Mea ora te parau a Iehova

Manaˈo faufaa o te buka a Ezera

E HAAMATA ta te buka bibilia a Ezera faatiaraa i te taime e hope ai te Paraleipomeno Piti. E haamata to ˈna taata papai, te tahuˈa ra o Ezera i te faatiaraa e te faaueraa mana a te arii ra o Kuro no Peresia o te faatia ra i te hoê toea o te mau ati Iuda i hopoi-ê-hia i Babulonia ia hoˈi i to ratou fenua aiˈa. E hope te faatiaraa e ta Ezera mau raveraa no te tamâ i te feia o tei haaviivii ia ratou iho e te nunaa o te fenua. I te taatoaraa, e puohu te buka i te hoê tau e 70 matahiti—mai te matahiti 537 e tae atu i te matahiti 467 H.T.T.

Mea maramarama te fa a Ezera i to ˈna papairaa i te buka: e faaite e mea nafea to Iehova faatupuraa i ta ˈNa parau fafau e faatiamâ i to ˈNa nunaa i hopoi-ê-hia i Babulonia e e haamau faahou i te haamoriraa mau i Ierusalema. No reira, e haamataratara noa Ezera i te mau tupuraa o te taai i teie opuaraa. E faatia te buka a Ezera e mea nafea te hiero i te patu-faahou-raahia e e mea nafea te haamoriraa a Iehova i te haamau-faahou-raahia noa ˈtu te patoiraa e te huru tia ore o te nunaa o te Atua. Mea anaanatae roa te faatiaraa no tatou no te mea te ora atoa nei tatou i te hoê tau faaapîraa. Mea rahi o te tairuru nei i nia i te “mouˈa o Iehova,” e ua fatata te fenua taatoa i te ‘î i te ite i te hanahana o Iehova.’—Isaia 2:2, 3; Habakuka 2:14.

TE PATU-FAAHOU-HIA RA TE HIERO

(Ezera 1:1–6:22)

Ei pahonoraa i ta Kuro faaueraa mana e faatiamâ, fatata e 50 000 ati Iuda i hopoi-ê-hia o te hoˈi i Ierusalema i raro aˈe i te aratairaa a te tavana ra o Zerubabela, aore ra Sesebazara. E faatia oioi te feia i hoˈi i te fata i nia i to ˈna iho vahi e e haamata i te pûpû i te mau tusia na Iehova.

I te matahiti i muri mai, e haamau te mau Iseraela i te niu o te fare o Iehova. E haafifi noa te mau enemi i te ohipa patu-faahou-raa e i te pae hopea e manuïa ratou i te ani i te hoê faaueraa a te arii o tei faaoti e tapea i te ohipa. E faaitoito te mau peropheta ra o Hagai raua Zekaria i te nunaa ia tamau ratou i te patu i te hiero noa ˈtu te opaniraa. Na te mǎtaˈu i te patoiraa i te hoê faaueraa mana Peresia eita e au ia tauihia i te omuaraa i faaotihia e Kuro e faaatea mai i to ratou mau enemi. Maoti te hoê maimiraa mana e itea mai ai ta Kuro ture no nia “i te fare o te Atua i Ierusalema.” (Ezera 6:3) E tere maitai te ohipa e oti roa ˈtu ai.

Uiraa bibilia pahonohia:

1:3-6—Ua paruparu anei te faaroo o te mau Iseraela i ore i opua i te hoˈi i to ratou fenua aiˈa? Aita paha vetahi i hoˈi i Ierusalema no to ratou riroraa ei taata nounou taoˈa aore ra aita ratou i haafaufaa i te haamoriraa mau, e ere râ tera i te parau mau i roto i te mau tupuraa atoa. Na mua roa, ua titauhia e maha aore ra e pae avaˈe ia tere 1 600 kilometera i te atea i Ierusalema. Hau atu â, ia parahi i roto i te hoê fenua i vai ano noa e 70 matahiti i te maoro e ia rave i te ohipa patu-faahou-raa, e titauhia ˈtu â i te puai i te pae tino. No reira, ua tapea mau â te mau tupuraa au ore, mai te maˈi i te pae tino, te ruhiruhiaraa, e te mau hopoia utuafare, ia vetahi ia hoˈi.

2:43—O vai ma te mau Netinimi? E taata teie e ere i te Iseraela o tei tavini ei tîtî aore ra ei tavini i te hiero. I rotopu ia ratou, te vai ra te mau huaai o te mau ati Gibeona o te tau o Iosua e ‘ua haapaohia vetahi e Davida e te feia rarahi [aore ra te mau tamaiti hui arii] atoa ra no te rave i te ohipa a te ati Levi.’—Ezera 8:20.

2:55—O vai ma te mau tamarii a te mau tavini o Solomona? E taata teie e ere i te Iseraela o tei horoahia te mau hopoia taa ê i roto i te taviniraa a Iehova. Ua tavini paha ratou ei papai parau aore ra ei papai hohoˈa parau i te hiero aore ra i roto i te tahi mau hopoia o te faatereraa.

2:61-63—Te vai ra anei i te mau taata i hoˈi te Urima e te Tumima, o tei faaohipahia ua hinaaro-anaˈe-hia te hoê pahonoraa no ǒ mai ia Iehova ra? Ua hiˈopoahia te mau faahitiraa parau a te fetii tahuˈa o tei ore i haapapu i to ratou ihotatau maoti te faaohiparaa i te Urima e te Tumima. E faahiti noa Ezera i te reira mai te hoê mea paha i tupu. Te vai ra i roto i te mau Papai te faaohiparaa i te Urima e te Tumima i muri iho e i muri aˈe. Ia au i te tutuu ati Iuda, ua moe te Urima e te Tumima i te haamouraa o te hiero i te matahiti 607 H.T.T. ra.

3:12—No te aha ‘te feia tahito tei ite i tei mutaaiho fare’ o Iehova i oto ai? Ua tia i teie feia ia haamanaˈo i te unauna rahi o te hiero i patuhia e Solomona. Te niu o te hiero apî i mua ia ratou, ‘aore ïa i to ratou  hiˈoraa’ ia faaauhia. (Hagai 2:2, 3) E faahoˈi mai anei ta ratou mau tutavaraa i te unauna o tei mutaaiho hiero? Ua topa paha to ratou morare, e no reira ua oto atura ratou.

3:8-10; 4:23, 24; 6:15, 16—Ehia rahiraa matahiti i titauhia no te patu faahou i te hiero? Ua haamauhia te niu o te hiero i te matahiti 536 H.T.T. ra—“i te piti o te matahiti o to ratou haerea mai.” Ua mau te ohipa paturaa i te tau o te arii Aretehasaseta i te matahiti 522 H.T.T. ra. Ua tamau noa te opaniraa e tae atu i te matahiti 520 H.T.T., i te piti o te matahiti o te arii ra o Dariu. Ua oti roa te hiero i te ono o te matahiti o to ˈna ariiraa, aore ra i te matahiti 515 H.T.T. ra. (A hiˈo i te tumu parau tarenihia “Te mau arii Peresia mai te 537 e tae roa ˈtu i te 467 H.T.T.” i te api 31.) Ua titau ïa te paturaa o te hiero fatata e 20 matahiti i te maoro.

4:8–6:18—No te aha teie mau irava i papaihia ˈi na roto i te reo Aramea? Mea rahi roa ta te mau taata toroa a te hau hohoˈa rata na te mau arii e te mau pahonoraa a te mau arii i roto teie tuhaa. Ua papai faahou Ezera i te reira maoti te mau vairaa parau huiraatira i papaihia na roto i te reo Aramea, te reo tapihoo e faatere i tera ra tau. Te tahi atu mau tuhaa o te Bibilia i papaihia na roto i teie reo ati Sema, oia ïa, Ezera 7:12-26; Ieremia 10:11, e Daniela 2:4b–7:28.

Haapiiraa no tatou:

1:2. Ua tupu iho â ta Isaia i tohu fatata e 200 matahiti na mua ˈtu. (Isaia 44:28) E tupu iho â te mau parau tohu o te Parau a Iehova.

1:3-6. Mai vetahi o te mau Iseraela o tei faaea noa i Babulonia, eita e rave rahi Ite no Iehova e nehenehe e rave i te taviniraa taime taatoa aore ra e tavini i te vahi e hinaaro-aˈe-hia ˈi. Teie râ, te paturu ra e te faaitoito ra ratou i te feia o te nehenehe e te horoa noa ra ratou i te mau ô no te turu i te ohipa pororaa i te Basileia e te faariroraa i te taata ei pǐpǐ.

3:1-6. I te hitu o te avaˈe o te matahiti 537 H.T.T. (Tishri, e tuea i te mau avaˈe Tetepa/Atopa), ua pûpû te mau taata haapao maitai i hoˈi i ta ratou mau tusia matamua. Ua tomo to Babulonia i Ierusalema i te pae o te avaˈe (Ab, e tuea i te mau avaˈe Tiurai/Atete) o te matahiti 607 H.T.T., e e piti avaˈe i muri aˈe ua ano roa te oire. (Te mau arii 2, 25:8-17, 22-26) Mai tei tohuhia, ua hope na matahiti anoraa e 70 i te taime au. (Ieremia 25:11; 29:10) E tupu noa iho â te mau mea atoa ta te Parau a Iehova e faaite atea.

4:1-3. Ua patoi te toea haapao maitai i te hoê pûpûraa, oia ïa e faatupu i te hoê faaauraa faaroo e te feia haamori haavare. (Exodo 20:5; 34:12) Eiaha atoa te feia haamori a Iehova i teie mahana e tahoê i te mau pǔpǔ faaroo atoa.

5:1-7; 6:1-12. E nehenehe Iehova e aratai i te mau mea ia manuïa to ˈna nunaa.

6:14, 22. E hopoi mai te apitiraa ma te itoito rahi i ta Iehova ohipa i ta ˈna farii maitai e ta ˈna haamaitairaa.

6:21. Ua turai te ite-mata-raa ˈtu i te haereraa te ohipa i mua i to Samaria o tei ora hoi i roto i te fenua aiˈa ati Iuda e te feia i hoˈi o tei hema i te mau mana etene ia rave i te mau tauiraa i roto i to ratou oraraa. Eiaha anei tatou e apiti ma te anaanatae roa i te ohipa faauehia e te Atua, oia atoa te ohipa pororaa i te Basileia?

E HAERE EZERA I IERUSALEMA

(Ezera 7:1–10:44)

E pae ahuru matahiti tei mairi mai te avariraahia mai â o te fare o Iehova i patu-faahou-hia. O te matahiti 468 H.T.T. ïa. Ma te rave na muri iho ia ˈna i te hoê toea o te nunaa o te Atua e te mau ô moni, e haere Ezera mai Babulonia ˈtu i Ierusalema. Eaha ta ˈna e ite i reira?

E parau mai te feia rarahi, aore ra te mau tamaiti hui arii ia Ezera e: “Te mau taata o Iseraela, e te mau tahuˈa, e te mau ati Levi, aore i faataa ia ratou i te mau taata o teie nei fenua; i te rave-atoa-raa i te parau faufau.” Hau atu â, “te feia rarahi [aore ra te mau tamaiti hui arii] e te mau tavana tei na mua ïa i taua hara nei.” (Ezera 9:1, 2) Ua huru ê aˈera Ezera. Te faaitoitohia ra oia ‘ia faaitoito e ia rave.’ (Ezera 10:4) E rave Ezera i te mau taahiraa no te faatitiaifaro, e e farii maitai mai te nunaa.

Uiraa bibilia pahonohia:

7:1, 7, 11—Te faahiti ra anei teie mau irava atoa ia Aretehasaseta o tei tapea i te ohipa paturaa? Aita. E iˈoa aore ra e tiaraa o Aretehasaseta o tei faaohipahia i nia i na arii Peresia e piti. O Bardiya aore ra o Gaumata te hoê o tei faaue e ia faaeahia te ohipa o te hiero i te matahiti 522 H.T.T. ra. O Aretehasaseta Rima roa te Aretehasaseta i te tau i haere ai Ezera i Ierusalema.

7:28–8:20—No te aha e rave rahi ati Iuda i Babulonia i ore ai i hinaaro e haere i Ierusalema na muri ia Ezera? Noa ˈtu e ua mairi e 60 tiahapa matahiti mai te taime mai â a hoˈi ai te pǔpǔ matamua o te mau ati Iuda i to ratou fenua aiˈa, o Ierusalema anaˈe tei taata-rii-hia. Te auraa e hoˈi i Ierusalema, o te haamata-faahou-raa ïa i te hoê oraraa apî i roto i te mau  tupuraa au ore e te atâta. Aita te Ierusalema o tera ra tau e pûpû ra i te mau tiairaa anaanatae i te pae materia na te mau ati Iuda i ruperupe na paha i Babulonia. Eiaha e haamoe e mea atâta te tere hoˈiraa. Ua titauhia i te feia i hoˈi i te faaroo puai ia Iehova, te itoito rahi no te haamoriraa mau, e te itoito no te tere atu. Ua itoito atoa Ezera iho no te mea tei ia ˈna te rima o Iehova. Maoti ta Ezera faaitoitoraa i pahono ai 1 500 utuafare—peneiaˈe e 6 000 rahiraa. I muri aˈe i to Ezera raveraa i te tahi mau taahiraa hau, ua pahono mai e 38 ati Levi e e 220 Netinimi.

9:1, 2—Mea nafea te faaipoiporaa i te taata o te tahi atu fenua i riro ai ei fifi rahi? Ua riro te nunaa i faanaho-faahou-hia ei tiai i te haamoriraa a Iehova e tae roa ˈtu i te haereraa mai o te Mesia. Ua riro te faaipoiporaa i te tahi atu mau taata ei fifi mau no te haamoriraa mau. No to vetahi faaipoiporaa i te mau taata haamori idolo, ua amui-roa-hia paha te nunaa taatoa i roto i te mau nunaa etene. E ore roa paha te haamoriraa viivii ore i te fenua atoa nei. E haere mai ïa te Mesia no vai? E ere i te mea maere e ua huru ê Ezera i te iteraa i te mea i ravehia!

10:3, 44—No te aha i faahoˈihia ˈi te mau tamarii i te mau vahine ra? Ahiri ua faaea te mau tamarii i muri, e mea rahi paha te mau vahine i faaruehia o te hoˈi no ta ratou mau tamarii. Hau atu â, e mea pinepine e titau te mau tamarii rii ia haapao to ratou metua vahine ia ratou.

Haapiiraa no tatou:

7:10. Ei piahi haapii tamau e ei orometua haapii aravihi i te Parau a te Atua, ua vaiiho mai Ezera i te hoê hiˈoraa. Ua faaineine oia i to ˈna aau na roto i te pure no te hiˈo i te Ture a Iehova. A hiˈo ai oia i te reira, ua haapao hua Ezera i ta Iehova e parau ra. Ua faaohipa Ezera i ta ˈna i haapii e ua faaitoito ia ˈna iho i te haapii ia vetahi ê.

7:13. Te hinaaro ra Iehova i te mau tavini aau tae.

7:27, 28; 8:21-23. Ua faahanahana Ezera ia Iehova, ua taparuparu ia ˈna ma te haavare ore hou a rave ai i te hoê tere roa e te atâta i Ierusalema, e ua ineine oia i te faaû i te pohe no te hanahana o te Atua. No reira, ua vaiiho mai oia i te hoê hiˈoraa maitai roa.

9:2. E mea tia ia haapao maite tatou i te aˈoraa e faaipoipo “i roto noa i te Fatu.”—Korinetia 1, 7:39, MN.

9:14, 15. E faatupu mai te mau amuimuiraa iino i to Iehova mauruuru ore.

10:2-12, 44. Ua tatarahapa te mau taata i rave i te mau vahine ěê ma te haehaa e ua faaafaro i to ratou haerea hape. E hiˈoraa maitai to ratou haerea e ta ratou ohipa.

E faatupu Iehova i ta ˈna mau parau fafau

Mea faufaa mau â te buka a Ezera no tatou! I te taime au, ua faatupu Iehova i ta ˈna parau fafau e faatiamâ mai i to ˈna nunaa i hopoi-ê-hia i Babulonia e ua haamau faahou i te haamoriraa mau i Ierusalema. Eita anei te reira e haapuai i to tatou faaroo ia Iehova e i ta ˈna mau parau fafau?

A feruri na i te mau hiˈoraa ta te buka a Ezera e horoa ra. Ua faaitehia te hiˈoraa maitai i te pae o te paieti i te Atua e Ezera e te toea o tei hoˈi no te apiti i te haamau-faahou-raa o te haamoriraa viivii ore i Ierusalema. Te haamataratara atoa ra te buka i te faaroo o te mau taata ěê e mǎtaˈu ra i te Atua e te haerea haehaa o te feia rave hara tatarahapa. Oia mau, te haapapu maitai ra ta Ezera mau parau faaurua e ‘mea ora te parau a te Atua, e te puai rahi.’—Hebera 4:12.

[Tapura i te api 31]

TE MAU ARII PERESIA MAI TE 537 E TAE ROA ˈTU I TE 467 H.T.T.

Ua pohe Kuro Rahi (Ezera 1:1) i 530 H.T.T.

Cambyse, aore ra Ahasueru (Ezera 4:6) 530-22 H.T.T.

Aretehasaseta—Bardiya (Ezera 4:7) 522 H.T.T. (Ua haapohehia

aore ra Gaumata i muri aˈe e hitu noa

avaˈe ariiraa)

Dariu I (Ezera 4:24) 522-486 H.T.T.

Xerxès, aore ra Ahasueru * 486-75 H.T.T. (Ua faatere

ei arii mono e o Dariu I

mai te 496-86 H.T.T.)

Aretehasaseta Rima roa (Ezera 7:1) 475-24 H.T.T.

[Nota i raro i te api]