1. Иисус өлүрүнүң мурнундагы кежээзинде өөреникчилери-биле кандыг чугула теманың дугайында чугаалашкан?

 ИИСУС өлүрүнүң мурнундагы кежээзинде өөреникчилери-биле чугаалажып олургаш, ынакшыл дугайында 30 хире катап сагындырган. Иисус оларга: «Бот-боттарыңарга ынак болуңар» — дээн (Ин. 15:12, 17). Улус оларның күштүг ынакшылын көргеш, Христостуң шынчы эдерикчилери деп билип каар ужурлуг турган (Ин. 13:34, 35). Иисустуң чугаалаан ынакшылы анаа-ла минниишкин эвес-тир. Ол күштүг болгаш бодун хайыралавас ынакшыл-дыр. Иисус мынча дээн: «Бодунуң эш-өөрү дээш амы-тынын бээр кижиниң ынакшылындан дээди ынакшыл чок. Мээң силерге айтыышкын кылдыр берген чүүлүмнү сагып чоруур болзуңарза, Мээң эш-өөрүм боор силер» (Ин. 15:13, 14).

2. а) Иегованың бараалгакчылары чүзү-биле билдингир? б) Бо статьяга кандыг айтырыгларны сайгарар бис?

² Иегованың чону бодун хайыралавас, ёзулуг ынакшылы-биле болгаш быжыг деми-биле билдингир (1 Ин.  3:10, 11). Бурганның бараалгакчылары янзы-бүрү нациялыг, дылдыг, ук-ызыгуурлуг-даа болза, ындыг ынакшылды көргүзүп турар. Амгы үеде ынакшылды илередири чүге чугула? Иегова биле Иисустуң ынакшылы бисти канчаар деткип турарыл? Өскелерни деткип, аргалаар дээш, ынакшылды канчаар көргүзүп болур бис? (1 Кор. 8:1).

3. Бо «аар-берге үе» кижилерже кандыг салдар чедирип турарыл?

³ Бо сөөлгү «аар-берге үеде» улустуң чуртталгазын муңгарал биле хилинчек тудуп чип турар (2 Тим. 3:1—5; Ыд.ыр. 89:10). Хөй улус аар-бергени угбайн баргаш, чурттаксавайн баар. Чыл санында 800000 ажыг кижи, азы 40 секундада-ла бир кижи, амы-тынынга четтинип турар. Хомуданчыг чүүл, бистиң акы-угбаларывыс-биле база ындыг хай-халап болуп турар.

4. Иегованың кайы бараалгакчылары чурттаксавайн турганыл?

⁴ Бурунгу үеде Бурганның шынчы бараалгакчылары амыдыралдың аар-бергелериниң ужундан хилинчектенгеш, чурттаксавайн турган. Чижээ, Иов аажок кудараанындан: «Чуртталгам меңээ ческинчиг апарды» — дээн (Иов 10:1; 14:13). Бурганның даалгазын күүседип турган Иона байдалдың хенертен өскерли бергенинден чөгенгеш, мынча дээн: «А ам, Дээрги-Чаяакчы, мээң амымны үзүп каавыт, чүге дээрге чурттаарындан өлүрү меңээ дээре-дир» (Иона 4:3). А Илия медээчи бодун баш муңгаш байдалда мен деп бодап, Бургандан өлүм дилеп, чаннып турган: «Мен-даа болдум, Дээрги-Чаяакчы. Амы-тынымны үзүп каап көрем» (3 Хаан. 19:4). Ындыг-даа болза, Иегова ол бердинген бараалгакчыларынга ынак болгаш, оларның улаштыр чурттаарын күзеп турган. Ол оларны буруудатпаан. Харын-даа Иегова оларны ынакшылдыы-биле деткип, улаштыр бараалгаар күштү берген.

5. Амгы үеде акы-угбаларывыска бистиң ынакшылывыс чүге херек?

⁵ Амгы үеде акы-угбаларывыс янзы-бүрү бергелерге таваржып чоруур, ынчангаш оларга ынакшылывыс дыка херек. Чамдыктарын улус кыжырып азы истеп сүрүп турар. Чамдыызы ажылында хоп-чипти азы дорамчылалды ажып эртип чоруур чадавас. Азы олар ажылдан дашкаар хөй ажылдап, могап-шылап турар, чок болза ажылынга стресске таваржып чоруур. Чамдыктары өг-бүлезинде бергелерлиг. Чижээ, олар Иегованың Херечизи эвес кижи-биле өгленип алган чадавас, а оозу ону чемелеп-ле турар. Бо бүгү чүүлдерниң ужундан ха-дуңмавыстың хөй кезии харыксырап, безин боттарын херекчок деп бодап турар. Оларны кым деткиирил?

6. Иегова бараалгакчыларын ынакшылдыы-биле канчаар деткип турарыл?

⁶ Иегова бараалгакчыларынга кезээде ынак болурун бүзүредип турар. Ол израильчилерге: «Сен Меңээ  улуг үнелиг болгаш эргим болганыңда, сеңээ Мен ынак... мен. Кортпа, Мен сээң-биле болгай мен» дээрге, оларның чүнү миннингенин бодап көрүңер даан (Иса. 43:4, 5). Иегова биске дыка ынак деп чигзинмейн барып болур бис. Библияда Ооң дугайында мынча дээн: «Ол — күштүг Дайынчы, сени камгалап шыдаар. Ол сен дээш өөрүүр» (Соф. 3:16, 17).

7. Иегованың ынакшылы иениң ынакшылынга чүзү-биле дөмей? (Статьяның эгезинде чурукту көрүңер.)

⁷ Иегова бараалгакчыларын кандыг-даа бергелерде деткип, аргалаарын аазап турар. Ол мынча дээн: «Силерни... холумга көдүрүп чоруур [Мен], хойнумга олурткаш, чассыдар [Мен]. Мен силерни, ие кижиниң чаш төлүн аргалааны дег, аргалаар мен» (Иса. 66:12, 13). Ие кижиниң чаш төлүн эргеледип-чассытканын азы ону хойнунга олуртуп алгаш, ойнатканын сагыштаалап көрүңер даан. Иегова ол сөстери-биле шынчы бараалгакчыларынга кайы хире ынаан көргүскен. Иегова силерни аажок үнелеп турар дээрзинге кажан-даа чигзинмеңер (Иер. 31:3).

8, 9. Иисустуң ынакшылы бисти канчаар деткип турарыл?

⁸ Бисти Иегованың ынакшылынга оон ыңай чүү бүзүредип турарыл? Иоанн 3:16-да мынча дээн: «Аңаа бүзүрээн кижи бүрүзү өлбезин, харын мөңге амыдыралдыг болзун дээш, Бурган Бодунуң эр чаңгыс Оглун берипкен. Ооң бо делегейниң улузунга ынакшылы ол хире болган-дыр». Иисус амы-тынын бергеш, биске ынакшылын көргүскен. Ооң ынакшылы  бисти деткип чоруур. Аар-бергелер, кызып-кыйыышкыннар безин Христостуң ынакшылындан бисти чарып шыдавас деп Библияда бижээн (Рим. 8:35, 38, 39).

⁹ Чамдыкта бергелер сагыш-сеткиливисти, мага-бодувусту болгаш Бурган-биле харылзаавысты кошкадып болур. Ындыг-даа болза, Христостуң биске ынакшылының дугайында боданып тургаш, бергелерни туруштуг ажып эртип шыдаар бис. (2 Коринфичилерге 5:14, 15 номчуптуңар.) Иисустуң ынакшылы Иеговага бараалгап, улаштыр чурттаар күзелди биске берип турар. Ол ынакшыл чөгеливис төнүп, бойдустуң халаптарындан когарап, истеп сүрдүрүп азы дүвүрелдерге алзып-даа чоруур болзувусса, холдарывысты сула салбазынга дузалап турар.

10, 11. Ундараан акы-угбаларны кым деткиир ужурлуг? Тайылбырлаптыңар.

¹⁰ Оон ыңай Иегова бисти чыыш таварыштыр деткип турар. Акы-угбаларывыска ынак болуп, Бурган-биле харылзаазын быжыктырарындан аңгыда, оларның сагыш-сеткилин оожургадып тургаш, Иеговага ынаавысты бадыткаар бис (1 Ин. 4:19—21). Павел элчин: «Ынчалдыр кылып турарыңар дег, бот-боттарыңарны моон-даа соңгаар аргалаңар база быжыглаңар» — деп бисти кыйгырган (1 Фес. 5:11). Чүгле удуртукчу акылар эвес, а кижи бүрүзү Иегова биле Иисусту өттүнүп тургаш, акы-угбаларны аргалап болур. (Римчилерге 15:1, 2 номчуптуңар.)

¹¹ Чыышта бир кижи депрессияның  аар хевири-биле аарып турар болза, аңаа психологтуң азы психиатр эмчиниң дузазы херек апарып болур (Лк. 5:31). Удуртукчулар болгаш чыыштың өске кежигүннери эмчилер эвес-даа болза, оларның дузазы болгаш деткимчези дыка херек. Бис шуптувус ундарааннарны сорук киирип, кошкактарга чөленгииш болуп, оларга шыдамык хамаарылганы көргүзүп болур бис (1 Фес. 5:14). Ындыг акы-угбаларның сагыш-сеткилин эки билип алырын кызып, оларны аргалап турар силер бе? Ийе болза, оларга дузалаар дээш, оон ыңай чүнү кылып болур силер?

12. Акы-угбалар чыыштың кежигүнүн канчаар ынакшылдыы-биле деткээнин үлежип көрүңерем.

¹² Европада бир угбавыс үлешкен: «Чамдыкта амы-тынымга четтинер деп бодай бээр мен. Ынчалза-даа акы-угбаларым мени аажок деткип турар. Олар эвес болза, шагда-ла чок мен. Акы-угбаларым ынакшылын көргүзүп, мен дээш кезээде сагыш човап чоруур. Депрессиялап турарымны чүгле каш кижи билир-даа болза, чыышта ха-дуңмам дуза кадарынга кезээде белен. Бир өг-бүле мээң ада-ием ышкаш. Олар менче сагыш салып, дүне-даа, хүндүс-даа деткииринге белен». Ындыг кичээнгейни чыышта кижи бүрүзүнден манаары болдунмас. Ындыг-даа болза, шуптувус акы-угбаларывысты деткип болур бис a.

13. Өскелерни аргалап тургаш, чүнү канчалза экил?

¹³ Кичээнгейлиг дыңна (Иак. 1:19). Акы-угбаларны кичээнгейлиг дыңнап тургаш, оларга ынакшылыңны көргүзер сен. Оларның чүнү миннип турарын билип алыр дээш, эвилең-ээлдек айтырыглардан сал. Херек кырында ол кижи дээш сагыш човап турарың арын-шырайыңдан көстүп кээр. Ол сагыш-сеткилин ажыдып турда, шыдамыккай бооп, ону үзе кирбейн, аңаа үндүр чугааланыр аргадан бер. Кичээнгейлиг дыңнап тургаш, ооң чүрээн чүү өйүп чоруурун эки билип алыр сен. Сээң аңаа сеткилиңден дузалажыксап турарыңны эскерип кааш, ол сеңээ бүзүреп эгелээрге, ону аргалап шыдаар сен.

14. Депрессиялап турар кижини чүге шүгүмчүлевес болза эки?

¹⁴ Шүгүмчүлеве. Чамдыкта бистиң бодал чок сөстеривис депрессиялап турар кижини аар балыглап болур. Ынчан аңаа дузалажыры биске дыка берге апаар. «Хоозун чугаа хылыш ышкаш балыглап боор, а мерген угаанныг улустуң аас-сөзү — экиртир шынарлыг» (У.ч. 12:18). Депрессиялап турар кижини өжегерээн хомудадыр дивээн-даа болзувусса, бодал чок чугаавыс аңаа аарышкылыг бооп болур. Ынчангаш ооң байдалын эки билип алыр дээш кызып турарывысты ол көрүп каар кылдыр, бүгү чүвени кылыр болзувусса эки (Мф. 7:12).

15. Акы-угбаларывысты деткииринге биске чүү дузалаар?

¹⁵ Библияның дузазы-биле аргала.  (Римчилерге 15:4, 5 номчуптуңар.) Библия «шыдамык чорук биле сорук кириишкинниң үнер дөзү боор Бургандан» болганда, оон аргалалды тып ап турар бис. Оон ыңай бисте «Индекс публикаций Сторожевой Башни» биле «Путеводитель по публикациям Свидетелей Иеговы» бар. Оларның дузазы-биле акы-угбаларны аргалап, деткиир библейжи шүлүктерни болгаш дептерлерни тып ап болур бис.

16. Ундараан кижини деткииринге биске кандыг шынарлар дузалаар?

¹⁶ Чылыг-чымчак болгаш сагыш човангыр бол. Иегова — «бисти аргалап, деткип чоруур Бурган». Ол бараалгакчыларының аар үүлезин кады үлежип чоруур (2 Коринфичилерге 1:3—6 номчуптуңар; Лк. 1:78; Рим. 15:13). Павел Иегованы өттүнүп, аңаа хамаарыштыр биске кайгамчык үлегерин көргүскен. Ол мынча дээн: «Иениң чаш төлдери дээш сагыш човаары дег, силерге аажок уян-чымчак хамаарылга көргүстүвүс. Силерге ындыг күштүг ынак болгаш, чүгле Буянныг Медээни эвес, а амы-тынывысты силерге хүлээдип бээринге белен турдувус. Биске ол хире эргим болдуңар!» (1 Фес. 2:6—8). Акы-угбаларывыска чылыг-чымчак хамаарылганы көргүзер болзувусса, Иегова бисти таварыштыр оларны деткип, дуза дилээн мөргүлүнге харыылап бээр.

17. Бот-боттарывыстан тергиин чорукту чүге манавас болзувусса экил?

¹⁷ Улустан тергиин чорукту манава. Ха-дуңмавыстан тергиин чорукту манаар болзувусса, чөгени бээр бис (Эккл. 7:21, 22). Ынчангаш кижилерден хөйнү манава. Иегова бистен хөйнү негевейн турар болганда, бот-боттарывыска шыдамыккай болуулу (Эф. 4:2, 32). Акы-угбаларывыс боттарын өскелерден эвээш бараалгап турар кылдыр бодай бээрин кажан-даа күзевес бис. Харын-даа ажыл-херээниң эки талаларынче айтып, оларны мактаза чогуур. Ооң ачызында олар Иеговага өөрүшкүлүг бараалгаарлар (Гал. 6:4).

18. Бот-боттарывысты деткижип, ынакшылды илередири чүге чугула?

¹⁸ Иегова биле Иисус чыыштың кежигүн бүрүзүн үнелеп турар (Гал. 2:20). Кады бүзүрээн ха-дуңмавыска ынак болганывыста, оларга чылыг-чымчак хамаарылганы көргүзер болзувусса эки. Ол ышкаш «амыр-тайбыңны база удур-дедир деткимчени эккээр чүүлдерже чүткүүр ужурлуг бис» (Рим. 14:19). Кымның-даа сеткилинге кударанчыг бодалдар келбес чаа делегейни четтикпейн манап турар бис! Аңаа кандыг-даа дайын, аарыг-аржык, Бурганга бүзүрел дээш истеп сүрүүшкүннер, чөгениишкиннер, өг-бүлениң бергелери турбас. Кижилер салгап алган бачыды дээш моон соңгаар өлбес. Муң чыл башкарылганың соонда кижи төрелгетени тергиин апаар. А эң сөөлгү шылгалданы ажып эртиптер шынчы улус Бурганның чер кырында «ажы-төлү» бооп, хосталганы алыр (Рим. 8:21). Ынчангаш Иегованың кайгамчык делегейинге шупту чурттаар дээш, бот-боттарывысты деткижип, ынакшылды илередиилиңер.