I roto i te mau Papai Heleni Kerisetiano, ua faahitihia te parau o te mau raatira faehau no Roma e rave rahi taime. Te vai ra te raatira i tiaau i te haapoheraa o Iesu, oia atoa te taata nunaa ê matamua tei riro mai ei Kerisetiano o Korenelio te iˈoa. E raatira faehau te taata i haapao ia huihia te aposetolo Paulo, na reira atoa Iulio, tei afai ia ˈna i Roma.—Mareko 15:39; Ohipa 10:1; 22:25; 27:1.

E faatere te raatira faehau 50 e tae atu 100 faehau. Na ˈna e faaineine e e aˈo ia ratou a hiˈopoa atoa ˈi i te ahu e te mau mauhaa a te mau faehau. Na ˈna atoa e tiaau atu ia haere ratou i te aroraa.

Tera te tiaraa teitei roa ˈˈe i roto i te nuu faehau. E maitihia tei rave maoro i tera toroa e tei riro ei aratai maitai. Na ratou hoi e ara ia riro to Roma ei nuu nahonaho e te puai. Ia au i te tahi papai, “e pinepine, e mau taata aravihi e haapao maitai” te riro ei raatira faehau.

Mea taa ê roa te mau hiˈo o teie mahana i to te tau tahito. Na mua ˈˈe, i faaohipahia na te mau metara mai te veo, peneiaˈe atoa te veo anoihia i te tahi atu metara, te ario, te auro aore ra te hesemala parauhia électrum. I roto i te Bibilia, ua haamata te hiˈo i te faahitihia i te hamaniraa o te sekene, te vahi haamoriraa matamua a to Iseraela. Ua horoa te mau vahine i ta ratou mau hiˈo no te hamani i te tahi farii pape veo moˈa e to ˈna tapearaa. (Exodo 38:8) Te manaˈohia ra, hou a rave ai i te reira, ua faatahehia tera mau hiˈo.

Ua itehia mai te tahi mau hiˈo i roto i te mau apoo hiˈopoaraa a te feia ihipǎpǎ i Iseraela e ati aˈe tera vahi. E pinepine tera mau hiˈo i te itehia e te mau taoˈa faaunauna e te tahi atu faaneheneheraa no te vahine. Mea menemene tera mau hiˈo e e tapearaa raau, metara aore ra ivori faanehenehehia to te reira. E pinepine, e taraihia te hohoˈa o te tino o te tahi vahine no te hamani i te tapearaa. Aita e faaneheneheraa to te pae i ore i haamaninahia.

Aita te hohoˈa i ite-maitai-hia na i roto i te mau hiˈo i tahito ra, e ere roa ˈtu hoi mai to teie tau. Te taa ra ïa ia tatou no te aha te aposetolo Paulo i parau ai: “Teie nei hoi, te ite arehurehu nei tatou mai te mea e, i na roto i te hiˈo.”—Korinetia 1, 13:12.