1. Иегова кезээде чөптүг шииткел үндүрер деп чүүлге бүзүрелин Авраам канчаар көргүскен? (Статьяның эгезинде чурукту көрүңер.)

 «БҮГҮ черниң Шииткекчизи шын эвес шииткел кылып болур бе?» — деп айтыргаш, Авраам Иегованың Содом биле Гоморраны чөптүг шиидеринге бүзүрелин илереткен (Э. д. 18:25). Иегова шын эвес шииткел кылып, буруулуг кижи биле актыг кижини деңге шаажылап шыдавас деп, Авраам ыяк бүзүреп турган. Безин ол: «Ындыг болбас ужурлуг!» — деп хөлзеп чугаалаан. 400 хире чыл эрткенде Иегова Моисейге бодунуң дугайында мындыг сөстерни бижиирин дааскан: «Ол — бистиң Хаявыс, Ооң ажыл-херектери болбаазыраңгай, Ооң шупту оруктары дорт; Бурган сөзүнге шынчы, Ында меге чүү-даа чок, Ол чөптүг болгаш шынныг» (Ы. х. к. 31:19; 32:4).

2. Иегованың шииткелдери кезээде чөптүг деп, кайыын билир бис?

² Иегованың шииткелдери кезээде чөптүг деп чүге чугаалап болурул? Чүге дизе Ол чөптүг чорукту канчаар илередириниң тергиин үлегерин көргүзүп чоруур. Ынчангаш Ол кандыг-даа байдалды шын талазындан көрүп билир. Оон артык, Бурганның Сөзүнде: «Ол чөптүг чорук биле шын шииткелге ынак» — деп бижээн (Ыд. ыр. 32:5).

3. Бо делегейде улус кандыг чөптүг эвес чорукка таваржып турарыл? Чижектен чугаалаңар.

 ³ Иегованың шииткелдери кезээде чөптүг деп чүүл ак сеткилдиг кижилерни дыка-ла оожуктуруп турар, чүге дээрге бо делегей чөптүг эвес чорук-биле долган! Чөптүг эвес чоруктан когараан улус көвей. Чижээ, чамдык актыг улусту кылбаан херектери дээш хосталгазын казып шииткен. Безин чадаарда ындыг улус кара-бажыңга он-он чылдар иштинде олурган соонда, суд экспертизазының ДНК анализи деп чаа хыналда тыптып кээрге, оларның херээн эде көргеш, хостап турган. Ындыг чөптүг эвес чорукту дыңнааш, кижиниң кылыы хайныр. Ынчалза-даа христианнарга ёзулуг шенелде апарып болур оон-даа берге чүүл бар. Чүл ол?

4. Христиан кижиниң бүзүрелин чүү шенеп болур?

⁴ Христианнар бо делегейге чөптүг эвес чорукка таваржы берип болурун билип турар. Ынчалза-даа чыыш иштинге бисти азы өске кижини чөптүг эвес ышкаш кылдыр аажылап турар болза, ол чүүл бүзүреливиске ёзулуг шенелде апарып болур. Бир эвес христианнарның бирээзи силерниң-биле чөптүг эвес алдынган деп бодап турар болзуңарза, чүнү канчаар силер? Ол чүүл бүзүрелиңерге моондак апарып болур бе?

5. Чыышка чөптүг эвес чорукка таваржы берип болурувус чүге бисти кайгатпас ужурлуг?

⁵ Шуптувус бачыттыг болгаш, үе-үе болгаш-ла, чазыптар бис. Чыышка акы-угбалар биске хамаарыштыр чөптүг эвес алдынып болур азы боттарывыс-даа оларны ынчаар аажылап болур бис (1 Ин. 1:8). Ындыг таварылгалар ховар-даа болза, Бурганга шынчы христианнарны ол чүүл кайгатпайн турар. Кады бүзүрээннеривис бисти хомудадып-даа турар болза, Иегова биске, Аңаа шынчы артарынга дузалаар, ажыктыг сүмелерни берген (Ыд. ыр. 54:13—15).

6, 7. Бир акый кандыг чөптүг эвес чорукка таварышкан база аңаа шын хамаарылгалыг болурунга кандыг шынарлар дузалаан?

⁶ Вилли Диль деп акывыс-биле чүү болганын көрээлиңер. 1931 чылдан эгелеп, ол Бернде (Швейцария) Вефилге бараалгап турган. 1946 чылда ону Нью-Йоркта (АКШ) Галаад школазының 8-ки клазынче чалаан. Кезек үе эрткенде ону эргий кезиир хайгааракчы кылдыр Швейцарияже томуйлаан. Ол бодунуң допчу намдарынга мынчаар чугаалаан: «1949 чылдың майда Бернде салбырже өгленир деп турарымның дугайында сөс дамчыткан мен». Харыызы кандыг болганыл? Диль акыйның шупту хүндүткелдиг хүлээлгерин казааш, чүгле доктаамал эгелекчи бооп бараалгаарын чөпшээрээн. Аңаа илеткелдер чугаалаарын хоруп каан, а чыышта ха-дуңма ооң-биле болгаш кадайы-биле, чыыштан үндүрткен кижилер-биле дег, мендилешпестеп калган.

⁷ Ону ажып эртеринге Диль акыйга чүү дузалааныл? Библия өгленирин хорувайн турар деп, олар билип турган болгаш, Иеговага мөргүп, Аңаа ынанып турганын ол тайылбырлаан. Кажан акылар өглениринге хамаарыштыр шын эвес көрүжүн өскертиптерге, аңаа хүндүткелдиг хүлээлгелерин эгидип берген. Иеговага бердинген чоруу дээш ол шаңнаткан a. Бодувуска мындыг айтырыгларны салып болур бис: «Мээң-биле ындыг таварылга болур болза, канчаар мен? Иегованы шыдамык манаар мен бе азы шупту чүвени  бодумнуң холумга аптар мен бе?» (У. ч. 11:2; Михей 7:7 номчувут).

8. Чөптүг эвес чорук болган деп, чүге бодай берип болур бис?

⁸ Сактырыңарга, силерге азы чыышта бир кижиге чөптүг эвес хамаарылга көргүскен ышкаш, ынчалза-даа ол шын эвес бооп болур. Чүге? Чүге дээрге бис тергиин эвес болгаш, байдалды шын эвес таладан көрүп азы барымдааларның шуптузун билбейн турар чадавас бис. Саналывыс шын азы шын эвес-даа болза, Иеговага хорадавас дээш, Аңаа мөргүвүшаан, ынанып, бердинген артар болзувусса эки. (Чугаалар 19:3 номчувут.)

9. Бо болгаш дараазында статьяларга кандыг чижектерни сайгарар бис?

⁹ Библейжи үелерде Иегованың бараалгакчыларының чөптүг эвес чорукка таварышканының үш чижээн көрээлиңер. Бо статьяга акыларының багай аажылаашкынынга таварышкан Авраамның оглунуң оглунуң оглу Иосифтиң дугайында чугаалажыр бис. А дараазында статьяга Ахав хаанны Иегованың канчаар аажылаанын болгаш Сирияда Антиохияга Пётрнуң канчаар алдынганын сайгарар бис. Бо чижектерден бүгү чүвеже Иегованың көрүжү-биле көөрүнге болгаш ылаңгыя силерниң-биле чөптүг эвес алдынган ышкаш үеде Иегова-биле хамаарылгаңарны кадагалаарынга дузалаар ажыктыг кичээлдерни шиңгээдип алырын кызыңар.

10, 11. а) Иосиф-биле чүү болган? б) Иосиф кара-бажыңга тургаш, кандыг арганы ажыглаан?

¹⁰ Иегованың шынчы бараалгакчызы Иосиф чүгле өске улустан эвес, а чаңгыс ададан төрээн акыларындан база когараан. Ол чүүл аңаа ылаңгыя аарышкылыг болган. Ол 17 харлыг турда, акылары ону оорлааш, кулданыгже садыпкан. Шак ынчаар Иосиф Египетке келген (Э. д. 37:23—28; 42:21). Кезек үе эрткенде, ону күштээшкин кылыр деп турганынга меге буруудаткаш, истелге-даа кылбайн, кара-бажыңче киир октапкан (Э. д. 39:17—20). Иосиф кулданыгга, а ооң соонда кара-бажыңга 13 хире чыл иштинде хилинчектенип келген. Кады бүзүрээн ха-дуңмавыстың аразындан бир кижи бисти чөптүг эвес аажылаан болза, Иосифтиң чижээ биске канчаар дузалаар?

¹¹ Иосифке херектеннерниң бирээзинге ооң-биле чүү болганын чугаалаар арга тыптып келген. Ол херектен, фараонга бараан бооп турган, кол кундага тудукчузу болган. Бир катап ол кижи дүш дүжээн. Ооң утказын Бурган Иосифке ажыдып берген. Иосиф кундага тудукчузунга, ол катап фараонга бараан болуп эгелээр деп тайылбырлааш, бодунуң байдалының дугайында чугаалаан. Иосифтиң чүнү чугаалаанындан база чүнү чугаалаваанындан хөй чүвеге өөренип ап болур бис (Э. д. 40:5—13).

12, 13. а) Иосиф холун сула салып алгаш олурбаан деп чүге чугаалап болурул? б) Кундага тудукчузунга Иосиф чүнүң дугайында чугаалавааныл?

¹² Эге дөс 40:14, 15-ти номчувут. Эскерип көрүңер даан, Иосиф «еврейлерниң чуртундан мени оорлап эккелген» дээн. Иосиф чөптүг эвес чоруктан когараан деп билдингир турган. Ону актыг черге буруудаткаш, кара-бажыңче октапкан деп, ол кундага тудукчузунга чугаалаан. Ынчангаш ол «фараонга мээң адымны сагындырып... көрем» деп оон дилээн. Чүге? Чүге дээрге ол кара-бажыңдан үнүксеп турган.

¹³ Иосиф холун сула салып алгаш олурган бе? Чок! Ол чөптүг эвес чоруктан  чаңгыс удаа эвес когарап чораан болгаш, аңаа дузалап болур кижиге байдалын тайылбырлаан. Ынчалза-даа Иосифтиң ону оорлапкан улустуң дугайында чугаалап турганын Библияда кайда-даа биживээн. Ол фараонга безин чүнү-даа ыыттаваан. Кажан Иосифтиң акылары Египетке келгеш, ооң-биле эптежип алырга, фараон оларны эки хүлээп алгаш: «Египетте бар бүгү-ле эки чүүлдерни оларга бээр мен» деп чугаалааш, ооң чуртунга чурттап артарын саналдаан (Э. д. 45:16—20).

14. Чыышта бир кижи бисти хомудадыпкан-даа болза, хоп таратпазынга биске чүү дузалаар?

¹⁴ Бир эвес христиан кижи ооң-биле чөптүг эвес алдынган деп бодап турар болза, ооң дугайында өскелерге хоп тарадырындан ол оваарныр ужурлуг. А бир эвес аар бачыт дугайында чугаа чоруп турар болза, удуртукчулардан дуза дилээри болгаш оларга болган чүүлдү чугаалаары шын болур (Лев. 5:1). Бачыт ындыг кончуг аар эвес болза, өскелерни (безин хуралдың удуртукчуларын) киириштирбейн, чөрүлдээни хөй кезиинде чүгле хомудадыкчы-биле шиитпирлеп болур. (Матфей 5:23, 24; 18:15 номчувут.) Ынчангаш, Бурганга бердинген бооп, билишпейн баар таварылгаларны библейжи дүрүмнерге даянып, шиитпирлээлиңер. Чамдыкта шупту чүвени өскээр билип алганывысты болгаш кымның-даа биске удур чөптүг эвес алдынмаанын билип каар бис. Ынчан байдалды нарыыдадып, акывыстың азы угбавыстың дугайында хоп таратпаанывыска аажок өөрүүр бис! Бистии шын-даа болза, хоп таратканы-биле чөрүлдээни шиитпирлээри болдунмас деп сактып чоруулуңар. Иеговага болгаш ха-дуңмага бердинген  болзувусса, хоп дажывас бис. «Чүгле арыг шынчы оруктар-биле чоруур» кижиниң дугайында ыр күүседикчизи мынча дээн: «[Ол] сеткилиниң ханызындан шынны чугаалаар, аксы-дылы-биле нүгүлдевес, өске кижиге бак чүве кылбас, чанында кижини бак атка киирбес» (Ыд. ыр. 14:2, 3; Иак. 3:5).

15. Иеговага бердинген бооп артканының ачызында Иосиф канчаар шаңнатканыл?

¹⁵ Иосифтиң Иегова-биле кандыг хамаарылгалыг турганындан оон-даа чугула кичээлди шиңгээдип ап болур бис. Берге 13 чылдың дургузунда Иосиф ооң-биле болуп турган чүүлче Бурганның караа-биле көрүп турган (Э. д. 45:5—8). Ол Иегованы кажан-даа буруудатпайн чораан. Иосифке улус чеже-даа хора чедирген болза, ол каржыланы бербээн. Оон-даа чугула чүүл, улустуң частырыглары болгаш каржы херектери ону Иеговадан ыратпаан. Иосиф Иеговага бердинген бооп арткаш, Бурганның чөптүг эвес чорукту ап каапканын база ону болгаш ооң өг-бүлезин йөрээгенин көрген.

16. Чыыш иштинге чөптүг эвес чорукка таварышкаш, Иегова-биле найыралывысты чүге быжыглаар ужурлуг бис?

¹⁶ Иосиф ышкаш, Иегова-биле хамаарылгавысты үнелеп, ону кадагалаар ужурлуг бис. Улустуң частырыглары бисти ынак Бурганывыстан ырадыптарын чөпшээревээлиңер (Рим. 8:38, 39). Ха-дуңмавыстың кайы-бирээзи бисти хомудадыптар болза, Иосифти өттүнүп, Иеговаже чоокшулавышаан, байдалче Ооң караа-биле көөрүн кызаалыңар. Библияның өөредип турарынга дүүштүр берге байдалды шиитпирлээрин оралдашканывыс соонда бүгү чүвени Иеговага хүлээдипкеш, байдалды Ол чогуур үеде, Бодунга таарымчалыг кылдыр эдиптер деп бүзүрээр ужурлуг бис.

17. «Бүгү черниң Шииткекчизинге» бүзүреп турарывысты канчаар көргүзүп болур бис?

¹⁷ Бо делегейде чурттап турар болганывыста, чөптүг эвес чорукка моон-даа соңгаар таваржыр бис. Ховар таварылгаларда силерге азы эштериңерге чыыш иштинде бир кижи чөптүг эвес алдынган ышкаш кылдыр көстүп болур. Ындыг чүүл силерге моондак болбазын (Ыд. ыр. 118:165). Бурганга бердинген артып, Оон дуза дилеп, мөргүвүшаан, Аңаа ынаныңар. Ол ышкаш шупту барымдааларны билбезивисти биче сеткилдии-биле миннир ужурлуг бис. Байдалды шын эвес билип алган чадавас бис. Иосифтиң таварылгазындан алырга, багай чугаадан ойталаар болзувусса эки, оон башка байдалды дам-на дорайтадып ап болур бис. Байдалды холувуска алырының орнунга, Бурганга бердинген бооп артарынче хөөнненгеш, Иегованың шупту чүвени эдиптеринге чедир шыдамык манаалыңар. Ынчан Иегова бисти, Иосифти ышкаш, албан йөрээр. «Бүгү черниң Шииткекчизи», Иегова, шын эвес шииткел кылбас деп чигзинмес бис, чүге дизе Ооң «шупту оруктары дорт» (Э. д. 18:25; Ы. х. к. 32:4).

18. Дараазында статьяга чүнү сайгарар бис?

¹⁸ Дараазында статьяга библейжи үелерде Иегованың бараалгакчыларының чөптүг эвес чорукка таваржып турганының өске ийи чижээн сайгарар бис. Ол чижектер томаарыыр биле өршээчел чорук Иегованың чөптүг чорукче көрүжүн өттүнеринге канчаар дузалаарын көргүзер.