1, 2. Иегова бисти аар-берге байдалдарга канчаар аргалап чоруурул база бодунуң Сөзүн таварыштыр чүү чүвеге бүзүредип турарыл?

 БИР бот акывыс бодундан улуг, өглүг хуралдың удуртукчузунга сагышсыралдарын чугаалаан. Ол 1 Коринфичилерге 7:28-те бижээн: «Өгленип алган улус амыдыралынга түрегдел көөрүн утпаңар» дээн сөстерниң дугайында боданып турган. «Мында кандыг түрегделдиң дугайында чугаалааныл база өгленип алыр болзумза, ону канчаар ажып эртер мен?» — деп, ол удуртукчудан айтырган. Харыылаарының мурнунда удуртукчу ооң кичээнгейин Павел элчинниң өске сөстеринче угландырган. Павел мынчаар бижээн: «Бисти аргалап, деткип чоруур Бурган... кандыг-даа аар-берге байдалга таварышканывыста... бисти аргалап чоруур» (2 Кор. 1:3, 4).

² Шынап-ла, Иегова — бергелерге таварышканывыста, бисти аргалап чоруур ынакшылдыг Адавыс-тыр. Иегованың силерни деткип турганын азы бодунуң Сөзү таварыштыр херек сүмелерни берип турганын сактыр чадавас силер. Эрткен үеде  бараалгакчыларынга дег, Ол биске база эң-не экини күзеп турар деп бүзүреп болур бис. (Иеремия 29:11, 12 номчувут.)

3. Бо статьяга кандыг айтырыгларны сайгарар бис?

³ Бергелеривистиң чылдагаанын билир болзувусса, оларны шиитпирлээри биске белен болур. Өгленген соонда тургустунар бергелер-биле база шак ындыг. Ынчалза-даа Павелдиң чугаалааны «түрегдел» кайыын тыптып кээп болур? Бурганның бурунгу-даа, амгы-даа үениң бараалгакчыларының үлегери биске аргалалды тып алырынга канчаар дузалап болур? Бо айтырыгларның харыызы биске бергелерни ажып эртеринге дузалаар.

4, 5. Ашак-кадай улус чүү дээш «түрегделге» таваржып болур?

⁴ Кижи төрелгетенниң төөгүзүнүң эгезинде Иегова бир дугаар кижиге кадайны бергеш, мынча дээн: «Эр кижи ада-иезин каапкаш, кадайы-биле катчып, чаңгыс мага-бот апаарының чылдагааны мында-дыр» (Э. д. 2:24). Кижи бүрүзү бачыттыг, ынчангаш өг-бүле туткан улустуң түрегделге, азы бергелерге, таваржып турары кайгамчык эвес (Рим. 3:23). Өгленириниң мурнунда кыс кижи ада-иезинге чагыртып чораан болза, өгленип алгаш, ол ашаанга чагыртыр апаар. Бурган эр кижиге өг-бүлениң баштыңы болур хүлээлгени берген (1 Кор. 11:3). Чамдык чаа өгленген улуска ындыг өскерлиишкиннерге чаңчыгары белен эвес. Ынчалзажок өгленген кыс кижи ам ада-иезинге эвес, а ашаанга чагыртырын миннир ужурлуг деп, Бурганның Сөзү көргүзүп турар. Кадайының азы ашааның төрелдери-биле чөрүлдээлер аныяк өг-бүлеге шыңгыы бергелерни тургузуп болур.

⁵ Кажан ашак-кадай улус төлдүг болур деп баарга, ол чүүл өөрүнчүг-даа, дүвүренчиг-даа минниишкиннерни оттурар. Олар иениң болгаш төрүттүнер чаш төлдүң кадыкшылы дээш дүвүреп болур. Оон аңгыда ажы-төлдү азыраарынга хөй акша херек. Төл төрүттүнүп кээрге, өг-бүлеге улуг өскерлиишкиннер болур. Кадайы ам барык шупту кичээнгейин болгаш үезин төлүнче үндүрүп эгелээр, ооң шупту бодалдары чүгле олче угланыр. Ындыг үеде ашаа бодун уттундурган кылдыр миннип болур. Оон аңгыда ашаа чаа хүлээлгелерлиг апаар, чүге дээрге ол чүгле кадайын эвес, төлүн база азыраар ужурлуг.

6—8. Ажы-төлдүг болуксаан күзели боттанмайн турар ашак-кадай улус чүнү миннип турарыл?

⁶ Ашак-кадай улус оон өске бергелерге база таваржып болур. Олар аажок ажы-төлдүг болуксаар, ынчалза-даа оларның күзели бүтпейн турар. Ол дээш чамдык херээжен улус аажок ундарап турар (У. ч. 13:12). Библейжи үелерде төлдүг бооп шыдавас херээжен улус бак атка кирип турган. Иаковтуң кадайы Рахил үр үе иштинде иштелип чадап кааш, угбазы ажы-төлдүг боорга, сеткили аарып турган (Э. д. 30:1, 2). Ажы-төлү хөй өг-бүлелерлиг чурттарда бараалгап турар миссионерлерден оларның чүге ажы-төл чогун улус болганчок айтырар. Олар шупту чүвени тода болгаш эвилең-ээлдек тайылбырлаарга-даа, чамдык улус: «Бис силер дээш мөргүүр бис!» — дээр.

⁷ Ажы-төлдүг болуксаан, ынчалза-даа иштелип чадап турган, Англиядан угбавыс-биле чүү болганын көрээлиңер. Кажан ооң ай демдээ шуут болбастап каарга, күзели чүгле чаа делегейге боттаныр деп билип кааш, ол идегелин ышкыныпкан. Ынчан ол ашаа-биле уруг азырап алыр деп шиитпирлээн. Ынчалзажок ол: «Мен дөмей-ле муңгарап турган мен. Азыранды төл — төрээн төл эвес-ле болгай» — деп үлешкен.

⁸ Библияда херээжен кижини «ол ажы-төл божуп, камгалалды алыр» дээн  (1 Тим. 2:15). Ынчалза-даа ажы-төлдү божууру болгаш кижизидери дээн сөстер мөңге чуртталга алыр дээн утканы илеретпейн турар. Ынчаарга ажыл-төл биле бажың-балгат дээш сагыш човаашкын херээжен кижини кандыг уткалыг камгалаар? Ооң хоп-чип дажыыр, киришпеске киржир үези чок болур (1 Тим. 5:13). Ындыг-даа болза, ол чүүл өг-бүлеге тургустунар бергелерден ону камгалавайн турар.

9. Өгленген улус кандыг аар шенелдеге таваржып болурул?

⁹ Өг-бүле чуртталгазынга таваржып болур база бир берге бар. Ол дээрге чоок кижизин чидирери-дир. Ынак ашааның азы кадайының өлүмү хөй улуска аар согуг болган, чүге дээрге олар ону манаваан чадавас. Христианнар Иисустуң өлгеннерни диргизер дээн аазаашкынынга быжыг бүзүреп турар. Ол чүүл оларга ажыг-шүжүгнү ажып эртеринге дузалап чоруур (Ин. 5:28, 29). Бурганның Сөзүнде бергелерге таваржып турар улусту аргалап, деткип турар аазаашкыннар хөй. Ам Иегованың бодунуң бараалгакчыларын канчаар аргалап турганының каш чижээн көрээлиңер.

10. Анна аргалалды канчаар алганыл? (Статьяның эгезинде чурукту көрүңер.)

¹⁰ Элкананың ынак кадайы Анна бир тускай шенелдеге таварышкан. Ооң ажы-төлү чок турган, а Элкананың ийи дугаар кадайы Феннананың ажы-төлү хөй турган. (1 Хааннар 1:4—7 номчувут.) Феннана Аннаны «чылдың-на» хомудадыр турган. Ол чүүл ооң сеткилин хилинчектеп турган. Аргалал дилеп, Анна Бурганга минниишкиннерин чугаалаан. Ол «Дээрги-Чаяакчыга үр мөргүп-чаннып» турган деп Библияда бижээн. Ооң дилээн Бурган күүседиптер деп, ол идегеп турган бе? Ындыг болза хөңнү. Кандыг чүү-даа болза, мөргүл соонда ол «чазыга берге[н]» (1 Хаан. 1:12, 17, 18). Ол Иеговага ынанып, Бурган аңаа төлдү бээр азы кандыг-бир арга-биле ону деткиир деп, Анна бүзүреп турган.

11. Оожургал алырынга мөргүл биске канчаар дузалап болурул?

¹¹ Бачыттыг болганывыстан, ол ышкаш Эрликтиң делегейинде чурттап турар болгаш, бергелерге дөмей-ле таваржыр бис (1 Ин. 5:19). Ынчалза-даа Иегова — «бисти аргалап, деткип чоруур Бурган» деп миннири кайы хире өөрүнчүг-дүр! Оон дуза дилеп, мөргүп тургаш, бергелерни ажып эртип болур бис. Анна Иеговага сагыш-сеткилин тө каап берген. Шак ынчаар бис база мөргүлдеривиске чүнү миннип турарывысты анаа чугаалаарындан аңгыда, дүвүрелдеривисти сеткиливистиң ханызындан үлежип, Бургандан дузаны чаннып-дилээр болзувусса эки (Флп. 4:6, 7).

12. Анна дээр дулгуяк херээженге өөрүшкүнү чидирбезинге чүү дузалаан?

¹² Ажы-төлүвүс чок дээш азы чоок киживисти чидиргенивистен сагыш-сеткиливис аарып-даа чоруур болза, оожургалды дөмей-ле тып ап болур бис. Иисустуң үезинде чурттап чораан Анна медээчи өгленгениниң соонда, чеди чыл эрткенде, ашаан оскунуп алган. Библияда ону ажы-төлдүг турган деп биживээн. Анна 84 харлыг турган хирезинде, «ол кажан-даа Бурганның өргээзин каап көрбээн, харын аңаа дүн-хүн дивейн, Бурганга мөргүүр болгаш шээрленир турган» деп Лука 2:37-де бижээн. Анна өөрүшкү биле аргалалды Иеговага бараалгалдан тып алган.

13. Чоок улузувус бисти чөгендирерге, шынчы өңнүктеривис бисти канчаар оожуктуруп болурул? Чижектен чугаалаңар.

¹³ Чоок аралажып турар кады бүзүрээн акы-угбаларывыстың аразындан шынчы өңнүктерни тып ап болур бис (У. ч. 18:25). Пола беш харлыг турда, ооң авазы алыс шынны каапкан деп, ол сактып чугаалаан.  Ол берге үелерде Пола дыка чааскаанзырап турган. Энн дээр эгелекчи угбай аңаа кичээнгей илередип, Бурганче чоокшулаарынга дузалап, улуг деткимчени көргүскен. «Энн мээң төрелим эвес-даа турган болза, ооң ынакшылы болгаш чымчак сеткили мени дыка деткээн. Ооң ачызында Иеговага бараалгалымны уламчылаан мен» — деп, Пола үлешкен. Пола бо үеге чедир Бурганга бараалгап чоруур. Ол авазының чыышче эглип келгенинге аажок өөрүп турар. Энн база Поланың Иеговага бараалгалын уламчылаарынга дузалааны дээш өөрүп турар.

14. Өскелерни оожуктуруп турар улус кандыг йөрээлдерни алыр?

¹⁴ Өскелерниң дугайында ынакшылдыы-биле сагыш човаар болзувусса, ол чүүл багай минниишкиннерден адырлырынга биске дузалаар. Өглүг-даа, бот-даа угбалар Бурган-биле ажылдажып, буянныг медээни өскелерге чугаалап тургаш, улуг өөрүшкүнү миннип турар. Олар Бурганның  күзел-соруун күүседип, Ону алдаржыдарын күзеп турар. Чамдык улуска бараалгал эм-биле дөмей апарган. Чугаажок, кады бүзүрээн акы-угбаларның дугайында сагыш човап, оларга буян кылыр болзувусса, аравыста харылзаа оон-даа быжыг апаар (Флп. 2:4). Павел элчин аңаа хамаарыштыр эки үлегерни көргүскен. Ол, «ие... дег», Фессалоникада христианнарның дугайында сагыш човап турган. Ол ышкаш Павел, «ада... дег», оларны өөредип база үттеп-сургап турган. (1 Фессалоникчилерге 2:6—7, 11, 12 номчувут.)

15. Ажы-төлдү өөредир хүлээлге кымда?

¹⁵ Бистиң деткимчевисти болгаш аргалалывысты өг-бүлелер база хереглеп турар. Чамдыкта чоокта чаа сугга суктурган ада-иелер дуржулгалыг суртаалчылардан, олар ажы-төлүнге алыс шынга быжыгарынга дузалаар кылдыр азы безин оларның-биле библейжи кичээлдер эрттирер кылдыр, дузаны дилеп болур. Библиядан алырга, ажы-төлдү өөредир болгаш кижизидер хүлээлге ада-иелерде (У. ч. 23:22; Эф. 6:1—4). Ынчалза-даа чамдык таварылгаларда ада-иелерге дуза дыка херек, олар ону аажок үнелээр. Ындыг-даа болза, ол чүүл оларны харыысалгадан хоставайн турар. Оларга ажы-төлү-биле хүннүң-не чугаалажыры эргежок чугула.

16. Бичии улус-биле Библияны өөренирде, чүнү херекке алыры чугула?

¹⁶ Бир эвес ада-ие оларның ажы-төлүнге бир кижи Библияны өөредир кылдыр күзеп турар болза, ону хүлээнип алган христиан кижи ада-иениң ролюн бодунче албас ужурлуг. Чамдыкта Херечилерниң бирээзин алыс шынны сонуургавас ада-иелиг төл-биле библейжи кичээлдер эрттирерин дилеп болур. Ындыг таварылгада акый азы угбай бодун ооң ада-иези эвес-тир мен деп сактыр ужурлуг. Библейжи кичээлди төлдүң бажыңынга, ооң ада-иези азы өске чедишкен христиан кижи чанынга турда, чок болза улус бар таарымчалыг черге эрттирери мерген угаанныг болур. Ынчан кым-даа шын эвес түңнелдерни үндүрбес. Чоорту ындыг ада-иелер ажы-төлүнүң Бурган-биле харылзаазын боттары быжыглап шыдаар апаар дээрзинге идегээр-дир бис.

17. Оолдар болгаш кыстар чоок улузун канчаар аргалап, деткип болур?

¹⁷ Бурганны дыңнаарын болгаш Аңаа ынак боорун кызып чоруур оолдар-кыстар чоок улузун аргалап, деткип болур. Канчаар? Чижээ, ада-иезин хүндүлеп, ол ышкаш оларга бажың ажылынга дузалажып тургаш. Оон ыңай олар Иеговага шынчы артып чорууру-биле өг-бүлезиниң чаагай чоруунга үлүүн киирип турар. Суг халавының мурнунда чурттап чораан, Иеговага бараалгап турган Ламех оглу Нойнуң дугайында мынча дээн: «Дээрги-Чаяакчыга каргаттырган чер кырынга бистиң кадыг ажыл-агыйлыг амыдыралывысты ол чиигедир». Ол өттүр билген медеглел, кажан черден ол каргыш адырлы бээрге, күүсеттинген (Э. д. 5:29; 8:21). Аныяк христианнар бөгүн база чоок улузунга бергелерни ажып эртеринге дузалавышаан, оларны аргалап болур, а келир үеде Суг халавындан артык коргунчуг халапты ажып эртеринге дузалап болур.

18. Кандыг-даа шенелдеге туруштуг артарынга биске чүү дузалаар?

¹⁸ Библейжи үлегерлерниң дугайында ханы боданырының, мөргүлдүң, ол ышкаш Иегованың чону-биле сырый аралажып турарының ачызында миллион-миллион кижилер аар-берге байдалдарында аргалалды тып ап турар. (Ырлар 144:18, 19 номчувут.) Кандыг-даа шенелдеге чүгле Иегова бисти аргалап шыдаар деп сактып тургаш, туруштуг артып шыдаар бис.