Mea faufaa anei ia haapii te tamarii no nia i te Atua?

“No te iti o to tatou faaroo e riri ai tatou i te taata, a ore atu ai e here te tahi i te tahi.”—JONATHAN SWIFT, TAATA PAPAI BERETANE.

I TE mau matahiti 1700 to ˈna faahitiraa i teie parau. Mea rahi i teie mahana e farii nei i te reira. I te tahi mau fenua, te manaˈo ra vetahi e eiaha na metua e haapii i ta raua mau tamarii no nia i te Atua. E fifi te tamarii o te hoê utuafare faaroo.

Tera atoa anei to oe manaˈo? Teihea te manaˈo tano aˈe i muri nei?

● Eiaha na metua e haapii i ta raua mau tamarii no nia i te Atua.

● Ia paari mai te tamarii e faataa ˈtu ai na metua i te mau ohipa faaroo.

● I te nainairaa te tamarii e faaite ai na metua i ta raua iho e tiaturi ra no nia i te Atua. Ia paari mai râ, na ratou e faaoti no ratou iho.

● Ia farii iho â te tamarii i ta te metua tiaturiraa no nia i te Atua.

E fifi anei te tamarii i te faaroo?

Aita e metua î i te here e hinaaro ia fifi ta ˈna tamarii. Ua tano anei râ te feia e parau ra e eiaha te tamarii ia haapii no nia i te Atua? E rave rahi matahiti to te tahi feia maimi hiˈopoaraa i te haerea o te mau tamarii e metua faaroo to ratou. Eaha ta ratou i ite mai?

E ore te tamarii e fifi i te faaroo, e paari maitai mai râ. I te matahiti 2008, ua faataa te hoê vea e maoti te faaroo e piri atu â ˈi na metua e ta raua tamarii. E mea faufaa te faaroo e te haamâharaa i te mau hinaaro mau o te tamarii i roto i to ratou oraraa e hau atu â no te utuafare. (Social Science Research a) Ua parau Iesu Mesia: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.

Te parau-atoa-hia ra e ia paari mai te tamarii a haapii atu ai ratou no nia i te Atua e te faaroo. Tera iho â anei? E nehenehe e faaau i te feruriraa o te hoê tamarii i te hoê patete. Na te metua e maiti: na ratou anei e faaî i taua “patete” ra i te mau tiaturiraa e aratairaa maitatai aore ra na vetahi ê e tuu i to ratou iho manaˈo i roto.

E nafea ïa?

Te haapapu ra te Tuatapaparaa e e nehenehe te taata e faaohipa i te mau tiaturiraa faaroo no te manaˈo ino, a riri atu ai ia vetahi ê. Ta Jonathan Swift ïa i parau. Teie râ, e nehenehe na metua e haapii i ta raua mau tamarii ia here i te taata. E nafea ïa?

Mea faufaa ia ite i te pahonoraa o teie mau uiraa: (1) Ia haapii te tamarii i te aha? (2) Na vai e haapii ia ratou? (3) Eaha te mau ravea maitai roa ˈˈe?

[Nota i raro i te api]