1. Иегованың онзагай тайбыңы деп чүл база ол өг-бүлениң кежигүннери чүнү күзеп турар?

 ЧЕР кырында амгы үеде Иегованың онзагай тайбың өг-бүлези бар. Миллион-миллион тайбыңга ынак улус буянныг херектер кылыр дээш чай чок. Ооң чурттакчылары аңаа үргүлчү артыксаар, ынаар өске улусту база чалап турар. Иегованың онзагай тайбыңының a эжиктери шупту улуска ажык!

2. Иегованың онзагай тайбың өг-бүлези чүге ёзулуг хуулгаазыныл?

² Бөгүнгү делегей каржы-хажагай хамаарылга-биле сиңген (1 Ин. 5:19; Ажыд. 12:12). Ындыг айыылдыг черде тайбың ортулук бары кайгамчык. Ынакшылдыг Бурганывыс биске аңаа өөрүшкүлүг бараалгап, оожургалды миннир арганы берген. Библияда Иегованың онзагай тайбың өг-бүлезин «чаштынар чер» болгаш «суггарып каан сесерлик» деп бижээн (Иса. 4:6; 58:11). Ооң чурттакчыларын Иегова йөрээп турар боорга, бо берге сөөлгү хүннерде, олар боттарын айыыл чок кылдыр миннип турар (Иса. 54:14; 2 Тим. 3:1).

3. Исайя 65-ки эгеде медеглел бир дугаарында кажан күүсеттингенил?

³ Иегованың онзагай тайбың өг-бүлезинге чуртталга кандыг болурун Исайя номунуң 65-ки эгеде медеглелде тайылбырлаан. Ол медеглел б. э. чедир 537 чылда бир дугаар күүсеттинген. Ынчан буруузун билинген  еврейлер Вавилоннуң кулданыындан хосталгаш, чуртунче чанып келгеннер. Иегова оларны йөрээп, Иерусалимниң бузундуларын чараш хоорай кылдыр тударынга база Израильге алыс шын чүдүлгениң төвү болур өргээни катап тургузарынга дузалашкан (Иса. 51:11; Зах. 8:3).

4. Исайя 65-ки эгеде медеглел бистиң үевисте канчаар күүсеттинип турарыл?

⁴ Исайяның медеглели ийи дугаарында 1919 чылда күүсеттинип эгелээн. Ынчан Иегованың чону Өндүр улуг Вавилоннуң кулданыындан хосталган. Ол чылдан эгелээш, Иегованың онзагай тайбыңының кызыгаарлары алгып эгелээн. Чагырга дугайында суртаал кидин түлүк чоруп турган. Бүгү черге чыыштар тургустунуп, а Иегованың өг-бүлезиниң кежигүннери Христоска дөмейлежип бар-ла чыткан. Каржы-хажагай, куду мөзүлүг чораан эр-херээжен улус «Бурганның күзелинден үлегерлей чаяаган... чаа кижиниң овур-хевирин кедип» алган (Эф. 4:24, Чаа делегей). Исайя номунда йөрээлдерниң хөй кезии чүгле чаа делегейге күүсеттинер болгай. Ынчалза-даа чамдыызын ам безин көрүп турар бис. Ол онзагай тайбыңның чараш талаларын, ону чүге кажан-даа каап болбазын сайгарып көрээлиңер.

ИЕГОВАНЫҢ ОНЗАГАЙ ТАЙБЫҢЫНГА БИСКЕ ЧҮГЕ ЭКИ?

5. Исайя 65:13-те медеглел биске канчаар күүсеттинип турар?

⁵ Тодуг-догаа база кадык бис. Исайяның медээзинде Иегованың онзагай тайбыңында улус-биле өске кижилерниң кайы хире ылгалдыын тода көргүскен. (Номчуптуңар: Исайя 65:13.) Иегова бодунуң дугайында харам чокка ажыдып, бараалгакчылары дээш сагыш човап турар. Ол тодуг-догаа, өөрүшкүлүг болурувусту күзеп, биске Библияны, ном-дептерни болгаш ыдыктыг сүлдени берген. (Деңнептиңер: Ажыдыышкын 22:17.) А Бурганның онзагай тайбыңын билбес улус аштап-суксап, түреп чоруур (Ам. 8:11).

6. Иоил 2:21—24-те аазаашкынын Иегова канчаар күүседип турар?

⁶ А Иоил медээчи тараа, кызыл арага болгаш олива үзүнүң дугайында чугаалаан. Ол бүгү бурунгу Израильдиң кол аъш-чеми турган. Ынчалдыр Иегова чонунга бүзүрелин быжыктырарынга херек бүгү чүүл турарын бүзүреткен (Иоил 2:21—24). Бөгүн Иегова кандыг аъш-чемни берип турар? Библия, ном-дептеривис, сайт болгаш ужуражылгаларывыс биле шуулганнарывыс бар. Хүннүң-не мага хандыр чемненип болур бис. Ынчангаш тодуг-догаа, кадык бис.

7. Бистиң чүректеривис чүден өөрүп-хөглеп турар? (Исайя 65:14).

⁷ Аас-кежиктиг, сеткил ханар чуртталгалыг бис. Бурганның чонунуң чүректерин хөглээшкин бүргээн болгаш, өөрүп четтириишкин-биле долган. (Номчуптуңар: Исайя 65:14.) Алыс шын билиглер, ооң аазаашкыннары, төлевирге үндезилээн быжыг идегел дээш, Иеговага четтиргенивисти илередир-дир бис. Ол йөрээлдерни акы-угбалар-биле чугаалажырывыска кайы хире аас-кежиктиивисти оон-даа эки билип эгелээр бис! (Ыд. ыр. 33:9; 132:1—3).

8. Иегованың онзагай тайбыңының ийи кол талазын адаңар.

⁸ Бурганның онзагай тайбыңының ийи кол талазы — ынакшыл болгаш Иегованың чонунуң чаңгыс демнии. Акы-угбаларның аразында быжыг ынакшылы, демнии чаа делегейге чуртталга оон артык  эки болурун билип алырынга дузалап турар (Кол. 3:14). Бир угбавыс Иегованың Херечилери-биле эң-не баштай ужурашканын мынчаар үлешкен: «Мен өг-бүлемге безин бодумну аас-кежиктиг деп миннивейн турган мен. Кижилер аразынга ёзулуг ынакшылды Иегованың Херечилеринден көрүп каан мен». Улус ёзулуг аас-кежикти, сеткил ханар чуртталганы чүгле Бурганның амыр-тайбыңының ачызында билип каар. Бо делегейде улус Иегованың Херечилерин чүү-даа деп турза, олар Бурганның эгээртинмес өг-бүлезинде хүндүткелдиг аттыг (Иса. 65:15).

9. Исайя 65:16, 17-ден алырга, Иегова бисти хилинчек-човалаңдан канчаар адырар?

⁹ Оожургалдыг болгаш идегелдиг бис. Иегованың өг-бүлезинче кирер күзели чок улусту Исайя 65:14-те «чүрээнде качыгдалга алзып, човууртаар» дээн. Амгы үеде Бурганның чону база хилинчектенип чоруур болгай. Ийе, ындыг-даа болза, чоорту шупту биеэги качыгдалдар уттундурар, чиде бээр деп кончуг эки билир бис. (Номчуптуңар: Исайя 65:16, 17.) Иегова бүгү аарышкыны узуткаарындан аңгыда, ол сактыышкыннарны безин угаанывыстан балап кааптар.

10. Акы-угбалар-биле аралажырынга чүге ынак силер? (Чурукту база көрүңер.)

¹⁰ Амгы үеде безин бистиң чыыштарывыс эм үс ышкаш сеткил чүрээвисти бергелерден болгаш дүвүрелдерден оожургадып турар. Бурганның сүлдезиниң үре-түңнели болур ынакшыл, өөрүшкү, тайбың, буян болгаш томаарыыр чорукту илередип тургаш, аңаа чылыг-чымчак байдалды тургузуп турар бис (Гал. 5:22, 23). Бурганның организациязынга хамааржыры дыка-ла улуг аас-кежик! Иегованың онзагай тайбыңынче кирген улус «чаа дээр биле чаа чер» дугайында ооң аазаашкыны канчаар долузу-биле бүдерин бодунуң карактары-биле көөр.

11. Исайя 65:18, 19-тен алырга, Иегованың онзагай тайбыңынга чүнү миннип турар бис?

¹¹ Өөрүшкүлүг бис. Ооң соонда Иегованың онзагай тайбыңынга «өөрүп-байырлаар» шупту чылдагааннар бисте барын Исайя тайылбырлаан. Ооң тургузукчузу — Иегова. (Номчуптуңар: Исайя 65:18, 19.) Ынчангаш кижилерге бо делегейниң Бурган-биле кандыг-даа хамаарылга чок организацияларындан үнеринге дузалаарында элдеп чүве чок. Оларга бодаарга, Бурганның тайбыңы чечектелген чараш сесерлик  дег, ынчангаш өске улусту ынаар чалап турар бис (Иер. 31:12).

12. Исайя 65:20—24-те аазаашкыннарның кайызы силерге эң эки база чүге?

¹² Бурганның онзагай тайбыңында улустуң база бир өөрүүр чылдагааны — чаа делегейже идегел. Ол үеде чуртталганы сагыштаалап көрүңер даан! «Аңаа моон соңгаар чаш ажы-төл өлүп кырылбас, бодунуң назынын бүрүнү-биле чурттаваан шаанда, чаңгыс-даа кырган кижи өлбес» — деп, Библия аазаан. Тудуп алган бажыңнарывыска чурттап, тарып каан ыяштарывыстың чимизин боттарывыс чиир бис. Хилис ажылдавас бис, чүге дизе Иегова бисти йөрээр. Тайбың, аас-кежиктиг, ёзулуг утка-биле долган чуртталганы ол аазап турар. Дилеп чугаалаар мурнунда-ла, Бурган биске херек чүүлдү билир. Ол «бүгү амылыгларның күзээн чүвезин хандыр[ар]» (Иса. 65:20—24; Ыд. ыр. 144:16).

13. Исайя 65:25-тен алырга, Иеговага бараалгап эгелээн улустуң чуртталгазы канчаар өскерлип турар?

¹³ Тайбың болгаш айыыл чок минниишкинниг бис. Бурганның дузазы-биле араатанзыг чораан дыка хөй улус долузу-биле эки талаже өскерлип алган. (Номчуптуңар: Исайя 65:25.) Ол багай аажы-чаңның изи-даа артпаан (Рим. 12:2; Эф. 4:22—24). Бис тергиин эвес болгаш, частырыгларны кыла бээр бис. Ындыг-даа бол Иегова бисти, ол хире аңгы улусту, ынакшыл биле амыр-тайбыңга быжыы-биле каттыштырган (Тит. 2:11). Ындыг хуулгаазынны чүгле шупту чүвени шыдаар Бурган кылыр!

14. Исайя 65:25-те сөстерниң шынныын бир акывыстың төөгүзү канчаар бадыткаан?

¹⁴ Кижи шынап-ла бодун өскертип шыдаар бе? Бир чижекти көрээлиңер. Каржы, хай-чагырга чок аныяк оол машина-балгат оорлап, өске-даа херектери дээш, 20 харлыынга чедир хөй катап кара-бажыңга олурган. Үргүлчү ол чогуш-содаа үндүрер турган. Ол аныяк оол библейжи алыс шынны билип алгаш, Иегованың Херечилериниң ужуражылгаларынче барып эгелээн. Ынчан ол Бурганның онзагай тайбыңын миннип, бараалгаары дээрге чуртталганың ужур-утказы деп билип каан. Сугга суктурган соонда, Исайя 65:25-те сөстер ооң чуртталгазында өскерлиишкиннерни кайы хире шын чугаалаанын, акывыс бо-ла боданыр турган. Ону араатан арзылаң тургаш, хураган апарган деп болур.

15. Бурганның өг-бүлезинге хөй кижилер келзин деп чүге күзээр бис база оларга канчаар дузалап болур бис?

¹⁵ Исайя 65:13 мындыг сөстер-биле эгелээн: «[Иегова] Дээрги-Бурган-Чаяакчы мынча дээн». А 25-ки шүлүү: «[Иегованың] чугаалаан чүвези ол-дур» деп сөстер-биле төнген. Бурганның аазаашкыннары кезээде күүсеттинип турар (Иса. 55:10, 11). Иегованың онзагай тайбыңы ам чер кырында бар. Бурган шынап-ла кайгамчык чонну тургускан. Ооң бараалгакчыларының аразынга амыр тайбыңны болгаш айыыл чок чорукту миннип болур бис. Бистиң организациявыс бо каржы делегейде — ёзулуг оазис (Ыд. ыр. 71:7). Ынчангаш Иегованың өг-бүлезинче каттыжып кээринге, хөй улуска дузалаарын күзээр бис. А ону кылырда суртаалдап, өөреникчилерни белеткээри чугула (Мф. 28:19, 20).

ИЕГОВАНЫҢ ТАЙБЫҢЫНЧЕ УЛУСТУ КАНЧААР ХААРА ТУДАРЫЛ?

16. Иегованың онзагай тайбыңынче кирер күзел канчаар тыптып кээрил?

¹⁶ Бурганның өг-бүлезинче өске улустуң кирер күзели тыптып кээр кылдыр кижи  бүрүзү хөйнү кылып болур. Ынчангаш Иегованы өттүнери чугула. Ол бодунуң организациязынче кижилерни күш-биле эвес, а чылыг-чымчаа-биле хаара тыртып турар (Иер. 31:3; Ин. 6:44). Биче сеткилдиг улус Иегованы кайгамчыктыг Бурган деп билип алгаш, боттары-ла чүткүп эгелээр. Өске улуска сонуурганчыг кылдыр шынарларывыс болгаш аажы-чаңывыс-биле Бурганның өг-бүлезин канчаар каастап болур бис?

17. Чыыштарывыска келгеш, улус чүнү эскерип каар?

¹⁷ Чыыштарга келгеш, улус бир дугаарында бот-боттарывыска ынаавысты, эки хамаарылгавысты эскерип каар. Хурал залдарынга бир дугаарында олар чүнү сонуургаарыл? Келген улус бурунгу Коринфтиң чурттакчылары ышкаш: «Бурган ылап-ла силерниң араңарда-дыр!» деп магадаарын күзээр бис (1 Кор. 14:24, 25; Зах. 8:23). Ынчангаш моон-даа соңгаар: «Араңарда эп-найыралдыг амыдыраңар» деп библейжи чагыгны дыңнаар болзувусса эки (1 Фес. 5:13).

18. Бурганның организациязынга кижилер чүге каттыжыксаарыл?

¹⁸ Акы-угбаларже Иегова ышкаш көөрүн кызар бис. Ынчангаш оларның четпестеринче эвес, а эки шынарларынче кичээнгей салыр бис. Үе эртерге, частырыгларның изи безин артпас болгай. Ынчалза-даа аравыска чөрүлдээлер тургустунуп болур. Ол бергелерни ынакшылга башкартып шиитпирлеп, «бот-боттарывыска буянныг, энерелдиг» өршээжир бис (Эф. 4:32). Ооң ачызында Бурганның онзагай тайбыңы ынакшылдыг, эки хамаарылганы күзээр улусту хаара тыртып турар b.

 ИЕГОВАНЫҢ ОНЗАГАЙ ТАЙБЫҢЫН КАЖАН-ДАА КАГБАҢАР

19. а) Иегованың өг-бүлезинче эглип келген улус чүнү миннип турар? ( «Олар Иегованың онзагай тайбыңынче эглип келген» деп көзенекти көрүңер.) б) Иегованың өг-бүлезин хумагалаарывысты канчаар көргүзер бис? (Чурукту база көрүңер.)

¹⁹ Иегованың онзагай тайбыңын дыка үнелээр бис! Ында хүнден-хүнче Иегованы алгап-мактаар улус көвүдеп-ле олурар. Бурганның ол кайгамчык белээ дээш кезээде өөрүп четтирер бис. Ооң өг-бүлезинге аас-кежикти, өөрүшкүнү, оожургалды база айыыл чок чорукту миннип турар бис. Оон канчап-даа үнмес бис. Серемчилел чок болзувусса, Эрлик бисти оон кажарлап үндүрерин оралдажыр (1 Пет. 5:8; Ажыд. 12:9). Ынчангаш аңаа алыспайн, Иегованың чараш, арыг, тайбың өг-бүлезин улаштыр камгалаалыңар.