1. Хөй акы-угбаларывыс кандыг күзелдигил?

 БО ДЕЛЕГЕЙНИҢ төнчүзү мырыңай чоокшулап келген, ынчангаш кылыр ажылывыс дыка көвей (Мф. 24:14; Лк. 10:2; 1 Пет. 5:2). Бис Иеговага хөйнү кылыксаар бис. Дыка хөй акы-угбалар суртаал ажылынга хөй киржир деп шиитпирлеп алган. А өске акы-угбалар эгелекчилээр, Вефилге бараалгаар, организациязывыстың тудуг проектилеринге киржир сорулгаларны салып алган. Акыларның хөй кезии хуралдың дузалакчылары болгаш удуртукчулары болур дээш, библейжи негелделерге дүгжүрүн кызып турар (1 Тим. 3:1, 8). Иегова чонунуң чүткүлдүүн көргеш, дендии өөрүп турар! (Ыд. ыр. 109:3; Иса. 6:8).

2. Бараалгалга сорулгаларывысты чедип чадап турар болзувусса, чүнү миннип болур бис?

² Ынчалза-даа салып алган сорулгаларывысты чамдыкта чедип албайн барып болур бис. А чамдык улус чыышка күзеп чоруур хүлээлгелерин хар-назынының аайы-биле азы бир өске чылдагааннар дээш албайн турар чадавас. Ол чүүл аажок муңгаранчыг бооп болур (У. ч. 13:12). Чижээ, Мелисса * болза, Вефилге азы Чагырга медээчилериниң школазынга өөрениксээр күзелдиг турган, ынчалза-даа аңаа хар-назынының аайы-биле болдунмас турган. Ол мынча дээн: «Мээң бодап чоруур күзелдеримни бүдүрери берге, ынчангаш үе-үе болгаш, ол дээш аажок муңгараар чордум».

3. Немелде хүлээлгелер алыксап турар улустар чүнү кылыр болза эки?

³ Бараалгалга болгаш чыышка хөйнү кылыксап турар аныяк оолдар-кыстар эгезинде боттарының бүзүрелин быжыктырып, херек ужурлуг шынарларны сайзырадып алыр болза эки. Бир талазында аныяк улус тывынгыр, шиитпирлиг болгаш  шимченгир боор. Ынчалза-даа чамдыкта оларга бодамчалыг, шыдамык болгаш эвилең-ээлдек чорук чедишпейн барып болур. Ынчангаш силерде чок шынарларны сайзырадып алырын кызыңар. Ынчан силерниң манавайн турган үеңерде хуралдың удуртукчулары немелде хүлээлгелерни дагзыр чадавас. Ник-биле болган чүүлдү көрүптээлиңер. 20 харлыг тургаш, ол хуралдың дузалакчызы болуксап турган. Ол мынча дээн: «Чүнү шын эвес кылып турар кижи мен аан дээш, утказын билип чадап турган мен». Ынчалза-даа Ник чөгени бербээн. Ол идепкейлиг улаштыр суртаалдап, аңаа кандыг-даа даалгаларны дагзырга, чалданмайн, кызымаккай кылып турган. Амгы үеде Ник салбыр комитединиң бирээзинде бараалгап турар.

4. Бо статьяга чүнү сайгарар бис?

⁴ Бурган-биле чоок харылзаалыг болурунга дузалаар сорулгаларны чедип алыры болдунмайн турар болза, Иеговага ооң дугайында чугаалаңар (Ыд. ыр. 36:5—7). Кандыг талазы-биле экижип алыр болзумза эки деп дуржулгалыг христианнардан айтырыңар. Оларның берген сүмелерин чуртталгаңарга ажыглаарын кызыңар. Ынчан чедип алыксаан сорулгаларны чедип ап, күзээн немелде хүлээлгелерни алыр чадавас силер. Ынчалза-даа силерниң чамдык күзелдериңер, Мелиссаның ышкаш, бүтпейн барып болур. Ындыг үеде өөрүшкүлүг артарынга чүү дузалаар? Ол айтырыгның харыызын билип алыр дизивиссе, эгезинде: 1) өөрүшкү чүүден хамааржырыл, 2) оон-даа өөрүшкүлүг болурунга чүү дузалаар, база 3) кандыг сорулгаларны чедип аар болзувусса, өөрүшкүлүг болур бис деп айтырыгларны сайгарыптаалыңар.

5. Өөрүшкү чүүден хамааржыр? (Экклесиаст 6:9).

⁵ Экклесиаст 6:9-та өөрүшкүнүң чүүден хамааржырын тайылбырлаан (номчуптуңар). Мурнунда көстүп турар чүүлге өөрүп турар кижи бодунуң байдалынга сеткили ханып чоруур боор. А сеткилиниң күзеп чоруур четтинмес чүүлдү күзээри дээрге дөмей-ле чедип ап шыдавас чүүлүнче чүткүп турар ышкаш боор. Оон кандыг түңнел үндүрүп болур? Өөрүшкүлүг артар дизе, бар чүүлүвүстү үнелеп, чедип ап шыдаар сорулгаларны салыр болза эки.

6. Кандыг угаадыглыг чугааны сайгарар бис база чүүже кичээнгейивисти угландырар бис?

⁶ Кижи чаңгыс черге турбайн, бурунгаар чүткүүр күзелдиг боор. Ынчалза-даа ынчан бар чүүлүнге сеткил ханары болдунар бе? Ийе, безин өөрүшкүнү миннип болур бис. Аңаа биске чүү дузалаар? Иисустуң акша дугайында угаадыглыг чугаазын сайгарыптаалыңар (Мф. 25:14—30). Оон бар чүүлүвүске сеткиливис ханып, канчаар аас-кежиктиг бооп болурувусту билип алыр бис.

7. Иисустуң мөңгүн акша дугайында угаадыглыг чугаазын тайылбырлаптыңар.

⁷ Иисустуң угаадыглыг чугаазының утказы мындыг. Бир эр кижи ырак чуртче чоруур дээш, бодунуң чалчаларынга мөңгүн акшаларны үлеп бергеш, оон орулганы киирип алырын дагзып каан. Ынчалза-даа ол чалча бүрүзүнүң шаг-шинээн көрүп тургаш, аңаа мөңгүн акшаларны үлеп берген. Бирээзинге беш шоодай мөңгүннү, өскезинге ийини, а үшкүзүнге чаңгыс шоодай мөңгүннү берген. Эгеки ийи чалча оларга дагзып каан айтыышкынынга харыысалгалыг болганнар. А үш дугаар чалча харыысалга чок болган. Ол безин аңаа берген акшаны немей ажылдап алырын оралдашпааны дээш дээргизиниң бүзүрелин чидирип алган.

8. Бирги чалчаның өөрүүр кандыг чылдагааны турган?

⁸ Бирги чалча беш шоодай мөңгүннү алгаш, дыка өөрээн чадавас. Ол дээрге дыка хөй акша ышкажыл! Ынча хөй акшаны бергенин  бодаарга, дээргизи аңаа бүзүреп турган. А ийи дугаар чалча биргизинден эвээш мөңгүннү алгаш, муңгарай берип болур турган. Ынчалза-даа ол канчалган?

9. Ийиги чалча чүнү кылбаан? (Матфей 25:22, 23).

⁹ Номчуптуңар: Матфей 25:22, 23. Ийиги чалча чүгле ийи шоодай акша алган мен дээш, хыйланып турган деп угаадыглыг чугаада биживээн. «Чүгле ол-ла бе?! Чүге бирги чалчага беш шоодай мөңгүннү бергеш, а меңээ чүгле ийини бергени ол? Мен чүүм-биле дорайтаан кижи мен? Бир эвес дээргим мени үнелевейн турар болза, мен ол акшаны черге хөөп кааш, бодумнуң ажыл-херектеримни кылырым ол-дур» — деп, ол чугаалаваан.

10. Ийиги чалча аңаа берген акшаны канчалган?

¹⁰ Ийиги чалча база бир дугаар чалча дег, аңаа берген даалгага шыңгыы хамаарылганы көргүзүп, кызып ажылдаан. Түңнелинде ол дээргизиниң бүзүреткен ийи шоодай мөңгүнге немей ийини ажылдап берген. Бодунуң кызымаккайы дээш, ол чалча аажок улуг шаңналды алган. Дээргизи ону мактаанындан аңгыда, аңаа оон-даа улуг ажыл-херекти бүзүреткен.

11. Оон-даа артык өөрүшкүнү минниринге биске чүү дузалаар?

¹¹ Иегованың дагзып турар даалгаларын бүгү сеткилиңерден кызып, күүседир болзуңарза, оон-даа улуг өөрүшкүнү алыр силер. Ынчангаш чүткүлдүг суртаалдап, чыыштың ажыл херектеринге идепкейлиг киржиңер (Аж.-ч. 18:5; Евр. 10:24, 25). Силерниң харыыларыңар акы-угбаларның хей-аъдын көдүрер кылдыр, чыыш бүрүзүнге эки белеткениңер. Ажыл хүннеринде болуп турар ужуражылгаларга ап турар даалгаларыңарга харыысалгалыг болуңар. Чыышта акылар силерден бир-ле  чүүлдү дилээр болза, бүзүрелдиг бооп, ону үезинде кылырын кызыңар. Ол даалгаже артык үе чарып турар мен деп черле бодаваңар, харын-даа арга-мергежилиңерни сайзырадыңар (У. ч. 22:29). Иеговага кызып-кылайып бараалгаар болзуңарза, ынчан Ооң-биле найыралыңар быжыгып, улуг өөрүшкүнү алыр силер (Гал. 6:4). Оон аңгыда, силерниң алыксап турган даалгаларыңарны өскелерге дагзып каар болза, олар дээш өөрүүрү силерге белен боор (Рим. 12:15; Гал. 5:26).

12. Мелисса биле Ник хөй өөрүшкүнү миннир дээш, чүнү кылган?

¹² Мелиссаның чижээнче катап эглип кээлиңер. Ол Вефилге-даа бараалгап, Чагырга медээчилериниң школазынга-даа өөренип шыдавас-тыр мен деп билип турган. Ынчалза-даа ол мынча дээн: «Мен сеткилимниң ханызындан доктаамал эгелекчи кылдыр бараалгап турар мен. Оон аңгыда, суртаалдың янзы-бүрү хевирлеринге киржирин кызып турар мен. Бо чүүл меңээ улуг өөрүшкүнү эккеп турар». А Никти хуралдың дузалакчызы кылдыр томуйлаваска, аңаа чүү дузалаан? Ол мынча деп үлешкен: «Мен кылып шыдаар чүүлдеримни кызып кылып, идепкейлиг суртаалдап, эки белеткээн харыыларым-биле акы-угбаларны деткип турган мен. Оон ыңай Вефилге бараалгаар анкетаны долдурупкан мен. А бир чыл болганда мени ынаар чалапкан!»

13. Биске дааскан даалгаларны бар шаавыс-биле кызып, күүседир болзувусса, чүнү миннир бис? (Экклесиаст 2:24).

¹³ Силерге берген даалгаларны кызып күүседип турар болзуңарза, келир үеде силерге оон-даа хөй харыысалгалыг даалгаларны берип болур дээни ол бе? Ник-биле болган таварылгада ышкаш, ындыг чүүл болу берип болур. Ындыг чүүл болбас-даа болза, силер Мелисса дег, кылып турар ажылыңардан сеткилиңер ханып, өөрүшкүнү миннип болур силер. (Номчуптуңар: Экклесиаст 2:24.) Оон аңгыда, дээргивис Иисус Христос бистиң күжениишкиннеривисти көргеш, өөрүп турар деп бодал хей-аъдывысты көдүрер.

14. Бараалгалга сорулгаларны салып тургаш, чүнүң дугайында сактыр ужурлуг бис?

¹⁴ Чыышта биске дагзып каан амгы даалгаларывыска сеткиливис ханып, Иеговага бараалгалывыска оон-даа өске сорулгаларны салган херээ чок дээни ол бе? Канчап-даа чок! Бараалгалга сорулгаларны салыры эргежок чугула. Оон башка канчап бис акы-угбаларывыска дузалап, суртаалга арга-мергежиливисти экижидип шыдаар бис? Салып алган сорулгаларывысты чедип алырын күзээр дизивиссе, мерген угаанныг бооп, хире-шаавысты миннир бис. Ол ышкаш улустуң сонуургалдарын бодувустан артык бедик кылдыр салыр болзувусса эки (У. ч. 11:2; Аж.-ч. 20:35).

15. Кандыг сорулгалар силерге оон-даа хөй өөрүшкүнү эккеп болур?

¹⁵ Кандыг сорулгаларны салып ап болур силер? Иегова силерге байдалыңарны шинчилээринге база кылып шыдаар сорулгаларны салырынга дузалаар кылдыр, Оон дилеңер (У. ч. 16:3; Иак. 1:5). Бо статьяның  бирги абзазында бижиттинген сорулгаларны салып шыдаар силер бе? Чижээ, дузаламчы азы доктаамал эгелекчи болур. Чок болза, Вефилге бараалгаар азы тудуг проектилеринге киржир дээн ышкаш сорулгаларны. Бир болза өске дылды өөренип алгаш, ону суртаалга ажыглап азы ол дылда чугааланып турар девискээрже чүге көжүп болбас деп? Бараалгалга оон-даа хөйнү кылыр дизе, чүнү канчап болурун «Организованы, чтобы исполнять волю Иеговы» деп номнуң 10-гу эгезинде бижээн. Чок болза, чыыжыңарның удуртукчулары-биле сүмележип болур силер *.  Салган сорулгаңарже бурунгаар базымнарны кылган тудум, силерниң чедиишкиннериңер өске улуска көскү апаар база өөрүшкүңер көвүдээр.

16. Байдалыңар аайы-биле салып алган сорулгаңарны чедип шыдавайн турар болзуңарза канчаарыл?

¹⁶ Бир эвес силер кырында чугаалаан сорулгаларның кайызын-даа байдалыңар аайы-биле чедип ап шыдавас болзуңарза канчаар? Ындыг таварылгада кылып шыдаар сорулгаларыңарны салыңар. Каш чижекти көрүптээлиңер.

17. Оон-даа мергежилдиг башкы болурунга акыларга чүү дузалаар? (1 Тимофейге 4:13, 15).

¹⁷ Номчуптуңар: 1 Тимофейге 4:13, 15. Сугга суктурган акый болзуңза, чугааланыр болгаш өөредир арга-мергежилиңни сайзырадып, бүгү бодуңну хүлээлгелериңге бараалгат. Ынчан сээң чугаалап, номчуп азы өөредип турар чүүлдериң дыңнакчыларыңның чүрээнге дээштиг боор. «Номчуур болгаш өөредир арга-мергежилиңни сайзырат» деп брошюраны эки шиңгээдип алыр сорулгадан салып ал. Ынчалза-даа шупту кичээлдерни хары угда эвес, а чаңгыстап сайгар. Оон даалгаларга белеткенип тургаш, брошюрадан сүмелерни ажыглап, эки белеткен. «Суртаалдаар база өөредир ажылга» кызымак киржип турар хуралдың удуртукчуларындан дузадан диле, чижээ, сүмелер бээр удуртукчудан * (1 Тим. 5:17). Сээң сорулгаң анаа-ла арга-мергежилиңни экижидери эвес, а дыңнакчыларыңның бүзүрелин быжыктырарынга база билип алган чүүлдерин ажыглаарынга дузалаары-дыр. Ынчан бодуң-даа, дыңнакчыларың-даа өөрүшкүлүг болур.

18. Оон-даа эки суртаалдап, өөреникчилерни белеткээринге биске чүү дузалаар?

 ¹⁸ Бистиң кижи бүрүзүнде суртаалдаар база өөреникчилер белеткээр чугула даалга бар (Мф. 28:19, 20; Рим. 10:14). Ону оон-даа эки күүседип өөренип алыксаар-дыр силер бе? Бо таварылгада биске база-ла «Арга-мергежилиңни сайзырат» деп брошюра дузалаар. Кандыг-бир кичээлди номчуп тургаш, оон сүмелерни ажыглап өөренип алыр дээш, тода сорулгаларны салыңар. Оон өске солун бодалдарны «Христиан чуртталгавыс болгаш бараалгалывыс» деп ажылчын кыдырааштан база ажылдаар хүннерде ужуражылгаларда көргүзүп турар чугаа эгелээр сөстерлиг видеороликтерден тып ап болур силер. Оларны хөй ажыглаан тудум, бодуңарга тааржыр чугааны тып ап болур силер. Ынчалдыр силер Бурганның Сөзүнүң мергежилдиг башкызы апарып, чүге-даа деңнешпес өөрүшкүнү миннир силер (2 Тим. 4:5).

19. Христиан шынарларны сайзырадырынга силерге чүү дузалаар?

¹⁹ Сорулганы салырының дугайында боданып тургаш, христиан шынарларны сайзырадырының дугайында утпаңар. Ол дээрге эң-не чугула сорулгаларның бирээзи-дир (Гал. 5:22, 23; Кол. 3:12; 2 Пет. 1:5—8). Ону канчаар чедип ап болур? Чижээ, бүзүрелиңерни быжыктырып алыксап турар дижик силер. Бистиң дептерлеривистен аңаа хамаарыштыр сүмелерни тып ап болур силер. Ол ышкаш JW Broadcasting^®-те янзы-бүрү шенелделерни ажып эрткен акы-угбаларның дугайында үндүрүлгелерни көрүп болур. Оларның чижээнден чүнү өөренип ап болуруңарны боданыр болзуңарза, ол силерге дыка улуг дузаны чедирер.

20. Чуртталгавыска өөрүшкү муңгаралдан хөй болзун деп бодаар болзувусса, чүнү канчаар болза эки?

²⁰ Чугаажок, бистиң кижи бүрүзү Иеговага амгы үеде кылып турарывыстан артык хөйнү кылыксаар. Бурганның чаа делегейинге ол күзеливис бүрүнү-биле күүсеттинер. Амдыызында Иеговага бараалгалга кылып шыдаар чүүлдеривисти үнелээлиңер. Ынчан улуг өөрүшкүнү миннип, муңгаралга алыспас бис. Оон артык, бараалгалывыс-биле аас-кежиктиг Бурганывыс Иегованы алдаржыдар бис (1 Тим. 1:11). Ынчангаш Иеговага кылып шыдаар чүүлүвүске өөрүүлүңер!