E pee anaˈe ia Iehova, to tatou Atua pae tahi ore
E pee anaˈe ia Iehova, to tatou Atua pae tahi ore
‘Eita te Atua e haapao i te huru o te taata.’—ROMA 2:11.
1, 2. (a) Eaha ta Iehova opuaraa no te mau ati Kanaana atoa? (b) Ua aha Iehova, e eaha te mau uiraa e hiti maira?
I TE puhaparaa i te mau vahi papu no Moabi i te matahiti 1473 H.T.T., ua faaroo maite Iseraela ia Mose. E fifi te tiai maira i te tahi atu pae o te anavai o Ioridana. Ua faaite Mose i te opuaraa a Iehova ia haapau Iseraela i na nunaa puai ati Kanaana e hitu i te Fenua tǎpǔhia. Auê te mahanahana ta Mose mau parau: ‘E tuu mai to Atua ra o Iehova ia ratou i mua i to aro na, e taparahi oe ia ratou e ia pau roa’! Eiaha Iseraela e faaau i te faufaa ia ratou, e eiaha e faaherehere atu.—Deuteronomi 1:1; 7:1, 2.
2 Ua faaora râ Iehova i te hoê utuafare o te oire matamua ta Iseraela i aro atu. Ua fanaˈo atoa te taata o na oire ê atu e maha i ta te Atua parururaa. No te aha te reira? Eaha ta te mau tupuraa faahiahia i taaihia i te oraraa mai o teie mau ati Kanaana e haapii maira no nia ia Iehova? E e nafea tatou e nehenehe ai e pee ia ˈna?
Te huru o te taata i mua i to Iehova roo
3, 4. Eaha te faahopearaa o te mau parau apî o te mau upootiaraa a te mau Iseraela i nia i te mau taata i Kanaana?
3 I te roaraa o na matahiti e 40 o Iseraela i roto i te medebara hou a tomo ai i roto i te Fenua tǎpǔhia, ua paruru e ua aro Iehova no to ˈna nunaa. I te pae apatoa o te Fenua tǎpǔhia, ua faaû Iseraela i te arii ati Kanaana ra o Arada. Maoti ta Iehova tauturu i upootia ˈi te mau Iseraela i nia ia ˈna e to ˈna nunaa i Horama. (Numera 21:1-3) I muri aˈe, ua haaati Iseraela i te fenua o Edoma e ua tere i te pae apatoerau e tae atu i te pae apatoerau hitia o te râ o te miti Avaava. I teie vahi, i faaeahia na e Moabi, e ati Amori to reira i teie nei. Aita te arii ati Amori ra o Sihona i tuu ia Iseraela ia haere na roto i to ˈna fenua. Ua tupu te tamaˈi i Iahaza, e au ra i te pae apatoerau o te pape o Aranona, i reira to Sihona haapoheraahia. (Numera 21:23, 24; Deuteronomi 2:30-33) I te pae apatoerau roa ˈtu â, te arii ra o Oga i nia i te tahi atu mau ati Amori i Basana. Noa ˈtu e e tiapai taata o Oga, aita i tia ia ˈna ia faaû ia Iehova. Ua haapohehia o Oga i Ederei. (Numera 21:33-35; Deuteronomi 3:1-3, 11) Ua ohipa puai te mau parau apî o teie mau upootiaraa e te mau aamu atoa o te Revaraa mai o Iseraela mai Aiphiti mai i nia i te mau taata e ora ra i Kanaana. *
4 I to Iseraela tomoraa na mua i Kanaana i muri aˈe i te taeraa i te tahi atu pae o Ioridana, ua puhapa ratou i Gilagala. (Iosua 4:9-19) Aita i atea roa te tia ra te oire auahia i te patu o Ieriko. Ua turai te mea ta te vahine ati Kanaana ra o Rahaba i faaroo no nia i ta Iehova mau ohipa ia ˈna ia haa ma te faaroo. Ei faahopearaa, i to Iehova haamouraa ia Ieriko, ua faaora oia ia ˈna e te feia i roto i to ˈna fare.—Iosua 2:1-13; 6:17, 18; Iakobo 2:25.
5. Na te aha i turai i to Gibeona ia haa ma te ravea paari?
5 I muri iho, mai te mau fenua haehaa i pihai iho ia Ioridana, ua paiuma Iseraela i nia i te mau aivi no ropu o te fenua. Ma te pee i ta Iehova aratairaa, ua moemoe Iosua i te oire o Ai. (Iosua, pene 8) Ua turai te mau parau apî o te pauraa ino mau i tupu i te mau arii ati Kanaana e rave rahi ia putuputu no te tamaˈi. (Iosua 9:1, 2) Aita te mau taata o te oire tapiri ati Hevi ra o Gibeona i apiti atu. “Imi atura ratou i te ravea paari,” ta te Iosua 9:4 (V.C.J.S.) ïa e faatia ra. Mai ia Rahaba, ua faaroo ratou i to Iehova faaoraraa i to ˈna nunaa i te Revaraa e i te pauraa o Sihona e o Oga. (Iosua 9:6-10) Ua taa ˈtura i to Gibeona i te faufaa ore ia haapaari. No reira, no to Gibeona maitai e to na oire tapiri e toru—o Kephira, o Beerota, e o Kiriata-iearima—ua tono ratou ia Iosua ra i Gilagala i te hoê pǔpǔ taata o tei faahuru ê ia ratou mai te huru ra e no te hoê fenua atea mai ratou. Ua manuïa te ravea paari. Ua faaau Iosua i te hoê faufaa ia ratou o te haapapu ra i to ratou oraraa ˈtu. E toru mahana i muri aˈe, ite aˈera Iosua e te mau Iseraela e ua haavarehia ratou. Noa ˈtu râ, ua tǎpǔ ratou ma te iˈoa o Iehova e haapao i te faufaa e no reira, ua tapea ratou i te reira. (Iosua 9:16-19) Ua farii anei Iehova?
6. Ua nafea Iehova i to Iosua faaauraa i te faufaa e to Gibeona?
6 Ua faatiahia to Gibeona ia riro ei papai vahie e ei tii pape na te mau Iseraela, oia atoa “no te fata a Iehova” i roto i te sekene. (Iosua 9:21-27) Hau atu i te reira, i to na arii ati Amori e pae e ta ratou mau nuu haamǎtaˈuraa i to Gibeona, ua ohipa semeio mai Iehova. E mea rahi aˈe te mau enemi i pohe i te uâ paari i ta Iosua mau nuu. Ua pahono atoa Iehova i ta Iosua taparuparuraa ia faaea noa te mahana e te avaˈe ia pau roa te mau enemi. “Aore roa e mahana e au i te reira mahana mai mutaaiho mai â, e i muri atoa iho nei,” ta Iosua ïa i faahiti, “i te faarooraa Iehova i te reo taata! Na Iehova hoi i aro i ta Iseraela tamaˈi.”—Iosua 10:1-14.
7. Eaha te parau mau i fariihia e Petero tei faaitehia i roto i te tupuraa o vetahi mau ati Kanaana?
7 Ua mǎtaˈu te vahine ati Kanaana ra o Rahaba e to ˈna fetii, oia atoa to Gibeona, ia Iehova e ua haa ia au i te reira. Te haapapu maitai ra te ohipa i tupu i nia ia ratou i te hoê parau mau ta te aposetolo Kerisetiano ra o Petero i parau i muri aˈe e: “E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.”—Ohipa 10:34, 35.
Te mau haaraa i nia ia Aberahama e ia Iseraela
8, 9. Mea nafea to Iehova faaiteraa i te pae tahi ore i roto i ta ˈna mau haaraa i nia ia Aberahama e i nia i te nunaa Iseraela?
8 Ua huti te pǐpǐ ra o Iakobo i te ara-maite-raa i nia i to te Atua aroha faito ore i roto i ta ˈNa mau haaraa i nia ia Aberahama e i to ˈna huaai. Maoti to Aberahama faaroo, eiaha to ˈna opu fetii, i riro ai oia ei ‘taua no te Atua.’ (Iakobo 2:23) Ua hopoi mai to Aberahama faaroo e te here ia Iehova i te mau haamaitairaa na to ˈna mau huaai. (Paraleipomeno 2, 20:7) Ua fafau Iehova ia Aberahama e: “E haamaitai rahi roa vau ia oe na, e faarahi au i to huaai; mai te fetia o te raˈi ra, e mai te one tahatai ra.” A tapao na râ i te parau fafau i to muri iho irava: “E maitai te mau fenua atoa o te ao nei i to oe na huaai.”—Genese 22:17, 18; Roma 4:1-8.
9 Ma te ore roa e haapao i te huru o te taata, ua faaite Iehova na roto i ta ˈna mau haaraa i nia ia Iseraela eaha ta ˈna e rave no te feia e auraro ia ˈna. E hiˈoraa teie mau haaraa e nafea Iehova e faaite ai i te here taiva ore i nia i ta ˈna mau tavini haapao maitai. Noa ˈtu e e “pǔpǔ taata hau ê” o Iseraela no Iehova, e ere te auraa e ua tuuhia te tahi atu mau nunaa i te hiti ia ore ratou ia ite i te aroha o te Atua. (Exodo 19:5; Deuteronomi 7:6-8) Parau mau, ua faaora Iehova ia Iseraela i te faatîtîraa i Aiphiti e no reira ua parau oia e: “Outou anaˈe ra ta ˈu i ite i te mau fetii atoa o te ao nei.” Na roto râ i te peropheta ra o Amosa e o vetahi ê, ua fafau atoa Iehova i te hoê tiaturiraa faahiahia no te mau taata o “te mau fenua atoa.”—Amosa 3:2; 9:11, 12; Isaia 2:2-4.
Iesu, te orometua haapii pae tahi ore
10. Mea nafea to Iesu peeraa i to ˈna Metua i te faaiteraa i te pae tahi ore?
10 I te roaraa o ta ˈna taviniraa i te fenua nei, ua pee Iesu, o te hohoˈa mau o to ˈna Metua, i to Iehova pae tahi ore. (Hebera 1:3) Ta ˈna tapiraa matamua i tera ra taime, o te itearaa mai ïa ‘te mau mamoe i moe i te utuafare ra o Iseraela.’ Aita râ oia i haamarirau i te poro i te hoê vahine no Samaria i te hoê apoo pape. (Mataio 15:24; Ioane 4:7-30) Ua faatupu atoa oia i te hoê semeio ia au i te aniraa a te hoê faehau toroa, e au ra e ere i te ati Iuda. (Luka 7:1-10) Te faaite atoa ra ta ˈna mau haaraa i to ˈna here i te nunaa o te Atua. Ua poro rahi atoa ta Iesu mau pǐpǐ. Ua taa-maitai-hia e ua taaihia te titauraa e fanaˈo ai i ta Iehova haamaitairaa, eiaha i te tiaraa basileia, i te haerea râ. Ua farii te feia aau haavare ore e te haehaa o tei hinaaro i te parau mau i te parau apî maitai o te Basileia. I te tahi roa ˈˈe pae, ua vahavaha te feia teoteo e te ahaaha ia Iesu e ta ˈna poroi. “E haamaitai au ia oe, e tau Metua, e te Fatu o te raˈi e te fenua,” ta Iesu ïa i parau, “i te mea, huna ê noâ oe i teie nei mau parau i te feia paari e te ite ra, ua faaite mai oe i te tamarii nei: oia ïa, e tau Metua, o te mea tia ïa ia oe.” (Luka 10:21) Ia haa tatou i nia ia vetahi ê na nia i te niu o te here e te faaroo, e ohipa tatou ma te pae tahi ore, ma te ite e te reira te haerea ta Iehova e farii.
11. Mea nafea te pae tahi ore i te faaiteraahia i roto i te amuiraa Kerisetiano matamua?
11 I roto i te amuiraa Kerisetiano matamua, ua aifaito te mau ati Iuda e te feia e ere i te ati Iuda. “O te hinuhinu . . . e te tura, e te hau, i te taata atoa i rave i te maitai ra,” ta Paulo ïa i faataa, “to te ati Iuda na, e to te Heleni atoa. I te haapao hoi i te huru o te taata nei, aita ïa i te Atua.” * (Roma 2:10, 11) Te mea i faaite ua fanaˈo anei ratou i to Iehova aroha faito ore, e ere to ratou tiaraa basileia, to ratou râ huru i to ratou haapiiraa no nia ia Iehova e te mau tiaturiraa i pǔpǔhia e te hoo o ta ˈna Tamaiti ra o Iesu. (Ioane 3:16, 36) Ua papai Paulo e: “O te ati Iuda rapae au ra, e ere ïa oia i te ati Iuda; e te peritome rapae au i te tino ra, e ere ïa i te peritome: o te ati Iuda roto ra, te ati Iuda; e te peritome aau ra, te peritome; eiaha to [te ture i papaihia ra], o to te varua râ.” E ma te faaohipa maramarama i te mau taˈo i taaihia i te parau ra “ati Iuda” (te auraa “no Iuda,” oia hoi, aruehia aore ra haamaitaihia), ua na ô faahou Paulo e: “O tei ore i haamaitaihia e te taata, e te Atua râ.” (Roma 2:28, 29; MN) E faatae Iehova i te arueraa ma te pae tahi ore. Te na reira atoa ra anei tatou?
12. Te pûpû ra te Apokalupo 7:9 i teihea tiaturiraa, e ia vai?
12 I muri aˈe, i roto i te hoê orama, ua ite te aposetolo Ioane i te mau Kerisetiano faatavaihia haapao maitai tei faataahia ei nunaa pae varua o na 144 000, “i tapaohia, no te mau opu atoa o te tamarii a Iseraela ra.” I muri aˈe i te reira, ua ite atura Ioane i te “feia rahi roa . . . no te mau fenua atoa, e te mau opu atoa, e te mau nunaa atoa, e te mau reo atoa, i te tia-noa-raa i mua i te terono, e i mua i te Arenio, ma te ahu teatea i te ahuraa e ma te amaa tamara i to ratou rima.” (Apokalupo 7:4, 9) No reira, aita e pǔpǔ taata aore ra e reo e tuuhia i te hiti i roto i te amuiraa Kerisetiano no teie tau. E tiaturiraa to te mau taata atoa o te mau huru oraraa rau e ora ˈtu i “te ati rahi” e fatata maira e e inu i “te mau pape ora pihaa ra” i roto i te ao apî.—Apokalupo 7:14-17.
Te mau faahopearaa maitatai
13-15. (a) E nafea tatou e nehenehe ai e tinai i te mau taa-ê-raa i te pae o te iri e te taˈere? (b) A faahiti i te mau hiˈoraa o te mau maitai ta te faaiteraa i te auhoaraa e hopoi mai.
13 Ua ite maitai Iehova ia tatou, mai te hoê metua tane maitai i ta ˈna mau tamarii. Oia atoa, ia taa tatou ia vetahi ê ma te anaanatae i to ratou taˈere e huru oraraa, aita e faufaaraa to te mau taa-ê-raa. E ore te mau fifi o te opu fetii, e e puaihia te mau taairaa o te auhoaraa e te aroha. E rahi atu â te auhoêraa. (Korinetia 1, 9:19-23) Te faaite-maitai-hia ra te reira e te ohipa a te mau mitionare o te farii e tavini i te mau fenua ěê. E anaanatae roa ˈtu ratou i te taata e ora ra i reira, e ei faahopearaa, e ite oioi te mau mitionare e mea piri roa ratou i te mau amuiraa no tera mau vahi.—Philipi 2:4.
14 Te itehia ra te mau faahopearaa maitatai o te pae tahi ore i roto i te mau fenua e rave rahi. Ua ora Aklilu, no Etiopia mai, o ˈna anaˈe i Lonedona, te oire pu o Beretane. Ua uˈana to ˈna manaˈo moemoe no te mea e au ra ia ˈna ei ereraa rahi i te auhoaraa e te taata o te tahi atu mau fenua, te tahi mea e itehia ra i roto i te mau oire rarahi e rave rahi o Europa no teie tau. Mea taa ê mau â te tupuraa o Aklilu i to ˈna haereraa i te hoê putuputuraa Kerisetiano i te Piha a te Basileia a te mau Ite no Iehova! Ua farii te feia i tae mai ia ˈna, e aita i maoro ua au roa oia. Ua haere oioi oia i mua i roto i te faahohonuraa i to ˈna maramarama e to ˈna mauruuru i te Atua Poiete. Imi mai nei oia i te mau ravea no te haaparare i te parau apî maitai o te Basileia ia vetahi ê i roto i taua mataeinaa ra. Oia mau, i te hoê mahana i to te hoa pororaa o Aklilu uiraa ia ˈna eaha ta ˈna mau fa i teie nei i roto i te oraraa, ua pahono atura Aklilu ma te haamarirau ore e te tiaturi ra oia i te hoê mahana e riro ei melo o te hoê amuiraa o te paraparau i to ˈna reo, te Amharique. I to te mau matahiapo o te amuiraa reo Beretane no tera vahi iteraa i te reira, oaoa aˈera ratou i te faanaho i te hoê oreroraa parau bibilia no te taatoaraa na roto i to Aklilu reo tumu. Ua faatae mai te titau-manihini-raa e haere mai e rave rahi taata ěê e taata no tera vahi atoa ia paturu i te putuputuraa matamua no te taatoaraa reo Amharique i Beretane. I teie mahana, ua hoê te mau Etiopia e vetahi ê i taua vahi ra i roto i te hoê amuiraa ruperupe. Ua itea mai e rave rahi no reira e aita e mea e tapea ia ratou ia tia ˈtu i te pae o Iehova e ia faataipe i te reira na roto i te bapetizoraa Kerisetiano.—Ohipa 8:26-36.
15 E ere hoê â huru taa ê e te huru oraraa. Aita e mea teitei aore ra e mea haihai; e mea taa ê noa te reira. A mataitai ai i te bapetizoraa o te mau tavini pûpû-apî-hia a Iehova i te motu o Melita, ua apitihia te oaoa rahi o te mau Ite no tera vahi i te roimata oaoa o te mau ratere no Beretane mai. Ua faaite na pǔpǔ e piti ra no Melita e no Beretane atoa i to raua huru aau, na roto râ i te mau ravea taa ê, e ua tima to raua here puai ia Iehova i te mau taairaa o te auhoaraa Kerisetiano.—Salamo 133:1; Kolosa 3:14.
Te tinairaa i te manaˈo oti noa
16-18. A faatia na i te hoê tupuraa o te faaite ra e nafea e tinai ai i te manaˈo oti noa i roto i te amuiraa Kerisetiano.
16 A hohonu noa ˈi to tatou here ia Iehova e to tatou mau taeae Kerisetiano, e nehenehe tatou e pee maite roa ˈtu â ia Iehova na roto i ta tatou hiˈoraa ia vetahi ê. E nehenehe e tinaihia te mau manaˈo oti noa atoa ta tatou i faatupu i mutaa iho no nia i te tahi mau tiaraa basileia, iri, aore ra taˈere. E rave anaˈe i te hiˈoraa o Albert o tei tavini i roto i te nuu Beretane i te Piti o te Tamaˈi rahi e o tei haruhia e te mau Tapone i te toparaa o Singapour i te matahiti 1942 ra. I muri aˈe, ua rave oia i te ohipa fatata e toru matahiti i nia i te “eˈa no te pereoo auahi o te pohe,” piri atu i tei matauhia ei eˈaturu na nia i te anavai Kwaï. I to ˈna tuuraahia mai i te hopea o te tamaˈi, e 32 kilo to ˈna, ua fati te hoê ivi taa e te ihu, e ua roohia oia i te maˈi maero, te hî toto, e te malaria. E mau tausini o to ˈna mau hoa i tapeahia e tupuraa ino roa ˈtu â to ratou, e mea rahi aita i ora mai. Ei faahopearaa o te mau mea riaria ta Albert i ite e i farerei, ua hoˈi atu oia i ǒ ˈna i te matahiti 1945 ra ei taata riri e te inoino, ma te ore e anaanatae i te Atua aore ra i te haapaoraa.
17 Ua riro ta Albert vahine, o Irene, ei Ite no Iehova. Ia oaoa oia, ua haere Albert i te tahi mau putuputuraa a te amuiraa a te mau Ite no Iehova o te vahi iho. Ua haere Paul, te hoê Kerisetiano apî tei roto i te taviniraa taime taatoa, e farerei ia Albert no te haapii i te Bibilia e o ˈna. Aita i maoro, taa aˈera ia Albert e e hiˈo Iehova i te mau taata ia au i te huru o to ratou aau. Ua pûpû oia i to ˈna ora na Iehova e ua bapetizohia ˈtura oia.
18 I muri aˈe, ua reva Paul i Lonedona, ua haapii i te reo Tapone, e ua apiti i te hoê amuiraa reo Tapone. I to ˈna horoaraa i te manaˈo e afai i te tahi mau Ite Tapone i ta ˈna amuiraa tahito, haamanaˈo aˈera te mau taeae no reira i te manaˈo puai oti noa o Albert no nia i te taata o taua fenua ra. Mai to ˈna hoˈiraa ˈtu i Beretane, ua ape Albert i te farerei tia ˈtu i te hoê taata no Tapone mai, no reira ua uiui aˈera te mau taeae e nafea oia e faaruru ai i te tupuraa. Aita e faufaa no ratou ia haapeapea—ua farii Albert i te feia ratere ma te here taeae pipiri ore.—Petero 1, 3:8, 9.
‘Ia mahora outou’
19. Eaha te aˈoraa a te aposetolo Paulo o te tauturu ia tatou mai te peu e e manaˈo pae tahi to tatou?
19 “Ia haapao i te huru o te taata i te haavaraa, e ere ïa i te mea maitai,” ta te arii paari ra o Solomona ïa i papai. (Maseli 28:21) E mea ohie ia piri atu i te feia ta tatou i matau maitai. I te tahi mau taime râ, e anaanatae rii tatou i te feia ta tatou i ore i matau maitai. Eita e au i te hoê tavini a Iehova tera manaˈo pae tahi. Papu maitai, e mea titauhia ia pee tatou paatoa i te aˈoraa maramarama a Paulo “ia mahora”—oia, ia mahora tatou ia here tatou i te mau hoa Kerisetiano no te mau huru oraraa taa ê.—Korinetia 2, 6:13.
20. I roto i teihea mau tuhaa o te oraraa nei e mea tia ˈi ia pee tatou ia Iehova, to tatou Atua pae tahi ore?
20 Noa ˈtu e ta tatou fanaˈoraa taa ê o te parauraa no te raˈi aore ra o te tiaturiraa e ora e a muri noa ˈtu i nia i te fenua nei, e tauturu to tatou manaˈo pae tahi ore ia tatou ia fanaˈo i te auhoêraa o te hoê nǎnǎ, o te hoê Tiai mamoe. (Ephesia 4:4, 5, 16) E tauturu te tutavaraa i te pee ia Iehova, to tatou Atua pae tahi ore, ia tatou i roto i ta tatou taviniraa Kerisetiano, i roto i to tatou mau fetii e i roto i te mau amuiraa, oia mau, i roto i te mau tuhaa atoa o te oraraa nei. E nafea hoi? E tauaparau te tumu parau i muri nei i teie tuhaa.
[Nota i raro i te api]
^ par. 3 I muri aˈe, ua riro to Iehova roo ei tumu parau o te mau himene moˈa.—Salamo 135:8-11; 136:11-20.
^ par. 11 I ǒ nei, te parau ra “to te Heleni,” o te mau Etene atoa ïa.—Étude perspicace des Écritures, neneihia e te mau Ite no Iehova, buka 1, api 1026.
E nafea outou e pahono ai?
• Mea nafea to Iehova faaiteraa i te pae tahi ore i nia ia Rahaba e to Gibeona?
• Mea nafea to Iesu faaiteraa i te pae tahi ore i roto i ta ˈna haapiiraa?
• Eaha te nehenehe e tauturu ia tatou ia tinai i te manaˈo oti noa i te pae taˈere e te iri?
[Uiraa haapiiraa]
[Hohoˈa i te api 9]
E haamata te haruraa a Iseraela ia Kanaana
[Hohoˈa i te api 11]
Aita Iesu i haamarirau i te poro i te hoê vahine no Samaria
[Hohoˈa i te api 12]
Te hoê putuputuraa no te taatoaraa reo Amharique i Beretane
[Hohoˈa i te api 12]
Ua tauturu to Albert here ia Iehova ia ˈna ia tinai i te manaˈo oti noa