“I teie mahana, te tiaturi nei au e te vai ra te hoê Atua”

TE HOˈI ra te hoê vahine no Ukraine o Alexandra te iˈoa e ora ra i Prague, i te Repupirita Tchèque, i to ˈna fare mai ta ˈna ohipa mai. I te tapearaa pereoo uta taata, ua itehia ia ˈna te hoê pute moni nainai i raro e tue-haere-hia ra e te mau taata e hahaere ra. I to ˈna raveraa mai i te pute moni e hiˈoraa i roto aita o ˈna i tiaturi i te mea ta ˈna i ite. Te vai ra te hoê haapueraa e 5 000 couronnes moni papie! Aita râ hoê aˈe taata na pihai iho e imi ra i te pute moni. Ei taata ê e ora ra i te Repupirita Tchèque, e mea fifi roa no Alexandra ia imi i te ora. Eaha ta ˈna i rave?

I muri aˈe i te hoˈiraa ˈtu i te fare, ua faaite atu o Alexandra i te pute moni i ta ˈna tamahine, ia Victoria. Ua maimi atura raua i roto i te pute moni i te iˈoa e te vahi nohoraa o te fatu aita râ i itehia. Teie râ, te vai nei i roto i te pute moni te hoê papie iti ua papaihia i nia iho te tahi mau numera. Ua papaihia i nia i te hoê pae o te papie te hoê numera afata moni, e i nia i te tahi atu pae e rave rahi numera. Te vai atoa ra i roto i te pute moni te mau faataaraa no te haere atu i te hoê fare moni e te hoê nota e faaite ra “330 000 couronnes” (fatata e 8 000 euros). Te rahiraa mau ïa o te moni e vai ra i roto i te pute.

Ma te faaohipa i tei manaˈohia e e numera niuniu, ua taniuniu o Alexandra i te fare moni, aita râ i manuïa. No reira ua haere o ˈna e ta ˈna tamahine i te fare moni e ua faataa eaha te ohipa i tupu. Ua ani raua no nia i te numera afata moni tei itehia mai e raua i roto i te pute moni. Teie râ, aita teie numera afata moni i tapaohia i roto i teie fare moni. I te mahana i muri iho, ua hoˈi faahou atu o Alexandra e te tahi atu numera no roto i te pute moni. Inaha, e numera afata moni teie na te hoê vahine hoani no te fare moni. Ua farerei atu o Alexandra e o Victoria i tera vahine, e ua haapapu mai oia i teie moeraa. I to ratou farereiraa, ua haamauruuru teie vahine ia raua ma te mahanahana e ua ui, “Eaha te mau titauraa no te faahoˈiraa mai i te moni?”

Ua pahono o Victoria: “Aita e titauraa. Ahiri mâua i hinaaro na i te moni, ua tapea noa ïa mâua i te reira.” Na roto i to ˈna reo Tchèque taotiahia, ua faataa oia e: “Ua faahoˈi atu mâua i ta oe moni no te mea e Ite no Iehova mâua. Eita to matou manaˈo haava haapiihia e te Bibilia e farii ia tapea noa matou i te tahi mea e ere matou te fatu.” (Hebera 13:18) Ua parau teie vahine ma te oaoa e, “I teie mahana, te tiaturi nei au e te vai ra te hoê Atua.”