Te tiaturi ra te mau Ite no Iehova i “te mau parau moˈa atoa i papaihia ra e mea faaurua mai ïa e te Atua, e e mea maitai.” (Timoteo 2, 3:16) No matou, ua riro te Bibilia ei buka o te tauturu mai ia haapii no nia i te Atua poiete e te tia ia rave no te fanaˈo i te oraraa oaoa.

Te na ô ra te Bibilia: “Ia ite te taata atoa e, o Iehova to oe iˈoa, e o oe anaˈe tei Teitei i te fenua atoa nei.” (Salamo 83:18) No reira, e haamori matou i te Atua Iehova anaˈe e te tutava atoa nei i te faaite i to ˈna iˈoa ei Ite no ˈna.—Isaia 43:10-12.

Ei Kerisetiano, te tiaturi ra matou ua haere mai Iesu, ‘te Tamaiti a te Atua’ * i nia i te fenua e ua riro ei Mesia. (Ioane 1:34, 41; 4:25, 26) I muri aˈe i to ˈna poheraa, ua faatiahia oia no te ora i te raˈi. (Korinetia 1, 15:3, 4) I muri aˈe, ua riro oia ei Arii no te Basileia o te Atua. (Apokalupo 11:15) E faatereraa mau tera Basileia o te faariro faahou i te fenua ei paradaiso. (Daniela 2:44) Te na ô ra te Bibilia: “Area te feia mǎrû ra, e parahi ïa i te fenua, e oaoa ratou i te rahi o te hau.”—Salamo 37:11, 29.

Te tiaturi ra te mau Ite no Iehova e maitaihia te taata o teie tau atoa i te mau aratairaa Bibilia. (Isaia 48:17, 18) No reira matou e haapao maite ai i tera mau aratairaa. Ei hiˈoraa, te faaara mai ra te Bibilia ia haapae i te mau peu o te haaviivii i to tatou feruriraa e tino. Eita ïa matou e puhipuhi i te avaava aore ra e rave i te raau taero. (Korinetia 2, 7:1) E haapae atoa matou i te rave i te mau peu iino faaite-maitai-hia i roto i te Bibilia mai te inu-hua-raa i te ava, te mau peu faufau atoa e te eiâ.—Korinetia 1, 6:9-11.