1. Амгы үеде улустуң ынакшылы соой берген деп чүге чугаалап болур?

СӨӨЛГҮ хүннерде улустарның хөй кезии «ынакшыыр... сеткили чок» апаар деп Библияда баш удур бижээн (2 Тим. 3:1, 3). Шынап-ла, ындыг чүүл болуп турар. Дыка хөй өг-бүлелер чарлып-чирлип, ашак-кадай улус бот-боттарынга дайзыннар дег, а ажы-төл боттарын кымга-даа херекчок кылдыр миннип турар. Өг-бүлелер безин, бот-боттарынга сыр өске улус ышкаш хамаарылгалыг. Өг-бүле талазы-биле специалист кижи мынча дээн: «Ада-иези-даа, ажы-төлү-даа бот-боттарынга кичээнгей көргүспейн, планшетче, смартфонче, компьютер оюннарынче бажын супкан орар. Олар чаңгыс бажыңда чурттап турар-даа болза, бот-боттарын көңгүс билбес».

2, 3. а) Римчилерге 12:10-дан алырга, кымга хамаарыштыр эрге-чассыг ынак боор ужурлуг бис? б) Бо статьяга чүнү сайгарар бис?

² Бис бо делегей ышкаш, соок болгаш тоомча чок болуксавас бис (Рим. 12:2). Чылыг-чымчак хамаарылганы чүгле өг-бүлевиске эвес, а кады бүзүрээн ха-дуңмавыска илередири кайы хире чугулазын дыка эки билип турар бис. (Номчуптуңар: Римчилерге 12:10.) «Эрге-чассыг ынак болуңар» дээн сөстер чоок төрелдерниң аразында чылыг-чымчак хамаарылганы илередип турар. Ынчап кээрге, чыышта акы-угбаларга хамаарылгавыс кады төрээннерге ышкаш боор ужурлуг. Ындыг байдалда бис чаңгыс аай эп-сеткилдиг бооп, Иегованың сеткилин өөртүп бараалгаар бис (Мих. 2:12).

 ³ Ынчалза-даа ындыг минниишкиннерни канчаар сайзырадырыл? Аңаа биске Библиядан каш чижек дузалаар.

4. Исайя 63:9-тан алырга, Иегова биске кайы хире ынак?

⁴ Библиядан Иегованың чараш шынарларының дугайында билип ап турар бис. Чижээ, ында «Бурган — ынакшыл-дыр» дээн (1 Ин. 4:8). Чамдык улус чүгле чаңгыс ону билип алгаш безин, Ооң өңнүү болуксай бээр. Оон артык, Иегованың дугайында «ынакшылдыг болгаш ээ-хайыралдыг» деп бижээн. (Номчуптуңар: Исайя 63:9.) Иегова биске кайы хире эрге-чассыг хамаарылгалыг-дыр!

5. Иегова ээ-хайыралын канчаар көргүзүп турарыл база Ону канчаар өттүнүп болур бис?

⁵ Исайя 63:9-те Иегованы «ээ-хайыралдыг» дээн (Хост. 34:6). Ооң ээ-хайыралы частырыгларывысты өршээп турарындан көскү (Ыд. ыр. 50:3). Библиядан алырга, ээ-хайыралдыг кижи дуза хереглээн кижиге дуза кадарынга белен. Иегованың ээ-хайыралы ие кижиниң бодунуң төлүнге ынакшылындан артык күштүг (Иса. 49:15). Ынчангаш Иегова бергелерге таварышкан санывыста-ла, биске дузаны кадып чоруур (Ыд. ыр. 36:39; 1 Кор. 10:13). Акы-угбалар бисти хомудадыптарга, оларже хомудавайн, өршээп турарывыс-биле ээ-хайыралды көргүзер бис (Эф. 4:32). Оон артык, ол шынар бергелерге таварышкан ха-дуңмавысты деткииринче бисти оттурар. Ынчаар кылгаш, Иегованың өндүр улуг ынакшылын болгаш ээ-хайыралын өттүнүп турар бис (Эф. 5:1).

6. Ионафан биле Давидтиң аразында найырал кандыг турган?

⁶ Тергиин эвес улус безин аразында быжыг найыралды тудуп болур деп Библиядан көрген бис. Ол дээрге Давид биле Ионафан-дыр. 1 Хааннар 18:1-де: «Саулдуң оглу Ионафан Давидтиң сагыш-сеткилин  бодунуу дег билип, аңаа ынак апарган» — деп бижээн. Элээн үе эрткенде, кажан Давидти хаан кылдыр шилип алырга, Саул ону көрбестеп, өлүрер деп шиитпирлээн. Ынчалза-даа Саулдуң оглу, Ионафан, ачазының талазын ээлевейн, ону деткивээн. Ионафан биле Давид бот-боттарынга кезээ-мөңгеде эжишкилер боорун даңгыраглаан (1 Хаан. 20:42).

7. Ионафан биле Давидтиң найыралынга чүү шаптыктап болур турган?

⁷ Ионафан биле Давидтиң найыралынга чүү-даа шаптыктап шыдаваан. Ионафан Давидтен 30 хире хар улуг турган-даа болза, Ионафан «Давид-биле меңээ аралажырын солун эвес, ол мен ышкаш улуг дуржулгазы чок, эмин эрттир аныяк» деп бодаваан. Харын-даа Ионафан аңаа чымчак, хүндүткелдиг хамаарылгалыг турган.

8. Чүү деп бодаар силер, Ионафан Давидке чүге эки эш турганыл?

⁸ Ионафан Саулдуң оглу болгаш, ачазының соонда хааннаар эргелиг турган. Ооң ужундан Ионафан Давидке адааргап болур турган (1 Хаан. 20:31). Ынчалза-даа ол биче сеткилдиг, Иеговага бердинген кижи чораан болгаш, Ооң Давидти хаан кылдыр томуйлаар дээн шиитпирин деткээн. Оон аңгыда, ол Давидке база бердинген турган. Ол дээш ачазы ону көрбестей берген (1 Хаан. 20:32—34).

9. Ионафан Давидти удурланыкчызы кылдыр санап чораан бе? Тайылбырлаптыңар.

⁹ Ионафан Давидке чылыг-чымчак хамаарылгалыг болгаш, ону удурланыкчызы кылдыр санавайн турган. Ионафан тергиин ча адыкчызы база эрес-дидим дайынчы чораан. Чон ону болгаш ооң ачазы Саулдуң дугайында: «Алыс боттары эзирден кашпагай, арзылаңдан күштүг» — деп чугаалажыр турган (2 Хаан. 1:22, 23). Ионафан бодунуң чедиишкиннери-биле мактанып болур турган-даа болза, ооң адааргаар, адааннажыр хөөнү чок турган. Харын-даа Ионафан Давидтиң Иеговага быжыг бүзүрели биле туруштуун магадаар чораан. Солун чүүл, Давид Голиафты тиилеп алган соонда, Ионафан аңаа аажок ынак апарган. А бис кады бүзүрээн акы-угбаларга эрге-чассыг хамаарылганы канчаар сайзырадып ап болур бис?

10. «Сеткилиңер ханызындан ынак болуңар» дээн сөстерниң утказы кандыгыл?

¹⁰ Библияда: «Ынакшып эгелээш, бот-боттарыңарга арыг чүрээңер ханызындан ынак болуңар!» — дээн (1 Пет. 1:22). Аңаа хамаарыштыр Иегова биске дыка эки үлегерни көргүскен. Бис-ле Иегованы кагбас болзувусса, Ол бисти кажан-даа кагбас база биске кезээде ынак боор (Рим. 8:38, 39). «Сеткилиңер ханызындан» дээн сөстер грек дылда, бир-ле кижиге ынак болур дизе, күжениишкиннер херек дээн утканы илередип турар. Шынап-ла, чамдыкта акы-угбаларга ынак болуру белен эвес. Бир эвес олар бисти хомудадыптар болза, «тудуштурган амыр-тайбың ачызында чаңгыс эпти кадагалаарынче» чүткүүр дээш, оларга шыдамык болуру чугула (Эф. 4:1—3). Амыр-тайбыңны кадагалаарын сеткиливистен кызып турар болзувусса, оларның четпес талаларынче кичээнгей салбайн, оларже Иегова ышкаш көрүштүг болурун кызар бис (1 Хаан. 16:7; Ыд. ыр. 129:3).

11. Кады бүзүрээн акы-угбаларывыска эрге-чассыг ынакшылды илередири чүге чамдыкта белен эвес?

¹¹ Чамдыкта акы-угбаларывыска эрге-чассыг ынакшылды илередири белен эвес,  чүге дизе оларның четпес талаларын эскерип чоруур бис. Бирги векте христиан чыышка база шак ындыг чүүл болган. Эводия биле Синтихия Павел элчин-биле өөрүшкүлүг ажылдажып турган-даа болза, бот-боттарын бир-ле чылдагаан-биле билишпейн турганнар. Ынчангаш Павел оларны: «Дээрги-Чаяакчыга бүзүрээниңер ачызында чаңгыс эп-сеткилдиг» болурунче кыйгырып турган (Флп. 4:2, 3).

12. Акы-угбаларга эрге-чассыг хамаарылганы сайзырадып алырынга биске чүү дузалаар?

¹² Чыышта акы-угбаларга чылыг-чымчак хамаарылганы сайзырадып алырынга биске чүү дузалаар? Бир эвес оларның-биле чоок найыралдажып алыр болзувусса, эрге-чассыг хамаарылганы илередип, оларны эки билип шыдаар боор бис. Оларның назы-хары болгаш ук-ызыгууру силерге шаптык болбас ужурлуг. Чижээ, Ионафан Давидтен 30 хар улуг турган-даа болза, олар чоок эжишкилер чораан. Бир эвес чыышта бодуңардан улуг азы бичии акы-угбалар-биле эдержир болзуңарза, бүгү ха-дуңмага ынакшылыңарны көргүзер силер (1 Пет. 2:17).

13. Чыышта шупту улус бистиң чоок эштеривис бооп болур бе?

¹³ Ынчаарга чыышта шупту улус бистиң чоок эш-өөрүвүс болур дээни ол бе? Чок. Сонуургалдары дөмей улус-биле эдержири солун, ында багай чүве чок. Чижээ, Иисус элчиннериниң шуптузун өңнүктерим деп адап чораан, ынчалза-даа ол Иоаннга онза ынак турган (Ин. 13:23; 15:15; 20:2). Кажан Иоанн акызы Иаков-биле Бурганның Чагыргазынга хүндүткелдиг черлерни ээлээрин дилээрге, Иисус: «Мээң оң азы солагай таламга олурарын хайырлаары Менден хамаарышпас» — дээн (Мк. 10:35—40). Моон алырга, Иисус Иоанны өске элчиннерден бедик кылдыр санавас турган. Бис Иисусту өттүнүп, чыышта улусту аңгылавас бис (Иак. 2:3, 4). Оон башка чыышка амыр-тайбың болгаш чаңгыс аай, демниг чорук турбас боор (Иуда 17—19).

14. Филипчилерге 2:3-те сүме адааннажыр хөөннүг болбазынга биске канчаар дузалаар?

 ¹⁴ Кайда эрге-чассыг, чылыг-чымчак хамаарылга барыл, ында адааннажыр хөөн чок. Ионафан Давид-биле эрге-чагырганы былаажып, ооң-биле адааннажырын бодаваан. Бис база акы-угбаларывысты удурланыкчылар кылдыр бодавайн, оларның салым-чаяанынга адааргавас бис. Харын-даа биче сеткилдиг бооп, оларны бодувустан бедик кылдыр көөр бис. (Номчуптуңар: Филипчилерге 2:3.) Биче сеткилдиг боор болзувусса, акы-угбаларывыстың эки талаларын эскерип, олардан бир-ле чүүлге өөренип алырынга белен боор бис. Чыышта кижи бүрүзү үнелиг деп утпаалыңар (1 Кор. 12:21—25).

15. Таня-биле болган таварылга бисти чүү чүвеге өөредип турарыл?

¹⁵ Берге байдалдарда акы-угбаларывыс биске чылыг-чымчак хамаарылганы көргүзүп, дузазын кадарга, Иегованың сагыш човаашкынын миннир бис. Таня дээр угбавыс 2019 чылда үш ажы-төлү-биле «Ынакшыл кажан-даа төнүп читпес» деп Каттышкан Штаттарга болуп эрткен делегей чергелиг шуулганга чораан. Субботада кежээ гостиницаже бар чыткаш, олар озал-ондакка таварышкан. Таня үлешкен: «Уткуштур кел чыткан машина бистиң оруувусче хенертен үнүп келгеш, бисти үстүрүпкен. Кым-даа кемдевээн, ынчалза-даа корга берген бис. Машинадан дүшкеш, орук кыдыынга туруп алган бис. Оон көрүп турарывыска, бир-ле кижи бодунуң машиназынче чалап, хол чайып турар болган. Ол база шуулганга чораан акывыс болган. Чүгле ол эвес, оон аңгыда Швециядан беш ха-дуңмавыс база биске дузазын кадарын кыскан. Угбаларывыс мени уруум-биле  куспактап каан. Ол үеде биске оожургал дыка херек турган. „Ажырбас, бис дээш сагыш човаваңар, чоруптуңар“ дээривиске-даа, олар бисти кагбаан. Олар дүрген дуза кадар эмчилерниң чедип кээрин манап алгаш, бистиң-биле шупту чүве эки деп чүвени көргеш, чорупканнар. Ол үе дургузунда Иегованың эрге-чассыг сагыш човаашкынын боттарывыска көрген бис. Ол болуушкуннуң соонда Иегованың ынакшылын оон-даа үнелеп, ха-дуңмавыска оон-даа ынак апарган бис». А силерни акы-угбаларның кайы-бирээзи берге үеде ынакшылдыы-биле деткээн бе?

16. Ха-дуңмавыска эрге-чассыг хамаарылганы илередир кандыг чылдагааннар бисте барыл?

¹⁶ Бот-боттарывыска чылыг-чымчак, эрге-чассыг хамаарылганы көргүзери эргежок чугула! Ынчалдыр бис дуза хереглээн акы-угбаларывысты деткип, Бурганның чонунуң чаңгыс аай, демниг чоруунче үлүүвүстү киирип турар боор бис. Оон ыңай ак сеткилдиг улус бисти Христостуң алыс шын эдерикчилери деп көргеш, Иегова Бурганывыска база бараалгаксай бээр. А чүден артык чугула чүүл — бис Иегованы, өршээлдиг Адавысты, бисти аргалап чоруур Бурганны, алдаржыдар бис (2 Кор. 1:3). Ынчангаш ха-дуңмага эрге-чассыг хамаарылганы ам-даа сайзырадып, илередиилиңер!