1. Алыс шынны канчаар билип алганывыстың дугайында чугаалаарынга чүге ынак бис?

 АКЫ-УГБАЛАР-БИЛЕ таныжып тургаш, «алыс шынны канчаар билип алдың?» деп айтырыгга хөй катап харыылаан чадавас силер. Өске улустуң Иегованы канчаар билип алганын дыңнаары биске дыка солун. Ол ышкаш алыс шынны чүге үнелеп турарывысты өскелерге чугаалаары биске өөрүнчүг (Рим. 1:11). Ындыг чугаалаар Иеговага ынакшылывысты катап оттуруп, алыс шынның кайы хире үнелиин биске сагындырып турар. Оон алыс шынның оруун эдерер күзеливис улам күштелир. Чүгле ол орук-биле чоруур болзувусса, Иегованың ээ көрүүшкүнүн болгаш шаңналын алыр бис (3 Ин. 4).

2. Бо статьяга чүнү сайгарар бис?

² Алыс шынга чүге ынак бис? Ооң каш чылдагаанын сайгарыптаалыңар. Оон ол кайгамчык белекти үнелеп турарывысты канчаар көргүзүп болурун чугаалажыр бис. Ынчан алыс шынче бисти хаара туткан Иегова Бурганывыска оон-даа өөрүп четтирер бис (Ин. 6:44). Чугаажок, Бурганның Сөзүнден алыс шынны өскелерге чугаалаар күзеливис улам күштелир.

3. Алыс шынга чүге ынак бис?

³ Алыс шынга ынак болур чылдагааннарывыс дыка хөй. Оларның эң чугулазы — алыс шынның дөзү болур, Иегова Бурганга ынак бис. Ооң Сөзү, Библияның ачызында бис Ону чер-дээрниң өндүр күштүг Чаяакчызы болгаш бис дээш эрге-чассыг сагыш човап чоруур ынакшылдыг Адавыс  деп билип алган бис (1 Пет. 5:7). Бистиң Бурганывыс «килеңнээчел эвес, кээргээчел, ээ көрнүүчел, өндүр улуг энерелдиг болгаш бүзүрелдиг» (Хост. 34:6). Иегова чөптүг чорукка ынак (Иса. 61:8). Аңаа бистиң хинчектенип чоруурувусту көөрү дыка аарышкылыг. Ынчангаш Ол доктааткан үезинде шупту кижилерни хилинчек-човалаңдан хостаарын аажок күзеп турар (Иер. 29:11). Бис ол үени база четтикпейн манап турар бис! Иеговага ол хире ынак болганывыс кайгамчык эвес.

4, 5. Павел элчин идегеливисти чүге якорьга дөмейлээн?

⁴ Оон ыңай алыс шынга чүге ынак бис? Чүге дизе ооң ачызында чуртталгавыста эки чүүлдер эңдерик. Чижээ, алыс шын биске келир үеже идегелди берип турар. Ол идегелдиң кайы хире чугулазын онзалап демдеглээр дээш, Павел элчин мынча дээн: «Ол идегелди сеткил-хөңнүвүстүң айыыл чок быжыг якорун дег кадагалап чоруур бис» (Евр. 6:19). Якорь корабльге чаңгыс черге турарынга база хая-даштарга үспезинге дузалап турар. Ооң-биле дөмей, Библияга үндезилээн идегел чуртталганың хат-шуурганнарынга торулбазынга биске дузалап турар.

⁵ Бо шүлүктүң контекстизин көөр болза, Павел шилип чагдырган христианнарның дээрге чурттаар идегелиниң дугайында чугаалаан. Ынчалза-даа ооң сөстери черге дываажаңга мөңге чурттаар идегелдиг Бурганның бараалгакчыларынга база хамааржыр (Ин. 3:16). Ындыг идегел бистиң чуртталгавысты ёзулуг ужур-уткалыг кылып турар.

6, 7. Келир үе дугайында идегел Ивонга канчаар дузалаан?

⁶ Ивон дээр угбавыстың төөгүзүн көрүптээлиңер. Бичиизинде алыс шынны билбес тургаш, ол өлүмден дыка коргар турган. Ивон бир номдан: «Даартагы хүн дүшпейн баар үе кажан-бир чедип кээр» деп сөстерни номчуп алган. Ол сөстер ооң бажындан үнместеп туруп берген. Ивон сактып чугаалаан: «Ол дүне удуп чадап каан мен, чүге дээрге келир үе дугайында бодалдар мени дүвүредип-ле турган. „Чуртталганың ужур-утказы черле турар эвеспе? Мен чүү дээш төрүттүнүп келген мен?“ — деп боданып турган мен. Мен өлүксевейн турган мен!»

⁷ Элээди үезинде Ивон Иегованың Херечилеринге ужуражы берген. Ол улаштыр мынча дээн: «Мен дываажаңга мөңге чурттаар идегелдиг апарган мен». Ол алыс шын угбавыска канчаар дузалаан? «Ам дүнелерде келир үе болгаш өлүм дугайында бодалдар мени дүвүретпес апарган» — деп, Ивон чугаалаан. Ивон алыс шынны аажок үнелеп, келир үеже идегелиниң дугайында өскелерге чугаалаарынга дыка ынак (1 Тим. 4:16).

8, 9. а) Иисустуң бир угаадыглыг чугаазында кижи тып алган эртинезин кайы хире үнелээн? б) Алыс шынны кайы хире үнелээр силер?

⁸ Библейжи алыс шынче Бурганның Чагыргазының дугайында өөрүшкүлүг медээ база кирип турар. Иисус Чагырга дугайында алыс шынны хөөп каан эртинеге деңнээн: «Дээрниң Чагыргазы шөлде хөөп каан эртинеге дөмей. Ону тып алган кижи база катап чажыра хөөп кааш, аажок өөрүп чоруткаш, бодунда бар шупту чүвени садыпкаш, эртине хөмген шөлдү садып алган» (Мф. 13:44). Эскерер болзувусса, ол кижи эртине дилээр сорулгалыг турбаан. Ол душ бооп, эртинени тып алгаш, ону ап алыр дээш, дыка хөй чүүлден ойталаан. Иисустуң сөстеринден алырга, ол «бодунда бар шупту чүвени садыпка[н]». Чүге? Чүге дээрге ол эртине ооң шупту бар эт-хөреңгизинден артык үнелиг болган.

 ⁹ А силер алыс шынга шак ындыг хамаарылгалыг силер бе? Ийе, деп бичии-даа чигзинмес бис! Иеговага бараалгап тургаш, ап турар өөрүшкүвүс бо делегейниң биске берип болур чүүлдеринден 100 катап дээре! Оон аңгыда, Бурганның Чагыргазының адаанга мөңге чурттаар идегелдиг бис. Оон ыңай Иегованың чоок өңнүктери апарган бис, а ол найырал чүүден-даа артык үнелиг! Бурганның «сеткили ханар бүгү чүүлдерни кезээде кылыры[ндан]» артык улуг өөрүшкү бисте чок (Кол. 1:10).

10, 11. Майклды чуртталгазын долузу-биле өскертиринче чүү оттурганыл?

¹⁰ Иегованы өөртүр дээш, хөй кезиивис чуртталгазын долузу-биле өскертип алган. Чамдыывыс шыырак ажылындан үне берген. А байып алыксап турган улус акша-төгерикче көрүжүн өскертип алган. Чамдык улус Иегованы билип алгаш, сыр өске кижилер апарган. Майкл-биле база ындыг болган. Аныяанда ол каратэни сонуургаар турган. Ол мынча дээн: «Мен аваангыр, күштүг-шыырак, мөчек-мөчек шыңганнарлыг чораан мен. Ынчангаш бодумга чоргаарланыр турган мен. Мени кым-даа удуп шыдавас ышкаш турган». Ынчалза-даа Майкл Библияны өөренип эгелээш, Иегованың күчүлелге хамаарылгазын билип алган (Ыд. ыр. 10:5). Ооң-биле библейжи кичээлдерни эрттирип турган өг-бүлениң дугайында Майкл мынча дээн: «Олар мени каратэни каар ужурлуг сен деп чугаалавайн, библейжи алыс шынга улаштыр өөредип турганнар».

¹¹ Майкл Иегованы эки билген тудум, Аңаа дам ынак апарган. Иегованың бараалгакчыларынга көргүзүп чоруур кээргээчел сеткили ооң чүрээнге мырыңай дээштиг болган. Чоорту Майкл чуртталгазын өскертир ужурлуг деп билип каан. «Каратэни каары меңээ эң-не берге боор деп, билип турган мен. Ынчалза-даа ол базымны кылыр болзумза, Иегова аажок өөрүүр деп база билип турган мен. Аңаа бараалгал кандыг-даа чидириглеримден артык үнелиг деп чигзинмейн турган мен». Майкл алыс шынны бедик үнелеп турган болгаш, чуртталгазын бүрүнү-биле өскертипкен (Иак. 1:25).

12, 13. Библейжи алыс шын Майлиниң чуртталгазын канчаар өскертипкен?

¹² Алыс шынның үнезин онзалап демдеглээр дээш, Библияда ону караңгыда чырып турар чырыткыга дөмейлээн (Ыд. ыр. 118:105; Эф. 5:8). Азербайджандан Майлиниң чуртталгазын Бурганның Сөзүнден алыс шын өскертипкен. Ооң ада-иези ийи аңгы шажын-чүдүлгелиг чораан. Ачазы мусульман, а авазы иудей чүдүлгелиг турган. «Бурган бар деп черле чигзинмес турган мен, — деп, Майли сактып чугаалаан. — Ынчалза-даа кезек айтырыглар мээң бажымга канчап-даа аайлашпас турган: Бурган кижилерни чүү дээш чаяап каан? Кижи дириг чорааш, түреп чурттааш, өлүм соонда улаштыр алдыы оранга кезээ-мөңгеде өрттенип хинчектензин дээш бе? Кижилер колдуунда „ол дээрге Бурганның күзел-соруу-дур“ дижир турган. А мен „Таанда-ла, Бурган кижилерге шилиир арга бербейн, улустуң хинчектенип турарын көргеш, амырап турар бе?“ деп аайын тыппас турган мен».

¹³ Майли айтырыгларының харыызын дилээрин соксатпаан. Кезек үе эрткенде, ол Библияны өөренип эгелээш, Иегованың Херечизи апарган. «Библияның билдингир болгаш ужур-уткалыг өөредиглери чуртталгамны өскертипкен. Айтырыгларымның харыызын тып алгаш, сагыш-сеткилим оожургай берген» — деп, ол чугаалаан. Чугаажок, «дүмбей караңгыдан Бодунуң кайгамчык чырыынче кыйгырып эккелгени» дээш,  Иегованы алгап-мактаар чылдагааннарывыс дыка хөй (1 Пет. 2:9).

14. Алыс шынга оон-даа күштүг ынак болурунга биске чүү дузалаар? (Ол ышкаш  «Өске деңнелгелер» деп көзенекти көрүңер.)

¹⁴ Алыс шынны якорьга, эртинеге болгаш чырыткыга дөмейлээни ооң кайы хире үнелиин биске сагындырган. Ол дээрге чүгле 3 борбак чижек-тир. Силер оон-даа өске чижектерни сактып кээр чадавас силер. Библияны хууда өөренип тургаш, алыс шынны үнелээр өске-даа чылдагааннарны чүге дилеп болбас деп? Алыс шынга ынак болган тудум, ынакшылды көргүзер оон-даа хөй аргаларны тып алыр бис.

15. Алыс шынга ынакшылды канчаар көргүзүп болур бис?

¹⁵ Алыс шынга ынак болзувусса, Библияны болгаш ону тайылбырлап турар дептерлерни доктаамал өөренир бис. Бис алыс шынны чеже-даа хөй чылдар ишти билир болзувусса, дөмей-ле чаа-чаа чүүлдер биске ажыттынар. Бо журналдың баштайгы үндүрүлгезинде мынча деп бижээн: «Алыс шын чашпаннар аразында үнүп орар чечекке дөмей. Ону мегениң чашпаннары тудуп чиир чыгыы. Ындыг чечекти тып алыр дизе, кижи ону дүн-хүн дивейн, дилээр ужурлуг. [...]  Ону алыксап турар болзуңарза, доңгайгаш, чулуп алыңар. Чаңгыс чечек четчир деп санаваңар. [...] Алыс шынның чечектерин соксаал чок дилеп, чулуңар». Шинчилел кылыры белен эвес, ынчалза-даа ол биске дыка ажыктыг боор.

16. Силер Библияны шинчилээрде кандыг арганы ажыглаар-дыр силер? (Чугаалар 2:4—6).

¹⁶ Чамдык улус номчуттунарынга, шинчилел кылырынга ынак эвес. Ынчалза-даа Иегова бисти «истеп» дилээринче кыйгырып турар. Ол бисти кызымак шинчилекчилер бооп, алыс шынны оон-даа эки билип алырывысты күзеп турар. (Номчуптуңар: Чугаалар 2:4—6.) Ындыг күжениишкиннер канчап-даа хилис барбас. Кори дээр акывыс Библияны хууда шинчилеп тургаш, «чаңгыс угда — чаңгыс шүлүк» деп арганы ажыглап турар. Ол мынча деп тайылбырлаан: «Мен шупту немелде тайылбырларны болгаш чергелешкек айтыгларны көрүп, ол ышкаш немелде шинчилелди кылыр чордум. Ол арганың ачызында дыка хөйнү билип ап турар мен!» Бир эвес Библияны өөрениринче үевисти болгаш күжүвүстү үндүрер болзувусса, алыс шынны херек кырында үнелеп турарывысты көргүзер бис (Ыд. ыр. 1:1—3).

17. Алыс шын ёзугаар чурттаары дээрге чүү дээни ол? (Иаков 1:25).

¹⁷ Алыс шын — анаа-ла кургаг, хоозун сөстер эвес-тир. Бис билип алган чүүлүвүстү амыдыралывыска ажыглап, алыс шын ёзугаар чурттаар ужурлуг бис. Чүгле ынчан ёзулуг аас-кежиктиг болур бис. (Номчуптуңар: Иаков 1:25.) Алыс шын ёзугаар чурттап турарывысты канчаар хынап болур бис? Чижээ, бодувустан айтырып болур бис: «Мен чүнү эки кылып турар мен база чүнү экижидер болзумза эки?» Павел элчин: «Чүнү билип алган болдур бис, ооң аайы-биле улаштыр амыдырап көрээлиңер» — дээн (Флп. 3:16).

18. Алыс шынның оруун эдерери чүге чугула?

¹⁸ Алыс шынның оруун эдереринден артык чугула чүү турар боор! Ол орук-биле чоруп ора, аас-кежиктиг апарып, Иегованы болгаш кады бүзүрээн ха-дуңмавысты өөртүп турар бис (У. ч. 27:11; 3 Ин. 4). Чигзиниг чок, алыс шынга ынак бооп, ол ёзугаар чурттаар шупту чылдагааннарывыс бар!