ӨӨРЕНИР СТАТЬЯ 10
ЫРЫ 31 Бурган-биле кожа чор!
Иегова биле Иисустан боданып өөрениңер
«Христостуң [ышкаш]... бодал-биле быжыгланып алыңар» (1 ПЕТ. 4:1).
КОЛ БОДАЛ
Пётр элчинге Иисус-биле найырал Иегованың угаан-бодалын эки билип алырынга канчаар дузалаан база биске кандыг кичээлдер бар?
1, 2. Бурганга ынакшылдың утказы кандыг? Иисус Иеговага бүгү угаан-бодалы-биле ынаан канчаар көргүскен?
«ДЭЭРГИ-ЧАЯАКЧЫГА бүгү-ле чүлдү-чүрээң-биле, бүгү-ле сеткил-сагыжың-биле, шыдаар-ла шааң-биле, бүгү-ле угаан-сарыылың-биле ынак бол» (Лк. 10:27). Иисустуң эң-не чугула дээн айтыышкынындан алырга, Иеговага бүгү-ле чүлдү-чүрээвис-биле ынак болур ужурлуг бис. Күзелдер, минниишкиннер база сагыш-сеткил ынаар кирип турар. Иеговага долузу-биле бердинген болурунче, бүгү-ле күштү үндүрер болза эки. Угаанывысты канчаар ажыглаарывыс база чугула. Иегованың бодалдарын долузу-биле билип шыдавас болгай бис. А ону эки билип алыр дизе, «Христостуң угаанын» шинчилээр херек (1 Кор. 2:16). Чүге дизе Иисус Иегованың угаан-медерелин кара олчаан өттүнүп турар болгай.
2 Иисус Иеговага бүгү угаан-сарыылы-биле ынак турган. Бурган оон чүнү манаарын билир болгаш, ооң күзел-соруун күүседир быжыг хөөннүг чораан. Хилинчекти эртер деп билгеш-даа, ол сестип-кортпаан. Адазын кезээде өөртүрү — Иисустуң кол сорулгазы турган. Өске ажыл-херек оон-даа чугула апаарын ол болдурбаан.
3. Пётр элчин Иисустан чүнү өөренип алган база христианнарны ол чүже кыйгырган? (1 Пётр 4:1).
3 Пётр болгаш өске элчиннер Иисус-биле хөй үени эрттирген. Олар Башкызының канчаар боданырын билип ап, ол дег көрүштү сайзырадыр онзагай аргалыг болганнар. Пётр бирги чагаазынга христианнарны Христостуң угааны-биле a чепсегленип алырынче оттурган. (Номчуптуңар: 1 Пётр 4:1.) Пётрнуң ажыглаан «быжыгланып» деп сөзү дайынчы термин-дир. Бир эвес христианнар Иисустуң угаан-бодалын азы хөөнүн үлегерлеп алыр болза, оларның холунда күштүг чепсек бар болур. Ооң ачызында олар бачыттыг күзелдери-биле демисежип, Эрликтиң башкарылгазында делегейниң салдарынга удурланып шыдаар (2 Кор. 10:3—5; Эф. 6:12).
4. Бо статьяга чүнү сайгарар бис?
4 Бо статьяга Иисустуң угаан-бодалы-биле эки таныжып алыр бис. Ол билиг: 1) Иегова ышкаш боданып өөрениринге, 2) биче сеткилдиг болурунга база 3) бодамчалыг чорукту илередиринге дузалаар.
ИЕГОВА ЫШКАШ БОДАНЫП ӨӨРЕНИҢЕР
5. Пётрнуң Иегова ышкаш боданмаан таварылгазын тайылбырлаңар.
5 Пётрнуң Иегова ышкаш боданмайн барган таварылгазын көрээлиңер. Иисус Иерусалимче баар ужурлуун база ону туткаш, эттеп-эриидеп, өлүрүп каарын элчиннеринге чугаалаан (Мф. 16:21). Израильдиң идегели база аазаттынган Мессия — Иисустуң өлүмүн Иегованың чөпшээрээнин хүлээри Пётрга берге болган (Мф. 16:16). Ынчангаш Пётр Иисусту кедээр апаргаш: «Канчап ындыг боорул! Ындыг чүве Силер-биле болбас ужурлуг!» — дээн (Мф. 16:22). Пётр биле Иисустуң бодалдары ийи аңгы апарган. Чылдагааны чүде? Иисуска бодаарга, Пётрнуң көрүжү Иеговадан аңгы болган.
6. Иисус Иегова ышкаш боданырын канчаар көргүскен?
6 Иисус кезээде дээрде Адазы ышкаш боданыр болгаш, Пётрга: «Менден ырап чор, эрлик! Сен Мени оруумдан астыктырып тур сен, чүге дээрге бодалдарың Бурганныы эвес, улустуу-дур» — дээн (Мф. 16:23). Иегованың күзел-соруун күүседир дээш, хилинчек-човалаңны ажып эрткеш, өлүр ужурлуун Иисус билир турган. Пётрнуң эки сеткилдиг болганы чугаажок, ынчалза-даа Иисус шиитпирлии-биле ойталаан. Пётрну ол байдал чүү чүвеге өөреткен? Иегованың бодалын билип алгаш, ону хүлээп алыры чугула. Ол үнелиг кичээл биске база хамааржыр.
7. Иегова ышкаш боданып өөрениринге беленин Пётр канчаар көргүскен? (Чурукту көрүңер.)
7 Соонда Пётр Иегова ышкаш боданып өөренип алыксаарын көргүскен. Еврей эвес улус чонунче кирзин дээш, Корнилийге суртаалдаар кылдыр Пётрну Бурган чоргускан. Еврейлер колдуунда өске чоннар улузу-биле харылзашпас турган. Ынчангаш Бурганның даалгазын күүседирде Пётрга угаанын чаартыры херек болган. Иегованың еврей эвес улуска хамаарылгазын билип кааш, ол өскерлип алган. Түңнелинде «удур чүве чугаалавайн», Бурганның айбылаан черинче Пётр чорупкан (Аж.-ч. 10:28, 29). Ол Корнилийге, ооң чоок улузунга суртаалдаарга, олар сугга суктуруп алгаш, еврей эвес улустан бир дугаар христианнар апарган (Аж.-ч. 10:21—23, 34, 35, 44—48).
Пётр Корнилийниң бажыңында кирип келген (абзац 7).
8. Иегова-биле чаңгыс угланыышкынныг боданырывысты канчаар көргүзер бис? (1 Пётр 3:8).
8 Чылдар эрткенде, Пётр акы-угбаларны: «Эп-найыралдыг чурттап... көрүңер» деп кыйгырган. (Номчуптуңар: 1 Пётр 3:8.) Кижи бүрүзү Бурганның бодалын өттүнер болза, угаан-бодалывыска демниг чорукту чедип алыр бис. А ону Библиядан билип ап болур. Кандыг байдалдарда эп-найыралды илередири чугула? Чижээ, Иисус эдерикчилерин Бурганның Чагыргазын чуртталгада бирги черге салырынче оттурган (Мф. 6:33). Чыыжыңарда бир кижи долу бараалгаар деп шиитпирлээн дижик. «Бодуңну кээргеп, бода» дээриниң орнунга ол кижини мактап, янзы-бүрү аргалар-биле деткиири чугула.
БИЧЕ СЕТКИЛДИГ БОЛУҢАР
9, 10. Иисус кайгамчык биче сеткилди канчаар көргүскен?
9 Өлүрүнүң мурнунда, сөөлгү кежээки чем үезинде, Иисус Пётрга болгаш өске элчиннерге биче сеткилдиң чугула кичээлин көргүскен. Каш шак бурунгаар Иисус Пётр биле Иоанны дилээрге, олар таз биле аржыылдарны белеткеп кааны чугаажок. Бир кижи аалчыларның буттарын чуур ужурлуг турган. Ол бөдүүн ажылды кым кылырыл?
10 Элчиннерниң манавааны чүүл болган. Иисус аржыылды белинге астып алгаш, тазче суг куткаш, оларның буттарын чуп эгелээн (Ин. 13:4, 5). Чалча кижиниң ажылын кылгаш, Иисус кайгамчыктыг биче сеткилди көргүскен. Ол он ийи өөреникчиниң буттарын чуп берген. Ону элээн үр кылган чадавас. Ынчалза-даа Иисус ажылын эчизинге чедир кылган. Ол ону садыптар деп турган Иуда Искариоттуң безин буттарын чуп берген. Оон Иисус шыдамыы-биле: «Чүнү кылганымны билип тур силер бе? ...Мени Башкы болгаш Дээрги деп адаар-дыр силер, ол чугааңар шын... Мен ылап-ла ындыг мен. Ынчангаш Дээргиңер болгаш Башкыңар болур Мен буттарыңар чуп бергенимде, силер база бот-боттарыңарның буттарыңарны чуп бээр ужурлуг силер» — деп тайылбырлаан (Ин. 13:12—14).
Ёзулуг биче сеткил... бодалдарывыстан эгелээр.
11. Пётрнуң биче сеткилге өөренип алганы чүден көскү? (1 Пётр 5:5). (Чурукту база көрүңер.)
11 Шак ол биче сеткилдиң кичээлин Пётр шиңгээдип алган. Иисус дээрже үне бергенде, бир катап Пётр төрүмелинден аскак кижини экиртип каан (Аж.-ч. 1:8, 9; 3:2, 6—8). Ол хуулгаазынны көөр дээш, эңмежок улус чыылган (Аж.-ч. 3:11). Пётр кол кичээнгейни эрге-дужаалче салыр ниитилелге өзүп келген. А ону магадаан хөй улус мурнунга ол өрү көрдүнген бе? Пётр биче сеткилдии-биле бүгү алдар Иегова биле Иисуска хамааржырын: «Бо кижини Иисустуң ады быжыктырган-дыр, чүге дээрге Ооң адының күжүнге бүзүрээн-дир бис» — деп сөстери-биле бадыткаан (Аж.-ч. 3:12—16). Соонда ол биче сеткилди илередиринче оттурган чагааны христианнарга бижээн. Ону номчуурга аржыылды белинге астып алгаш, элчиннерниң буттарын чуп орар Иисустуң овур-хевири каракка чуруттунуп кээр. (Номчуптуңар: 1 Пётр 5:5.)
Пётр хуулгаазын кылгаш, Иегова биле Иисусту биче сеткилдии-биле алдаржыткан. Бис база буянныг херектер кылгаш, шаңнал-мактал манавайн, биче сеткилди илередип болур бис (абзац 11, 12).
12. Биче сеткилди бис база канчаар сайзырадып болур бис?
12 Пётрнуң үлегерин эдерип, бис база биче сеткилди сайзырадып болур бис. Ёзулуг биче сеткилдиг болур дизе, анаа-ла шын сөстер чугаалаары чедишпес деп утпаңар. Пётрнуң бижээни ёзулуг биче сеткил — боттарывыс болгаш өске кижилер дугайында бодалдарывыстан эгелээр. Өске улуска бир-ле чүүлдү бисти магадазын дээш эвес, а Иеговага база кижилерге ынак болгаш, кылып турар бис. Биче сеткилдиг боор болзувусса, Иеговага, акы-угбаларга бараалгал ала-чайгаар өөрүшкүнү эккээр. Буянныг ажыл-херээвисти өске улустуң эскерери, эскербези-даа чугула эвес (Мф. 6:1—4).
«БОДАМЧАЛЫГ БОЛУҢАР»
13. Бодамчалыг кижи кандыг болур?
13 Христиан кижиниң бодамчалыы чүден көскү? (1 Пет. 4:7). Ындыг кижи Бурганның бодалын кичээнгейге алгаш шиитпир үндүрер. Ооң чуртталгазында Иегова-биле хамаарылгазы чүден-даа артык чугула. Бодунуң дугайында хөйнү бодавас, шупту айтырыгларның харыызын билбезин ол билир. Оон аңгыда ол болганчок мөргүүр. Ынчалдыр Бурганга бүзүреп, шупту чүүлге ооң удуртулгазын дилээрин көргүзүп турар b.
14. Пётр чүге бодамчалыг болбаан?
14 Өлүмүнүң бүдүүзүнде Иисус өөреникчилеринге: «Шупту бо дүне Менден ойталаар-дыр силер» — дээн. А Пётр: «Улус Силерден шупту-даа ойталаар болза, мен кажан-даа ынчанмас мен!» — деп чарлаттынган. Оон Иисус: «Серемчилелдиг болуп, мөргүңер» — деп чагаан (Мф. 26:31, 33, 41). Ынчалза-даа Пётр дыңнангыр болбаан. Ол Иисустуң өөреникчизи мен дээринден ынчангаш дидинмээн боор. Башкызындан ойталапкаш, Пётр ишкирнигип ыглап турган (Мф. 26:69—75).
15. Иисустуң бодамчалыы чер кырынга сөөлгү дүнезинде канчаар илерээн?
15 Иисус тергиин-даа болза, бодунга ынанмаан. Ол Иеговага долузу-биле бүзүреп, өлүмүнүң бетинде хөй мөргүп турган. Мөргүл аңаа Бурганның күзел-соруун күүседиринге дидим чорукту берген (Мф. 26:39, 42, 44; Ин. 18:4, 5). Иисустуң мөргүлге шыңгыы, хүндүткелдиг хамаарылгазы Пётрнуң угаанынга бүгү назынында таңмаланып артканы чугаажок.
16. Пётрнуң бодамчалыг чорукту сайзырадып алганы чүден көскү? (1 Пётр 4:7).
16 Чоорту Пётр кандыг-даа ажыл-херек кылырда мөргүп, Иеговадан удуртулганы дилээри чугула деп билип каан. Иисус Пётрну болгаш өске-даа элчиннерни суртаалдаарынга дузалаар ыдыктыг сүлдени алырынга бүзүреткен. Амдыызында олар Иерусалимге артар ужурлуг турган (Лк. 24:49; Аж.-ч. 1:4, 5). Манаашкын үезин ол канчаар ажыглаан? Пётр болгаш өске христианнар «үргүлчү чыглып, мөргүүр чаңчылдыг турганнар» (Аж.-ч. 1:13, 14). Сөөлзүредир Пётр бирги чагаазынга акы-угбаларны бодамчалыг болуп, үргүлчү мөргүүрүнче кыйгырган. (Номчуптуңар: 1 Пётр 4:7.) Пётр Иеговага идегеп өөренип алгаш, чыыштың чөлеңгиижи апарганы көскү (Гал. 2:9).
17. Бис чүнү үргүлчү кылыр ужурлуг бис? (Чурукту база көрүңер.)
17 Бис бодамчалыг болзувусса, үргүлчү мөргүүр бис. Бөдүүн айтырыгларга хамаарыштыр безин боттарывыска идегевейн, сүмени Иеговадан дилээр бис. Чугула шиитпир үндүрер апарганда, ылаңгыя ооң удуртулгазын дилээр бис. Биске чүү эң-не дээрезин ол эки билир.
Пётр бодунга идегевейн, Иеговадан сүмени кезээде дилээриниң чугулазын билип алган. Бис база ылаңгыя улуг шиитпирлер хүлээрде, хөй мөргүп, бодамчалыг болурун күзээр бис (абзац 17). c
18. Иегованың угаан-бодалын оон-даа дээре билип алырынга биске чүү дузалаар?
18 Иегованың ышкаш шынарлар бисте бар болганы дээш, аңаа дыка-ла өөрүп четтирер бис (Э. д. 1:26). Бурганның ышкаш шынарларны кижилер тергиини-биле илередип шыдавас (Иса. 55:9). Ынчалза-даа Пётрнуң үлегерин эдерип, Иегованың угаан-бодалын эки билип алырынга өөренип ап болур. Бодалдарывысты Бурганның бодалдарынга дүүштүр үргүлчү эдип, биче сеткилдиг, бодамчалыг болзувусса, ону шыдаптар бис.
ЫРЫ 30 Мээң Камгалакчым, Ачам, Өңнүүм
a 1 Пётр 4:1-де «бодал» деп сөстү «угаан-бодал, боданыры» деп очулдуруп болур.
b Бодамчалыг чорук дугайында немей jw.org азы JW Library® приложениеден «Объяснение библейских стихов» деп рубрикада «2 Тимофею 1:7. „Ибо дал нам Бог духа не боязни“» деп статьядан база «Шинчилел Библиязындан» (англи) 1 Тимофейге 3:2-ге тайылбырдан көрүп болур.
c ЧУРУКТА. Ажылга кирип алыр дээш, дарга-биле чугаалажыр мурнунда иштинде мөргүп олурар угбай.
