TE FAATAA maitai ra teie mau parau i te aamu o te faatereraa taata, tei faatupu hoi i te mauiui e te veve tei ore i itehia aˈenei. I te roaraa o te tau, ua tamata te mau taata manaˈo maitai i te haamau i te hoê totaiete tia aˈe. Ua haafifi râ te nounou e te ohipa piˈo ia ratou. No te aha? No te aha e ite-noa-hia ˈi te ohipa piˈo? No teie ïa na mana ino e toru i muri nei.

Te parau maitai ra te Bibilia e “te vai hara noa nei” tatou. (Roma 3:9) Mai te hoê maˈi ta to tatou metua i tutuu mai e o te ore e ora, te “vai” nei te hara i roto ia tatou. E tausani matahiti to te hara haavîraa i te huitaata mai te hoê arii ra te huru. Te ohipa noa ra to te reira “ture” i roto ia tatou. No te mau hinaaro tia ore, mea rahi te taata e haapao na mua ia ratou. Oia atoa o te niu ra i to ratou oraraa i nia i te titauraa i te mau mea materia aore ra i te mana i nia i to vetahi atu tua.—Roma 5:21; 7:17, 20, 23, 25.

Te ora nei tatou i roto i te hoê ao nounou e te miimii. No reira vetahi mau taata e manaˈo ai e e mea fifi ia ore e pee i tera huru. No te nounou tiaraa, e nounou ratou i te mana. E hinaaro uˈana atoa ratou hau atu â moni e taoˈa i tei hinaaro-mau-hia. Te mea peapea, ua ineine ratou i te pee i te hoê haerea tia ore ia naea tera mau fa. Aita tera mau taata e patoi ra i te mau mana ino, te pee noa nei râ ratou “i te feia rahi i te parau ino.”—Exodo 23:2.

Te haavare nei Satani, te hoê melahi orure hau, i to te ao atoa nei. (Apokalupo 12:9) Mea au roa na ˈna e turai i te taata ia rave i to ˈna hinaaro. E nehenehe o ˈna e faaohipa ma te aravihi i te mau hinaaro natura o te taata e fanaˈo i te hoê oraraa maitai i te pae materia e i te pae moni a haa ˈtu ai ratou ma te tia ore.

Te auraa anei e e pepe hurio noa tatou i roto i te rima o Satani, oia hoi e pee noa tatou i to ˈna hinaaro? E ite tatou i te pahonoraa i to muri nei tumu parau.