A tapea i te manaˈo faito noa no nia i te inuraa i te ava

“E tâhitohito tei te uaina; e hauti rahi tei te ava taero; e ere i te taata paari tei vare i te reira.”—MASELI 20:1.

1. Mea nafea to te fatu salamo faaiteraa i to ˈna mauruuru no te tahi mau mea maitatai i hohia mai e Iehova?

 “TE MAU mea maitatai i ho-mai-hia mai, e te mau mea tia roa e maitai roa ˈi, no nia ïa, mai nia mai ïa i te Metua o te maramarama,” ta te pǐpǐ Iakobo ïa i papai. (Iakobo 1:17) Ma te turaihia e te mauruuru no e rave rahi mea maitatai i hohia mai e te Atua, ua himene te fatu salamo e: “Te faatupu nei oia i te aihere na te mau puaa, e te raau rii na te taata. E te roaa nei te maa ia ˈna no roto i te fenua, e te uaina e oaoa ai te aau o te taata nei; e te monoˈi i hinuhinu ai to ˈna mata, e te pane e itoito ai te aau taata nei.” (Salamo 104:14, 15) E mau mea maitatai te uaina e te tahi atu mau ava, mai te raau rii, te pane, e te monoˈi, i hohia mai e te Atua. E nafea tatou e faaohipa ˈi i te reira?

2. Eaha te mau uiraa e hiˈopoahia no nia i te inuraa i te ava?

² E mea maitai te hoê ô faahiahia ua faaohipa-maitai-anaˈe-hia. Ei hiˈoraa, “e maa maitai” te meli “e ere [râ] i te mea maitai ia amu hua i te meli.” (Maseli 24:13; 25:27) Noa ˈtu e e mea au ia inu “maa uaina iti,” e fifi rahi te inu-hua-raa i te ava. (Timoteo 1, 5:23) Te faaara ra te Bibilia e: “E tâhitohito tei te uaina; e hauti rahi tei te ava taero; e ere i te taata paari tei vare i te reira.” (Maseli 20:1) Eaha ïa te auraa e vare i te ava? * Eaha te faito ava e riro ai ei mea rahi roa? Eaha te manaˈo faito noa i roto i teie tuhaa?

E “vare” i te ava—e nafea?

3, 4. (a) Na te aha e faaite ra e e faautuahia te inuraa ia taero roa i roto i te Bibilia? (b) Eaha te tahi mau tapao o te taeroraa i te ava?

³ I Iseraela i tahito ra, e pehi-pohe-hia te hoê tamaiti oehamu tiaâ e te taero ava tatarahapa ore i te ofai. (Deuteronomi 21:18-21) Ua aˈo te aposetolo Paulo i te mau Kerisetiano e: “Eiaha outou e amui atu i te taata i parauhia e taeae ia riro ei taiata, e te nounou taoˈa, e te haamori idolo, e te faaino, e te taero ava, e te haru; e eiaha atoa e amu noa ˈtu i te maa i reira.”  Papu maitai, e faautuahia te inuraa ia taero roa i roto i te mau Papai.—Korinetia 1, 5:11; 6:9, 10.

⁴ Ei faataaraa i te mau tapao o te taeroraa i te ava, te na ô ra te Bibilia e: “Eiaha e hiˈo i te uaina ia uteute mai, ia ahehe i roto i te farii ra, e mairi ohie ihora i raro ra: ia tae hoi i te hopea ra e au to ˈna hohoni i to te ophi, tere atura hoi ta ˈna taero mai to te zepho ra. E riro hoi to mata i te hiˈo i te [mau mea huru ê]; e tupu hoi te manaˈo ino i roto i te aau na.” (Maseli 23:31-33; MN) E hohoni te inu-hua-raa mai te hoê ophi taero, ma te faatupu i te maˈi, te huehue i te pae feruriraa, e te moeraa o te hiroa atoa. E ite paha te hoê taero ava i “te mau mea huru ê” i roto i to ˈna aoaoa aore ra moemoeâ. Eita atoa paha oia e haama i te faaite i te mau manaˈo e hiaai ino o tei haavîhia iho â.

5. E nafea te inu-hua-raa i te ava e riro ai ei mea ino?

⁵ E ia inu te hoê taata i te ava ma te haapao maitai râ eiaha e inu faarahi a itehia mai e ua taero oia? E mea iti roa te tapao o te taeroraa i te ava ta vetahi e faaite i muri aˈe atoa i te inu-rahi-raa i te ava. Ia manaˈo râ e e ere tera peu i te mea ino, te haavare ra ïa te hoê taata ia ˈna iho. (Ieremia 17:9) E riro riirii mǎrû paha te hoê taata ei tîtî na te ava e ei “inu hua i te uaina.” (Tito 2:3) No nia i te riroraa ei taata inu hua, te na ô ra te vahine papai buka ra o Caroline Knapp e: “E mea taere, te mǎrû, te huna e te fifi te riroraa ei taata inu hua.” E marei pohe mau te inu-hua-raa i te ava!

6. No te aha e mea maitai ai ia haapae te hoê taata i te inu-hua-raa i te ava oia atoa i te amu-hua-raa i te maa?

⁶ A hiˈo atoa na i ta Iesu faaararaa: “E ara . . . ia outou, o te teimaha outou i te rahi o te maa e te taero, e te peapea o teie nei ao, a roohia mai ai outou e taua mahana ra aore i manaˈohia. E roohia mai hoi to te ao atoa nei i te reira mai te marei ra.” (Luka 21:34, 35) E nehenehe te inuraa e haavarea e e faahupehupe—i te pae tino e oia atoa i te pae varua—na mua te hoê taata e topa ˈi i roto i te taeroraa i te ava. E nafea mai te peu e e tae mai te mahana o Iehova e tei roto oia i tera tupuraa?

Ta te inu-hua-raa i te ava e nehenehe e faatupu mai

7. No te aha eita ˈi te inu-hua-raa i te ava e au maite i te faaueraa i papaihia i roto i te Korinetia 2, 7:1?

⁷ E aratai atu te inu-hua-raa i te ava i te fifi e rave rahi—i te mau pae tino e varua atoa. I rotopu i te mau maˈi e faatupuhia e te inu-hua-raa i te ava, te vai ra te cirrhose o te upaa, te hépatite alcoolique, e te fifi i te pae o te roro mai te delirium tremens. E nehenehe atoa te inu-hua-maoro-raa i te ava e faatupu mai i te mariri ai taata, te omaha tihota, e te tahi mau maˈi mafatu e o te vairaa maa. Eita roa te inu-hua-raa i te ava e au maite i te faaueraa bibilia: “E tamâ hua tatou ia tatou iho i te mau viivii atoa o te tino e te varua, ma te [haamoˈa roa na roto i te mǎtaˈu] i te Atua.”—Korinetia 2, 7:1; MN.

8. Ia au i te Maseli 23:20, 21, eaha te faahopearaa o te inu-hua-raa i te ava?

⁸ Te auraa atoa o te inu-hua-raa i te ava, o te haamâuˈaraa ïa i te moni, te ere-atoa-raa i te ohipa. Ua faaara te arii o Iseraela i tahito ra o Solomona e: “Eiaha oe e amui atoa i te feia i taero i te uaina ra; i roto i te feia oehamu tiaâ ra.” No te aha? Ua faataa oia e: “O te taero ava hoi e te oehamu tiaâ ra, e veve  ïa; e na te tiaruhe e faaahu mai i te ahu motumotu.”—Maseli 23:20, 21.

9. No te aha e haerea paari ai ia ore te hoê taata e inu i te ava mai te peu e e faahoro oia i te hoê faurao?

⁹ No nia i te tahi atu fifi, te na ô ra te hoê buka (The Encyclopedia of Alcoholism) e: “Ua faaite te mau maimiraa e e faaiti mai te ava i te aravihi e faahoro, tae noa ˈtu te taime ohiparaa, te hautiraa, te ara-maite-raa, te ite maite e te haroaroaraa.” Mea peapea roa te mau faahopearaa o te inuraa i te ava a faahoro ai i te pereoo. I te Hau Amui noa, e mau ahuru tausani taata te pohe e e mau hanere tausani tei pepe i te mau matahiti atoa i roto i te mau ati purumu no te inuraa i te ava. O te feia apî iho â râ, aita i ite maitai i te faahoro e i te inu i te ava, o te roo-ohie-hia i teie fifi. E nehenehe anei te hoê taata e faahoro i muri aˈe i te inuraa e rave rahi ava e i taua atoa taime ra e parau e te faatura ra oia i te ora ei ô na te Atua ra o Iehova? (Salamo 36:9) I te mea e e mea moˈa te ora, e mea maitai aˈe eiaha roa ˈtu te hoê taata e inu i te ava mai te peu e e faahoro oia.

10. E nafea te ava e ohipa ˈi i nia i to tatou feruriraa, e no te aha e mea atâta ˈi?

¹⁰ E faaino te inu-hua-raa i te mau taata eiaha noa i te pae tino i te pae varua atoa râ. Te na ô ra te Bibilia e: “E riro ê te aau i . . . te uaina, e te uaina apî.” (Hosea 4:11) E ohipa te ava i nia i te feruriraa. “Ia inu te tahi taata i te ava,” ta te hoê papai a te Pu maimiraa no nia i te rave-hua-raa i te raau taero i Marite ïa e faataa ra, “e na roto atu te ava i te vairaa maa i te haere atu i roto i te toto e tae oioi atu ai i te roro. E haamata te ava i te haaparuparu i te mau tuhaa o te roro o te faatere ra i te feruriraa e te huru aau. Eita te taata e tapeapea e e haavî ia ˈna.” I roto i tera tupuraa, e “vare” atu â paha tatou na roto i te mau haerea tano ore i nia i te tahi taata, a faaû atu ai i te faahemaraa e rave rahi.—Maseli 20:1.

11, 12. Eaha te fifi pae varua o te inu-hua-raa i te ava?

¹¹ Hau atu â, te faaue ra te Bibilia e: “Te amu ra e te inu ra hoi, e te mau mea atoa ta outou e rave na, e rave ïa ma te haamaitai i te Atua.” (Korinetia 1, 10:31) E faahanahana ˈtu â anei te inu-hua-raa i te ava i te Atua? Papu maitai, eita te hoê Kerisetiano e hinaaro ia matauhia oia ei taata inu hua. E faaino te reira i te iˈoa o Iehova eita râ e faahanahana.

¹² E ia faaturori te inu-hua-raa a te hoê Kerisetiano i te hoê hoa faaroo, e pǐpǐ apî paha? (Roma 14:21) Ua faaara Iesu e: “Te faaturori i te hoê i teie nei mau taata rii i faaroo ia ˈu nei, e huru maitai aˈe oia ia taamuhia te hoê ofai mule i nia i tana aˈî e ia hurihia oia i raro i te moana.” (Mataio 18:6) E faaere atoa te inu-hua-raa i te hoê taata i te mau fanaˈoraa taa ê i roto i te amuiraa. (Timoteo 1, 3:1-3, 8) Eiaha e haamoe e e mau faahopearaa ino ta te inu-hua-raa i te ava e nehenehe e faatupu i roto i te utuafare.

A ape i te mau fifi—e nafea?

13. Eaha te mea faufaa roa no te ape i te inu-hua-raa i te ava?

¹³ Te hoê ravea no te ape i te mau fifi o te inu-hua-raa i te ava, o te iteraa ïa i te taa-ê-raa, eiaha i rotopu i te inu-hua-raa e te taeroraa i te ava, i rotopu râ i te inuraa i te ava ma te au e te inu-hua-raa. O vai te nehenehe e faataa teihea to outou otia? I te mea e e rave rahi tuhaa tei taaihia, aita e ture etaeta no nia i te faito ava. E mea tia ia ite te taata taitahi i to ˈna iho otia e  ia faaea noa i roto i taua otia ra. Na te aha e tauturu ia outou ia faaoti eaha te faito ava e riro ai ei mea rahi roa no outou? Te vai ra anei te hoê faaueraa tumu o te nehenehe e faaohipa ei aveia?

14. Eaha te faaueraa tumu aveia o te tauturu ia outou ia faataa ê i te inuraa i te ava ma te au e te inu-hua-raa?

¹⁴ Te na ô ra te Bibilia e: “E tapeâ oe i te paari maitai e te [puai feruriraa]; o te ora ïa no to oe ra [nephe], e o te nehenehe ïa i nia i to oe ra aˈî.” (Maseli 3:21, 22; MN) Teie ïa te faaueraa tumu aveia e pee: E haafifi te mau faito ava atoa i to outou haroaroaraa e e haaparuparu i to outou puai feruriraa. E mea tia râ ia ore outou e haavare ia outou iho ma te ite eaha to outou iho otia!

15. I teihea taime e haerea paari ai ia ore e inu noa ˈˈe?

¹⁵ I roto i te tahi mau tupuraa, e haerea paari paha ia ore e inu noa ˈˈe. No te fifi i nia i te feto, e maiti paha te hoê vahine hapû eiaha roa ˈtu e inu. E ere anei e mea maitai aˈe ia ore e inu i mua i te hoê taata e fifi ra e te inu-hua-raa aore ra i mua i te feia eita te manaˈo haava e farii i te inu? Ua faaue Iehova i te feia e rave ra i te mau ohipa a te tahuˈa i roto i te sekene e: “Eiaha ei uaina e te ava taero e inuhia . . . ia haere outou i roto i te tiahapa amuiraa, a pohe hoi outou.” (Levitiko 10:8, 9) No reira, eiaha e inu i te ava na mua noa ˈˈe e haere ai i te mau putuputuraa Kerisetiano, a apiti ai i roto i te taviniraa aore ra a e amo ai i te tahi atu mau hopoia pae varua. Hau atu â, i te tahi mau fenua e opanihia ˈi te inuraa i te ava aore ra e taotiahia ˈi te faito matahiti no te inu i te ava, e mea tia ia pee i te mau ture o te fenua.—Roma 13:1.

16. E nafea outou e faaoti ai eaha te rave ia tuuhia mai te ava i mua ia outou?

¹⁶ Ia horoahia mai aore ra ia tuuhia mai te ava i mua ia outou, e ui outou na mua: ‘E mea tia anei ia inu vau?’ Ia faaoti outou e inu, a haamanaˈo maitai i to outou iho otia, e eiaha e na nia ê atu. Eiaha e vaiiho i te hoê taata farii manihini horoa noa ia ohipa i nia ia outou. E a ara i te mau vahi i reira e horoahia ˈi te mau ava ma te taotia-ore-hia mai te mau oroa faaipoiporaa. I roto i te vahi e rave rahi, e faatia te ture i te mau tamarii ia inu i te ava. E hopoia na te mau metua e haapii i ta ratou mau tamarii no nia i te inuraa i te ava e e hiˈopoa i ta ratou mau ohipa i roto i teie tuhaa.—Maseli 22:6.

E nehenehe ta outou e faaû i te fifi

17. Na te aha e tauturu ia outou ia haroaroa e e fifi anei to outou e te inu-hua-raa i te ava?

¹⁷ E fifi anei no outou te inu-hua-raa i te uaina e te ava? Eiaha e vare no nia i te reira, mai te peu e e hara huna te inu-hua-raa i te ava, i te pae hopea e ohipa te reira i nia ia outou. A hiˈopoa maite iho ia outou. A ui i teie mau uiraa no te hiˈopoa ia outou iho: ‘Mea pinepine aˈe anei au i te inu i ta ˈu i matau noa? Mea puai aˈe anei ta ˈu ava i tei mutaa iho? Te inu ra anei au no te ape i te mau fifi? Ua faaite anei te hoê melo utuafare aore ra te hoê hoa rahi i te peapea no nia i ta ˈu inuraa? Te haafifi ra anei ta ˈu inuraa i to ˈu utuafare? E mea fifi anei no ˈu ia haapae i te ava no te hoê hebedoma, hoê avaˈe aore ra e rave rahi avaˈe? Te huna ra anei au ia vetahi ê ehia rahiraa uaina aore ra ava ta ˈu e inu ra?’ E nafea mai te peu e te pahonoraa i te tahi o teie mau uiraa e e? Eiaha e riro mai te hoê taata ‘e hiˈo noa i to ˈna iho mata i roto i te hiˈo ra  e aramoe noa ihora to ˈna huru ia ˈna iho i reira ra.’ (Iakobo 1:22-24) A rave i te mau taahiraa no te faaafaro i te fifi. Eaha ta outou e nehenehe e rave?

18, 19. E nafea outou e faaea ˈi i te inuraa i te ava?

¹⁸ Ua aˈo te aposetolo Paulo i te mau Kerisetiano e: ‘Eiaha ia taero i te uaina e tupu ai te taiata ra; ia î râ outou i te varua.’ (Ephesia 5:18) A faaoti eaha te faito ava e riro ai ei mea rahi roa no outou, e a taotia ma te tano. A faaoti eiaha e na nia ê i te reira; a faahotu i te hitahita ore. (Galatia 5:22, 23) E mau hoa anei to outou o te faahepo ra ia outou ia inu hua? A ara. Te na ô ra te Bibilia e: “O tei amui atoa to ˈna haerea i to te feia paari ra, e paari atoa ïa; o tei amui râ i te feia maamaa ra, e pohe ïa.”—Maseli 13:20.

¹⁹ Mai te peu e te inu nei outou i te ava no te ape i te tahi mau fifi, a faaû roa ˈtu i te fifi. E nehenehe e faaû i te mau fifi ma te faaohipa i te aˈoraa no roto mai i te Parau a te Atua. (Salamo 119:105) Eiaha e haamarirau i te imi i te tauturu a te hoê matahiapo Kerisetiano tiaturihia. A faaohipa maitai i te mau faanahoraa a Iehova no te patu i to outou ea pae varua. A haapaari i to outou taairaa e te Atua. A pure tamau ia ˈna—no nia iho â râ i to outou mau paruparu. A ani i te Atua ia ‘perehahu i to outou aau e to outou manaˈo.’ (Salamo 26:2) Mai tei tauaparauhia i roto i to mua ˈtu tumu parau, a faaitoito i te haere ma te hapa ore.

20. Eaha te mau ravea ta outou e rave no te faaû i te fifi tamau o te inu-hua-raa?

²⁰ E ia tamau te fifi o te inu-hua-raa noa ˈtu ta outou mau tutavaraa? E mea tia ïa ia pee outou i te aˈoraa a Iesu: “E te hapa ra oe i to rima, e tâpû ê atu; e maitai hoi oe i te rima hoê ia tae i te ao ra, i te rima piti ia tae i te [Gehena] ra.” (Mareko 9:43; MN) Teie te pahonoraa: Eiaha roa ˈtu e inu. Tera ta te hoê vahine ta tatou e pii o Irene i faaoti i te rave. “I muri aˈe fatata e piti matahiti e te afa haapaeraa i te ava,” ta ˈna ïa e parau ra, “ua haamata vau i te feruri e e ere i te mea ino hoê noa ˈˈe inu, ia ite noa e nafea vau e faaruru ai i te reira. I to ˈu iho â râ manaˈoraa mai te reira, e tuu oioi au i tera tupuraa ia Iehova ra na roto i te pure. Ua faaoti papu vau eiaha ta ˈu e ava e tae roa ˈtu i te faanahoraa apî—peneiaˈe i roto atoa i te faanahoraa apî.” Eita e mâuˈa te taime i te haapae-roa-raa i te ava no te ora i roto i te ao apî parau-tia a te Atua.—Petero 2, 3:13.

 “E faaau i to outou hororaa ia noaa te berabeio”

21, 22. Teihea fifi e nehenehe e tapea ia tatou ia ore ia raea te reni tapaeraa i roto i te hororaa no te ora, e e nafea tatou e nehenehe ai e ape i te reira?

²¹ E au te hororaa Kerisetiano no te ora i te hoê tataˈuraa, mai ta te aposetolo Paulo i parau e: “Aita outou i ite e, o te feia horo i te hororaa e horo paatoa ïa, hoê roa râ e rave i te berabeio? E faaau i to outou hororaa ia noaa te berabeio. E te taata atoa e titau i te re ra, e haapao ïa i tei au i te mau mea atoa nei. Ia noaa te korona tahuti noa i na reira ˈi ratou, area tatou ia noaa ïa te korona tahuti ore. E teie nei, te horo nei au, eiaha mai te mea e aore i itea; te moto nei au eiaha mai te mea e, e moto i te mataˈi. Te moto nei râ vau i tau tino ia vi; o te riro noa ˈtu hoi au o tei aˈo ia vetahi ê ra, ei taata ite-ore-hia mai.”—Korinetia 1, 9:24-27.

²² E horoahia te berabeio na te feia noa o te faaoti ma te manuïa i te hororaa. I roto i te hororaa no te ora, e nehenehe te inu-hua-raa i te ava e tapea ia tatou ia ore ia raea te reni tapaeraa. E mea tia ia faahotu tatou i te hitahita ore. E titau te hororaa papu eiaha tatou ia “inu rahi i te uaina.” (Petero 1, 4:3) Area râ, e mea tia ia faahotu tatou i te hitahita ore i roto i te mau mea atoa. No nia i te inuraa i te ava, e haerea paari ia “haapae tatou i te paieti ore, e te hinaaro i teie nei ao, e ia parahi tatou ma te haapao maitai, e te parau-tia, e te paieti.”—Tito 2:12.

[Nota i raro i te api]

Te haamanaˈo ra anei outou?

• Eaha te inu-hua-raa i te ava?

• Eaha te faahopearaa ino o te inu-hua-raa i te ava?

• E nafea outou e nehenehe ai e ape i te mau fifi o te inu-hua-raa i te ava?

• E nafea te hoê taata e nehenehe ai e faaû i te fifi o te inu-hua-raa i te ava?

[Uiraa haapiiraa]

[Hohoˈa i te api 27]

E mea tia ia ite tatou i to tatou iho otia e ia faaea i roto

[Hohoˈa i te api 28]

A faaoti oioi teihea te otia

[Hohoˈa i te api 29]

A pure tamau ia Iehova no nia i to outou mau paruparu

[Hohoˈa i te api 30]

E hopoia na te mau metua e haapii i ta ratou mau tamarii no nia i te inuraa i te ava