1, 2. а) Кандыг айтырыг кижи бүрүзүнге хамааржып турарыл? б) Ол айтырыг чүге эргежок чугула?

 УЛУСТУҢ хөй кезиинге акшадан чугула чүве чок апарган. Олар чүгле байып алырын азы эт-хөреңгизин канчап чидирбезин бодаар. А өскелерниң чуртталгазында бир дугаар черде өг-бүлези, кадыкшылы болгаш хууда чедиишкиннери турар.

² Ынчалзажок кижи бүрүзүнге хамааржыр, чүүден-даа артык чугула айтырыг бар. Ол дээрге Иегованың чагырар эргезиниң дугайында айтырыг-дыр. Бис ону кезээде сактып чоруур ужурлуг бис. Чүге дизе ону уттуптар айыыл бар. Кандыг? Иегованың чагырар эргезин бадыткаарының кайы хире чугулазын уттуптарынга чедир амыдыралдың ажаанзыралдарынче дүлдүне берип болур бис. Оон аңгыда ол айтырыгга хамаарылгавысче амыдыралывыска таваржып кээр аар бергелер салдар чедирип болур. Ынчалзажок Бурганның чагырар эргезин идепкейлиг деткиир болзувусса, шенелделерни ажып эртери биске белен болур, ол ышкаш Иегова-биле харылзаавыс быжыгар.

3. Эрлик Бурганның башкарылгазынга хамаарыштыр чүнү чугаалааныл?

³ Эрликтиң үймээниниң түңнелинде Иегованың чагырар эргезинге хамаарыштыр айтырыг көдүртүнген. Бурган — чаяалгаларынга  эки чүве күзевейн турар, шынчы эвес чагырыкчы-дыр деп, Эрлик чугаалаан. Кижилер боттарын боттары чагырар болза, олар оон-даа аас-кежиктиг болур деп, ол каксы сөглээн (Э. д. 3:1—5). Оон аңгыда, Эрликтии-биле алырга, Бурганга шыны-биле бердинген чаңгыс-даа кижи чок: аар шенелдеге таварышкаш, кым-даа Ооң талазынга артпайн баар (Иов 2:4, 5). Эрликтиң көдүрген айтырыгларынга харыы бээр дээш, Иегова, Ооң чөптүг башкарылгазы чокта чуртталганың кайы хире аас-кежик чок апаарын билип алзын дээш, кижилерге үени берген.

4. Бурганның чагырар эргезинге хамаарышкан айтырыг чүге шиитпирлеттинер ужурлуг?

⁴ Эрликтиң буруудадыышкыннары үндезин чок деп, Иегова билир турган. Ынчаарга Бурган аңаа бодунуң сөстерин шынзыдар үени чүге бергенил? Бо айтырыгга харыы шупту угаан-сарыылдыг чаяалгаларга хамааржып турар. (Ырлар 82:19 номчувут.) Ада́м биле Ева Иегованың башкарылгазынга чагыртырындан ойталаан, оларның үре-салгалының хөй кезии база ынчалган. Ынчангаш дээрниң төлээлериниң азы кижилерниң: «Эрликтиң чугаазы шын турган эвес бе?» деп чигзиниишкиннери тыптып болур турган. Ол айтырыг шиитпирлеттинмээн шаанда, чоннарның, язы-сөөктерниң, аймактарның, өг-бүлелерниң аразынга чаңгыс аай чорук турбас. Ынчалза-даа Иегова бодунуң чагырар эргезин бадыткаптарга, Аңаа дыңнангыр шупту чаяалгалар Ооң чөптүг башкарылгазының адаанга кезээ-мөңгеде чурттаар. Ынчан бүгү Октаргайга тайбың тергиидээр (Эф. 1:9, 10).

5. Иегованың чагырар эргезин деткип турарывысты канчаар көргүзүп болур бис?

⁵ Удавас Бурганның чагырар эргези бадыткаттынар, а Эрликтиң болгаш кижилерниң башкарылгазының чедиишкин чогу илдең апаар, ынчан ону ап кааптар. Бурганның башкарылгазы Мессиан Чагырганы таварыштыр бодунуң сорулгазын чедип алыр. Бурганга шынчы артар улус Ооң чагырар эргезин деткиир кижилер бар деп чүүлдү бадыткаар (Иса. 45:23, 24). Оларның бирээзи болуксаар силер бе? Ийе болза, Бурганның чагырар эргезинге хамаарышкан айтырыгны үргүлчү сактып, ооң кайы хире чугулазын миннип чоруур болзуңарза эки.

6. Иегованың чагырар эргезин бадыткаары кайы хире чугула?

⁶ Үстүнде демдеглээни дег, Иегованың чагырар эргезин бадыткаары — кижи бүрүзүнге хамааржыр, шыңгыы айтырыг-дыр. Ол айтырыгның шиитпирлеттинери боттарывыстың менди-чаагай чоруувустан артык чугула. Ынчалза-даа ол дээрге бистиң камгалалывыс ындыг-ла кончуг чугула эвес азы Иегова биске ынак эвес дээни ол бе? Чок! Чүге ынча деп болурул?

7, 8. Иегованың чагырар эргезиниң бадыткаттынары Ооң аазаашкыннарының күүсеттинери-биле чүге сырый харылзаалыгыл?

⁷ Иегова кижилерге аажок ынак болгаш оларны үнелеп турар. Бисти кезээ-мөңгеде камгалал алзын дээш, Ол Оглунуң амы-тынын бээринге безин белен турган (Ин. 3:16; 1 Ин. 4:9). Иегова аазаашкыннарын күүсетпейн баар болза, Бурган чаяалгаларындан бир-ле эки чүве чажырып, оларны мегелеп турар, ынчангаш Ону чөптүг башкарыкчы деп болбас дээн Эрликтиң буруудадыышкыннары шын апаар. Оон аңгыда: «Христостуң ээп кээрин аазаан болгай, Ооңар ам кайыл? Чаяалганың эгезинден, ада-өгбелеривис өлгүлээнден бээр бо делегейде өскерилген чүү-даа чок-тур» деп кочуургап турар алыс шынның удурланыкчыларының Бурганны бак сөглээр аргазы тыпты бээр (2 Пет. 3:3, 4). Ынчангаш Иегова, бодунуң чагырар эргезин бадыткап тургаш, Аңаа дыңнангыр улус камгалал алыр кылдыр сагыш човаар. (Исайя 55:10, 11 номчувут.) Оон аңгыда Иегованың башкарылгазы ынакшылга үндезилеттинген. Ынчангаш Иегова шынчы бараалгакчыларынга кезээде  ынак боор база оларны үнелээр дээрзинге чигзинмейн турар бис (Хост. 34:6).

⁸ Иегова чагырар эргелиг деп миннип тургаш, бис бодувустуң камгалалывысты чугула эвес деп бодавайн турар бис. Ынчалза-даа Бурганның чагырар эргези бистиң камгалалывыстан артык чугула деп, сактыр ужурлуг бис. Ол чүүл биске маргыштыг айтырыгның дугайында утпайн, Иегованың чөптүг башкарылгазын бердингени-биле деткииринге дузалап турар.

9. Иовка хамаарыштыр Эрлик чүнү чугаалааныл? (Статьяның эгезинде чурукту көрүңер.)

⁹ Иегованың чагырар эргезин бадыткаары чүүден-даа артык чугула деп, Библияның баштайгы бижиттинген номнарының бирээзи болур, Иовтуң номундан көстүп турар. Ында Эрликтиң Иовту бир эвес ол аар шенелдеге таваржыр болза, ол Бургандан ойталай бээр дээн буруудадыышкынын бижээн. Бурган Иовту хилинчектээр кылдыр, Эрлик Аңаа сүмелээн. Ынчалза-даа Иегова Иовту хилинчектевейн, Эрликке ону кылырын чөпшээрээн. Бурган: «Ооң бар-ла кошкул-хөреңгизи сээң холуңче кирзин» — дээн. (Иов 1:7—12 номчувут.) Иов кыска үе дургузунда шупту чалчаларын, кошкул-хөреңгизин болгаш ынак ажы-төлүн чидирип алган. Кыдыындан көөрге, бо бүгү хилинчекти Бурган чоргузупкан ышкаш кылдыр, Эрлик кылыпкан (Иов 1:13—19). Оон Эрлик Иовка аажок хилинчектиг, ческинчиг аарыг чыпшырып каан (Иов 2:7). Кадайындан болгаш өңнүктери деп санап чораан улузундан балыглап турар сөстер дыңнаан соонда, Иовтуң аарыы оон-даа шыдажыр арга чок апарган (Иов 2:9; 3:11; 16:2).

10. а) Иов Бурганга шынчызын канчаар көргүскенил? б) Ооң частырыы кандыг турган?

¹⁰ Бо бүгү чүнүң-биле төнген? Эрликтиң сөстери көк меге деп көстүп келген. Иов Бургандан ойталаваан (Иов 27:5). Ынчалзажок ол кезек када чүү эң-не чугула дээрзин уттупкан. Иов чүгле бодунуң чөптүг-шынныын бадыткаарынга өйлежип, безин чадаарда, ооң хилинчээниң чылдагаанын тайылбырлаарын Бургандан негеп турган (Иов 7:20; 13:24). Иовту билип болур бис, чүге дизе ол дыка хөй хилинчек-човалаңны ажып эрткен. Ындыг-даа болза Иегова ону эдип-чазаарын саналдаан. Ол аңаа чүү дээн?

11, 12. Иегова Иовка чүнү билип алырынга дузалаан база Бурганның сөстерин ол канчаар хүлээп алган?

¹¹ Иегованың Иовка чугаалаан сөстерин Иов номунуң 38-тен 41-ге чедир эгелерде бижээн. Ында Бурган Иовтуң хилинчээниң чылдагаанын айтып бербээн. Иегова Иов-биле чугаалажып тургаш, чүге ону халаптар тавараанын тайылбырлаар сорулгалыг турбаан, чүге дизе кижиниң мурнунга Бурганның агартынары албан эвес. Иегова Иовка, Бүрүн Күчүлүг Бурганга бодаарга, ооң кайы хире азарганчыг бичиизин минниринге дузалаарын күзеп турган. Оон аңгыда Бурган Иовка кижиниң бергелеринден артык чугула  чүүлдер бар деп көрүп каарынга дузалаан. (Иов 38:18—21 номчувут.) Ооң ачызында Иов чүү херек кырында чугула дээрзин катап сактып келген.

¹² Ынча хөй бергелерни ажып эрткениниң соонда Иовту Иегованың эдип-чазап эгелээнин кадыг аажылаашкын деп болур бе? Чок. Иов боду безин ынчаар бодавайн турган. Иов Бурганның эдип-чазаашкынын хүлээп алгаш, ол дээш Аңаа өөрүп четтирген. Ол мынча дээн: «Бүгү сөстеримден ойталап тур мен, доозун-довурак, хүлде олуруп алган, буруум миннип тур мен». Дорт-даа болза, Бурганның аргалалдыг сөстери кандыг кончуг салдарлыг болган чоор! (Иов 42:1—6). А ооң мурнунда Иовка сүмени Элиуй дээр аныяк кижи берген (Иов 32:5—10). Иов Иегованың сөстерин хүлээп алырга, Бурган Иовтуң шенелделерге шынчы артканын бедик үнелеп турарын өскелерге көргүскен (Иов 42:7, 8).

13. Иегованың сүмелери Иовка шенелделер соонда канчаар дузалаан?

¹³ Иегованың сүмелери Иовка шенелделер төнүп каарга безин дузалаан. Иегова «Иовтуң чуртталгазының арткан чылдарында аңаа, биеэги чылдарынга бодаарга, оон-даа хөй ачы-буян хайырлаан». Соонда ол «чеди оолдуг, үш кыстыг болган» (Иов 42:12—14). Ынчалза-даа Иов Эрликтиң хайы-биле чок апарган ажы-төлүн сактып турган. Кезек үе дургузунда ооң-биле болган чүүлдерниң дугайында коргунчуг сактыышкыннар ооң бажынга кирип турган чадавас. Сөөлүнде ол чүү дээш хилинчектенип турганының чылдагаанын билип алгаш, чамдыкта: «Таанда мени ол хире хилинчектээри албан турган чүве бе?» деп боданып турганы чадапчок. Ооң бажынга ындыг бодалдар кирзе-даа, Бурганның чугаалаан сөстериниң дугайында ол боданып болур турган. Ол чүүл болган болуушкуннарга шын хамаарылгалыг болурунга, ол ышкаш аргалалды алырынга аңаа дузалаан (Ыд. ыр. 93:19).

14. Иовтуң дугайында тоожулалдан чүнү өөренип алыр бис?

¹⁴ Иов-биле болган болуушкун чуртталгавыста чүү эң-не чугула дээрзин сактып чоруурунга болгаш аргалалды алырынга дузалап турар. Иегова бо тоожулалды биске Бижилгелер дамчып кээр сорук кириишкинниң ачызында бисти шыдамык бооп, идегеливис чидирбезин дээш, өөредиг кылдыр кадагалап арттырган (Рим. 15:4). Оон аңгыда моон дараазында кичээлди өөренип алыр бис: Иегованың чагырар эргезин бадыткаарын уттуптар хире кылдыр, хууда бергелеривисче дүлдүне бербес болзувусса эки. Ол ышкаш бо чугула айтырыгның шиитпирлеттинеринге бис база киржип болур бис деп сактып чоруулуңар. Ону кылыр дизивиссе, Иов ышкаш, аар-берге байдалдарга Бурганга шынчы артар ужурлуг бис.

15. Шенелделер үезинде Бурганга шынчы артып тургаш, чүнү бадыткап турар бис?

¹⁵ Иов-биле болган чүүл бисти аргалап болур. Чүге? Хилинчек көрүп турарывыс  дээрге Иегова биске таарзынмайн турар дивээн, харын-даа ол чүүл биске Ооң башкарылгазын деткиир арганы берип турар (У. ч. 27:11). Шыдамык чорук Бурганның ээ көрнүүшкүнүн чаалап алырынга дузалап, идегеливисти быжыглап турар. (Римчилерге 5:3—5 номчувут.) Иовтуң дугайында тоожулал «Дээрги-Чаяакчы аажок өршээлдиг болгаш кээргээчел» деп бадыткап турар (Иак. 5:11). Ынчангаш Ооң чагырар эргезин деткип турар шупту улусту Ол шаңнаар деп чигзинмес бис. Бо бодал биске «бүгү чүвени туруштуу-биле шыдажып» эртеринге дузалаар (Кол. 1:11).

16. Бурганның чагырар эргезин деткиири дыка чугула деп бодувуска чүге үргүлчү сагындырар ужурлуг бис?

¹⁶ Бергелерге таварышкан үелеривисте Иегованың чагырар эргезин бадыткаарының дугайында үргүлчү сактып чорууру белен эвес. Бичии бергелер безин, чүгле оларның дугайында бодап туруп бээр болзувусса, шиитпирлеттинмес ышкаш болур. Ынчангаш нарын байдалдарда Бурганның чагырар эргезин деткиири дыка чугула деп бодувуска үргүлчү сагындырып чоруур болзувусса эки.

17. Иегованың ажылынга доктаамал киржири Ооң чагырар эргезинге хамаарышкан айтырыгны утпазынга биске канчаар дузалап турар?

¹⁷ Иегованың биске дааскан ажылынга доктаамал киржип турар болзувусса, ол чүүл биске Бурганның чагырар эргезиниң дугайында сактып чоруурунга дузалаар. Рене дээр угбавыстың чижээн көрээлиңер. Ооң мээзинче хан чүгүре берген, оон аңгыда ол соксаал чок аарышкылардан хинчектенип, рак-биле база аарып турган. Эмчиге чыткаш, ол ында шупту ажылчыннарга, ол ышкаш аарааннарга болгаш оларга кээп турар улуска суртаалдап турган. Бир катап ол ийи неделя чартык үе дургузунда ниитизи-биле 80 шак суртаалдаан. Чок апаарын билип турган хирезинде, Рене Иегованың чагырар эргезиниң дугайында сактып турган. Ынчангаш ол чүүл ооң хилинчээн чиигедип турган.

18. Иегованың чагырар эргезин деткип турарывыс кандыг түңнелдиг болурун бир угбавыстың чижээ канчаар көргүзүп турарыл?

¹⁸ Аар эвес-даа бергелерге таваржып тургаш, Иегованың чагырар эргезиниң дугайында утпас болзувусса эки. Бир катап Дженнифер дээр угбавыс аэропортка үш хүн хүнзээн. Ол бодунуң рейзин манап турган, ынчалза-даа ону чылдырып-ла турган. Ол чаасканзырап, могап турупкан. Ындыг байдалда кижи бодун белени-биле кээргеп эгелээр. Ынчалзажок ол боду ышкаш могап-шылаан улусту канчаар деткип болурун айтып бээр кылдыр, Иеговадан дуза дилээн. Оон чүү болганыл? Дженнифер дыка хөй улуска суртаалдап, хөй дептерлерни тараткан. «Белен эвес байдалга турган-даа болзумза, Иегова мени йөрээп, Ооң адын алдаржыдар күштү берген» — деп, ол үлешкен. Дженнифер Иегованың күзел-бодалының дугайында сактып чораан деп моон көскү.

19. Иегованың бараалгакчылары Ооң чагырар эргезинге кандыг хамаарылгалыгыл?

¹⁹ Бурганның алыс шын бараалгакчылары Иегованың чагырар эргезиниң кайы хире чугулазын билип турары-биле меге бараалгакчылардан ылгалып турар. Бурганның чону Ооң чагырар эргезин шагдан бээр деткип келген. Христиан кижи бүрүзү Бурганның талазын ээлеп турар мен бе деп бодун үргүлчү хынаныр ужурлуг.

20. Иегованың чагырар эргезин деткип турарывысты көргеш, Ол чүнү миннип турарыл?

²⁰ Шенелделерге туруштуг артып, шынчы бараалгап чорууруңар-биле Иегованың чагырар эргезин деткип турарыңарны Иегова аажок үнелеп турар деп бүзүреп чоруңар (Ыд. ыр. 17:26). Дараазында статьядан ону канчаар кылып болурувусту болгаш чүге ол чүүл шупту күжүвүстү үндүреринге төлептиг дээрзин билип алыр бис.