1. Иисус кандыг хөөннүг суртаалдап чораан база өөреникчилери ооң үлегерин эдерген бе? (Журналдың даштында чурукту көрүңер.)

ИИСУС черге бараалгап турган үезинде кезээде эки хөөннүг чораан болгаш, өөреникчилери база өөрүшкүнү чидирбес кылдыр, ол күзеп турган (Ин. 4:35, 36). Иисус өөреникчилериниң чанынга турда, оларның чүткүлү аажок күштүг турган (Лк. 10:1, 5—11, 17). А кажан Иисусту тудуп алгаш, өлүрүп каарга, оларның суртаалдаар чүткүлү кошкай берген (Ин. 16:32). Ынчангаш Иисус дирлип келгеш, оларны суртаалга эки хөөннүг болурунче деткээн. Иисус дээрже үне берген соонда, ооң өөреникчилери чүткүлдүг суртаалдап эгелээрге, дайзыннары: «Өөредииңерни бүдүн Иерусалимни бир кылдыр нептереттиңер» — деп турганнар (Аж.-ч. 5:28).

2. Иегова бараалгакчыларынга суртаалдаарынга канчаар дузалап турар?

² Иисус бирги векте христианнарның суртаал ажылын удуртуп турда, Иегова оларның күжениишкиннерин йөрээп турган. Ынчангаш Чагырга дугайында медээни дыка хөй улус хүлээп алган. Чижээ, Беженги хүннүң байырлалында б. э. 33 чылда үш хире муң кижи сугга суктурган (Аж.-ч. 2:41). Өөреникчилерниң саны көвүдеп-ле орган (Аж.-ч. 6:7). Ынчалза-даа сөөлгү хүннерде суртаал ажылы оон-даа нептерээр деп, Иисус баш удур чугаалаан (Ин. 14:12; Аж.-ч. 1:8).

3, 4. Чүге чамдык девискээрлерде суртаалдаары берге? Бо статьяга чүнү сайгарар бис?

³ Бис суртаал ажылынга шын хөөннүг боор дээш кызып  турар бис. Чамдык чурттарда акы-угбаларга шын хөөннүг артары чиик, чүге дизе Библияны өөрениксээр улустуң саны дыка көвей. Безин чадаарда оларның чамдыызы боттарының өөренир оочурун манап турар. А өске чурттарда улустарның хөй кезии бажыңнарынга олурбас азы Библияны сонуургавас боорга, шын хөөннүг артары берге.

⁴ Суртаалдаары берге девискээрде чурттап турар болзуңарза, бо статьяда сүмелер силерге дузалаар. Чамдык акы-угбалар буянныг медээни хөй санныг улуска чедирер дээш, чүнү кылып турарын база бистиң чедирип турар буянныг медээвисти улустар дыңнаар-дыңнавас-даа болза, өөрүшкүнү чидирбезинге чүү дузалаарын бо статьяга сайгарар бис.

5. Хөй акы-угбалар кандыг бергелерге таваржып турар?

⁵ Дыка көвей улустар бажыңнарынга олурбас боор. Чижээ, чамдык акы-угбаларывыс шыңгыы кадарып турар бажыңнарлыг девискээрлерде чурттап турар. Ындыг бажыңнарже чурттакчыларның чөпшээрели чокка, охранниктер анаа-ла кижи бүрүзүн киирбес боор. Өске черлерде акы-угбаларывыс бажыңнар кезип, хостуг суртаалдап турар-даа болза, эвээш санныг улус-биле чугаалажып турар. А бир өске черлерде суртаалчылар эвээш чурттакчылыг девискээрлерде суртаалдап турар болгаш, оода-ла чаңгыс кижиге буянныг медээни чедирер дээш, узун орукту эртип турар. Ынчалза-даа кызып-кылайып чеде бээрге, ол бажыңында чамдыкта чок боор. Силер база шак ындыг бергелерге таваржып турар болзуңарза, дүжүп бербеңер. Оларны канчаар ажып эртерил база суртаалга оон-даа канчаар чедиишкинниг бооп болур?

6. Суртаалчыларны чүге балыкчыларга дөмейлеп болур?

⁶ Иисус суртаал ажылын балыктаарынга дөмейлээн (Мк. 1:17). Балыкчы кижи каш хүн улай балыкты тудуп шыдаваан-даа болза, черле дүжүп бербес. Ол балыктаар аргазын, черин болгаш үезин өскертир. Бис база суртаалга ынчаар кылып болур бис. Каш сүмеден көрүптээлиңер.

7. Аңгы-аңгы үелерде суртаалдаар болзувусса, түңнели кандыг боор?

⁷ Аңгы-аңгы үелерде суртаалдаңар. Улус бажыңынга турда, суртаалдаар болзувусса, буянныг медээни хөй улуска тарадып шыдаар бис. Кижилер кажан-бир бажыңынарынче чанар-ла ыйнаан! Ынчангаш чамдык акы-угбалар хүндүс азы кежээки шактарда суртаалдап турар. Ындыг үелерде улустар далашпайн турар болгаш, силерни күзелдии-биле дыңнаар боор. Дэвид дээр удуртукчу акывыстың ажыглап турар аргазы силерге солун боор чадавас. Ол бажыңнар кезип суртаалдап тургаш, кижи чок болган бажыңнарже бир-ийи шак эрткенде катап барып турар. Дэвид мынча дээн: «Солун чүүл, ийи дугаар кээривиске, дыка хөй улус бажыңнарында олурар боор чорду!» *

8. Экклесиаст 11:6-да сөстерни суртаалга хамаарыштыр канчаар ажыглап болур бис?

⁸ Бо статьяның кол шүлүү холувусту сула салбазынче оттуруп турар. (Номчуптуңар: Экклесиаст 11:6.) Дэвид база шак-ла ындыг хөөннүг суртаалдап турар. Ооң-биле мындыг солун таварылга болган. Баарга-ла, кижи чок турган бажыңче Дэвид катап чеде бээрге, эжикти бир эр кижи ажыдыпкан. Ол Библия дугайында чугааны аажок деткип, сонуургааш: «Маңаа сес чыл ишти  чурттап кээримге, Иегованың Херечилери чаңгыс-даа келбээн!» — дээн. Аңаа хамаарыштыр Дэвид: «Эскереримге, бажыңынга олурбас улус колдуунда медээвисти сонуургап дыңнаар боор» — дээн.

9. Чамдык акы-угбалар бажыңынга олурбас улус-биле чугаалажыр дээш, чүнү кылып турар?

⁹ Аңгы-аңгы черлерге суртаалдаңар. Чамдык акы-угбалар бажыңга олурбас улус-биле чугаалажыр дээш, өске черлерде суртаалдап турар, чижээ, кудумчуга азы стенди-биле. Ооң ачызында чөпшээрел чокка кирери болдунмас бажыңның чурттакчыларынга суртаалдап болур. Оон ыңай чамдык акы-угбалар рыноктарга, парктарга база хөй улус ажылдап турар девискээрлерге суртаалдаарга, улус күзелдии-биле чугаалажып, дептерлеривисти ап алырын эскерген. Боливиядан Флойран дээр кожуун хайгааракчызы мынча дээн: «Бис рыноктарга, садыгларга, садыгжылар хостуг турар үеде, 13 шактан 15 шакка чедир суртаалдаар бис. Дыка хөй улус-биле солун кылдыр чугаалажып, безин библейжи кичээлдерни эгелеп ап турар бис».

10. Суртаалдап тургаш, оон өске кандыг аргаларны ажыглап болур силер?

¹⁰ Аңгы-аңгы аргаларны ажыглап суртаалдаңар. Чижээ, бир кижиге аңгы-аңгы үелерде баарыңарга-даа, ол чок боор болза, аңаа канчаар суртаалдап болур силер? Катарина мынча деп үлешкен: «Ужуражып келгеш, чүнү чугаалаар деп турганымны бажыңында чок болган улустарга чагаага бижиир чордум». Суртаалдап турар девискээриңерде кижи бүрүзү буянныг медээни дыңназын дээш, аңгы-аңгы аргаларны ажыглаарын кызыңар.

11. Чамдык улус буянныг медээни чүге дыңнавайн турар?

¹¹ Чамдык улус бистиң медээвисти сонуургавайн турар. Оларга Бурганның-даа, Библияның-даа херээ чок. Чер-делегей кырында хилинчек-човалаңны көргеш, олар Бурганга бүзүревес апарган. Улустуң Библияга сонуургалы чидип турар, чүге дээрге Бурганның негелделери-биле чурттап чоруур бис дижир шажын башкарыкчыларының ийи арынныг чоруун олар көрүп турар. А өске улус ажылының, өг-бүлезиниң болгаш хууда ажаанзыралының аайы-биле шуут-ла чай чок бооп турар. Ынчангаш Библия бистерге дузалап шыдавас деп, олар бодап турар. Улус бистиң медээвисти дыңнавас болза, өөрүшкүвүстү канчаар чидирбейн барып болур бис?

12. Филипчилерге 2:4-те сөстер суртаал үезинде биске канчаар дузалаар?

¹² Улусту сеткилиңерден сонуургаңар. Мооң мурнунда буянныг медээни дыңнавас турган улус суртаалчыларның оларга эки хамаарылгазын көргеш, буянныг медээни сонуургап эгелээн. (Номчуптуңар: Филипчилерге 2:4.) Кырында чугаалашкан Дэвид мынчаар үлешкен: «Бис суртаалдап турувуста, кижи „меңээ солун эвес чүве-дир“ дээр болза, Библияны болгаш дептерлеривисти сумкавысче супкаш, чүге сонуургавазын айтырар чордувус». Шын сеткиливистен көргүскен сонуургалывысты улус эскерип көрүп турар. Олар бистиң чугаалаан сөстеривисти уттуп болур-даа болза, оларга көргүскен эки хамаарылгавысты утпас. Чугаалажып турар киживис биске сөс бербес-даа болза, эвилең-ээлдек, хүндүткелдиг хамаарылгавыс ону бодап турарывысты көргүзер.

13. Чугаалажып турар киживистиң хереглелдеринге медээвисти канчаар таарыштырып болур бис?

¹³ Улустуң хереглелдеринге таарыштыр суртаалдап тургаш, оларга хууда кичээнгейивисти көргүзер бис. Чижээ, бичии төлдү эскерип каан болзуңарза, бажың ээзи-биле библейжи сүмелерниң ажы-төлдү кижизидеринге канчаар дузалаарын азы Библияның ачызында өг-бүлениң канчаар аас-кежиктиг апарып болурун көргүзүңер. Чок болза, бажыңының эжиинде хөй шоочаларны эскерген дижик силер. Ынчаарга бажың ээзи-биле делегейде өзүп турар кем-херек үүлгедиишкиннеринден улус коргуп турар, ынчалза-даа удавас ындыг чүүл турбас деп чугаалажып болур. Кижилер-биле чүнүң-даа дугайында чугаалажып тургаш, эң-не кол чүүл — Библия хууда аңаа канчаар дузалап болурун көргүзүңер. Кырында чугаалашканывыс Катарина мынча дээн: «Алыс шын мээң чуртталгамны эки талаже канчаар  өскертипкенин бодумга сагындырар чордум». Ооң ачызында Катарина улус-биле бүзүрелдиг чугаалажып турар.

14. Чугаалар 27:17-ден алырга, акы-угбалар суртаал үезинде бот-боттарынга канчаар дузалап болур?

¹⁴ Акы-угбаларның дузазын ажыглаңар. Павел элчин Тимофейге канчаар суртаалдаарын база улусту өөредирин айтып берип турган. Оон ыңай ол билиглерни ажыглап тургаш, өске акы-угбаларга Тимофей дузалаар кылдыр, Павел күзеп турган (1 Кор. 4:17). Бис база Тимофей ышкаш, дуржулгалыг акы-угбалардан өөренип ап болур бис. (Номчуптуңар: Чугаалар 27:17.) Шоннуң чижээн көрүптээлиңер. Боттарының шажын-чүдүлгезинге ынак чурттакчыларлыг бичии суурга ол доктаамал эгелекчи бооп бараалгап турган. Аңаа өөрүшкүнү чидирбезинге чүү дузалаан? Шон үлешкен: «Мен акы-угбалар-биле кады суртаалдаар дээш, шупту аргаларны ажыглап турдум. Бажыңнар кезип суртаалдап тургаш, орук ара үе чидирбейн, улус өөредир арга-мергежиливисти канчаар экижидип болурувусту чугаалажып турган бис. Чижээ, бир кижи-биле чугаалашкан соонда, дараазында шак ындыг чугааны канчаар тургузуп болурун сайгарып турган бис».

15. Суртаал үезинде мөргүл чүге эң чугула?

¹⁵ Иеговадан дуза дилеп, мөргүңер. Суртаалдаарының бетинде-ле, албан мөргүп алыңар. Иегованың ыдыктыг сүлдезиниң дузазы чокка чедиишкинниг суртаалдаары болдунмас (Ыд. ыр. 126:1; Лк. 11:13). Дуза дилээн мөргүлүңер тодаргай боор болза эки. Чижээ, Бурганның дугайында билип алыксап турар база силерни күзелдии-биле дыңнаар улусче чедире бээрин Иеговадан дилеңер. Оон мөргүлүңерге дүүштүр алдынып, таварышкан-на улуска суртаалдаңар.

16. Чедиишкинниг суртаалдаар дизе, Библияны хууда шинчилээри чүге чугула?

¹⁶ Хууда Библияны шинчилээр үени үндүрүп алыңар. Библия бисти «Бурганның силерден чүнү күзээнин, кандыг чүүлдер Аңаа эки, таарымчалыг база болбаазыраңгай боорун билип» алырынче деткип турар (Рим. 12:2). Бир эвес бис алыс шынны тып алганывыска чигзинмес болзувусса, улуска бүзүрелдии-биле суртаалдаар бис. Катарина мынча деп үлешкен: «Кезек үе бурунгаар библейжи кол өөредиглерге бүзүрелимни база катап быжыктырар болзумза эки деп билип каан мен. Ынчангаш Чаяакчы херек кырында бар, Библия — Бурганның Сөзү-дүр база амгы үеде Иегованың организациязы бар деп чүүлдерни кичээнгейлиг шинчилээн мен». Ооң ачызында Катарина бодунуң бүзүрелин быжыктырып, суртаал ажылындан улуг өөрүшкүнү ап эгелээн.

17. Иисус суртаал ажылынга эки хөөннү чүге чидирбейн чораан?

¹⁷ Улустуң чамдыызы ооң медээзин тогбаан-даа болза, Иисус эки хөөннү чидирбейн, суртаалдаарын соксатпаан. Аңаа чүү дузалап турган? Алыс шын кижилерге дыка херек деп, Иисус билир турган болгаш, хөй улуска ону чедирерин кызып чораан. Оон ыңай амдыызында алыс шынны хүлээвейн турар улус келир үеде ону дөмей-ле хүлээп алыр деп, ол идегеп турган. Чижээ, Иисустуң чоок улузун сактып кээлиңер. Ооң черге (үш чыл чартык) бараалгап турган үезинде кады төрээн дуңмаларының чаңгызы-даа ооң өөреникчизи апарбаан (Ин. 7:5). А кажан ол дирлип кээрге, олар аңаа бүзүрей бергеннер (Аж.-ч. 1:14).

18. Чүге суртаалдаарын соксатпас бис?

¹⁸ Бистиң суртаалдап турар улузувустуң  кайызы алыс шынны хүлээп алырын билбес бис. Чамдык улуска, өскелерге бодаарга, хөй үе херек. Бисти дыңнавайн турар улус безин, эки алдынып чоруурувусту болгаш эки хөөнүвүстү көргеш, Иегованың бараалгакчылары болуксай бээр чадавас (1 Пет. 2:12).

19. 1 Коринфичилерге 3:6, 7-де бижээн кандыг чугула алыс шынны утпас болзувусса эки?

¹⁹ Алыс шынның үрезинин тарааш, суггарып турар-даа болзувусса, ону Бурган өстүрүп турар деп сактып чоруулуңар. (Номчуптуңар: 1 Коринфичилерге 3:6, 7.) Эфиопиядан Гетахун дээр акывыс мынча дээн: «Мен 20 чыл ажыг ховар кезиттинип турар девискээрге чаңгыс борбак Иегованың Херечизи турган мен. Ам мында 14 суртаалчы бар. 13 кижи сугга суктуруп алган, оларның аразында мээң кадайым биле үш ажы-төлүм. А чыыштарже ортумаа-биле 32 кижи кээп турар». Иегова Бодунуң организациязынче ак сеткилдиг улусту хаара тударын Гетахун шыдамыккай манап, суртаалдаарын соксатпаанынга өөрүп турар (Ин. 6:44).

20. Бистиң бараалгалывыс камгалакчыларның ажылынга чүзү-биле дөмей?

²⁰ Иеговага кижи бүрүзүнүң амы-тыны үнелиг. Бо делегейниң төнчүзү келбээн шаанда, Иисус-биле кады шупту чоннардан улусту чыыр ажылга киржир алдар-хүндүнү Иегова биске берген (Агг. 2:7). Суртаал ажылын камгалакчыларның ажылынга, а бисти бузундулар адаандан кижилерни уштуп турар камгалакчыларга дөмейлеп болур. Камгалакчы бүрүзү-ле дириг улусту тыппас, ынчалза-даа бүдүн команданың демниг кылган ажылы чугула бооп турар. Эрликтиң делегейинден чеже кижиге дузалап шыдаарывысты билбес бис. Ынчалза-даа Иегова оларга дузалаар кылдыр, бистиң кайывысты-даа ажыглап болур. Боливия чурттуг Андреас мынча дээн: «Бир кижи алыс шынны хүлээп алгаш, сугга суктуруп аар болза, ол дээрге бистиң шуптувустуң үндүрген күжүвүстүң түңнели-дир». Бис база, ол акывыс ышкаш, эки хөөннүг суртаал ажылынга киржиилиңер. Ынчан Иегова бисти йөрээр, а суртаал ажылы биске улуг өөрүшкүнү эккээр!