Eaha te mana o Iesu Mesia i nia ia oe?

IA AU i ta tatou i hiˈopoa mai i roto i to mua ˈtu tumu parau, te vai ra anei te tahi feaaraa no nia i te ohiparaa te mau haapiiraa a Iesu na te ao atoa nei? Teie râ te uiraa faufaa, “Eaha te mana o te mau haapiiraa a Iesu i nia ia ˈu iho?”

Te vai ra i roto i te mau haapiiraa a Iesu e rave rahi anairaa tumu parau. E nehenehe te mau haapiiraa faufaa e matara mai e ohipa i nia i te mau tuhaa atoa o to oe oraraa. E hiˈopoa mai tatou i ta Iesu i haapii no nia i te haamauraa i te mau fa matamua i roto i te oraraa, te atuaturaa i te auhoaraa e te Atua, te haamauraa i te mau taairaa maitai e o vetahi ê, te faatitiaifaroraa i te mau fifi e te aperaa i te rave i te mau ohipa haavî uˈana.

A haamau i te mau fa matamua i roto i te oraraa

Te titau nei te ao ru noa o teie mahana i to tatou taime e itoito e e pinepine te mau mea pae varua i te tuuhia i te hiti. A hiˈo na i te tupuraa o te hoê taata e 20 e tiahapa matahiti to ˈna o ta tatou e mairi i te iˈoa o Jerry. Noa ˈtu e e mea au na Jerry ia aparau i nia i te mau tumu parau i te pae varua e e mea haafaufaa roa na ˈna i ta ˈna e haapii ra no nia i te reira, te autâ nei o ˈna: “Aita to ˈu e taime no te rave tamau i te reira. E rave au i te ohipa e ono mahana i te hebedoma. Te Tapati noa ta ˈu mahana faafaaearaa. E i muri aˈe i te raveraa i te ohipa ta ˈu e nehenehe e rave, e rohirohi roa ïa vau.” Mai te peu e to roto oe iho i te hoê â tupuraa fifi, e nehenehe oe e faufaahia i ta Iesu i haapii i roto i te Aˈoraa i nia i te mouˈa.

Ua parau Iesu i te nahoa taata o tei putuputu no te faaroo ia ˈna e: “Eiaha e tapitapi i to outou ora, i ta outou e amu, e ta outou e inu; e te ahu no to outou tino. E ere anei e rahi te ora i te maa, e te tino i te ahu? A hiˈo na i te mau manu o te reva; aore ratou e ueue, aore hoi e ooti, aore a ratou fare pueraa maa; na to outou Metua i te ao râ e faaamu ia ratou. E ere anei te maitai rahi to outou i to ratou? . . . E teie nei, eiaha outou e tapitapi noa, a na ô ai ra, Eaha ta matou ia amu? e, Eaha ta matou ia inu? e Eaha to matou ahu ia ahu? (Te imi nei hoi te mau Etene i taua mau mea atoa nei:) ua ite hoi to outou Metua i te ao ra, e ia noaa taua mau mea ra ia outou e tia ˈi. E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.”  (Mataio 6:25-33) Eaha ta tatou e haapii mai na roto i te reira?

Aita o Iesu e parau ra e eiaha e haapao i to tatou mau hinaaro i te pae tino e o te mau melo o to tatou utuafare. Te parau ra te Bibilia e: “O te taata . . . aore i hamani maitai i to ˈna ihora, e rahi atu â i to ˈna ihora utuafare, ua faarue ïa oia i te parau, e e rahi atu ïa to ˈna ino i to te taata mau ore ra.” (Timoteo 1, 5:8) Ua fafau râ Iesu e mai te peu e e tuu tatou i te mau mea matamua na mua e e horoa i te parahiraa matamua i te mau mea pae varua, e haapao maite te Atua e ia haamâhahia te tahi atu mau hinaaro. No nia ïa i te haamauraa i te mau fa matamua te haapiiraa i ǒ nei. E aratai te peeraa i teie aˈoraa i te oaoa no te mea “e ao to tei ite i to ratou veve i te pae varua.”—Mataio 5:3, MN.

A atuatu i te auhoaraa e te Atua

E taa te feia tei ite i to ratou veve i te pae varua i te titauraa ia atuatu i te hoê taairaa maitai e te Atua. E nafea tatou e haamau ai i te hoê taairaa maitai e te hoê taata? Eita anei tatou e tamata i te haamatau maitai aˈe i taua taata ra? E mea tia ia rave tatou i te taime no te haapii i ta ˈna mau huru hiˈoraa, to ˈna mau haerea, to ˈna mau aravihi, ta ˈna mau ohipa i faatupu, ta ˈna e au e e ore e au. E parau mau atoa te reira ia faatupuhia te hoê auhoaraa e te Atua. E titauhia ia ite mau ia ˈna. A pure ai oia i te Atua no nia i ta ˈna mau pǐpǐ, ua parau Iesu e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Oia, no te atuatu i te mau taairaa piri roa e te Atua e titauhia ia haamatau ia ˈna. O te Parau faaurua e te Atua, te Bibilia anaˈe ïa te tumu o tera ite. (Timoteo 2, 3:16) E mea tia ia faataa tatou i te taime no te haapii i te mau Papai.

Tera râ, eita e navai te iteraa i te reira. I roto i tera noâ pure, ua parau Iesu e: “Ua haapao ratou [ta ˈna mau pǐpǐ] i ta oe parau.” (Ioane 17:6) Eita e titau-noa-hia te ite i te Atua ia ohipa atoa râ ia au i tera ite. E nafea ˈtu â tatou e nehenehe ai e riro ei hoa no te Atua? E nehenehe mau anei tatou e tiaturi e e rahi to tatou auhoaraa e te hoê taata ia rave tatou ma te opua i te mau peu o te ore e tuea ra i to ˈna mau manaˈo e ta ˈna mau faaueraa tumu? Ia aratai ïa te mau hiˈoraa e faaueraa tumu a te Atua i to tatou mau taahiraa atoa i roto i te oraraa, e tia ˈi. A hiˈo na e nafea e piti o ta ˈna mau faaueraa tumu e faaohipahia ˈi i roto i to tatou mau taairaa e vetahi atu mau taata.

A haamau i te mau taairaa maitai e o vetahi ê

I te hoê taime, ua faatia Iesu i te hoê aamu poto no te horoa i te hoê haapiiraa faufaa no nia i te taairaa i rotopu i te mau taata. Ua faahiti oia no nia i te hoê arii o te hinaaro e faaau i te parau i nia i ta ˈna mau tavini. E tarahu rahi râ ta te hoê o ratou e aita e ravea no te aufau i te reira. Ua faaue te fatu ia hoohia te tane, ta ˈna vahine, e ta ˈna mau tamarii e ia aufauhia mai. Ua tipapa ihora i raro e ua taparuparu ihora te taata tarahu: “E tau fatu, eiaha na oe e ru ia ˈu, na ˈu e faahoˈi atu i te hoo ia oe na e hope roa ˈˈe.” No to ˈna aroha rahi, ua faaore aˈera te fatu i ta ˈna tarahu. Ua haere atura râ tera tavini e farerei i te hoê hoa tavini tei tarahu ia ˈna i te tahi maa moni rii e ua ani atu ia aufauhia mai oia. Tera râ, ua taparu teie hoa tavini ia arohahia o ˈna, ua huri te tavini matamua ia ˈna i roto i te fare tapearaa e tae roa ˈtu i te taime e aufau pauroa ˈi oia i ta ˈna tarahu. I to te arii faarooraa i te reira, ua riri aˈera oia. “Eiaha oe e aroha . . . i to taetaeae tavini mai ia ˈu i aroha ˈtu ia oe na?” o ta ˈna ïa i ui atu. E ua tuu oia i te tavini tei ore i faaore i te hara i roto i te fare tapearaa e tae roa ˈtu i te taime e aufau pauroa ˈi oia i ta ˈna tarahu. Ma te huti i te hoê haapiiraa i roto i teie aamu, ua parau Iesu e: “E na reira atoa mai tau Metua i te ao ra ia outou atoa na, ia ore outou ia faaore ma te aau  atoa i te hapa a to ˈna taeae.”—Mataio 18:23-35.

Ei taata tia ore, e rave rahi hapa ta tatou. Eita roa ˈtu ta tatou e nehenehe e aufau i te tarahu rahi roa i te Atua ta tatou i haaputu no te mau hara i ravehia i mua ia ˈna. Te hoê noa mea ta tatou e nehenehe e rave o te imiraa ïa i ta ˈna faaoreraa hara. E ua ineine te Atua ra o Iehova i te faaore pauroa i ta tatou mau hara, ia faaore tatou i ta to tatou mau taeae i rave i nia ia tatou. Auê ïa haapiiraa puai mau tera! Ua haapii Iesu i ta ˈna mau pǐpǐ ia pure: “E faaore mai i ta matou hara, mai ia matou atoa e faaore i tei hara ia matou nei.”—Mataio 6:12.

A faatitiaifaro i te tumu o te mau fifi

No nia i te taaraa i te natura o te taata, e mea aravihi roa o Iesu. E faatitiaifaro ta ˈna mau aˈoraa i te tumu o te fifi. A hiˈo na i na faahiˈoraa e piti i muri nei.

Ua parau Iesu e: “Ua faaroo hoi outou e i parauhia mai te feia tahito ra e, Eiaha oe e taparahi i te taata: e O te taparahi i te taata ra, e au ia ˈna te haavaraa; te parau atu nei râ vau ia outou, O te taata i riri noa i to ˈna taeae, e au atoa ia ˈna te haavaraa.” (Mataio 5:21, 22) Ua faaite Iesu i ǒ nei e mea hohonu atu â te tumu o te fifi o te taparahiraa taata i te haavîraa uˈana iho. O te huru ïa o te rahi roa i roto i te aau o te feia taparahi taata. Ahiri e eita te hoê taata e vaiiho i te huru aau o te inoino aore ra o te riri ia tupu mai, e ore ïa te haavîraa uˈana opuahia. E ape-mau-hia te haamaniiraa toto ahiri i faaohipahia teie haapiiraa!

A tapao na mea nafea to Iesu faahohonuraa i te tumu o te tahi atu fifi o te faatupu i te hoê oto rahi. Ua parau oia i te nahoa taata e: “Ua faaroo hoi outou, e i parauhia mai te feia tahito ra e, Eiaha oe e faaturi. Te parau atu nei râ vau ia outou, O te hiˈo noa ˈtu i te vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau. E te hapa na oe i to mata atau, e ohiti e faarue ê atu.” (Mataio 5:27-29) Ua haapii Iesu e mea hohonu roa ˈtu â te fifi o te haerea morare ore. E haamata te fifi na mua ˈˈe—te mau hiaai morare ore. Mai te peu e e patoi te hoê taata i te mau hinaaro tano ore e e “faarue ê atu” i to ˈna feruriraa, e aro ïa oia i te tumu o te fifi o te haerea morare ore.

“A oomo i to ˈoˈe i roto i te vehî”

I te po a haavarehia ˈi e a haruhia ˈi Iesu, ua rave aˈera te hoê o ta ˈna mau pǐpǐ i ta ˈna ˈoˈe no te paruru ia ˈna. Ua faaue Iesu ia ˈna e: “A oomo i to ˈoˈe i roto i te vehî; o te rave hoi i te ˈoˈe ra, e pohe ïa i te ˈoˈe.” (Mataio 26:52) I te poipoi aˈe, ua parau Iesu ia Ponotio Pilato e: “E ere i to teie nei ao to ˈu basileia; ahiri no teie nei ao to ˈu basileia, ua faaitoito ïa tau mau tavini ia ore au ia tuuhia ˈtu i te rima o te ati Iuda; e ere râ to ˈu basileia i to ǒ nei.” (Ioane 18:36) E ere anei teie haapiiraa i te mea maitai?

Eaha te huru o te mau Kerisetiano matamua i nia i ta Iesu i haapii eiaha e faaohipa i te haavîraa uˈana? Te na ô ra te buka The Early Christian Attitude to War e: “I te mea e ua opani te reira [ta Iesu mau haapiiraa] mai te hoê mea tia ore i te feia atoa o te faaohipa ra i te haavîraa uˈana e te faainoraa i nia ia vetahi ê, e mea papu ïa to roto atoa te apitiraa tano ore i te tamaˈi. . . . Ua pee te mau Kerisetiano matamua i ta Iesu mau parau e ua taa i ta ˈna mau haapiiraa no nia i te mǎrû e te oreraa e mârô i roto i to ratou auraa mau. Ua faaau ratou i ta ratou haapaoraa i te hau; ua faahapa uˈana ratou i te tamaˈi no te haamaniiraa toto i tupu.” E taa ê mau te tereraa o te tuatapaparaa atoa ahiri te feia atoa e faahua parau ra ei Kerisetiano ratou i pee mau i teie haapiiraa!

E nehenehe oe e faufaahia i te mau mea atoa no ǒ mai i te mau haapiiraa a Iesu

E mea nehenehe, ohie e te mana te mau haapiiraa a Iesu ta tatou i hiˈopoa mai nei. E nehenehe te huitaata e faufaahia na roto i te ite i ta ˈna mau haapiiraa e na roto i te faaohiparaa i te reira. *

E oaoa te mau Ite no Iehova no to oe vahi i te tauturu ia oe ia ite e nafea oe e nehenehe ai e fanaˈo i te mau haapiiraa paari roa ˈˈe i faahitihia aˈenei e te taata. Te titau manihini nei matou ia oe ma te mahanahana ia farerei aore ra ia papai ia ratou i te mau vahi nohoraa o te api 2 o teie vea.

[Nota i raro i te api]

[Hohoˈa i te api 5]

‘Na to outou Metua i te ao e faaamu ia ratou’