1. Бүзүреливис бар дээш чүнү миннир ужурлуг бис?

 БҮЗҮРЕЛ — дыка үнелиг шынар. Ол кижи бүрүзүнде чок (2 Фес. 3:2). Ынчалзажок Бурган шупту бараалгакчыларынга бүзүрелди хайырлап турар (Рим. 12:3; Гал. 5:22). Ол дээш Иеговага аажок өөрүп четтирер-дир бис!

2, 3. а) Бүзүрели бар кижини кандыг йөрээлдер манап турар? б) Кандыг айтырыгларны сайгарар бис?

² Дээрде Адавыс Бодунче кижилерни Оглун таварыштыр хаара тудуп турар. Иисуска бүзүрээр кижи бачыттары дээш өршээлди ап болур. Ооң ачызында кижи Иегова-биле чоок хамаарылгалыг апарып турар. Ындыг найырал кезээ-мөңгеде уламчылап болур (Ин. 6:44, 65; Рим. 6:23). Кайгамчыктыг-ла идегел-дир! Бис шуптувус бачыттыг болгаш, өлүмге төлептиг-даа болзувусса, Иегова бистиң буянныг херектерже чүткүп болурувусту көрүп каан (Ыд. ыр. 102:10). Ол авыралын көргүзүп, буянныг медээни чүлдү-чүрээвис-биле хүлээп алырынга биске дузалаан. Иисуска бүзүрей бергеш, мөңге амыдыралче идегелдиг апарган бис. (1 Иоанн 4:9, 10 номчувут.)

 ³ Ынчап кээрге, бүзүрел деп чүл ол? Олче чүгле Бурганның биске кандыг йөрээлдер белеткээнин медереп билип турарывыс кирип турар бе? Оон-даа чугула чүүл, бүзүреливисти канчаар илередир ужурлуг бис?

4. Бүзүрел дээрге бир-ле чүвени анаа-ла угаап билиринден артык чүүл-дүр деп чүге чугаалап болур? Тайылбырлап көрүңерем.

⁴ Бүзүрел дээрге Бурганның күзел-бодалын чүгле угаап билири эвес, а аңаа дүүштүр алдынарынче кижини оттурар иштики күш-түр. Бир эвес кижи Бурганның камгалал алзын дээш, биске кылган бүгү чүвезинге бүзүрээр болза, ол өскелер-биле буянныг медээни үлешпейн барып шыдавас. Павел элчин мынча деп тайылбырлаан: «Ол медээ бо-дур: Иисус — Дээргивис дээрзин аксың-биле хүлээп көрүп, чугаалаар болзуңза база Бурган Ону өлүглер аразындан катап диргискен деп чүрээңге бүзүрээр болзуңза, камгалалды алыр сен. Чүге дээрге чүрээ-биле бүзүрээр кижи — агартыышкынны алыр, бүзүрээнин ажыы-биле чугаалаар кижи — камгалалды алыр» (Рим. 10:9, 10; 2 Кор. 4:13).

5. Бүзүрелди быжыглаары чүге чугула база ону канчаар кадагалап ап болурул? Чижектен чугаалаңар.

⁵ Бурганның чаа делегейинге мөңге чурттаксаар болзувусса, бүзүрелди илередип, ону кадагалаар ужурлуг бис. Бүзүрел суг хереглээр үнүшке дөмей. Кылымал үнүшке бодаарга, дириг үнүш үргүлчү өзүп турар. Багай суггарар болза, үнүш кадып каар. А үргүлчү суггарар болза, ол быжыг болгаш чараш апаар. Суг чокта кадык үнүш безин оңуп каар. Ындыг чүүл бүзүреливис-биле база бооп болур. Бир эвес ону быжыглавас болзувусса, ол кошкап, сөөлүнде барып чиде бээр (Лк. 22:32; Евр. 3:12). А бир эвес бүзүреливис дээш сагыш човаар болзувусса, ол быжыг болур. Ынчан «бүзүреливис өй-кызыгаар чок өз[ер]» (2 Фес. 1:3; Тит. 2:2).

6. Еврейлерге 11:1-ден алырга, бүзүрел кандыг ийи талалыгыл?

⁶ Бүзүрелдиң библейжи тайылбырын Еврейлерге 11:1-де бижээн (номчувут). Моон алырга, бүзүрел ийи талалыг. Бирээде, ол «идегеливисти боттандырып» турар, чижээ, келир үеде каржыны узуткаарынга болгаш чаа делегейни тургузарынга хамаарыштыр. Ийиде, ол «каракка көзүлбес чүүлдерни бадыткап турар». Бо шүлүкте «бадыткап турар» деп очулдуртунган грек сөстүң утказы каракка көзүлбес чүүлдерниң херек кырында барын шынзыдып турар: Иегова Бурганны, Иисус Христосту, дээрниң төлээлерин, дээрде Бурганның Чагыргазын (Евр. 11:3). Идегеливисти дириг деп, ол ышкаш Бурганның Сөзүнде бижээни каракка көзүлбес чүүлдерге бүзүреп турарывысты канчаар көргүзүп болур бис? Сөстеривис-биле болгаш бүзүрелди херечилээн ажыл-херээвис-биле.

7. Быжыг бүзүрелдиг болуру дээрге чүл ол дээрзин Нойнуң үлегери канчаар көргүзүп турар? (Статьяның эгезинде чурукту көрүңер.)

⁷ «Ам-даа көрбээни чүве дугайында сагындырыг алгаш, бодунуң өг-бүлезин камгалаар дээш, Бурганны хүндүлээр сеткили-биле бажың-хеме тудуп алган» Нойнуң быжыг бүзүрелиниң дугайында Еврейлерге 11:7-де бижээн. Ной быжыг бүзүрелдиг болгаш, хөлчок улуг бажың-хемени туткан. Долгандыр улус ооң чүге ындыг улуг тудугну тудуп турарын сонуургап айтырып турган чадавас. Ной оларга харыылавайн турган бе азы оларның херээ эвес-тир деп турган бе? Чок. Нойнуң бүзүрели ону дидим суртаалдаарынче болгаш кел чыдар Бурганның шииткелиниң дугайында  улуска чугаалаарынче оттуруп турган. Ной Иегованың: «Черде чурттап турар кижилерниң амыдыралын үзүп каар мен, чүге дээрге оларның каржы-бак үүлгедиглери чер кырын долган-дыр... А мен черже суг халавын чорудупкаш, дээр адаанда бүгү-ле тынныг чүвени узуткап каар мен» — дээн сөстерин дамчыдып турган чадавас. Оон аңгыда Ной чүгле чаңгыс камгаланыр арга барын — Бурганның айытканы ёзугаар бажың-хемеже кирерин — кижилерге чугаалап турганы чадапчок. Ийе, Ной «чөптүг-шынныг чоруктуң суртаалчызы» турган, оозу-биле ол быжыг бүзүрелин бадыткаан (Э. д. 6:13, 17, 18; 2 Пет. 2:5).

8. Ёзулуг бүзүрел дээрге чүл ол дээрзин Иаков канчаар тайылбырлаан?

⁸ Бүзүрелдиң тайылбырын Павел элчинниң бижээн соонда, үр болбаанда, Иаковтуң чагаазы бижиттинген чадавас. Павел-даа, Иаков-даа ёзулуг бүзүрел ажыл-херектерден илдең болур деп тайылбырлаан. Иаков мынча деп бижээн: «Сен меңээ бүзүрелиңни ажыл-херектериңден аңгы кылдыр көргүс че. А мен сеңээ ажыл-херектеримден илдең апаар бүзүрелимни көргүзер мен» (Иак. 2:18). Ооң соонда ол анаа бүзүрээри биле ажыл-херектер-биле бүзүрелди көргүзери — ийи аңгы чүүлдер-дир деп демдеглээн. Буктар безин Бурган бар  деп бүзүреп турар, ынчалза-даа оларда ёзулуг бүзүрел чок. Харын олар Иегованың күзел-соруунуң чогуп бүдеринге шаптыктаарын кызып турар (Иак. 2:19, 20). Иаков оларга Бурганның бурунгу быжыг бүзүрелдиг бараалгакчызын удурланыштырып деңнээн: «Бодунуң оглу Исаакты өргүл бедигээжинче салгаш, Авраам өгбевис Бурганның мурнунга ажыл-херээ-биле агарып үнмежик бе? Ооң ажыл-херээ биле бүзүрелиниң тудуш харылзаалыын, ажыл-херээн дамчыштыр ооң бүзүрели эчизинге четкенин көрүп тур сен». Түңнеп тургаш, бүзүрелди ажыл-херек-биле көргүзер херек деп Иаков катап тайылбырлаан: «Мага-боттуң амы-тын чокта өлүү дег, Бурганга бүзүрел база ажыл-херек чокта өлүг» (Иак. 2:21—23, 26).

9, 10. Бүзүрелди илередириниң чугулазын Иоанн элчин биске канчаар көргүскен?

⁹ Үжен ажыг чыл эрткенде, Иоанның Буянныг медээзи болгаш ооң үш чагаазы бижиттинген. Иоанн элчин ёзулуг бүзүрелдиң утказын, ооң мурнунда ооң дугайында, Бурганның сүлдезинге бүргеткеш, бижээн улус дег, эки билип турган бе? Ийе, чүге дизе «бүзүрелди илередир» деп очулдуртунган грек кылыг сөзүн Иоанн өскелерден артык хөй ажыглаан.

¹⁰ Иоанн мынча деп бижээн: «Оглунга бүзүрээн кижи мөңге амыдыралдыг болур. А Оглун тооп дыңнаваан кижи мөңге амыдыралды көрбес, харын Бурганның килеңи ооң-биле артып каар» (Ин. 3:36). Бүзүрелче Иисустуң чагыгларынга дыңнангыр болуру кирип турар. Бүзүрелди соксаал чокка илередир ужурлуг дээн Иисустуң сөстерин Иоанн болганчок ажыглаар турган (Ин. 3:16; 6:29, 40; 11:25, 26; 14:1, 12).

11. Алыс шынны билиривис дээш Бурганга четтиргенивисти канчаар илередип болур бис?

¹¹ Иегова ыдыктыг сүлдезиниң дузазы-биле биске алыс шынны ажыдып, буянныг медээге бүзүрээр арганы бергени дээш, Аңаа аажок өөрүп четтирер-дир бис! (Лука 10:21 номчувут.) Иеговага үргүлчү четтиргенивисти илередири дыка чугула, чүге дизе Ол бисти Бодунче «бүзүреливистиң Баштакчызы болгаш Эчизинге чедирикчизи» болур Оглун таварыштыр хаара туткан (Евр. 12:2). Бурганның авыралы дээш четтиргенивисти бүзүреливисти улаштыр быжыглап, Бурганга мөргүп, Ооң Сөзүн өөренип турарывыс-биле илередип болур бис (Эф. 6:18; 1 Пет. 2:2).

12. Бүзүрелди канчаар илередип болур?

¹² Иегованың аазаашкыннарынга бүзүреп турарывысты ажыл-херээвис-биле үргүлчү көргүзер ужурлуг бис. Ону канчаар кылып болурунуң хөй аргалары бар. Чижээ, Бурганның Чагыргазының дугайында соксаал чок суртаалдап, өөреникчилер белеткээр ажылга киржип, ол ышкаш «бүгү улуска, ылаңгыя бүзүрели чаңгыс ха-дуңмавыска, буянны көргүзүп» болур бис (Гал. 6:10). Оон база «биеэги бүдүжүвүстү ооң бүгү үүлгедиглери-биле адыра сивирип кааптар» дээш, күжениишкиннерни үндүрери эргежок чугула, чүге дизе Бурган-биле харылзаавысты үрепки дег шупту чүведен дезерин күзээр болгай бис (Кол. 3:5, 8—10).

13. Бурганга бүзүрээри кайы хире чугула? Ону чүнүң-биле деңнеп болур база чүге?

¹³ Библияда мынча дээн: «А бүзүрел чок болза, Бурганның сеткилинге кирери канчап болдунарыл? Бурганче чоокшулап кел чыдар кижи бүрүзү Ол бар деп база Олче чүткүп чоруур улуска Ооң шаңналы турар деп бүзүрээр ужурлуг болгай» (Евр. 11:6). Библиядан алырга, «Бурганга бүзүрээри» дээрге алыс шын христиан болур дээн кижиниң салыр «үндезининиң» бир кезээ-дир (Евр. 6:1). Ынчалзажок ол үндезинни тудуп тургаш, христиан кижи Бурганның ынакшылынга артар дизе, бүзүрелден аңгыда өске-даа шынарларны сайзырадыр ужурлуг. (2 Пётр 1:5—7 номчувут; Иуда 20, 21.)

14, 15. Бүзүрелди ынакшыл-биле деңнээр болза, ооң дугайында чүү деп болурул?

 ¹⁴ Христиан Грек Бижилгелерни бижип турган улус, бүзүрелдиң чугулазын демдеглээр дээш, ооң дугайында чүс-чүс катап бижээн. Оон өске кандыг-даа христиан шынарның дугайында Библияда ынча хөй катап биживээн. Ынчап кээрге, бүзүрел — эң-не чугула христиан шынар бе?

¹⁵ Бүзүрел биле ынакшылдың дугайында чугаалааш, Павел мынча деп бижээн: «Ол ышкаш дагларны шимчедиптер бүзүрел менде бар-даа болза, а ынакшылым чок болза, мен чүү-даа эвес-тир мен» (1 Кор. 13:2). «Ыдыктыг хоойлуда эң чугула айтыышкын кайызыл?» деп Иисустан айтырарга, эң-не чугула шынар — Бурганга ынакшыл-дыр деп, ол тода көргүскен (Мф. 22:35—40). Ынакшылче хөй-ле христиан шынарлар кирип турар. Оларның бирээзи — бүзүрел. Библияда ынакшылдың «бүзүрели... кажан кезээде хевээр артар» дээн. Ынчап кээрге, ынакшыл Бурганның биске Библияны таварыштыр чугаалаан чүүлдеринге бүзүрээр кылдыр дузалап турар (1 Кор. 13:4, 7).

16, 17. Библияда бүзүрел биле ынакшылдың кады бижиттинген чижектерин чугаалап көрүңерем. Ол шынарларның кайызы эң чугула база чүге?

¹⁶ Бүзүрел биле ынакшыл чугула болганда, Библияда олар болганчок-ла кады таваржып турар. Чамдыкта оларны чаңгыс домакта-даа бижээн боор. Ынчангаш Павел ха-дуңмазын «бүзүрел болгаш ынакшылды — куяк хеп дег» кедип аалыңар деп кыйгырып турган (1 Фес. 5:8). Пётр: «Христосту көрбээн-даа болзуңарза, дөмей-ле Аңаа ынак апарган силер. Ону ам көрбейн-даа турзуңарза, дөмей-ле Аңаа бүзүрей берген силер» — деп бижээн (1 Пет. 1:8). Иаков шилип чагдырган акылардан: «Бурган бо делегейниң ядыы улузун чүге шилип алганыл? Оларны бүзүрел-биле байыткаш, Аңаа ынак улуска аазааны Чагырганың салгакчылары кылып каар дээш эвес бе?» — деп айтырган (Иак. 2:5). Иоанн: «Бурганның биске чагыы бо-дур: Ооң Оглу Иисус Христостуң адынга бүзүрээр база бот-боттарывыска ынак болур ужурлуг бис» — деп бижээн (1 Ин. 3:23).

¹⁷ Бүзүрел аажок чугула, ынчалза-даа идегеливис биле Бурганның аазаашкыннары боттаны бээрге, оларга бүзүрээри херекчок апаар. А Бурганга болгаш чанывыста кижиге ынакшылды көргүзерин уламчылаар бис. Ынчангаш Павел мынча деп бижээн: «Ынчаарга ам кезээ шагда артып каар үш чүүл: бүзүрел, идегел, ынакшыл бар. Ынчаарга оларның эң чугулазы — ынакшыл» (1 Кор. 13:13).

18, 19. Бурганның чонунуң илередип турары бүзүрелдиң ачызында кандыг кайгамчыктыг чүүл болдунганыл база ону кым кылган?

¹⁸ Бөгүн Бурганның бараалгакчылары Бурганның тургускан Чагыргазынга бүзүреп турар. Ооң ачызында аңгы-аңгы чурттарда сес миллион ажыг улустуң аразында тайбың биле демниг чорук тергиидеп турар, чүге дизе олар Бурганның ыдыктыг сүлдезиниң үре-түңнели болур шынарларны сайзырадырын кызып турар (Гал. 5:22, 23). Иегова бүзүреливисти болгаш ынакшылывысты кайгамчыктыг кылдыр йөрээген-дир!

¹⁹ Кижилер боттарының күжү-биле ындыг чүүлдү чедип ап шыдавас. Ону Бурганывыс Иегова кылган. Ол чүүл Иегованы алдаржыдып турар база «мөңге, чиде бербес бадыткал демдээ» болур (Иса. 55:13). Шынап-ла, бүзүреливис дамчыштыр камгалал алганывыс — Бурганның белээ-дир (Эф. 2:8). Удавас чер кырынга тайбың биле демниг чорук тергиидээр. Ынчан тергиин, чөптүг-шынныг болгаш аас-кежиктиг кижилер кезээ-мөңгеде Иегованың адын алдаржыдар. Ынчангаш моон-даа соңгаар Иегованың аазаашкыннарынга бүзүреливисти илередиилиңер!