E nafea to Iesu pohe e faaora ˈi ia oe

FATATA a 2 000 matahiti aˈenei, i te oroa Pasa ati Iuda o te matahiti 33 T.T, ua pohe te hoê taata hapa ore ia nehenehe vetahi ê e ora. O vai taua taata ra? O Iesu no Nazareta. O vai te maitaihia i teie ohipa pipiri ore? Te huitaata taatoa. Te haapoto ra te hoê irava bibilia matau-maitai-hia i teie tusia faaora: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te [faaohipa i te] faaroo ia ˈna ra, ia roaa râ te ora mure ore.”—Ioane 3:16; MN.

Noa ˈtu e ua matau e rave rahi i teie irava, tau taata noa te taa mau ra i to ˈna auraa. Te uiui ra ratou: ‘No te aha tatou e hinaaro ai i te tusia o te Mesia? E nafea te pohe o te hoê noa taata e faaora ˈi i te huitaata i te faahopearaa o te pohe mure ore?’ Te horoa ra te Bibilia i te mau pahonoraa maramarama e te tano maitai i tera mau uiraa.

E nafea te pohe i mana ˈi i nia i te huitaata

Te tiaturi ra vetahi mau taata e ua poietehia te taata no te ora maa taime iti i nia i te fenua, no te ite i te mau fifi, no te ite maa oaoaraa, e pohe atu ai no te haere i te hoê vahi maitai aˈe. Ia au i teie huru feruriraa, e tuhaa te pohe o te opuaraa a te Atua no te huitaata. Teie râ, te faaite ra te Bibilia e te haamauiui ra te pohe i te huitaata no te hoê tumu ê. Te parau ra te reira e: “No te taata hoê ra i ô mai ai te [hara] i te ao nei, e no te [hara] hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12; MN) Te faaite ra teie irava e te pohe ra te taata no te hara. O vai râ te “taata hoê” e na roto ia ˈna te mau faahopearaa pohe o te hara i faaino ai i te huitaata?

Te faaite ra The World Book Encyclopedia e te tiaturi nei te rahiraa o te mau aivanaa e no roto mai te taata atoa i te hoê â tumu, e te faataa maitai ra te Bibilia i taua tumu hoê ra—te “taata hoê.” I roto i te Genese 1:27, te taio ra tatou e: “Hamani ihora . . . te Atua i te taata ma to ˈna ihora huru, i hamani oia ia ˈna ma te hohoˈa o te Atua ra; i hamani oia ia raua, o te tane e te vahine.” No reira, te faaite ra te Bibilia e o na taata faaipoipo matamua te hanahana hopea o te poieteraa a te Atua Mana hope.

Te horoa ra te aamu o te Genese i te tahi atu â mau tuhaa rii o te oraraa o te taata i muri aˈe i to te Atua ra o Iehova poieteraa i te taata matamua. Te vahi papu, i roto i tera faatiaraa taatoa, aita te Atua i faahiti noa ˈˈe i te pohe maoti râ ei faahopearaa o te faaroo-ore-raa. (Genese 2:16, 17) Ua hinaaro oia ia ora te taata i nia i te hoê fenua paradaiso nehenehe mau, ia oaoa e ia ora maitai e a muri noa ˈtu. Aita oia i hinaaro ia faaruru ratou i te mau mauiui o te ruhiruhiaraa e te pohe i te pae hopea. Mea nafea râ te pohe i te manaraa i nia i te huitaata atoa nei?

 Te faatia ra te pene 3 o te Genese mea nafea na taata faaipoipo matamua i te raveraa i te maitiraa opuahia e faaroo ore i te Tumu o to raua ora, te Atua ra o Iehova. Te faahopearaa, ua faatupu te Atua i te faautuaraa o ta ˈna i faaite ê na ia raua. Ua parau oia i te tane: “E repo . . . oe, e e hoˈi faahou atu â oe i te repo.” (Genese 3:19) Mai ta te Atua i parau, ua pohe iho â na taata faaroo ore e piti i te pae hopea.

Aita râ te ino i tairi noa i na taata faaipoipo matamua. Ua faaore to raua faaroo-ore-raa i te tiaturiraa o te hoê oraraa tia roa e fanaˈohia e to raua huaai. Tei roto atoa te feia aitâ i fanauhia ˈtura i te opuaraa a Iehova i to ˈna parauraa ia Adamu e o Eva: “Ia fanau orua, e ia rahi roa, e faaî i te fenua nei, e e haavi iho; e ia mana orua i nia iho i te iˈa o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.” (Genese 1:28) I muri aˈe, e faaî te fetii taata i te fenua e e fanaˈo i te hoê oraraa oaoa roa ma te ore e pohe. Ua hoo râ to ratou tupuna ra o Adamu—te “taata hoê”—ia ratou ei tîtî i te hara, e te pohe iho â te faahopearaa. Ua papai te aposetolo Paulo, te hoê huaai o te taata matamua e: “No te tino . . . vau, i hoohia i raro aˈe i te [hara].”—Roma 7:14; MN.

Mai te tahi mau taata o tei tuino i te tahi mau ohipa rimaî faito ore aita i maoro aˈenei, ua tuino Adamu, i to ˈna hararaa, i te poieteraa faahiahia a te Atua—te huitaata. Ua tamariihia te mau tamarii iho a Adamu, ua mootuahia, e te vai ra ˈtu â. Ua fanauhia te ui taitahi, ua paari mai, ua fanau i te huaai, e ua pohe i te pae hopea. No te aha ratou pauroa i pohe ai? No te mea no roto mai ratou pauroa ia Adamu. Te parau ra te Bibilia: “E rave rahi tei pohe i te hara a te taata hoê ra.” (Roma 5:15) Te maˈi, te ruhiruhiaraa, te mea e turai ra ia tatou nei i te ino, e te pohe iho, o te mau faahopearaa ino ïa o te hooraa Adamu i to ˈna iho utuafare. Tera utuafare, o tatou pauroa ïa.

I roto i ta ˈna rata no te mau Kerisetiano i Roma, ua papai te aposetolo Paulo i te tupuraa peapea o te taata tia ore, o ˈna atoa, e te aroraa faatoaruaru i te mau faahopearaa o te hara. Ua parau oia: “Auê hoi au o te taata ati rahi e! na vai ra vau e faaora i teie nei tino pohe?” E uiraa faufaa roa te reira, e ere anei? Na vai e faaora ia Paulo—e te feia atoa o te hinaaro ru nei i te reira—i te faatîtîraa a te hara e te pohe? Na Paulo iho i horoa i te pahonoraa:  “E haamaitai au i te Atua, i to tatou Fatu ra ia Iesu Mesia.” (Roma 7:14-25) Oia mau, ua faanaho to tatou Atua Poiete i te faaora ia tatou na roto i te arai o ta ˈna Tamaiti, Iesu Mesia.

Ta Iesu ohipa i roto i ta te Atua faaoraraa i te huitaata

Ua faataa Iesu i ta ˈna ohipa i roto i te faaoraraa i te huitaata i te faatîtîraa haapohe a te hara. Ua parau oia: ‘Ua haere mai te Tamaiti a te taata nei no te horoa i to ˈna ora ei hoo no te taata e rave rahi.’ (Mataio 20:28) E nafea to Iesu ora e riro ai ei hoo? E nafea to ˈna pohe e haamaitai ai ia tatou?

Te faataa ra te Bibilia ia Iesu ei taata ‘aita roa e hara’ e tei ‘taa ê i te feia rave hara ra.’ I te roaraa o to ˈna oraraa, ua auraro Iesu ma te tia roa i te ture a te Atua. (Hebera 4:15; 7:26) No reira, e ere to Iesu pohe i te faahopearaa o te hara e te faaroo-ore-raa mai ia Adamu. (Ezekiela 18:4) Inaha, ua farii Iesu i te hoê pohe e ere roa ˈtu i te mea tano ia nehenehe oia e rave i te hinaaro o to ˈna Metua no te faaora i te huitaata i te hara e te pohe. Mai tei parauhia aˈenei, ua haere mai Iesu ma te aau tae no te “horoa i to ˈna ora ei hoo.” Ma te here faito ore i te roaraa o te tuatapaparaa, ‘ua faaoromai Iesu ma te aau tae i te pohe no te taata atoa.’—Hebera 2:9.

Ua aifaito maitai te ora ta Iesu i horoa ei tusia i te ora ta Adamu i ere i to ˈna hararaa. Eaha te faahopearaa o to Iesu pohe? Ua farii Iehova i tera tusia ei “hoo [aifaito] i te taata atoa.” (Timoteo 1, 2:6; MN) Oia mau â, ua faaohipa te Atua i te faufaa o to Iesu ora no te hoo faahou, aore ra faaora, i te huitaata i te faatîtîraa a te hara e te pohe.

Te faahiti pinepine ra te Bibilia i teie ohipa aroha rahi i ravehia e te Atua Poiete o te taata. Ua haamanaˈo Paulo i te mau Kerisetiano e “ua tauihia [ratou] i te taui.” (Korinetia 1, 6:20; 7:23) Ua papai Petero e ua faaohipa te Atua, eiaha i te auro aore ra te ario, i te toto râ o ta ˈna iho Tamaiti no te faaora i te mau Kerisetiano i te hoê oraraa o te tapae atu i te pohe. (Petero 1, 1:18, 19) Maoti te tusia taraehara o te Mesia, ua faanaho Iehova i te faaora i te huitaata i te pohe mure ore papu.

E maitaihia anei oe i te hoo o te Mesia?

No nia i te maitai e rave rahi o te hoo o te Mesia, ua papai te aposetolo Ioane: “[O Iesu Mesia] hoi te taraehara i ta tatou nei hara; e ere hoi i ta tatou anaˈe ra, i ta to te ao atoa nei râ.” (Ioane 1, 2:2) Oia mau, no te taatoaraa o te huitaata nei te hoo o te Mesia. Te auraa anei râ e e maitaihia iho â ïa te taata atoa i teie faanahoraa faito ore? Eita. A haamanaˈo na i te faaoraraa i faahitihia i roto i te tumu parau i na mua ˈtu. Ua tamata te feia faaora i te faaora i te feia heru apoo i mau i raro i te fenua ma te faatae atu ia ratou ra i te hoê afata faaora, na te taata taitahi râ o tei mau e haere atu  i roto i taua afata ra. Hoê â huru no te feia e hinaaro ra ia maitaihia ratou i te tusia taraehara o te Mesia, eita e tia ia ratou ia tiai noa i te haamaitairaa a te Atua. E titauhia ia ohipa ratou.

Eaha te ohipa ta te Atua e titau ra? Te parau ra te Ioane 3:36 (MN) ia tatou: “O tei [faaohipa i te] faaroo i te Tamaiti ra e ora mure ore to ˈna; e o tei ore i faaroo i te Tamaiti ra, e ore oia e ite i te ora; te vai ra ïa te riri o te Atua i nia iho ia ˈna.” Te titau nei te Atua ia faaohipa tatou i te faaroo i te tusia o te Mesia. Te vai ra te tahi atu â titauraa. “Teie te mea e ite ai tatou e, ua ite tatou ia [Iesu], ia haapao tatou i ta ˈna parau.” (Ioane 1, 2:3) E mea papu maitai ïa e te mea faufaa no te ora mai i te hara e te pohe, o te faatupuraa ïa i te faaroo i te hoo o te Mesia e te faarooraa i ta ˈna mau faaueraa.

Te hoê ravea faufaa no te faaite i te faaroo i te hoo o Iesu, o te faaiteraa ïa i to tatou mauruuru no to ˈna poheraa ma te haamanaˈo i te reira, mai ta ˈna i faaue. Hou oia a pohe ai, ua haamau Iesu i te maa taipe e ta ˈna mau aposetolo haapao maitai, e ua parau atu oia ia ratou: “E na reira outou ei manaˈoraa ia ˈu.” (Luka 22:19) Te poihere nei te mau Ite no Iehova i to ratou auhoaraa e te Tamaiti a te Atua, e te faaroo nei ratou i te reira faaueraa. I teie matahiti, e faatupuhia te Oroa haamanaˈoraa i te poheraa o Iesu Mesia i te Mahana maa 22 no Mati, i muri aˈe i te toparaa mahana. Te titau manihini maitai atu nei matou ia oe ia tae mai i teie putuputuraa taa ê ei faarooraa i te faaueraa a Iesu. E nehenehe te mau Ite no Iehova no to oe vahi e faaite atu ia oe i te hora e te vahi o taua tupuraa ra. I te Oroa haamanaˈoraa e haapii hau atu â oe eaha te titauhia ia rave oe ia nehenehe te hoo o te Mesia e faaora ia oe i te mau faahopearaa haapohe o te hara a Adamu.

Mea iti te taata i teie mahana o te mauruuru roa ra no te tusia rahi ta to ratou Atua Poiete e ta ˈna Tamaiti i rave no te faaora ia ratou i te haamouraa. E ite te feia o te faaohipa i te faaroo i te reira i te hoê tumu taa ê o te oaoa. Ua papai te aposetolo Petero no nia i to ˈna mau hoa Kerisetiano: “O ta outou e oaoa na i te oaoa eita e tia ia parau ra, e te î hoi i te maitai, i te faarooraa ˈtu [ia Iesu] . . . ma te noaa hoi te hopea o to outou faaroo, oia te ora o to outou mau [“nephe,” MN].” (Petero 1, 1:8, 9) Na roto i te faatupuraa i te here no Iesu Mesia e te faaroo i to ˈna tusia taraehara, e nehenehe oe e faaî i to oe oraraa i te oaoa i teie nei e ma te tiai ru ia faaorahia mai i te hara e te pohe.

[Hohoˈa i te api 6]

Ua pûpû Iesu i to ˈna ora no te faaaifaito i te mau faahopearaa o te hara a Adamu

[Hohoˈa i te api 7]

E faatupuhia te Oroa haamanaˈoraa i te poheraa o Iesu Mesia i te Mahana maa 22 no Mati 2008, i muri aˈe i te toparaa mahana