1. Сактыышкын кежээзи чылда чүге эң-не чугула болуушкун? (Лк. 22:19, 20).

 ИЕГОВАНЫҢ чонунга Иисус Христостуң өлүмүнүң Сактыышкын кежээзи — чылдың эң чугула болуушкуну. Ол дээрге Иисустуң бодунуң тургускан чаңгыс байырлалы. (Номчуптуңар: Лука 22:19, 20.) Сактыышкын кежээзин манаарывыстың каш чылдагааннарын көрээлиңер.

2. Сактыышкын кежээзин манаарывыстың чамдык чылдагааннарын чугаалаңар.

² Төлевирниң кайы хире үнелиин боданырынга Сактыышкын кежээзи дузалаар. Ол байырлал биске Иисустуң өргүлү дээш өөрүп четтиргенивисти канчаар илередип болурун сагындырып турар (2 Кор. 5:14, 15). Кады чыглып тура бот-бодувусту база деткижер бис (Рим. 1:12). Чыл санында Сактыышкын кежээзинче чыыштарже келбейн барган хөй акы-угбалар келир. Оларны чылыг-чымчак уткуп алырга, чамдыызы Иеговаже эглип кээп турар. Ол байырлалга аалчылар база келир. Дыка хөй улус көрген, дыңнаан чүүлүн сонуургааш, Библияны өөренип эгелей бээр. Сактыышкын кежээзи бистиң чүрээвисте тускай черни ээлеп турары кайгамчык эвес!

3. Сактыышкын кежээзи бүгү делегейде ха-дуңманы канчаар демнештирип турар? (Чурукту база көрүңер.)

³ Ол байырлал делегей чергелиг ха-дуңманы канчаар демнештирип турарын база бодап көрүңер. Делегейниң аңгы-аңгы кезектеринге хүн ажып эгелээрге, Иегованың Херечилери ол тускай болуушкунга чыглып  эгелээр. Төлевирниң чугулазын тайылбырлаар библейжи илеткелди дыңнааш, алгаг-макталдың ийи ырызын күүсеткеш, хлеб биле араганы дамчыдар бис. Ол ужуражылгага дөрт мөргүлдү чугаалаан санында-ла, сеткиливистен «аминь» дээр бис. Ол байырлал 24 шак дургузунда чер кырында шупту чыыштарга эртер. Иегованы база Иисусту демнии-биле алдаржыдып турар бис. Олар бисти көргеш, кайы хире өөрүп турарын бодап көрүңер даан!

4. Бо статьяга чүнү сайгарар бис?

⁴ Бо статьяга дараазында айтырыгларга харыылаар бис: Сактыышкын кежээзиниң мурнунда чүрээвисти канчаар хөөннеп алыр бис? Аалчылар дээш канчаар сагыш човаар? Чыыштарже келбейн барган акы-угбаларга чүнү кылып болур бис? Бо айтырыгларның харыылары ол чугула болуушкунга белеткенип алырынга дузалаар.

ЧҮРЭЭВИСТИ КАНЧААР БЕЛЕТКЕП АЛЫР БИС?

5. а) Төлевир дугайында боданыры биске чүге чугула? (Ырлар 48:8, 9). б) «Иисус чүү дээш өлген?» деп видеодан чүнү билип алдыңар?

⁵ Сактыышкын кежээзинче баар кылдыр хөөнненип тура, баштай Иисустуң өргүлүнүң дугайында боданыры чугула. Бис боттарывыс бачыт биле өлүмден кажан-даа хосталып шыдавас ийик бис. (Номчуптуңар: Ырлар 48:8, 9; «Иисус чүү дээш өлген?» деп видеону база көрүңер a.) Ынчангаш Иегова бис дээш бодунуң Оглун берипкен. Ооң өлүмү Иеговага-даа, Иисуска-даа дыка улуг чидириг (Рим. 6:23). Оларның бис дээш кылган чүүлүн хөй боданган тудум, төлевирни оон-даа үнелээр бис. Төлевир деп чүл? Ол айтырыгны бо статьяга көөр бис. Ону дуглаар дээш, Иегова биле Иисус чүнү эрткенин база боттарывыска сагындырар бис.

6. Төлевир деп чүл база ол чүге херек болган?

⁶ Төлевир — дээрге чидиригниң орнун дуглаар өртек. Ада́м тергиин кылдыр чаяаттынган, ынчалза-даа ол соонда бачыт үүлгеткен. Ынчалдыр ол бодундан аңгыда, шупту ажы-төлүнүң мөңге чурттаар аргазын чидирген. Адамның чидириин эгидер дээш, Иисус бодунуң тергиин чуртталгазын өргүлге берген. Бурганның Оглу чер кырынга чурттап чорааш, «кандыг-даа бачыт үүлгетпээн база Ооң аксындан меге үнгенин кым-даа дыңнаваан» (1 Пет. 2:22). Ынчангаш Иисустуң амы-тыны, Адамның чидирген амы-тынынга дүгжүп турган (1 Кор. 15:45; 1 Тим. 2:6).

7. Иисус черге чурттап чорааш, кандыг бергелерге таваржып турган?

⁷ Иисус чер кырынга чурттап чорааш, берге үеде безин дээрде Адазынга кезээде дыңнангыр чораан. Ол тергиин кылдыр төрүттүнген, ынчалза-даа тергиин эвес ада-иезинге чагыртып өскен (Лк. 2:51). Ол элээди турда, ада-иезин дыңнавазынче азы Бурганың хоойлузун үрээринче ыдалаар кижилер турган чадавас. Ынчалза-даа Иисус чүнү-даа хажытпаан. А улуг кижи апаргаш, Эрликтиң күткүлгелеринге удурланып турган. Ол дайзын Бурганны садыптарынче Иисусту ажыы-биле ыдалаан (Мф. 4:1—11). Эрлик Иисустуң бачыт кылыптарын дыка күзээн. Ол албадап шыдапкан болза, Иисус амы-тынын өргүлге эккеп шыдавас турган.

8. Иисус оон ыңай кандыг шенелделерге таварышкан?

⁸ Иисус черге бараалгалын эгелей бээрге, шенелделер соксаваан. Дайзыннары ону истеп сүрүп, каш-даа катап өлүрерин  оралдашкан (Лк. 4:28, 29; 13:31). Ол өөреникчилериниң частырыгларын шыдажып турган (Мк. 9:33, 34). Иисусту шиидип турда улус ону кочулап, шоодуп турган. Оон бак атка киирип, хилинчектеп шаажылаан (Евр. 12:1—3). Шенелдениң сөөлгү кезээн Иегованың камгалалы чокка Иисус чааскаан эрткен (Мф. 27:46) b.

9. Иисустуң төлевири биске кандыг минниишкиннерни оттурар? (1 Пётр 1:8).

⁹ Ийе, төлевирни бээр дээш Иисус дыка хилинчектенген. Ооң бис дээш күзелдии-биле кылган чүүлүн бодап кээривиске, чүрээвис ынакшыл болгаш өөрүп четтириишкин-биле долуп кээр. (Номчуптуңар: 1 Пётр 1:8.)

10. Төлевир бээр дээш, Иегова чүнү кылган?

¹⁰ Төлевирни бээр дээш, Иегова чүнү кылган? Адазы биле оглунуң ышкаш, Иегова биле Иисустуң аразында дег ынакшыл кайда-даа чок (У. ч. 8:30). Иисустуң черге хөй шенелделерни эртип турганын көргеш, Иегова чүнү миннип турганын бодап көрүңер даан. Ооң оглун бак аажылап, куду көрүп, каржызы-биле хилинчектээрге, аңаа дыка аарышкылыг болган.

11. Оглунуң өлүмү Иеговага кандыг минниишкиннер оттурганын билип алырынга чүү дузалаар?

¹¹ Ада-иениң чуртталгазында эң коргунчуг чүүл — төлүнүң өлүмү. Диргизиишкинге күштүг бүзүрел безин, ол аарышкыны оожургатпас. Төлүн чидирген ада-иениң орнунга бодувусту салыр болзувусса, Иегованың минниишкиннериниң чамдык кезиин билип каар бис. Оглунуң хилинчектенип өлген хүнүнде ооң хилинчектенип турганын бодап көрүңер даан (Мф. 3:17) c.

12. Сактыышкын кежээзинге чедир үени канчаар ажыглаарыл?

¹² Сактыышкын кежээзи чоокшулаан. Аңаа чедир үени канчаар ажыглап болур? Хууда шинчилелге азы өг-бүле мөгейиишкининге билиглеривисти бедидип ап болур бис. «Путеводитель по публикациям Свидетелей Иеговы» азы өске-даа справочниктерни ажыглаңар d. «Христиан чуртталгавыс болгаш бараалгалывыс» деп ажылчын кыдыраашта бердинген Библия номчулгазының графигин албан сагыңар. А Сактыышкын кежээзиниң хүнүнде эртенги мөгейиишкинниң тускай үндүрүлгезин  көөрүн утпаңар. Чүрээвисти шын хөөнненип алыр болзувусса, өске улуска Сактыышкын кежээзиниң чугулазын угаап билиринге дузалаары биске белен боор (Эзра 7:10).

ААЛЧЫЛАР ДЭЭШ САГЫШ ЧОВАҢАР

13. Сактыышкын кежээзиниң дугайында улус билип алзын дээш, чүнү кылып болур бис?

¹³ Аалчыларывыска чүнү кылып болур бис? Бир дугаарында оларны чалаары. Суртаалга таварышкан улуска Сактыышкын кежээзин дыңнадыр болгай бис. А таныыр улузувустан кымны чалап болурун баш удур боданып болур бис. Чижээ, төрелдеривис, кады ажылдап турар эштеривис, чаңгысклассчыларывыс. Саазын чалалгалар төнүп каар болза, электроннуг чалалгаже шөлүгнү берип болур. Бодап көрүңер даан, олар шупту чедип келген дижик! (Эккл. 11:6).

14. Хууда чалалга кандыг салдарлыг?

¹⁴ Хууда чалалга күштүг. Бир катап Сактыышкын кежээзинче баар дээнин ашаа чоргаарал-биле дыңнадырга, угбавыс кайгай берген. Чүге дизе чылдар ишти өөнүң ээзин чалаарга, ол черле барбас турган. Чүү өскерли берген? «Көр даан, чалалга алдым» — дээн. Ол чалалганы таныыры хуралдың удуртукчузундан алган болган. Ооң соонда ол эр кижи чыл санында Сактыышкын кежээзинче кээр апарган.

15. Сактыышкын кежээзинче чалап тургаш, чүнү кичээнгейге алыры чугула?

¹⁵ Сактыышкын кежээзинче чалаан улузувус чыыштарже кээп көрбээн болза, хөй айтырыгларлыг боор чадавас. Чамдык айтырыгларны даап бодааш, белеткенип ап болур бис (Кол. 4:6). Чижээ, мындыг: «Байырлал канчаар эртер? Кайы хире үр болур? Канчаар кеттинерил? Киргени дээш төлээр бе? Акша чыылдазы турар бе?» Сактыышкын кежээзинче чалап тургаш: «Айтырыгларыңар бар бе?» — деп айтыргаш, харыылап берип болур. «Христос бис дээш өлген деп сактып чоруңар» база «Хурал залында чүү болуп турарыл?» деп видеоларны  база көргүзер бис. Ол кижи видеолардан чыыштар канчаар эртерин билип алыр. Оон «Аас-кежиктиг мөңге чуртта!» деп номнуң 28 дугаар кичээлинде бодалдарны база сонуургадып болур.

16. Сактыышкын кежээзиниң соонда аалчыларывыска кандыг айтырыглар тыптып болур?

¹⁶ Сактыышкын кежээзи дооступ каарга, аалчыларывыска чаа айтырыглар тыптып кээп болур. Олар хлеб биле араганы кым-даа амзаваанын элдепсинер чадавас. Оон аңгыда, Сактыышкын кежээзин каш катап демдеглээрин база өске чыыштарывысты сонуургап болур. Илеткелге ол айтырыгларны сайгарар-даа болза, бир дугаар келген кижиге тодаргай тайылбырлаары чугула. «Иегованың Херечилериниң Сактыышкын кежээзин демдеглээри чүге ылгалдыг?» деп статья ооң айтырыгларынга харыылаарынга дузалаар. «Алыс шынны хүлээп алырынга белен улуска» дузалаар дээш, болдунар-ла чүүлдү кылырын күзээр бис (Аж.-ч. 13:48, Чаа делегей).

ЧЫЫШТАРЖЕ КЕЛБЕЙН БАРГАН АКЫ-УГБАЛАРГА ДУЗАЛАЖЫҢАР

17. Чыышче келбейн барган акы-угбаларга удуртукчулар канчаар дузалап болур? (Иезекиил 34:12, 16).

¹⁷ Сактыышкын кежээзиниң үезинде удуртукчулар чыыштарже келбейн барган акы-угбаларга канчаар дузалап болур? Оларга хууда кичээнгейни көргүзүңер. (Номчуптуңар: Иезекиил 34:12, 16.) Ооң бетинде болдунар-ла болза, кижи бүрүзү-биле харылзажыңар. Дуза кадарын күзеп турарыңарны, ынакшылыңарны олар миннип көрзүн. Сактыышкын кежээзинче чалааш, чедип кээрге чылыг-чымчак уткуп алыңар. Ооң соонда ол эргим акы-угбаларга Иеговаже эглип кээринге дузалажыр дээш, харылзааны үспеңер (1 Пет. 2:25).

18. Чыыштарже келбейн барган акы-угбаларга кижи бүрүзү чүнү кылып болур? (Римчилерге 12:10).

¹⁸ Чыышче келбейн барган улуска кижи бүрүзү дузаны канчаар көргүзүп болурул? Олар Сактыышкын кежээзинче чедип кээрге ынакшылды, эки хамаарылганы,  хүндүткелди көргүзүңер. (Номчуптуңар: Римчилерге 12:10.) Бурганның ол хойларынга чыышче кээри амыр эвес болурун утпаңар. Азы оларны соок хүлээп алыр деп бодаан чадавас e. Ынчангаш эпчок байдалче киириптер айтырыглар салбаңар база оларга аарышкылыг болур чүве чугаалаваңар (1 Фес. 5:11). Ол акы-угбалар — бистиң өг-бүлевис. Бис олар-биле кады Бурганга өөрүп мөгеер бис! (Ыд. ыр. 118:176; Аж.-ч. 20:35).

19. Иисустуң чагыын күүседип, ооң өлүмүн сактыры чүге чугула?

¹⁹ Иисус бодунуң өлүмүн чылдың-на сактып чоруурун биске чагааны дээш, дыка-ла өөрүп четтирер бис. Сактыышкын кежээзинге баары биске-даа, өске-даа улуска чугула ажыктыг (Иса. 48:17, 18). Ол байырлалдың ачызында Иегова биле Иисуска ынакшылывыс өзер база акы-угбалар-биле найыралывыс быжыгар. Ол кежээже барганывыс-биле, бис дээш кылган чүүлүн кайы хире үнелээривисти оларга көргүзер бис. Оон аңгыда, Иисустуң өргүлүнүң ачызында кандыг келир үе ажыттынып келгенин билип алырынга өске улуска дузалажып шыдаар бис. Сактыышкын кежээзи — чылда эң-не чугула болуушкун. Аңаа эң дээре кылдыр белеткенип алыылы!