1, 2. Ua aha Iesu no ta ˈna mau aposetolo taiva ore i muri aˈe i te faatupuraa i te oroa Pasa i 33?

 TEI te maororaa po tatou o te 14 no Nisana 33. Ua oaoa Iesu e to ˈna mau hoa i te faatupu i te oroa Pasa o tei haamanaˈo atu mea nafea te Atua i te faaoraraa i to ratou tupuna i te faatîtîraa i Aiphiti. E ite râ ta ˈna mau pǐpǐ taiva ore i te hoê ‘faaoraraa mure ore’ rahi aˈe. I to muri iho mahana, ua haapohehia to ratou Aratai tia roa e to ˈna mau enemi. Ua riro râ teie ohipa ino mau ei haamaitairaa. E faaorahia te huitaata i te hara e te pohe maoti te toto o Iesu.—Heb. 9:12-14.

² Ia ore e moe ia tatou teie faanahoraa î i te here, ua haamau Iesu i te hoê oroa apî tamatahiti o tei mono i te oroa Pasa. Ua na reira o ˈna ma te ofati i te faraoa hopue ore a horoa ˈtu ai i ta ˈna na aposetolo taiva ore 11 e ua parau atu: “O tau tino teie e horoahia na outou nei, e na reira outou ei manaˈoraa ia ˈu.” Ua na reira atoa oia e te auˈa uaina uteute a na ô atu ai: “Teie nei auˈa, o te faufaa apî ïa i to ˈu nei toto, e haamaniihia no outou nei.”—Luka 22:19, 20.

3. (a) Eaha te tauiraa rahi tei tupu i muri aˈe i to Iesu poheraa? (b) Eaha te uiui no nia i te pure a Iesu i roto i te Ioane pene 17?

³ Fatata te faufaa o te Ture i rotopu i te Atua e te mau Iseraela pae tino i te hope. E monohia te reira e te hoê faufaa apî i rotopu ia Iehova e ta Iesu mau pǐpǐ faatavaihia. Aita Iesu i hinaaro ia riro ta ˈna mau pǐpǐ mai te nunaa Iseraela. Ua amahamaha roa hoi to Iseraela i te pae faaroo e totiare. E ua faaino te reira i to te Atua iˈoa moˈa. (Ioa. 7:45-49; Ohi. 23:6-9) Ua hinaaro râ Iesu ia vai hoê noa  ta ˈna mau pǐpǐ ia ohipa amui ratou no te faahanahana i to te Atua iˈoa. Ua aha ïa Iesu? Ua pûpû o ˈna i te pure nehenehe roa ˈˈe tei ore i taiohia aˈenei. (Ioa. 17:1-26; a hiˈo i te hohoˈa matamua.) E hiˈopoa anaˈe ïa ia tatou iho a uiui atu ai: “Ua pahono anei te Atua i ta Iesu pure? Te ohipa ra anei au ia au i te reira?”

4, 5. (a) Eaha ta te omuaraa o ta Iesu pure e haapii maira? (b) Mea nafea Iehova i te pahonoraa i ta Iesu i ani no ˈna iho?

⁴ I te maororaa po, ua haapii Iesu i te mau mea faahiahia mau i ta ˈna mau pǐpǐ. Hiˈo aˈera Iesu i te raˈi a pure atu ai: “E tau Metua, ua tae i te hora; a haamaitai i to Tamaiti, ia haamaitai atoa hoi to Tamaiti ia oe. Ua horoa mai hoi oe i te mana no ˈna i te taata atoa nei, ia horoa ˈtu oia i te ora mure ore i te feia atoa ta oe i horoa mai no ˈna ra. . . . Ua haamaitai au ia oe i te ao nei; ua oti ia ˈu te ohipa ta oe i ho mai na ˈu e rave ra. E teie nei, e tau Metua, e haamaitai mai oe ia ˈu i mua i to aro na i te maitai no ˈu ia oe hou teie nei ao.”—Ioa. 17:1-5.

⁵ A hiˈo na i roto i te omuaraa o ta Iesu pure eaha te mau mea faufaa aˈe no ˈna. Ta ˈna tapitapiraa matamua, o te faahanahanaraa ïa i to ˈna Metua i te raˈi. O ta ˈna atoa i ani na mua i roto i ta ˈna pure tuiroo: “E to matou Metua . . . , ia raa [aore ra moˈa] to oe iˈoa.” (Luka 11:2) Te piti o ta ˈna aniraa, no ta ˈna ïa mau pǐpǐ. Oia hoi ‘ia horoa ˈtu o ˈNa i te ora mure ore.’ I muri iho, ua ani Iesu no ˈna iho: “E tau Metua, e haamaitai mai oe ia ˈu i mua i to aro na i te maitai no ˈu ia oe hou teie nei ao ra.” Aita noa Iehova i horoa i ta Iesu i ani atu, oia atoa râ i ‘te iˈoa i hau ê i te maitai’ i to te mau melahi atoa.—Heb. 1:4.

6. (a) Ia aha te mau aposetolo no te fanaˈo i te ora mure ore? (b) Mea nafea tatou i ite ai e ua naea ia ratou tera fa?

⁶ A pure ai, ua faahiti atoa Iesu i tei titauhia ia rave tatou ei taata hara no te fanaˈo i te ô horoa noa o te ora mure ore. (A taio i te Ioane 17:3.) Ua na ô oia e mea tia ia tamau i te “ite” i te Atua e te Mesia. E nafea? A tahi, ma te rave i tei nehenehe no te haapii atu â no nia ia Iehova e i ta ˈna Tamaiti. Te piti, ma te faaohipa i ta tatou i haapii mai. Ua na reira te mau aposetolo. O ta Iesu ïa i haapapu i roto i ta ˈna pure: “Na oe i tuu mai ia ˈu i te parau ta ˈu i tuu aˈe ia ratou nei ra; e ua farii ratou i taua parau ra.” (Ioa. 17:8) No te fanaˈo râ i te ora mure ore, e mea tia ia tamau ratou i te feruri maite i ta te Atua mau parau a faaohipa ˈtu ai i te reira i roto i to ratou oraraa. Ua na reira anei te mau aposetolo taiva ore e tae roa ˈtu i te hopea? E. Ua ite tatou i te reira no te mea ua tapao-roa-hia to ratou iˈoa i nia i na ofai niu 12 o te Ierusalema apî i te raˈi.—Apo. 21:14.

7. Eaha te auraa e “ite” i te Atua, e no te aha mea faufaa roa ˈi te reira?

⁷ Ia au i te mau aivanaa o te reo Heleni, e nehenehe te parau ‘ite ia oe’ e hurihia ei “tamau i te ite.” Mea faufaa na parau e piti no te taa maitai i te auraa. Te ‘iteraa i te Atua,’ o te tamauraa ïa i te ite atu â no nia ia ˈna. E ere râ i te ite-noa-raa i to ˈna mau huru maitatai e ta ˈna opuaraa. E titau-atoa-hia ia here ia ˈna e i to tatou mau hoa haamori. Te faataa ra te Bibilia: “O tei ore i  aroha ra, aore ïa i ite i te Atua.” (Ioa. 1, 4:8) Te iteraa i te Atua, o te faaroo-atoa-raa ïa ia ˈna. (A taio i te Ioane 1, 2:3-5.) E fanaˈoraa taa ê mau â teie! E nehenehe râ tatou e ere i tera taairaa faufaa mau, mai ia Iuda Isakariota. E faaitoito anaˈe ïa i te haapaari i to tatou taairaa e o Iehova. E fanaˈo tatou i te ô horoa noa o te ora mure ore a na reira ˈi.—Mat. 24:13.

8, 9. (a) Eaha ta Iesu tapitapiraa matamua i te roaraa o ta ˈna taviniraa i te fenua nei? (b) Eaha te mau haapiiraa ta Iesu i patoi atu?

⁸ I muri aˈe i te taioraa i ta Iesu pure i roto i te Ioane pene 17, e ite papu tatou i to Iesu here rahi i ta ˈna mau aposetolo i to ˈna ra tau e i te feia atoa e riro mai ei pǐpǐ na ˈna. (Ioa. 17:20) Ia taa atoa râ ia tatou e e ere to tatou ora ta Iesu tapitapiraa matamua. I te roaraa o ta ˈna taviniraa i te fenua nei, ua ohipa oia na mua roa no te haamoˈa e te faahanahana i te iˈoa o to ˈna Metua. Ei hiˈoraa, a faaite ai i ta ˈna ohipa faauehia i roto i te sunago i Nazareta, ua taio Iesu i te otaro a Isaia: “Tei nia iho ia ˈu te [v]arua o te Fatu, oia i faatahinu mai ia ˈu ei poro haere i te parau maitai i te taata rii.” Aita e hape e ua faahiti Iesu i to te Atua iˈoa a taio ai i te reira.—Luka 4:16-21. *

⁹ Na mua roa ˈˈe Iesu e haere mai ai i te fenua, i haapii na te mau tia faaroo i te nunaa eiaha e faaohipa i to te Atua iˈoa. Mea papu e ua patoi roa ˈtu Iesu i tera tutuu o te ore e tu ra i te mau Papai. Ua parau oia i te feia e patoi ra ia ˈna: “I haere mai nei au ma te iˈoa o tau Metua, e aore outou i ite mai ia ˈu; ia haere mai râ te tahi ma to ˈna iho iˈoa, e ite outou i te reira.” (Ioa. 5:43) Tau mahana atoa hou Iesu a pohe ai, ua faaite â o ˈna eaha te mea faufaa aˈe no ˈna ma te pure: “E tau Metua, e haamaitai i to iˈoa.” (Ioa. 12:28) Eiaha ïa e maere e ua  faahiti atoa Iesu i tera tapitapiraa no te iˈoa o to ˈna Metua i roto i te pure ta tatou e hiˈopoa nei.

10, 11. (a) Mea nafea Iesu i te faaiteraa i te iˈoa o to ˈna Metua? (b) Eaha te fa a te mau pǐpǐ a Iesu?

¹⁰ Ua pure Iesu: “Ua faaite atu vau i to iˈoa i te mau taata o teie nei ao ta oe i ho mai no ˈu ra. No oe na hoi ratou; e na oe hoi ratou i ho mai no ˈu; e ua haapao ratou i ta oe parau. Ua ore au ua parahi i teie nei ao; e tia râ ratou i teie nei ao, e te haere atu nei au ia oe na. E tau Metua Moˈa ra e, e tiai oe ia ratou i ta oe i ho mai no ˈu i to iˈoa na, Ia hoê aˈe ratou mai ia tâua atoa nei â.”—Ioa. 17:6, 11.

¹¹ Aita Iesu i faaite noa i te iˈoa o to ˈna Metua i ta ˈna mau pǐpǐ ma te faahiti i tera iˈoa. Ua tauturu atoa râ oia ia ratou ia ite i te mau huru maitatai faahiahia o te Atua e i ta ˈna mau haaraa i nia ia tatou. (Exo. 34:5-7) Hau atu â, mai to ˈna tiaraa hanahana i nia i te raˈi, te tauturu noa nei Iesu i ta ˈna mau pǐpǐ ia faaite i to Iehova iˈoa e ati aˈe te fenua. Ma teihea fa? Ia haaputuputuhia e rave rahi roa ˈtu â pǐpǐ hou a haamouhia ˈi teie nei ao ino. Auê ïa iˈoa hanahana to Iehova a faaora ˈi oia i to ˈna mau ite taiva ore!—Ezk. 36:23.

12. Eaha na mea e toru faufaa roa te titauhia no te faaoti i te ohipa ta Iesu i haamata?

¹² Ei taata, ua tutava Iesu i te tauturu i ta ˈna mau pǐpǐ ia haavî i to ratou mau paruparu. Mea faufaa te reira no te rave hope i te ohipa ta Iesu i haamata. Ua pure Iesu: “Mai ia oe i tono mai ia ˈu i teie nei ao ra, ua tono atoa ˈtu hoi au ia ratou i teie nei ao.” No te faaoti i tera ohipa faaoraraa, ua faataa Iesu e toru ohipa faufaa roa te titauhia ia rave. A tahi, ua pure oia ia ore ta ˈna mau pǐpǐ ia riro i to te ao viivii a Satani. Te piti, ua pure oia ia haamoˈahia ratou ma te faaohipa i te parau mau o te Parau a te Atua no ratou iho. Te toru, ua taparu noa oia i te Atua ia vai hoê noa ta ˈna mau pǐpǐ i roto i te here mai te here e vai ra i rotopu ia ˈna e to ˈna Metua. E titauhia ïa ia hiˈopoa ia tatou iho. E ui anaˈe, ‘Te ohipa ra anei au ia au i na aniraa e toru a Iesu?’ Ma te faahiti i tera mau mea, ua faaite Iesu e ua papu ia ˈna e ‘e faaroo to te ao e na Iehova i tono ia ˈna.’—A taio i te Ioane 17:15-21.

13. Mea nafea te pure a Iesu i te pahonoraahia i te senekele matamua?

¹³ Ua pahonohia ta Iesu pure. Tei itehia ïa a hiˈopoa ˈi i te buka Ohipa. I taiohia na i rotopu i te mau Kerisetiano matamua te ati Iuda e te Etene, te feia ona e veve, te mau tavini e te mau fatu. A feruri na i te mau amahamaharaa te nehenehe e tupu! Mea tahoê râ ratou. No reira ratou i faaauhia ˈi i te mau tuhaa taa ê o te hoê tino taata e o Iesu te upoo. (Eph. 4:15, 16) Auê ïa ohipa faahiahia mau i roto i te ao amahamaha a Satani! Mauruuru ia Iehova. Maoti hoi te ohipa a to ˈna varua moˈa puai mau i tupu ai te reira.—Kor. 1, 3:5-7.

14. Mea nafea te pure a Iesu i te pahonoraahia i teie nei tau?

¹⁴ A pohe ai râ te mau aposetolo, aita e auhoêraa faahou. Mai tei tohuhia, ua haamata te hoê ohipa apotata rahi. Ua ô te mau haapiiraa hape i roto i te amuiraa e ua amahamaha ˈtura. (Ohi. 20:29, 30) I 1919 râ, ua faatiamâ Iesu i ta ˈna mau pǐpǐ faatavaihia i te haapaoraa hape e ua  haaputuputu atu i roto i te hoê “tatua nehenehe roa.” (Kol. 3:14) Eaha te faahopearaa o ta ratou ohipa pororaa? Ua hau atu i te hitu mirioni “mamoe ê atu” no ‘te mau fenua, opu, nunaa e reo atoa’ tei tahoêhia e te mau Kerisetiano faatavaihia i roto i te hoê nǎnǎ. (Ioa. 10:16; Apo. 7:9) E pahonoraa faahiahia mau â teie i ta Iesu pure ia Iehova: “Ia ite to te ao e na oe au i tono mai, e ua here mai oe ia ratou mai ia oe e here mai ia ˈu nei.”—Ioa. 17:23.

15. Eaha te aniraa taa ê a Iesu no ta ˈna mau pǐpǐ faatavaihia?

¹⁵ I te po o te 14 no Nisana, ua horoa Iesu i ta ˈna mau aposetolo te fanaˈoraa taa ê e faatere e o ˈna i roto i to ˈna Basileia ma te faaau atu i te hoê faufaa. (Luka 22:28-30; Ioa. 17:22) Te pure ra Iesu i teie nei no te feia atoa o te riro mai ei pǐpǐ faatavaihia na ˈna: “E tau Metua e, ua hinaaro vau i te feia ta oe i ho mai no ˈu ra, ei pihai atoa iho ia ˈu i te vahi e parahi ai au ra, ia hiˈo mai ratou i to ˈu hinuhinu i ta oe i ho mai no ˈu ra; ua here mai na hoi oe ia ˈu hou te fenua i hamanihia ˈi.” (Ioa. 17:24) Aita te mau mamoe ê atu a Iesu e feii ra, te oaoa nei râ. E haapapu â te reira i te auhoêraa o te mau Kerisetiano mau atoa e ora nei.

16, 17. (a) Eaha te faaotiraa papu ta Iesu i faahiti i te pae hopea o ta ˈna pure? (b) Eaha ta tatou e faaoti papu e rave?

¹⁶ Turaihia e to ratou mau tia faaroo, ua maiti te rahiraa o te taata i te tâuˈa ore i te haapapuraa e e nunaa tahoê to Iehova o tei ite mau o vai ra o ˈna. Hoê â huru i te tau o Iesu. No reira o ˈna i faaoti ai i ta ˈna pure ma teie mau parau putapû mau: “E tau Metua parau-tia e, aore â hoi to te ao i ite ia oe, ua ite râ vau ia oe; e ua ite hoi ratou nei e na oe au i tono mai. E ua faaite atu hoi au ia ratou, e e faaite atu â vau, i to oe iˈoa, ia herehia mai ratou i to hereraa mai ia ˈu nei ra, e o vau hoi e parahi i roto ia ratou.”—Ioa. 17:25, 26.

¹⁷ O vai te nehenehe e patoi e ua haa Iesu ia au i ta ˈna pure? Ei Upoo o te amuiraa, te tauturu noa nei oia ia tatou ia faaite i te iˈoa o to ˈna Metua e i ta ˈNa opuaraa. E auraro noa anaˈe i ta ˈna aratairaa ma te poro e te faariro i te taata ei pǐpǐ ma te itoito rahi. (Mat. 28:19, 20; Ohi. 10:42) E faaitoito atoa anaˈe i te vai hoê noa ei nunaa o te Atua. E haa ïa tatou ia au i ta Iesu pure, e faahanahanahia te iˈoa o Iehova e e oaoa tatou e a muri noa ˈtu.