1, 2. Захарияның чедиги көстүүшкүннү көрген үезинде Иерусалимде байдал кандыг турган?

 ЧЕДИГИ көстүүшкүннү көрген соонда Захария хөй чүүлдүң дугайында боданып турган. Шынчы эвес улусту Иегованың кезедир деп турарын билип кааш, ол сорук кирген чадавас. Ынчалза-даа амдыызында чүү-даа өскерилбээн турган. Хөй израильчилер шынчы эвес алдынып, бузут үүлгедип турган, а Иерусалимде өргээ туттунмаан хевээр болган. Олар Иегованың дааскан ажылын чүге дораан уттупканыл? Таанда олар Иерусалимче чүгле эки тургустунуп аар дээш келгени ол бе?

² Иерусалимче көжүп келген иудейлерниң бүзүрели быжыг турган деп, Захария чигзинмейн турган. Чүге дизе олар Бурганның сүлдезинге башкарткаш, Вавилонга аянныг чурттап орган бажыңнарын болгаш ажылын каапканнар (Эзра 1:2, 3, 5). Олар төрээн чери-биле дөмей апарган черни каапкаш, чамдыызының кажан-даа көрүп көрбээни черже көжүп чорупканнар. Еврейлер даглыг, эртери берге черлер-биле 1600 километр узун, берге орукту эрткен. Иегованың өргээзин катап тударын чугула деп санавайн турган болза, олар ону кылыр деп бе?

3, 4. Туттуруушкундан эглип келген еврейлер кандыг бергелерге таварышканыл?

 ³ Еврейлерниң Иерусалимче аян-чоруун сагыжывыска бодап көрээлиңер. Олар чоруп ора чуртунуң дугайында хөй боданып чораан чадавас. Олар Иерусалимниң кайы хире чараш турганын дыңнап өзүп келген турган. Оларның аразынга өргээниң кайы хире кайгамчык өндүр улуун ийи караа-биле көрген улуг назылыг улус база чораан (Эзра 3:12). Еврейлерниң орнунга турган болзуңарза, Иерусалим ырактан көстүп кээрге, чүнү миннир силер? Чашпан үнген хоорайның бузундуларын, хаалгаларда болгаш таңныыл суургаларында улуг оюндуларны көргеш, оларны Вавилоннуң ийи каът улуг ханалары-биле деңнептериңерге, силерге муңгаранчыг боор чадавас. Ынчалза-даа ол чүүл израильчилерниң тура-соруун кошкатпаан. Чүге дизе Иегова оларны ол узун орукка Бодунуң күчүлүг холу-биле деткип чораан. Израильчилер Иерусалимге келгеш, хүн бүрүде чогуур өргүлдер салыр дээш, бир дугаарында-ла өргүл салыр бедигээшти тудуп эгелээн (Эзра 3:1, 2). Олар чүткүлдүг ажылдаар хөөннүг турган. Сактырга, оларга чүү-даа шаптыктап шыдавас ышкаш болган.

⁴ Израильчилер чүгле өргээни эвес, а хоорайларын болгаш бажыңнарын катап туткаш, өг-бүлезин ашкарып-чемгерер дээш, шөлдерин болбаазырадыр ужурлуг турган (Эзра 2:70). Кылыр ажыл баш ажыг турган. Удатпаанда олар дайзыннарының талазындан, 15 чыл уламчылап келген, удурланыышкынга таварышкан. Эгезинде олар сула салдынмаан (Эзра 4:1—4). Ынчалзажок б. э. чедир 522 чылда Персияның хааны Иерусалимни катап тударын хоруптарга, оларның чүткүлү өжүп калган. Сактырга, хоорай кажан-даа катап туттунмас ышкаш болган (Эзра 4:21—24).

5. Иегова чонун канчаар деткээнил?

⁵ Чонунга сорук кириишкин биле деткимче херек деп, Иегова билир турган. Ынчангаш Ол иудейлерни ынакшылынга бүзүредип, оларның бараалгалын үнелеп турарын көргүзер дээш, Захарияга сөөлгү көстүүшкүннү көргүскен. Бир эвес олар Ооң дааскан ажылынче катап эглип кээр болза, Ол оларны албан камгалаарын аазаан. Өргээ катап туттуна бээр деп, Иегова чугаалаан. Ол: «Бурганыңар Дээрги-Чаяакчының чугаалаан чүвезин чүткүлдүү-биле тооп дыңнаар болзуңарза, ол бүгү болдуна бээр» — дээн (Зах. 6:15).

6. а) Захарияның сески көстүүшкүнү чүүден эгелээн? (Статьяның эгезинде чурукту көрүңер.) б) Аъттарның өң-чүзүнү чүге аңгы-аңгы бооп турар?

⁶ Захарияның көрген сөөлгү сески көстүүшкүнү бүзүрелди өскелеринден артык быжыглаар чадавас. (Захария 6:1—3 номчувут.) Сагыжыңарга бодаптыңар даан: ийи хүлер даг аразындан дайылдажырынга дерип каан дөрт дайынчы терге халдып орар. Дайынчы тергелерде кошкан аъттар аңгы-аңгы өң-чүзүннүг болган. Ооң ачызында тергелерни ылгап болур. Ынчан Захария дээрниң төлээзинден: «Бо чүү деп чүвел, дээргим?» — деп айтырган (Зах. 6:4). Ол чүүл биске база солун, чүге дизе көстүүшкүн биске база хамааржыр.

7, 8. а) Ийи даг чүнү илередип турар? б) Ол даглар чүге хүлер бооп турар?

⁷ Библияда даглар колдуунда чагыргаларны илередип турар. Захарияның көстүүшкүнүнде ийи даг Даниилдиң өттүр билген медеглелинде дагларга дөмей. Бирги даг Иегованың мөңге чагырар эргезин илередип турар. Ийигизи — Иисус Христостуң баштааны Мессиан Чагырга-дыр (Дан. 2:35, 45). 1914 чылда күзүн Иисустуң хааннап эгелээнинден тура, ол доора уткалыг ийи даг Бурганның черде  күзел-соруун күүседиринге тускай рольду ойнап турар.

⁸ Ол ийи даг чүге хүлер бооп турар? Хүлер, алдын дег, үнелиг. Иегова хүлерни ыдыктыг өргээ майгынны кылырынга, а соонда Иерусалимде өргээни тударынга ажыглаарын чагаан (Хост. 27:1—3; 3 Хаан. 7:13—16). Ынчангаш оларның хүлер болганы биске Иегованың чагырар эргезин болгаш келир үеде кижилерге йөрээлдерни эккээр Мессиан Чагырганы сагындырып турар.

9. Дайынчы тергелер болгаш оларның башкарыкчылары чүнү илередип турар? Оларның даалгазы кандыг турган?

⁹ А дайынчы тергелер болгаш оларның башкарыкчылары чүнү илередип турар? Олар дээрниң төлээлерин илередип турар; бөлүк-бөлүк дээрниң төлээлерин бооп чадавас. (Захария 6:5—8 номчувут.) Олар «бүгү чер-делегейниң Чагырыкчызының турар черинден үнүп келген», ынчангаш олар тускай даалгалыг. Кандыг? Терге бүрүзүнге баар черни айтып каан. Оларга Иегованың чонун камгалаарын дааскан, ылаңгыя «соңгу чүкте чурттан», Вавилондан. Иегова моон соңгаар Вавилонга чонунуң туттуруп алырын болдурбас. Захарияның хүннеринде өргээни катап тудуп турган улусту ол чүүл дыка-ла сорук киирген боор! Дайзыннар шаптыктай бээр деп, олар моон соңгаар кортпас ужурлуг турган.

10. Дайынчы тергелерниң дугайында көстүүшкүн бүзүреливисти канчаар быжыглап болур?

¹⁰ Бөгүн база, Захарияның хүннеринде дег, Аг-шериглиг Иегова чонун камгалап, быжыглаар дээш, дээрниң төлээлерин ажыглап турар (Мал. 3:6—7; Евр. 1:7, 14). 1919 чылда Бурганның чону Өндүр улуг Вавилоннуң аспаандан хостаткан. Оон эгелээш, дайзыннар оларга шаптыктап-даа турза, кым-даа, чүү-даа суртаал ажылын соксадып шыдавас апарган (Ажыд. 18:4). Дээрниң төлээлери бисти камгалап турар болганда, Иегованың организациязы катап меге шажынның туттуруушкунунче кире бээр деп корткан ажыывыс чок (Ыд. ыр. 33:8). Бүдүн делегейде Бурганның чону моон-даа соңгаар хөгжүүр дээрзинге чигзинмес бис. Захарияның өттүр билген медеглелинде ийи даг бисти камгалап турар деп билип алгаш, боттарывысты айыыл чок кылдыр миннип турар бис.

11. Бурганның чонунче удавас болур халдаашкындан чүге кортпас бис?

¹¹ Удавас Эрликтиң делегейиниң чагыргалары катчып алгаш, Бурганның чонун узуткаар дээш, халдап кээр (Иез. 38:2, 10—12; Дан. 11:40, 44, 45; Ажыд. 19:19). Иезекиилдиң өттүр билген медеглелинден алырга, олар килеңнээнинден черни дуглаар дээн булут дег, биске удур көдүрлүп, шупту аът мунуп алган чедип кээр (Иез. 38:15, 16) a. Оон корткан херээ бар бе? Чок, чүге дизе дээрниң аг-шерии бистиң талавыста. Коргунчуг хилинчектиң ол шиитпирлиг өйүнде дээрниң төлээлери Иегованың чонунга болчуп, Ооң чагырар эргезинге удурланган шупту улусту узуткап каар (2 Фес. 1:7, 8). Ол хүн төөгүге тураскаалдыг хүн болур! Ынчаарга Иегованың дээрде аг-шериин кым башкарып турар?

12, 13. а) Иегова Захарияга чүнү кылырын чагаан? б) Өзүм Иисус Христосту илередип турар деп, чүге чугаалап болур? Тайылбырлаптыңар.

¹² Иегованың көргүскен сес көстүүшкүнүн Захариядан өске кым-даа көрбээн. Ындыг-даа болза, Иегованың өргээзин тудуп турган израильчилерни сорук киириптер чүүлдү ол кылган. (Захария 6:9—12 номчувут.) Иегова Захарияга чоокта чаа Вавилондан эглип келген Хелдай, Товия болгаш Иедайядан алдын биле мөңгүннү алгаш, «оваадай» кылырын чагаан (Зах. 6:11). Захария ону Иуданың аймаанга хамааржыр, Давидтиң ук-салгалы боор Зоровавелге кедирер ужурлуг турган эвес бе? Чок. Кажан Захария оваадайны дээди бараалгакчы Иоседектиң оглу Иисустуң бажынга кедириптерге, ону көрүп турган улус кайгаан чадавас.

¹³ Дээди бараалгакчы Иисус ооң соонда хаан апарган бе? Чок. Ол Давидтиң үре-салгалындан укталбаан болганда, дүжүлгеге олурар эргези чок турган. Оваадайны кедиргени — келир үеде кезээ-мөңгеде хаан болгаш дээди бараалгакчы боор Өзүмче айтып турган. Ол Өзүм — Иисус Христос-тур деп, Библия тода айтып турар (Иса. 11:1; Мф. 2:23 b).

14. Хаан болгаш Дээди бараалгакчы болганда, Иисус чүнү кылып турар?

¹⁴ Иисус Христос хары угда Хаан болгаш Дээди бараалгакчы бооп турар. Иисус Иегованың дээрде аг-шерииниң баштыңы болганда, дайынзырак хөөннүг делегейде чурттап турар Бурганның бараалгакчыларын ниитизи-биле айыыл чок турзун дээш, бүгү чүвени кылып турар (Иер. 23:5, 6). Удавас Христос Бурганның чагырар эргезинге удурланып турар улуска удур үнүпкеш, оларны тиилеп каар. Ол Иегованың чонун камгалаар (Ажыд. 17:12—14; 19:11, 14, 15). Ол демиселдиң мурнунда Иисус, азы Өзүм, чугула ажылды кылыр ужурлуг турган.

15, 16. а) Бо үеде Бурганның чонун кым база канчаар арыглааш, катап тургусканыл? б) Христостуң муң чыл хааннаашкынының төнчүзүнде черде байдал канчаар өскерли бээр?

¹⁵ Бурган Иисусту Хаан болгаш Дээди бараалгакчы кылдыр томуйлаанындан аңгыда, аңаа «Дээрги-Чаяакчының өргээзин» тударын дааскан. (Захария 6:13 номчувут.) Иисус ол даалганы бо үеде канчаар күүседип турар? Ол 1919 чылда Иегованың шынчы бараалгакчыларын Өндүр улуг Вавилондан хостааш, христиан чыышты катап тургускан. Ол ышкаш Иисус, Бурганның доора уткалыг өндүр улуг өргээзиниң (Бурганның өңнүктери болурунга болгаш Аңаа чүдүүрүнге дузалаар кылдыр тургускан чурум) черде кезээнде бараалгалды удуртур кылдыр, «шынчы болгаш сарыылдыг чалчаны» томуйлаан (Мф. 24:45). Оон аңгыда ол Бурганның чонун арыглаар дээш кызымак ажылдап, оларга Аңаа таарымчалыг бараалгаарынга дузалап турар (Мал. 3:1—3).

¹⁶ Иисус Христос муң чыл хааннаашкынының үезинде ооң-биле кады чагырар 144 000 бараалгакчылар-биле Бурганга шынчы кижилерни тергиин кылыптар. Ооң соонда черге дываажаңга чүгле Бурганның алыс шын чүдүкчүлери чурттаар. Ынчан алыс шын Бурганга чүдүлге тергиидээр!

17. Иегова еврейлерни чүү чүвеге бүзүреткен база Ооң сөстери кандыг салдарлыг болган?

¹⁷ Захарияның үезинде чурттап чораан еврейлерге ооң медээзи кандыг салдар чедирген? Иегова оларны камгалаарын болгаш өргээни тударынга дузалаарын аазаан. Ол аазаашкын оларга идегелди берген.  Ынчалза-даа эвээш кижи ындыг нарын ажылды кылып шыдаптар бе? Захарияның дараазында бижээн чүвезинден алырга, өргээ катап туттунар деп чигзиниг чок. Хелдай, Товия болгаш Иедайядан аңгыда, тудугга киржир дээш, оон-даа өске улус чедип кээр деп, Иегова чугаалаан. (Захария 6:15 номчувут.) Ынчан еврейлер, Бурган оларны деткиир деп бүзүрей бергеш, Персияның хааны тудуг ажылын хоруп каан-даа турда, өргээни катап тудар дээш, ажылдап кирипкен. Удатпаанда Иегова «өндүр бедик даг» дег турган моондакты ап каапкан: тудуг ажылын чөпшээрепкен, ынчангаш б. э. чедир 515 чылда өргээ катап туттунган (Эзра 6:22; Зах. 4:6, 7). Ынчалзажок Иегованың сөстери хөй кезиинде бистиң үевиске хамааржыр.

18. Захария 6:15-те сөстер бөгүн канчаар күүсеттинип турар?

¹⁸ Бөгүн алыс шын Бурганга миллион-миллион кижилер бараалгап турар. Олар Иегованың доора уткалыг өндүр улуг өргээзин деткиир дээш, бар-ла үнелиг чүвезин — үезин, күжүн болгаш акша-хөреңгизин — сеткилинден өргүп турар (У. ч. 3:9). Иегова өргүлдеривисти үнелеп турар деп чигзинмезинге биске чүү дузалаар? Сактыр болзувусса, Хелдай, Товия болгаш Иедайяның эккелгени алдын-мөңгүнүнден Захария оваадайны кылып каан. Ол оваадай алыс шын чүдүлге дээш берген өргүлдерни сагындырар ужурлуг турган (Зах. 6:14). Ооң-биле дөмей Иегова бистиң Ол дээш кылган ажыл-херээвисти болгаш ынакшылывысты кажан-даа утпас (Евр. 6:10).

19. Захарияның көстүүшкүннери бисче кандыг салдар чедирер ужурлуг?

¹⁹ Бо сөөлгү хүннерде Иегованың чонунуң чедиишкиннери бисти Христостуң удуртуп турарын болгаш Иегованың йөрээп турарын көргүзүп турар. Бис кезээ-мөңгеде турар, бүзүрелдиг организацияда бис. Иегова арыг чүдүлгеге хамаарыштыр күзел-бодалын албан күүседир. Ынчангаш Бурганның организациязында ээлеп турар чериңерни үнелеп, Иегованы кезээде дыңнап чоруңар. Ынчан Дээди бараалгакчывыстың болгаш Хаанывыстың, ол ышкаш дээрниң төлээлериниң камгалалында боор силер. Иеговага чүдүлгени деткиир дээш, шыдаар-ла чүвеңерни кылыңар. Ынчаар кылыр болзуңарза, Иегова силерни бо каржы делегейниң төнчүзүнге чедир база кезээ-мөңгеде камгалаар дээрзинге чигзинмес силер.