1, 2. Mea nafea Iesu i te faaiteraa i to ˈna here hohonu no te huitaata?

 O TE Tamaiti fanau tahi a te Atua te hiˈoraa maitai roa ˈˈe o te paari faito ore o Iehova e te ‘rave ohipa aravihi’ na to ˈna Metua. A feruri na i to Iesu oaoa i te tautururaa i to ˈna Metua ia “haamau i te mau raˈi” e ia “haamau i te mau fenua.” No te mau mea atoa râ ta to ˈna Metua i poiete, ‘tei te mau tamarii a te taata ra to Iesu oaoaraa.’ (Mas. 8:22-31) Mea papu, ua here oia i te mau taata mai te omuaraa mai iho â.

² I muri aˈe, ua faaite Iesu i to ˈna haapao maitai e here no to ˈna Metua e i to ˈna here hohonu no te taata atoa. No reira i faarue ai oia i te raˈi e i pou mai ai oia ma te aau tae i te fenua nei ei taata. No to Iesu here i na reira ˈi oia ma te “horoa i to ˈna ora ei hoo no te taata e rave rahi.” (Mat. 20:28; Phil. 2:5-8) I te fenua nei, ua horoa te Atua ia Iesu i te mana no te faatupu i te mau semeio. Te haapapu ra teie mau semeio i to Iesu here rahi no te taata e te faaite ra te  mau mea faahiahia i ta ˈna e fatata ra i te rave no te huitaata.

3. Eaha ta tatou e hiˈopoa mai i roto i teie tumu parau?

³ I te fenua nei, ua poro Iesu “i te parau maitai o te basileia o te Atua.” (Luka 4:43) Ua ite oia e e faahanahana teie Basileia i te iˈoa o to ˈna Metua e e faatitiaifaro te reira i te mau fifi o te huitaata e a muri noa ˈtu. I to Iesu pororaa, ua faatupu oia e rave rahi semeio. Ua haapapu teie mau semeio i to ˈna haapeapea rahi no te taata atoa. No te aha mea faufaa ˈi no tatou? No te mea ua horoa mai oia te itoito e te tiaturiraa no a muri aˈe. E hiˈopoa mai ïa tatou e maha o te mau semeio a Iesu.

4. Eaha tei tupu a ite ai Iesu i te hoê taata e maˈi lepera to ˈna?

⁴ I te roaraa o ta ˈna taviniraa, ua haere Iesu i te oire no Galilea. I roto hoê o na oire i reira, ua farerei oia i te hoê taata e maˈi ino mau to ˈna, oia hoi te lepera. (Mar. 1:39, 40) No te maˈi rahi o teie taata, ua faataa Luka, e taote atoa, e ‘ua ati oia i te lepera.’ (Luka 5:12) Te parau ra te Bibilia e i to teie taata iteraa ia Iesu, ua ‘tipapa ihora oia i raro, faateni mai ia ˈna ra, na ô maira, E te Fatu, ia hinaaro oe ra, e mâ vau ia oe.’ Ua ite teie taata e e mana to Iesu no te faaora i to ˈna maˈi, ua tamata râ oia i te ite e te hinaaro mau ra anei Iesu e faaora ia ˈna. No te aha? No te mea, i vahavaha na te mau Pharisea i te taata e maˈi lepera to ratou. Tera anei râ to Iesu manaˈo? Eaha to ˈna huru i nia i teie taata o te roohia paha i te hoê maˈi o te faaino roa ra i to ˈna tino? Mai te peu e o oe tera, eaha ta oe e rave?

5. No te aha Iesu i hinaaro ai e faaora i te lepera?

⁵ E au ra e, aita teie taata maˈi i tuô “ua viivii, ua viivii,” mai ta te ture a Mose i titau. (Lev. 13:43-46) Aita râ Iesu i riri atu. Ua haapeapea hoi oia i teie taata e ua hinaaro oia e tauturu ia ˈna. Aita i papu maitai ia tatou eaha to Iesu manaˈo, ua ite râ tatou eaha to ˈna huru. No to ˈna mauiui rahi no teie taata i faatupu ai oia i te hoê semeio. Ua tapea oia i teie taata, ta te feia ê atu i ore i rave. Ma te tiaturi e te aumihi, ua parau Iesu: “Ua tia ia ˈu, ia mâ oe. Pee ê atura to ˈna lepera i reira ra.” (Luka 5:13) Mea papu, ua horoa Iehova ia Iesu i te mana no te faatupu i teie semeio rahi e ua faaite oia i to ˈna here rahi i te taata.—Luka 5:17.

6. Eaha te mea faahiahia i te mau semeio ta Iesu i faatupu, e eaha ta te reira e faaite mai ra?

⁶ Maoti te puai o te Atua, ua nehenehe ia Iesu e faatupu e rave rahi semeio faahiahia mau. Aita Iesu i faaora noa i te mau lepera, ua faaora atoa râ oia e rave rahi atu huru maˈi. Te parau mai ra te Bibilia e ua maere te taata i to ratou “iteraa . . . i te vava i te parauraa, e te paruparu i te oraraa, e te pirioi i te haereraa, e te matapo i te hiˈoraa.” (Mat. 15:31) Ia faaora Iesu i te hoê taata, eita oia e titau i te hoê taata ea maitai ia horoa i te tahi tuhaa o to ˈna mau mero o te tino. E mana iho â to Iesu no te faaora i te tahi tuhaa o te tino tei maˈihia. E ua faaora Iesu i te taata i taua taime ra, oia atoa te feia na te atea ia ˈna. (Ioa. 4:46-54) Eaha ta teie mau hiˈoraa maere mau e faaite ra? E mana to Iesu Mesia, to tatou Arii, e te hinaaro ra oia e faaore i te mau maˈi atoa  e a muri noa ˈtu. Ia haapii tatou i ta Iesu huru raveraa i nia i te taata, e hopoi mai te reira i te tiaturiraa e e “faaherehere oia i tei paruparu ra e tei veve” i roto i te ao apî. (Sal. 72:13) E faaora Iesu i te taata maˈi atoa, no te mea te hinaaro mau ra o ˈna e na reira.

7, 8. A faataa na eaha tei tupu a farerei ai Iesu i te hoê taata maˈi i Beteseda.

⁷ Tau avaˈe noa i muri aˈe i te faaora-raa-hia te lepera, ua ratere Iesu mai Galilea ˈtu e tae atu i Iudea, i reira oia i te tamauraa i te poro i te parau apî oaoa o te evanelia no nia i te Basileia o te Atua. E mirioni taata paha tei faaroo i ta Iesu poroi e ua putapû i to ˈna here ia ratou. Ua hinaaro iho â Iesu e tamahanahana i te feia veve e te feia e hepohepo ra ma te horoa i teie tiaturiraa i te taata.—Isa. 61:1, 2; Luka 4:18-21.

⁸ I te avaˈe Nisana, ua ratere Iesu i Ierusalema no te faatupu i te oroa Pasa. Ua î te oire i te taata o tei tae mai no te oroa taa ê. I te pae apatoerau o te hiero, te vai ra te hoê pape hopu, o Beteseda ïa te iˈoa. I reira, ua farerei Iesu i te hoê taata aita ta ˈna e nehenehe e haere faahou.

9, 10. (a) No te aha te taata e haere ai i te pape hopu i Beteseda? (b) Eaha ta Iesu i rave i te pape hopu, e eaha ta te reira e haapii mai? (A hiˈo i te hohoˈa matamua.)

⁹ E nahoa taata maˈi tei haere atu i Beteseda. No te aha? Ua manaˈo ratou e e faaora-semeio-hia te hoê taata maˈi ia haere oia i roto i te pape hopu ia arepu anaˈe te pape. A feruri na i te huehue i te taata e rave rahi o te hepohepo ra e haapeapea ra e o tei hinaaro ra ia faaorahia ratou. E taata tia roa Iesu e mea papu aita i titauhia ia ˈna te hoê raau rapaauraa. No te aha oia i haere ai i reira? No to ˈna here i te taata. I reira to ˈna farereiraa i te hoê taata mea maoro aˈe to ˈna maˈi i to Iesu oraraa i te fenua nei.—A taio i te Ioane 5:5-9.

¹⁰ Ua ani Iesu i teie taata e e hinaaro anei o ˈna e haere faahou. A feruri na i to ˈna oto a parau ai oia ia Iesu e ua hinaaro oia e ora e aita râ ta ˈna e nehenehe, no te mea aita e taata no te tuu ia ˈna i roto i te pape hopu. Ua parau atura Iesu i teie taata e e rave oia i tei ore e manaˈohia. Rave atura teie taata i to ˈna roi e haamata ihora i te haere! Te haapapu ra teie semeio faahiahia mau i ta Iesu e rave i roto i te ao apî. Oia atoa i to Iesu here hohonu i te taata. Ua imi oia i te feia i hinaaro mau i te tauturu. Te faaitoito mai ra te hiˈoraa o Iesu ia tamau i te imi i te feia i roto i ta tatou tuhaa fenua o te hepohepo ra no te mau ohipa riaria e tupu ra i roto i teie nei ao.

11. E nafea te Mareko 5:25-34 e faaite ai e ua here Iesu i te taata maˈi?

¹¹ A taio i te Mareko 5:25-34. A 12 matahiti aˈenei to te hoê vahine faaoromairaa i te hoê maˈi haama mau. Ua ohipa to ˈna maˈi i roto i te mau tuhaa atoa o to ˈna oraraa, oia atoa i ta ˈna haamoriraa. Ua haere oia e farerei e rave rahi taote e ua  pau roa ta ˈna moni no te rapaau ia ˈna. Tera râ hoi, ua faarahi roa to ˈna maˈi. I te hoê mahana, ua rave teie vahine i te tahi ravea no te maitai mai, ua haere oia na ropu i te nahoa taata e ua tapea i te ahu o Iesu. (Lev. 15:19, 25) I to Iesu taaraa e e mana no roto mai ia ˈna tei haere atu i rapae, ani atura oia o vai tei tapea ia ˈna. “Ma te mǎtaˈu e te rurutaina,” tipapa ihora teie vahine “i raro i mua ia ˈna, ua faˈi hua maira i te parau mau.” Ua ite Iesu e ua faaora Iehova i teie vahine e ua parau atu oia ma te mǎrû: “E tau tamahine, i ora oe i to faaroo; a haere ma te hau, e ma te ora i to maˈi.”

12. (a) Mai ta tatou i haapii mai nei, ua nafea Iesu i nia i te taata? (b) Eaha te hiˈoraa ta Iesu i vaiiho mai?

¹² E tamahanahana mau â te reira i to tatou aau i te iteraa e nafea Iesu e faaite ai i te here i te taata, i te feia maˈi iho â râ. Mea taa ê roa te reira i ta Satani, te hinaaro ra oia ia tiaturi tatou e mea faufaa ore tatou e aita e taata e here mai ra ia tatou. Ua haapapu râ te mau semeio a Iesu e te haapao maite ra oia ia tatou e i to tatou mau fifi. Auê ïa tatou i te mauruuru no te hoê Arii e Tahuˈa rahi î i te here mai ia ˈna! (Heb. 4:15) Aita anaˈe to tatou e maˈi, mea fifi paha no tatou ia taa i te mau huru aau o te tahi taata mea maoro to ˈna maˈiraahia. A haamanaˈo râ ia Iesu. Ua faaite oia i te aumihi i te taata tei maˈihia, noa ˈtu e aita oia i maˈihia aˈenei. Ia tutava maite i te pee i to ˈna hiˈoraa î i te here e tia ˈi.—Pet. 1, 3:8.

13. Eaha ta te tia-faahou-raa o Lazaro e faaite mai ra no nia ia Iesu?

¹³ Ua putapû roa Iesu i te iteraa i te oto o vetahi. Ei hiˈoraa, i te poheraa to ˈna hoa ra o Lazaro, ‘uuru ihora Iesu e horuhoru atura tana varua’ i te iteraa i te utuafare o Lazaro e te mau hoa e oto ra. (A taio i te Ioane 11:33-36.) Noa ˈtu e ua ite oia e e nehenehe ta ˈna e faatia faahou mai ia Lazaro, ua taˈi Iesu. Aita oia i mǎtaˈu ia faaite i to ˈna mau huru aau  ia vetahi ê. No to ˈna here rahi ia Lazaro e i to ˈna utuafare i faaohipa ˈi oia i te puai no ô mai i te Atua ra no te faahoˈi mai ia Lazaro i te ora.—Ioa. 11:43, 44.

14, 15. (a) Eaha te haapapuraa e te hinaaro ra Iehova e faaore i te mauiui o te huitaata? (b) Eaha ta tatou e haapii mai i te taˈo ra “apoo”?

¹⁴ Te faataa ra te Bibilia ia Iesu mai to ˈna ra Metua o Iehova. (Heb. 1:3) Te haapapu mai ra ïa te mau semeio a Iesu e te hinaaro atoa ra o Iehova e faaore i te maˈi, te oto e te pohe. Fatata Iehova e o Iesu i te faahoˈi mai e rave rahi atu â taata i te ora. Ua parau Iesu e e “fatata mai nei hoi te hora e faaroo ai te feia atoa i roto i te apoo” i te faatia-faahou-hia mai.—Ioa. 5:28, 29.

¹⁵ Ua faaohipa Iesu i te taˈo ra “apoo” no te faaite e ua taaihia te reira i ta te Atua e haamanaˈo. E nehenehe ta te Atua mana hope, te Atua poiete i te ao nui atoa, e haamanaˈo i te mau tuhaa rii atoa o te feia ta tatou i here tei pohe, oia atoa to ratou huru. (Isa. 40:26) Aita Iehova e nehenehe noa e haamanaˈo ia ratou, te hinaaro atoa râ oia e haamanaˈo ia ratou. E hiˈoraa faahiahia mau te mau tia-faahou-raa i faahitihia i roto i te Bibilia no nia i te ohipa e tupu i roto i te ao apî.

16. Eaha ta te mau tavini a te Atua e rave rahi e fanaˈo?

¹⁶ Ia vai taiva ore tatou, e nehenehe tatou e ite hoê o na mau semeio rahi roa ˈˈe, o te oraraa ˈtu ïa i te ati rahi! I muri iti noa ˈˈe ia Aramagedo, e ite tatou e rave rahi atu â mau semeio. I tera taime, e fanaˈo te taata taitahi i te ea maitai roa. (Isa. 33:24; 35:5, 6; Apo. 21:4) A feruri na i te iteraa i te taata e faarue i to ratou titia mata, ta ratou turutootoo, to ratou parahiraa turairai e ta ratou taoˈa no te tauturu i te tariˈa turi. Ua ite Iehova e mea titauhia i te feia o te ora ˈtu ia Aramagedo i te itoito e te ea maitai, no te mea mea rahi ta ratou ohipa. O ratou te feia e faariro i to tatou fenua nehenehe mau ei paradaiso.—Sal. 115:16.

17, 18. (a) No te aha Iesu i faatupu ai i te mau semeio? (b) No te aha mea faufaa ˈi ia rave oe i tei titauhia no te fanaˈo i te ao apî?

¹⁷ Ua faaitoitohia te “feia rahi roa” i teie mahana ia taio mea nafea Iesu i te faaoraraa i te maˈi. (Apo. 7:9) E haapuai mai teie mau semeio i to tatou tiaturiraa faahiahia mau a ora roa ˈtu ai i a muri aˈe. Te faaite atoa ra te reira i te here rahi o te Tamaiti fanau tahi a te Atua no te huitaata. (Ioa. 10:11; 15:12, 13) Te faaite ra te aumihi rahi o Iesu i to Iehova here hohonu no ta ˈna mau tavini taitahi.—Ioa. 5:19.

¹⁸ I teie mahana, ua î roa teie nei ao i te oto, te mauiui e te pohe. (Roma 8:22) No reira, mea titauhia te ao apî a te Atua. I reira ïa te taata atoa e fanaˈo ai i te hoê ea maitai ta te Atua i fafau. Te horoa mai ra te Malaki 4:2 i te hoê tiaturiraa, oia hoi e ‘tupaipai to tatou avae i te repo mai te kafa faaamu o te fare ra,’ e oaoa roa tatou no te mea e faaorahia tatou e e tiamâ mai i te huru tia ore. Ia turai to tatou mauruuru ia Iehova e to tatou faaroo i ta ˈna mau parau fafau ia rave i tei titauhia ia tatou no te fanaˈo i te ao apî. Auê ïa faaitoitoraa i te iteraa e ua riro te mau semeio ta Iesu i faatupu ei tamǎrûraa tamau o ta te huitaata e fatata i te fanaˈo i te roaraa o ta ˈna faatereraa!