалаары чугула турган (Иов 6:3; 13:4, 5; 32:2; 34:5). Ындыг-даа болза, Иов эң берге үеде безин Иеговадан хая көрүнмээн. Ол эш аттыг улустуң меге сөстеринге бүзүревейн, оларга мынча дээн: «Силернии шынныг деп кажан-даа чугаалавас мен, дириг чорааш, буруу чогумдан ойталавас мен» (Иов 27:5). Бо сөстер ханы уткалыг. Чүү-даа болуп турда, Иов Бурганга шынчы арткан. Бис база шыдаар бис.

10. Эрликтиң Иовка хамаарыштыр көдүрген айтырыы силерге кандыг хамаарылгалыг?

¹⁰ Эрлик кижи бүрүзүн база шак ынчаар буруудадып турар. Канчаар? Ажыы-биле чугаалаарга, ол бистиң дугайывыста Бурганга мынча деп турар: «Олар херек кырында Сеңээ ынак эвес, а чүгле Сени хүндүлээриниң даштыкы хевиринден туттунуп чоруур. Амы-тынынга айыыл тургустуна бээрге, олар Сеңээ бараалгавайн баар!» (Иов 2:4, 5; Ажыд. 12:10). Ындыг буруудадыышкыннарны дыңнаары аарышкылыг. Ынчалза-даа, кайгамчык чүүл, Бурган биске аажок бүзүрээр болгаш, кем-буруу чок артып каарывысты шенээрин Эрликке чөпшээреп турар. Иегова бисти шынчы артып, Эрликтиң мегечизин көргүзүптер дээрзинге бичии-даа чигзинмейн турар. Ол бисти деткиирин аазаан (Евр. 13:6). Октаргайның Чаяакчызы биске ол хире бүзүреп, улуг алдар-хүндүнү көргүзерге, кайгамчык эвес-тир бе? Бурганның мурнунга кем-буруу чок артары чүге чугула дээрзин билип тур силер бе? Шак ынчаар Эрликтиң мегезин буура шаап, Адавыстың актыг адын камгалап, Ооң чагырар эргезин деткиир бис. Иегованың мурнунга кем-буруу чок артар дизе, чүнү канчаарыл?

11. Иовтуң чижээнден чүнү өөренип ап болур бис?

¹¹ Бо делегейниң «сөөлгү хүннеринде» Бурганның бараалгакчыларынче Эрликтиң халдаашкыннарының дошкуну дам барган (2 Тим. 3:1). Бурганның мурнунга кем-буруу чок артар күштү кайыын ап болур бис? Биске база-ла Иовтуң чижээ дузалаар. Шенелделерниң мурнунда-ла ол Бурганга шынчызын чаңгыс удаа эвес бадыткаан. Иеговага шынчы артарынга дузалаар үш чүүлдү ооң чижээнден өөренип ап болур бис. Ону сайгарыптаалыңар.

12. а) Иов 26:7, 8, 14-тен алырга, Бурганны ханы хүндүлээринге Иовка чүү дузалаан? б) Иов дег, Иеговага ханы хүндүткелди канчаар сайзырадып ап болур бис?

¹² Иов Иеговага ханы хүндүткелди сайзырадып тургаш, Аңаа оон-даа ынак апарган. Иов Бурганның бодарадып чаяап каан чүүлдериниң дугайында боданыр үени аңгылап ап турган. (Номчуптуңар: Иов 26:7, 8, 14.) Иов черниң, дээрниң, булуттарның, диңмирээшкинниң дугайында бодап келгеш, сагыш-сеткили хөлзеп, Бурганның чаяалгаларының дугайында билиглериниң кайы хире  эвээжин билип турган. Оон аңгыда Иегованың сөстери аңаа ханы хүндүткелди оттуруп турган. Иов мынча дээн: «Ооң сөстерин хөрек-чүрээмде шыгжап чоруур мен» (Иов 23:12). Ол Иегованы магадап, ханы хүндүлеп, Аңаа ынак бооп, Ону өөртүрүн күзеп чораан. Бо бүгүнүң ачызында ол Бурганга шынчы арткан. Бис Иовтан үлегерни алыр болзувусса эки. Ооң үезинде чурттап чораан улуска бодаарга, Иегованың чаяалгаларының дугайында хөйнү билир бис. Оон аңгыда бисте Иегованы эки билип алырынга дузалаар Бурганның Сөзү бар. Ол чүүлдерниң ачызында Чаяакчыны ханы хүндүлеп чоруур бис. Ындыг хүндүткел Бурганны дыңнап, Аңаа ынак бооп, Ооң мурнунга кезээде кем-буруу чок болурунга биске дузалап турар (Иов 28:28).

13, 14. а) Иов 31:1-ден алырга, Бурганга дыңнангыр чоруун Иов канчаар көргүскен? б) Ону канчаар өттүнүп болур бис?

¹³ Бурганга дыңнангыр чорук Иовка кем-буруу чок артарынга дузалаан. Бурганга дыңнангыр болбас болза, кем-буруу чок артары болдунмас деп, Иов билип турган. Иеговага дыңнангыр болган санывыста-ла, кем-буруу чок артар хөөнүвүс быжыгып орар. Иов Бурганны хүн бүрүде дыңнаарын кызып чораан. Чижээ, ол херээжен улус-биле чугаалажып тургаш, оваарымчалыг алдынарын шиитпирлээн. (Номчуптуңар: Иов 31:1.) Иов кадайлыг турган, ынчангаш кадайындан өске кижиге сонуургалды көргүзери шын эвес деп билип турган. Амгы үеде Эрликтиң делегейинде бисти мөзү-шынар чок чорукту кылырынче ыдалап турар күткүлгелер дыка хөй. Бис база, Иов дег, кады өгленген эживистен өске улуска артык кичээнгей көргүспес ужурлуг бис. Ол ышкаш порнографиядан болгаш мөзү-шынар чок чуруктардан караавысты дестирери эргежок чугула (Мф. 5:28). Бо чүүлге хамаарыштыр хүннүң-не бодувусту туттунуп билир болзувусса, Бурганның мурнунга кем-буруу чок артары биске белен болур.

¹⁴ Иовтуң дыңнангыр чоруу акша-хөреңгиге хамаарылгазындан көскү турган. Бир эвес  Иов алдынга ынанып, эртинеге: «Сен — мээң чөленгиижим сен» деп турган болза, Бурганның мурнунга аар бачыт кылып, ол дээш кеземче алыр деп билип турган (Иов 31:24, 25, 28). Бо делегейде улус эт-септи, акша-хөреңгини дыка чугула деп санаар. Бир эвес библейжи дүрүмнерни сагып, эт-хөреңгиге болгаш акшага шын хамаарылгалыг болур болзувусса, Бурганның мурнунга кем-буруу чок артар бис (У.ч. 30:8, 9; Мф. 6:19—21).

15. а) Иов чүү чүвеге бүзүреп чораан база ол чүүл аңаа кем-буруу чок артарынга канчаар дузалаан? б) Иов ышкаш, быжыг бүзүрелдиг болуру чүге чугула?

¹⁵ Бургандан шаңнал алыр идегели Иовка кем-буруу чок артарынга дузалаан. Ооң кем-буруу чок артары Бурганга чугула деп, Иов билир турган (Иов 31:6). Шенелделер турза-даа, Иегова ону дөмей-ле шаңнаар дээрзинге Иов чигзинмээн. Ол бүзүрел Бурганның мурнунга кем-буруу чок артарынга аңаа дузалаан. Иегова ону көргеш, өөрээнинден тергиин эвес бараалгакчызын элбээ-биле шаңнаан (Иов 42:12—17; Иак. 5:11). А келир үеде Иовту оон-даа хөй йөрээлдер манап турар. Иегова силерни база кем-буруу чок чорууңар дээш шаңнаар дээрзинге ыяк бүзүрээр силер бе? Иегова Бурганывыс өскерилбес (Мал. 3:6). Ол бистиң шынчы чоруувусту үнелеп турар деп сактып чоруур болзувусса, кайгамчыктыг келир үеже идегеливисти кажан-даа ышкынмас бис (1 Фес. 5:8, 9).

16. Чүүже хөөнненип алыр болзувусса эки?

¹⁶ Бурганның мурнунга кезээде кем-буруу чок артар дээш хөөнненип алыңар. Чамдыкта чүгле силер ынчаар алдынып чоруур ышкаш сагындырып болур. Ынчалза-даа ол ындыг эвес. Иегованың мурнунда кем-буруу чок артып чоруур сая-сая акы-угбалар-биле база эрткен үеде Бурганга бердинген болуп артар дээш, амы-тынын артынга каап чораан ха-дуңма-биле эгин кожа бараалгаар силер (Евр. 11:36—38; 12:1). Иовтуң «буруу чогумдан ойталавас мен» дээн сөстерин чүрээвиске шыгжап чоруулуңар. Кем-буруу чок чоруувус Иегованы кезээде алдаржыдып чорзун!