1. Хөй оолдар-кыстар кандыг чедиишкиннерни кылганыл?

 ЧЫЛ санында муң-муң дуңмаларывыс сугга суктуруп турар. Оларның бирээзи болзуңза, Иегова болгаш сээң кады бүзүрээн акы-угбаларың сен дээш аажок өөрүп турар (У. ч. 27:11). Кылган чедиишкиннериңни сактып кээли. Сен Библияны хөй чылдар дургузунда кызымаккай өөренип турган сен. Оон Библия — Бурганның Сөзү деп шынзыккан сен. А эң чугула чүүл, ол Ыдыктыг номнуң Авторун билип алгаш, Аңаа ынак апарган сен. Оон Иеговага чуртталгаңны бараалгаткаш, сугга суктуруп алган сен. Ол дыка шын шиитпир-дир!

2. Бо статьяга чүнү сайгарар бис?

 ² Сугга суктурарының мурнунда-ла, Иеговага шынчы чорууңну шенээн бергелерге таварышкан сен. Улгаткан тудум, оон-даа хөй бергелерге таваржыр сен. Эрлик сээң Бурганга ынакшылыңны соодуп, Оон хая көрнү бээр кылдыр, сени албадаар (Эф. 4:14). Ынчалза-даа аңаа черле дүжүп бербе! Иеговага шынчы артарынга база бүгү чуртталгаңны Аңаа бараалгадыр дээн аазаашкыныңны күүседиринге сеңээ чүү дузалаар? Чаңгыс черге турбайн, чедишкен христиан боорунче чүткү (Евр. 6:1). А ону кылырда, чүү канчаарыл?

3. Сугга суктурган соонда безин, чүнү кылыр ужурлуг бис?

³ Сугга суктурган соонда, Павел элчинниң Эфесте акы-угбаларга чугаалаан дүрүмүн эдерер болзувусса эки. Ол оларны четчип-быжарынче оттурган (Эф. 4:13). Өскээр чугаалаарга, олар Бурган-биле найыралын улаштыр сайзырадыр ужурлуг турган. Павел ол өзүлдени чаш төлдүң өзүп орары-биле  деңнээн. Ада-иези ажы-төлүнге ынак база ол дээш чоргаарланыр болгай. Ындыг-даа бол, ол кезээде чаш артпас. Чоорту ол чаш төл ышкаш алдынарын соксадыр ужурлуг (1 Кор. 13:11). Бистиң өзүлдевиске хамаарыштыр база ынча деп болур. Сугга суктуруп алган соонда, чаңгыс черге тапталбайн, бурунгаар чүткүүр ужурлуг бис. Биске ону кылырынга дузалаар каш сүмени көрүптээлиңер.

4. Бурган-биле найыралды быжыктырарынга сеңээ чүү дузалаар? (Филипчилерге 1:9). Тайылбырла.

⁴ Иеговага ынакшылың улам өссүн. Иеговага ынак сен, ынчалза-даа Аңаа ынакшылың оон-даа күштүг бооп болур. Ону канчаар кылып болур сен? Ол айтырыгга Павел элчин Филипчилерге 1:9-та харыылаан (номчуптуңар). Филипте христианнарның ынакшылы «эгээртинмес долу болзун дээш» ол мөргүп турган. Ынчап кээрге, Иеговага ынакшылывыс улам күштүг апарып болур. Ону кылыр дизе, Бурганның дугайында ылап шын билиглерни ап, Ооң күзел-соруун угаап билири чугула. Иегованы эки билген тудум, Аңаа ынакшылывыс күштелип, Ооң шынарларын болгаш ажыл-херээн оон-даа үнелеп эгелээр бис. Ынчан Бурганны өөртүп, Ону муңгаратпас дээш кызар бис. Иегова бистен чүнү манап турарын билип ап, Аңаа таарымчалыг чурттаар бис.

5, 6. Иеговага оон-даа артык ынак апаарынга биске чүү дузалаар? Тайылбырла.

⁵ Иисус-биле чоок танышкан тудум, Иеговага ынакшылывыс оон-даа күштелир. Чүге дизе ол Адазының шынарларын кара олчаан өттүнүп турган (Евр. 1:3). Иисусту билип алыр эң-не эки арга — дөрт Буянныг медээ номнарын шинчилээри-дир. Хүннүң-не Библияны номчуур чаңчылды сайзырадып албаан болзуңза, ону бо хүнден эгелеп, чүге кылып болбас деп? Библияда Иисустуң дугайында төөгүлерни номчуп тургаш, ооң илередип турган шынарларынче кичээнгейни сал. Иисус бөдүүн сеткилдиг, чазык кижи чораан. Кажан аңаа бичии чаштарны эккээрге, ол оларны куспактап, хойнунга олуртуп алыр турган (Мк. 10:13—16). Ооң өөреникчилери Иисустуң чанынга боттарын хостуг кылдыр миннир чораан. Олар эпчоксунмайн, бодалдарын ажыы-биле чугаалап турган (Мф. 16:22). Иисус шак ынчаар дээрде Адазын өттүнүп турган. Иегова база бөдүүн сеткилдиг болгаш чазык. Ол бистиң мөргүлдеривисти кичээнгейлиг дыңнап турар. Чүрээвисте чүнү бодап турарывысты Аңаа хостуг чугаалап болур бис. Ол бисти кажан-даа шүгүмчүлевес деп билир бис. Дээрде Адавыс биске ынак болгаш, бис дээш сагыш салып чоруур (1 Пет. 5:7).

⁶ Иисус кижилерни кээргеп турган. Матфей элчин мынча деп бижээн: «Чыылган мөөң чонну көргеш, Иисус улусту кээргей берген, чүге дээрге олар, кадарчызы чок хойлар дег, канчаар-даа харык чок база могап-турупкан болганнар» (Мф. 9:36). А Иегова биске кандыг хамаарылгалыг? Иисус мынча дээн: «Дээрде Адаңар база шак ындыг: бо бичии уругларның чаңгызы-даа чиде бээрин Ол күзевейн турар» (Мф. 18:14). Ол сөстер бистиң чүрээвисти чылдып турар эвес-тир бе? Иисустуң дугайында хөйнү билген тудум, Иеговага ынакшылывыс дам күштелир.

7. Бүзүрели быжыг акы-угбалар-биле аралажыры чүзү-биле ажыктыг?

⁷ Иеговага ынакшылыңны улам сайзырадып, өзүп-мандыырынга сеңээ оон ыңай чүү дузалаар? Чыыжыңда бүзүрели быжыг акы-угбалар-биле чоок найырал. Оларның кайы хире өөрүшкүлүүн эскерип көр даан. Иеговага бараалгаар дээн шиитпири дээш,  олар бичии-даа хараадавас. Оларның чуртталгазынга болган солун болуушкуннарны сонуургап айтырып көр. А чугула шиитпир хүлээр деп баргаш, олардан сүмени диле. Чүге дизе Библияда: «Чөвүлекчилерниң саны хөй болза, чон камгалал алыр» дээн болгай (У. ч. 11:14).

8. Библияда бижээн чүүлге чигзинип эгелээн болзуңза, чүнү канчаар болза эки?

⁸ Чигзиниглерден адырлып ал.  2-ги абзацта бижээни дег, Эрлик бүзүрелиңни бар шаа-биле кошкадырын кызар. Канчаар? Чижээ, ол эволюция өөредиин ажыглап, библейжи өөредиглерниң алыс шынныынга сеңээ чигзиниглер тыптып кээр кылдыр кылып болур. Бичии тургаш, ол өөредиг дугайында дыңнап көрбээн чадавас сен. Ам школага ону сеңээ өөредип эгелээн. Эволюцияга хамаарыштыр башкыларыңның чугаалап турар чүүлдери уткалыг болгаш шын кылдыр сагындырар. Ынчалза-даа олар Чаяакчы ылап бар дээн фактыларны чаңгыс-даа шинчилевээн чадавас. Чугаалар 18:18-те сөстерни сактып кел даан: «Удурланыкчызы чугаалап эгелевээнде, сактырга, баштай чаргылдажып эгелээн кижиниң сөстери шынныг-даа ышкаш болур». Школада өөренип турар чүүлдерге бодамча чок бүзүрээриниң орнунга, Бурганның Сөзүн ханы шинчиле. Бистиң дептерлеривисти коптарып көр. Ооң мурнунда эволюцияга бүзүреп турган акы-угбалар-биле чугаалаш. Олар сагыш човангыр Чаяакчы бар дээрзинге чүге бүзүрей бергенил деп сонуургап айтыр. Шак ындыг аралажыышкын Бурган бар деп шынзыгарыңга дузалаар.

9. Мелиссаның чижээнден чүнү өөренип ап тур сен?

⁹ Шупту чүвени Бурган чаяап каан деп бадыткалдарны өөренип көргеш, Мелисса * чигзиниглеринден адырлып алган. Ол мынча дээн: «Школага эволюцияны кижи бүзүрей бээр кылдыр өөредир. Эгезинде ол айтырыгны ханы шинчилээринден коргуп турдум. Сактырымга, эволюцияга удур бадыткалдарны тып шыдавас ышкаш болган мен. Ынчалза-даа: „Иегова бисти Аңаа бодамча чок бараалгаарын күзевейн турар болгай“ деп бодангаш, ол теманы шинчилээр деп шиитпирлээш, „Существует ли заботливый Творец?“ деп номну, „Была ли жизнь создана?“, „У истоков жизни. Пять вопросов, которые требуют ответа“ деп брошюраларны  төндүр номчупкан мен. Меңээ херек чүүл ол болган! Ону та чүге ооң мурнунда кылбаан кижи мен».

10, 11. Мөзү-шынар талазы-биле арыг артарынга сеңээ чүү дузалаар?(1 Фессалоникчилерге 4:3, 4).

¹⁰ Бачыттан ойтала. Элээди үезинде кижиниң мага-бот күзээшкиннери дыка күштүг боор. Оон аңгыда, улус сени эр-херээжен чорук кылырынче көгүдүп турар чадавас. Бодуңнуң күзээшкиннериңге алзыптар болзуңза, Эрлик амыраар. Мөзү-шынар талазы-биле арыг артарынга сеңээ чүү дузалаар? (Номчуптуңар: 1 Фессалоникчилерге 4:3, 4.) Иеговага чүнү миннип турарыңны ажыы-биле чугаалап, Оон күштен диле (Мф. 6:13). Иегова сени шиитпес, а харын-даа дузалаарын күзеп турар деп утпа (Ыд. ыр. 102:13, 14). Оон ыңай Библия сеңээ дузалап болур. Мурнунда абзацта Мелисса арыг эвес бодалдар-биле база тулчуп турган. Ол мынча деп үлешкен: «Бир эвес Библияны хүннүң-не номчувайн турган болзумза, дүжүп бериптер турган мен. Мен Иеговага хамааржыр мен база Аңаа бараалгаксап тур мен деп, Библия меңээ сагындырып турган» (Ыд. ыр. 118:9).

¹¹ Бачытка удур чааскаан демисешпе. Ада-иеңге бергелериңни чугаала. Ооң дугайында чугаалажыры ыядынчыг бооп болур, ынчалза-даа ону кылыры дыка чугула. Мелисса улаштыр мынча дээн: «Мен Иеговадан дидим чорукту дилээш, ачам-биле байдалымның дугайында чугаалашкан мен. Оон сагыш-сеткилим чиигей берген. Иегова меңээ чоргаарланып турар деп билир мен».

12. Эки шиитпирлерни канчаар хүлээрил?

¹² Библейжи дүрүмнерни ажыгла. Улгаткан тудум, бодуң шиитпирлер хүлээп эгелээр сен. Ынчалза-даа дуржулгаң ам-даа эвээш. Иегова-биле найыралыңны бузуп болур частырыгларны кылбас дизе, чүнү канчаарыл? (У. ч. 22:3). Кари дээр дуңмавыска бодамчалыг шиитпирлер хүлээринге чүү дузалааныл? Бүзүрели быжыг кижиге таварылга бүрүзүнде дорт айтыышкынның херээ чок деп, ол билип каан. «Дорт айтыышкыннар дилевейн, библейжи дүрүмнерниң утказын эки билип алыр болза эки» — деп, ол үлешкен. Библияны номчуп тургаш: «Иегованың канчаар боданып турарын бо үзүндүден чүнү билип алдым? Меңээ шын алдынарынга дузалаар дүрүмнер ында бар бе? Оларны ажыглаары меңээ чүзү-биле ажыктыг боор?» деп бодуңдан айтыр (Ыд. ыр. 18:8; Иса. 48:17, 18). Библияны номчуп тургаш, ооң дүрүмнериниң дугайында ханы боданыр болзуңза, Иегованы өөртүр шиитпирлер хүлээри сеңээ белен боор. Бүзүрелиң быжыккан тудум, Иегованың бодалдарын оон-даа эки билип алыр сен. Ынчан байдал бүрүзүнге сеңээ дорт айтыышкынның херээ чок болур.

13. Эки эш-өөр сеңээ канчаар дузалап болур? (Чугаалар 13:20).

¹³ Иеговага ынак улус-биле аралаш. Бистиң эш-өөрүвүс Бурган-биле найыралче улуг салдарны чедирип турар деп көрдүвүс. (Номчуптуңар: Чугаалар 13:20.) Сара дээр дуңмавыс өөрүшкүзүн чидирипкен. Аас-кежик бооп, ол эки эш-өөрнү тып алган. Сара мынча дээн: «Бүзүрели быжыг эш-өөрнү үе-шаанда тып алган мен. Бир эжим-биле катай неделя санында „Таңныыл суургазынга“ белеткенип турган мен. А өске эжимниң ачызында чыыштарга харыылап эгелээн мен. Олар-биле эдеришкеш, хууда Библияны шинчилээринге болгаш мөргүүрүнге шыңгыы хамаарылгалыг апарган мен. Ынчан Иегова-биле найыралым оон-даа быжыгып, катап өөрүшкүлүг апарган мен».

14. Джулиен эки эштерни канчаар тып алган?

¹⁴ Сеңээ эки салдар чедирер эштер-биле  канчаар найыралдажып ап болур сен? Джулиен дээр удуртукчу акывыс аныяк үелерин сактып чугаалаан: «Бүзүрелдиг эштерни суртаалдың ачызында тып алган мен. Оларның кайы хире чүткүлдүг суртаалдап турарын көргеш, суртаалдан өөрүшкүнү ап болур деп билип каан мен. Ынчан долу бараалгаарын шиитпирлээн мен. Оон аңгыда, чүгле үе-чергем улус-биле эвес, а өске-даа акы-угбалар-биле эдержир болзумза эки деп билдим. Вефилге бараалгап тургаш, эки эштерни база тып алган мен. Оларның үлегер-чижээ меңээ оюн-тоглааны шын шилииринге дузалаан. А ол чүүл Иегова-биле найыралымны улам быжыктырган».

15. Павел Тимофейни чүү деп сагындырган? (2 Тимофейге 2:20—22).

¹⁵ Чыышта чамдык улус сенче багай салдар чедирип болур. Ындыг байдалда чүнү канчаар болза эки? Бирги векте христиан чыышта чамдык улустуң бүзүрели база кошкак турган. Павел элчин ону билип турган болгаш, Тимофейни ындыг улус-биле эдеришпес кылдыр сагындырган. (Номчуптуңар: 2 Тимофейге 2:20—22.) Иегова-биле найыралывысты үр үе дургузунда быжыглап, өстүрген болганывыста, ону үнелээр ужурлуг бис. Ол найыралды өске улус кошкадыптар кылдыр черле чөпшээреве (Ыд. ыр. 25:4).

16. Кандыг ажыктыг сорулгаларны салып болур сен?

¹⁶ Ажыктыг сорулгаларны сал. Бүзүрелиңни быжыктырар база сени эки талаже өскертиптер сорулгаларны сал (Эф. 3:16). Чижээ, Библияны хууда шинчилээринче азы номчуурунче оон-даа хөй үени үндүрүп болур сен (Ыд. ыр. 1:2, 3). Чок болза, сеткилиңниң ханызындан оон-даа хөй катап мөргүүр сорулганы салып ап болур сен. Оон ыңай оюн-тоглааны шын шилиир азы үени шын ажыглаар сорулганы салып болур (Эф. 5:15, 16). Бүзүрелиңге өзүп-мандыыр дээш кызып чорууруңну көргеш, Иегова дыка өөрүп турар.

17. Өске улуска чүге дузалаар болза эки?

¹⁷ Өске улуска дуза кадар болзуңза, оон-даа чедишкен христиан апаар сен. Аңаа хамаарыштыр Иисус мынча дээн: «Алырынга көөрде, бээри — амыр-чыргалдыг» (Аж.-ч.  20:35). Өске улус дээш үеңни болгаш күжүңнү харамнанмас болзуңза, аас-кежиктиг болур сен. Чижээ, чыышта кадыы багай азы улуг назылыг акы-угбаларның дугайында сагыш човаар сорулганы салып ап болур сен. Оларга аъш-чемни садып бээринге дузалап, чок болза электроннуг херекселди ажыглап өөредип каар болзуңза, олар сеңээ аажок өөрүп четтирер. А эр улус, акы-угбаларга оон-даа хөйнү кылыр дээш, чыыштың дузалакчызы болур сорулганы салып болур (Флп. 2:4). Чыышка хамаарышпас улуска ынакшылды канчаар көргүзүп болур сен? Бурганның Чагыргазының дугайында өөрүшкүлүг медээни оларга идепкейлиг чугаалап тургаш (Мф. 9:36, 37). Долу бараалгаарынга сеңээ чүү шаптыктап турар? Чүү-даа шаптыктавайн турар болза, ол сорулганы чүге салып ап болбас деп?

18. Долу бараалгал сеңээ өзүп-мандыырыңга канчаар дузалаар?

¹⁸ Долу бараалгап эгелээр болзуңза, оон-даа дүрген өзүп-мандыыр сен. Бодап көр даан, сээң мурнуңга чеже хөй аргалар ажыттынып кээр-дир! Доктаамал эгелекчи апаар болзуңза, Чагырга медээчилериниң школазынга өөренип, Вефилге бараалгап азы бистиң организациявыстың тудуг проектилеринге киржир аргалыг болур сен. Кейтлин дээр эгелекчи дуңмавыс мынча деп үлешкен: «Бурган-биле хамаарылгамны быжыктырып алырынга меңээ бүзүрели быжыг акы-угбалар дузалашкан. Оларның үлегер-чижээ мени Библияны ханы шинчилээринге база оон-даа мергежилдиг башкы болурунга дузалаан».

19. Иегова сеңээ кандыг белектерни бээр деп турар?

¹⁹ Иегова сеңээ дыка хөй белектерни бээр деп турар. Ынчалза-даа ону алыр дизиңзе, моон-даа улаштыр чедишкен христиан болур дээш, чүткүүр болзуңза эки. Ынчан аныяк чылдарыңны халас эрттирбес сен (1 Ин. 2:17). Мелегей шиитпирлер дээш хараадавас сен, а харын-даа ёзулуг аас-кежиктиг бооп, чедиишкинниг кижи болур сен (У. ч. 16:3). Сээң чижээң аныяк-даа, улуг-даа акы-угбаларны сорук киирер (1 Тим. 4:12). А эң чугула чүүл, сеткилиңге өөрүшкүнү болгаш тайбыңны миннир сен, чүге дээрге Иегова сээң чоок өңнүүң болур (У. ч. 23:15, 16).