1, 2. Хөй аныяк христианнар кандыг бергеге таваржып турарыл база ону ажып эртеринге оларга чүү дузалаарыл?

 «ТААНДА сен, угаанныг кижи, Бурганга канчап бүзүрээр сен?» — деп, Великобританиядан кыс дуңмавыска ооң чаңгысклассчызы чугаалаан. А Германиядан дуңмавыс мынча деп бижээн: «Башкыларымның саналы-биле алырга, бүгү чүвени чаяап каан деп библейжи медээ анаа-ла тоолчургу чугаа бооп турар. Өөреникчилерниң эволюцияга бүзүреп турары — оларга кайгамчык эвес». Франциядан кыс дуңмавыс: «Школамда башкылар өөреникчилерниң кайы-бирээзи ам-даа Библияга бүзүреп чоруур деп дыңнааш, кайгаарлар» — дээн.

² Дыка хөй Иегованың аныяк бараалгакчыларның болгаш Ооң дугайында чаа билип эгелээн кижилерниң чугаазы-биле алырга, долгандыр улус оларны Чаяакчыга бүзүрээрин соксаткаш, бо делегейде нептерээн үзел-бодалдарны, чижээ, эволюция дугайында өөредигни, хүлээринче албадап турар деп чугаалап турар. А сээң дугайыңда ону чугаалап болур бе? Ийе болза, бүзүрелиңни быжыглап, ону чидирбезинге дузалаар арга бар. Ол дээрге «сени камгалаар», Бурганның хайырлааны угааныңны ажылдадыры-дыр. Ол чүүл бүзүрелди кошкадыптар даап бодаашкыннардан сени камгалаар. (Чугаалар 2:10—12 номчувут.)

3. Бо статьяга чүнү сайгарар бис?

 ³ Алыс шын бүзүрел Бурганның дугайында ылап шын билиглерге үндезилеттинген (1 Тим. 2:4). Ынчангаш Бурганның Сөзүн болгаш христиан дептерлерни номчуп тургаш, кыры-биле улуг каралап эрте бербейн, номчуп турар чүүлүңнү угаап билип алыр дээш, угааныңны ажылдат (Мф. 13:23). Ынчалдыр бүгү чүвени Бурган чаяап каан база Библия бүзүреливиске төлептиг деп хөй барымдааларны тып алыр сен (Евр. 11:1).

4. Эволюцияның-даа, бүгү чүвени чаяап каан деп өөредигниң-даа талалакчызынга чүге бүзүрел херек? Сарыылдыг түңнелге кээр дизе, чүнү канчаар ужурлуг бис?

⁴ Хөй улус Чаяакчыга бүзүрээри чаңгыс бүзүрелден башка өске чүге-даа үндезилеттинмээн, а эволюция эртем шинчилелдеринге үндезилеттинген деп чугаалап турар. Ынчалзажок кижи кандыг-даа үзел-бодалдан туттунза, аңаа дөмей-ле бүзүрел херек апаар. Чүге? Чүге дээрге Бурганны кым-даа, кажан-даа көрбээн база бүгү чүвениң канчаар чаяаттынып турганын кым-даа хайгаараваан (Ин. 1:18). Ол ышкаш чаңгыс-даа кижи, безин эртемденнер, бир чуртталганың хевири өске хевирже сайзырай бергенин, чижээ, соястаар амытан сүт ижер амытанче канчаар шилчий бергенин көрбээн (Иов 38:1, 4). Ынчангаш кижи бүрүзү барымдааларны шинчилээш, угаанын ажылдаткаш, сарыылдыг түңнелге кээр ужурлуг. Павел элчин: «Бурганның көзүлбес шынарлары — Ооң мөңге күчү-күжү база бурганчы бүдүжү бүгү чаяалганы топтап көөрүн дамчыштыр кижиниң угаанынга билдингир, көскү апарды. Ынчангаш ындыг улус Бурганның мурнунга харыы тудуп шыдавас!» — деп бижээн (Рим. 1:20).

5. Бурганның организациязы биске ханы боданырынга канчаар дузалап турарыл?

⁵ «Топтап көөрү» — дораан көзүлбес азы эскертинмес чүүлдерни көрүп каары дээн уткалыг (Евр. 11:3). А ону кылырда анаа чүгле көөрү болгаш дыңнаары чедишпес, аңаа ханы боданыры негеттинер. Иегованың организациязы биске Чаяакчыны бүзүрел-биле «көрүп каарынга» дузалаар чүүлдерни берип турар (Евр. 11:27). Чижээ, бисте «Чаяалгаларның кайгамчыктыы Бурганны алдаржыдып турар» деп фильм, «Чуртталганың  тывылганы. Харыы негеттинип турар беш айтырыг» деп брошюра болгаш «Сагыш човангыр Чаяакчы бар бе?» деп ном бар. Оон аңгыда ханы боданырынга дузалаар сеткүүлдер база бар. Ында чүге Бурганга бүзүрей бергениниң дугайында тайылбырлаан эртемденнерниң болгаш өске-даа улустуң интервьюларын үндүрүп турар. «Чаяап кааны ол бе азы боду тыптып келген бе?» деп сериялыг статьяларда чаяалгалар угаан-сарыылдыг Чогаадыкчының дугайында канчаар херечилеп турарының кайгамчыктыг чижектерин бижээн. Эртемденнер чаяалгаларны хайгаарап тургаш, оларның онзагай чүүлдерин өттүнерин кызып турар.

6. Бисте бар дептерлер кайы хире ажыктыгыл база олар сеңээ канчаар дузалааныл?

⁶ Бүгү чүвени чаяаганының дугайында ийи брошюрага хамаарыштыр Америкадан 19 харлыг дуңмавыс мынча деп бижээн: «Мен оларны сонуургааш, чеже-даа номчаан мен». Франциядан угбавыс: «„Чаяап кааны ол бе азы боду тыптып келген бе?“ деп рубриканы дыка аянзынар чордум. Ында угаанныг улус чаяалгаларның онзагай чүүлдерин чүгле өттүнеринден башка, чүнү-даа чогаадып шыдавас деп көргүскен — деп бижээн. Мурнуу Африкадан 15 харлыг уругнуң ада-иези: «Уруувус «Оттуп келиңер!» деп брошюраны алгаш, бир дугаарында интервьюну номчуур» — деп үлешкен. А сен оларны номчуп турар сен бе? Оларның ачызында бүзүрелиң быжыг дазылдыг ыяш дег боор. Ындыг бүзүрелди меге өөредиглерниң «хаттары» безин ужур шаап шыдавас (Иер. 17:5—8).

7. Бурган бисти угаанын ажылдатсын деп чүге күзеп турарыл?

⁷ Библияның дугайында айтырыгларны салырында шын эвес чүүл бар бе? Чок. Иегова бисти харыыларны, «угаан-сарыылывысты» ажылдатпышаан, тып алзын деп күзеп турар. Ол бодал чок бүзүрээривисти күзевейн турар. Ынчангаш, алыс шын бүзүрелдиң үндезини болур, ылап шын билиглерни алыр дээш, угааныңны ажылдат. (Римчилерге 12:1, 2; 1 Тимофейге 2:4 номчувут.) Ындыг билиглерни алыр аргаларның бирээзи — кандыг-бир теманы шинчилеп көөрү-дүр.

8, 9. а) Чамдык улус кандыг темаларны шинчилээринге ынак? б) Шинчилел үезинде оларның ханы боданганы кайы хире ажыктыг болганыл?

⁸ Чамдык улус өттүр билген библейжи медеглелдерни өөренип азы төөгү, археология болгаш бойдус эртемнериниң талазы-биле Библияның кайы хире ылаптыын шинчилеп турар. Эге дөс 3:15-те бир кайгамчык өттүр билген медеглелдиң дугайында бижээн. Мында Чагырганың дузазы-биле Бурганның тергииделин шынзыдары болгаш Ооң адын ыдыктаары деп Библияның кол темазы ажыттынып турар. Эдемге болган үймээнден эгелеп, улустуң таваржып турар хилинчек-човалаңын Иегова канчаар соксадыптарын чаңгыс борбак шүлүкте чечен дыл-биле тайылбырлаан. Эге дөс 3:15-ти канчаар шинчилеп болурул? Чижээ, үе шкалазын чуруп ап болур. Ол өттүр билген медеглелди Бурган канчаар чоорту ажытканын база ооң күүсеттинерин шынзыдып турар кол библейжи шүлүктерни аңаа демдеглеп ап болур. Ол шүлүктерниң ниити утканы илередип турарын көрүп кааш, Библияны бижээн медээчилерниң ыдыктыг сүлдеге башкартып турганынга шынзыгар сен (2 Пет. 1:21).

⁹ Германиядан бир акывыс: «Библияны аңгы-аңгы үеде чурттап чораан, бот-боттарын билбес турган 40 хире кижи бижээн хирезинде, олар шупту Бурганның Чагыргазының дугайында бижип турган» — дээн. Австралиядан угбавыс 2013 чылдың декабрь 15-тиң «Таңныыл суургазында» Хосталыышкын байырлалын тайылбырлаан статьяны номчааш, магадаан. Ол тускай байырлал Эге дөс 3:15-те өттүр билген медеглел-биле болгаш Мессияның келгени-биле сырый харылзаалыг. «Ол статьяны шинчилээш, Иегованың кайы хире мерген угаанныын кайгап ханмаан мен. Израильчилерниң эрттирер ужурлуг Хосталыышкын байырлалы Иисус-биле чүү болурунуң үлегери боор кылдыр бодап кааны меңээ аажок солун болган.  Номчулга үезинде доктаапкаш, өттүр медеглээн Хосталыышкын байырлалының кайгамчыктыг кежээки чеминиң дугайында ханы боданып турган мен» — деп, ол бижээн. Угбавыс чүге ындыг минниишкиннерлиг болганыл? Чүге дээрге ол номчаан чүүлүнүң утказын эки билип алыр дээш, ханы боданып турган. Ол чүүл аңаа Иеговаже чоокшуларынга болгаш бүзүрелин быжыглап алырынга дузалаан (Мф. 13:23).

10. Библияны бижээн улустуң шынчы чоруу бүзүреливисти канчаар быжыглап турарыл?

¹⁰ Оон ыңай Библияны бижип турган улустуң шынчы болгаш дидим чоруунуң дугайында ханы боданыры бүзүрелди быжыглаарынга дузалаар. Бурунгу үеде хөй авторлар чагырыкчыларының алдар-хавыяазының дугайында хөөдүп, чонун хөлүн эрттир мактаар турган. Оларга көөрде, Иегованың медээчилери кезээде шынны чугаалап чораан. Олар чаңгыс чер чурттугларының, безин хааннарының частырыгларының дугайында ажыы-биле бижип турган (2 Чыл. 16:9, 10; 24:18—22). Оон аңгыда олар боттарының частырыгларын болгаш Бурганның өске бараалгакчыларының үүлгедиглерин чажырбайн чораан (2 Хаан. 12:1—14; Мк. 14:50). Великобританиядан аныяк дуңмавыс: «Ындыг шынчы чорук дыка ховар. Ол чүүл Библияны, шынап-ла, Иегова хей-аът киирген дээрзинге бүзүреливисти быжыглап турар» — деп чугаалаан.

11. Аныяк христианнар библейжи дүрүмнерниң үнезин канчап билип ап болурул?

¹¹ Хөй улус библейжи дүрүмнерни амыдыралынга ажыглап эгелээш, Библия — Бурганның аксындан үндүр тынган сөзү-дүр деп чүүлге бүзүрей берген. (Ырлар 18:8—12 номчувут.) Япониядан аныяк угбавыс: «Бистиң өг-бүлевис Библияның дүрүмнерин ажыглап эгелээш, дыка аас-кежиктиг апарган! Бис тайбың, эп-найыралдыг болгаш ынакшылдыг чурттап эгелээн бис» — деп үлешкен. Хөй кижилерни кулданыг адаанда тудуп турар меге шажын ёзулалдарындан болгаш бүдүүлүк чоруктан библейжи дүрүмнер бисти камгалап турар (Ыд. ыр. 113:11—16). Бурганны чок деп өөредип турар даап бодаашкыннар кижилерге кандыг салдар чедирип турарыл? Ындыг өөредиглер чижээ, эволюция, Бурганны херекке албайн, бойдусту күштүг деп санап, ону бурганчыдып турар. Бурган чок деп санаар улустуң чугаазы-биле алырга, келир үе чүгле олардан хамааржыр. Ынчалзажок олар херек кырында делегейни экижидип, кижилерге ёзулуг идегелди бербейн турар (Ыд. ыр. 145:3, 4).

12, 13. Чаңгысклассчылар, башкылар болгаш өске-даа улус-биле Библияның болгаш бүгү чүвени чаяаганының дугайында айтырыгларны канчаар сайгарар болза эки?

¹² Библияның болгаш бүгү чүвени чаяаганының дугайында өскелер-биле канчаар чугаалажып болурул? Өскелерниң чүү чүвеге бүзүреп турарын билир бис деп бодаарынче далашпаңар. Чамдыкта эволюцияга бүзүрээр кижилер Бурган бар деп база бүзүреп турар. Оларныы-биле алырга, Бурган чуртталганың аңгы-аңгы хевирлерин, эволюцияны ажыглап, чаяап каан. А өскелери: бир эвес эволюция барымдааларга үндезилеттинмээн болза, ону школага башкылавас ийик деп санап турар. Шажынга чөгенгеш, Бурганга бүзүревестей берген кижилер база бар. Ынчангаш кижи-биле чуртталганың канчаар тывылганының дугайында чугаалажы берзиңзе, баштай ооң санал-оналын болгаш чүү чүвеге бүзүреп турарын эки билип ал. Бир эвес бодамчалыг бооп, кижини кичээнгейлиг дыңнаар болзуңза, ол сени база дыңнаар чадавас (Тит. 3:2).

¹³ Бир эвес кижи үзел-бодалдарыңны чигзиниг адаанга салып турар болза, чымчаа-биле ооң чүге ынчаар бодап турарын тайылбырлаар кылдыр диле. Чижээ, чуртталга канчаар ала-чайгаар тыптып келгенин. Баштайгы чуртталга хевири төнүп читпезин дизе, ол боду бодун бүдүрүп шыдаар ужурлуг турган. Бир химик профессорнуң сөстери-биле алырга, аңаа, эвээш дизе, дөрт чүүл  херек: 1) камгалалдыг карт, 2) энергияны албышаан, ону бүдүрүп шыдаары, 3) генетиктиг информация, 4) ол информацияны хоолгалап шыдаары. «Кижи кайгаар: чуртталганың эң-не бөдүүн хевири безин аажок нарын» — деп, ол немээн.

14. Эволюцияның болгаш бүгү чүвени чаяаганының дугайында чугаалажыры берге болза, чүнү канчаар сен?

¹⁴ Эволюция биле бүгү чүвени чаяаганының дугайында сеңээ чугаалажыры берге болза, «оран-сава бүрүзүн бир-ле кижи туткан, а бүгү бар чүүлдү Бурган туткан болгай» деп, Павелдиң ажыглаан бөдүүн барымдаазын чугаалап болур сен (Евр. 3:4). Ооң-биле маргыжары берге, чүге дизе кандыг-даа нарын тургузугга угаан-сарыылдыг тургузукчу херек. Ол ышкаш таарымчалыг номну азы брошюраны ажыглап болур сен. Бир угбавыс «Бурганга эвес, а эволюцияга бүзүрээр мен» дээн аныяк оолга бүгү чүвени чаяаганының дугайында ийи брошюраны берген. Бир хире неделя эрткенде, ол оол: «Ам-на Бурган бар деп, бүзүреп тур мен» — дээн. Оон ол Библияны өөренип эгелээн. Ам ол Иегованың Херечизи апарган.

15, 16. Янзы-бүрү кижилер-биле Библияның дугайында канчаар чугаалажып болурул база кандыг сорулганы сактыр ужурлуг бис?

¹⁵ Библияның ылаптыынга чигзинип турар кижи-биле чугаалажырда, ол-ла арга дузалап болур. Ооң чүү чүвеге бүзүреп база кандыг темаларны сонуургап турарын билип алыңар (У. ч. 18:14). Бир эвес ол кижи эртемни сонуургаар болза, Библияның эртем талазы-биле ылаптыын көргүскен чижектерни чугаала. Өске улуска Библияның төөгү талазы-биле ылаптыының болгаш бирден-бирээ чокка күүсеттинген өттүр билген медеглелдерниң дугайында билип алыры солун боор чадавас. Чок болза Иисустуң Даг кырынга өөредиинден библейжи дүрүмнерни көргүзүп болур.

¹⁶ Сээң сорулгаң маргышка тиилээри эвес, а кижиниң чүрээн чаалап алыры дээрзин утпа! Ынчангаш кижини кичээнгейлиг дыңна. Ылаңгыя бодуңдан улуг улус-биле чугаалажып тургаш, таарымчалыг айтырыгларны ажыглап, эптиг-эвилең болгаш хүндүткелдиг чугаалаш. Ынчан олар чугаалаан барымдааларыңны күзелдии-биле дыңнаар. Оон аңгыда олар үзел-бодалдарыңны ханы бодангаш, үндүрген түңнелдер-дир деп көрүп каар. Аныяктарга болганчок чедишпейн турар чүүл ол ышкажыл. Анаа-ла маргыжарынга ынак азы бүзүрелиңни шоодар сагыштыг кижилерге харыы бээри албан эвес деп утпа (У. ч. 26:4).

17, 18. а) Бүзүреп турар чүүлүңнүң алыс шынныынга канчаар шынзыгып болур сен? б) Дараазында статьяга чүнү сайгарар бис?

¹⁷ Быжыг бүзүрел чүгле Библияның кол өөредиглеринге үндезилеттинмес ужурлуг. Ынчангаш Бурганның Сөзүнче, эртине-байлак шыгжаан черни тывары дег, сиңнигип кирер болза эки (У. ч. 2:3—6). Шинчилелге ажыглаар сээң дылыңда бар шупту херекселдерни, чижээ «Таңныыл суургазының дептерлериниң индекизин» азы «Иегованың Херечилериниң дептерлер айтыкчызын» ажыгла. Оон ыңай Библияны эгезинден төнчүзүнге чедир номчуур деп сорулга салып алыр болза, дыка эки. Ону бүдүн чыл ишти номчуптарын шенеп көр. Бурганның Сөзүн номчуурундан өске оон артык эки чүү бистиң бүзүреливисти быжыглаптар боор. Аныяк-чалыы үелерин сактып, бир кожуун хайгааракчызы мынча дээн: «Библия — Бурганның Сөзү-дүр деп бүзүрээринге меңээ дузалаан чүүлдерниң бирээзи — ону бүдүнү-биле номчааным. Бичиимден тура билир турганым библейжи төөгүлерниң утказын ам-на билип алган мен. Ол чүүл Бурган-биле харылзаамны быжыглаарынга кол рольду ойнаан».

¹⁸ Ада-иелер, ажы-төлүңерниң Бурган-биле харылзаазының кайы хире быжыг болуру колдуунда силерден хамааржыр. Оларга быжыг бүзүрелди сайзырадып алырынга канчаар дузалажып болур силер? Ооң дугайында дараазында статьяга көөр бис.