Mea nafea te tahi pae i te pahonoraahia

E MEA rahi te taata o te pure ra. Ua papu i te tahi pae e te pahonohia ra ta ratou pure. Te uiui ra te tahi atu te faaroohia mai ra anei ta ratou mau pure. Te imi ra vetahi ê i te mau pahonoraa aita râ e manaˈo no te hohora ˈtu i ta ratou mau aniraa i roto i te pure i te Atua.

Te faataa ra te Bibilia i te Atua mau mai “tei faaroo i te pure ra.” (Salamo 65:2) Ia pure outou, ua papu anei ia outou e te faatae ra outou i ta outou mau pure i te Atua mau ra? E mau huru pure anei ta outou ta ˈna e pahono?

No te taata e rave rahi i te mau vahi atoa o te fenua nei, te pahonoraa, oia ïa e! Mea nafea to ratou pahonoraahia? Eaha ta ratou i haapii?

Te Atua—o vai oia?

Mea haapao mau â te hoê orometua haapii i Potiti o tei haapiihia e te mau paretenia e te mau perepitero, i ta ˈna faaroo. I to te ekalesia tauiraa e faarueraa i te mau peu i haapiihia ia ˈna e mea faufaa, aita oia i taa faahou. Ua haa-matau oia i te mau huru ravea haamoriraa a to Hitia o te râ ma a tere ai oia i te tahi atu fenua, e ua haamata aˈera oia i te uiui te vai ra anei te hoê Atua mau. E nafea oia e haamori ai e tia ˈi? I to ˈna uiraa ˈtu i ta ˈna perepitero no nia i te mau mea i roto i te Bibilia, ua patoihia mai ta ˈna mau uiraa, e ua inoino oia.

Ua opere te ekalesia Katolika i te hoê api parau i roto i te oire o teie orometua haapii ma te faaara i ta ˈna paroita eiaha e paraparau e te mau Ite no Iehova. Ua vai noa râ ta ˈna mau uiraa. I te hoê mahana, i to te mau Ite haereraa i ǒ ˈna, ua faaroo oia e ua anaanatae i ta ˈna i faaroo atu. A tahi ra oia a paraparau ai e o ratou.

Ia pahonohia ta ˈna mau uiraa e rave rahi, ua haamata teie vahine i te haapii i te Bibilia e te mau Ite. I te mau hebedoma atoa, e tapura uiraa roa ta ˈna na raua. Ua hinaaro oia e ite i te iˈoa o te Atua, te vai ra anei hoê anaˈe Atua mau, e farii anei oia i te faaohiparaa i te mau hohoˈa i roto i te haamoriraa, e e mea rahi atu â. Ua tapao oia e no roto mai te mau pahonoraa atoa i horoahia ˈtu ia ˈna i te Bibilia, e ere râ i te manaˈo taata, no reira ua maere e ua oaoa oia i ta ˈna e haapii ra. Ua pahono-riirii-hia ta ˈna mau uiraa e rave rahi. I teie mahana, te haamori ra oia ia Iehova ma te varua e te parau mau, mai ta Iesu Mesia i parau e na reira “te feia haamori mau.”—Ioane 4:23.

I Sri Lanka, e taio amui te hoê utuafare ma te tamau i te Bibilia, aita râ ta ratou mau uiraa e rave rahi o tei riro ei mea faufaa no ratou i pahonohia. Noa ˈtu e ua hinaaro ratou i te tauturu, aita ta ratou perepitero i nehenehe e horoa ˈtu. Teie râ, ua haere mai te mau Ite no Iehova e ua vaiiho i te mau papai bibilia faufaa i te utuafare. I muri aˈe, i to te mau Ite no Iehova horoaraa i te mau pahonoraa mauruuru o te mau uiraa bibilia a te utuafare, ua farii ratou i te hoê haapiiraa bibilia. Ua anaanatae roa ratou i ta ratou i ite i roto i ta ratou mau haapiiraa.

Teie râ, ua haafifi te mau haapiiraa i te tamarii-rii-raa ra i te fare pure i te vahine ia hiˈo e te Metua o Iesu Mesia, o “te Atua mau ra” ïa, mai ta Iesu iho i parau. (Ioane 17:1, 3) Ua haapiihia ia ˈna e e tuea o Iesu e te Metua e e “miterio” eiaha e mârôhia. Ma te aau rotahi e te  hepohepo, ua pure oia ia Iehova, ma te faaohipa i to ˈna iˈoa, e ua ani ia ˈna ia faaite o vai o Iesu. I muri iho, ua hiˈopoa maitai faahou oia i te mau irava e tano. (Ioane 14:28; 17:21; Korinetia 1, 8:5, 6) Mai te huru ra ïa e te mairi ra te poa iˈa mai nia mai i to ˈna mata, ua ite maitai oia i teie nei e o Iehova—te Atua Poiete i te raˈi e te fenua e te Metua o Iesu Mesia—te Atua mau.—Isaia 42:8; Ieremia 10:10-12.

No te aha te mauiui?

Ua mauiui roa ino te taata ra o Ioba. Ua pohe pauroa ta ˈna mau tamarii i roto i te hoê vero, e ua vevehia oia. Ua tupu-atoa-hia oia i te hoê maˈi mauiui e ua faaoromai i te faaheporaa a to ˈna mau hoa haavare. I roto i teie mau mea atoa, ua faahiti o Ioba i te tahi mau parau feruri-ore-hia. (Ioba 6:3) Ua hiˈopoa râ te Atua i te mau tupuraa. (Ioba 35:15) Ua ite oia eaha to roto i te aau o Ioba e ua horoa i te aˈoraa i hinaarohia e Ioba. Te na reira ra oia no te taata i teie mahana atoa.

I Mozambique, 10 matahiti noa to Castro a pohe ai to ˈna mama. Ua peapea roa oia. “No te aha oia i pohe ai e i faarue mai ai ia matou?” ta ˈna ïa i ui. Noa ˈtu e na to ˈna mau metua o te mǎtaˈu i te Atua i haapao ia ˈna, aita oia i taa faahou. Eaha te nehenehe e tamahanahana i to ˈna feruriraa e to ˈna mafatu? Ua itea ia ˈna te tamahanahanaraa na roto i te taioraa i te hoê Bibilia nainai Chichewa e te aparauraa i te reira e to ˈna mau taeae paari aˈe.

Ua taa riirii atura ia Castro e ua pohe to ˈna mama, eiaha no te parau-tia ore no ǒ mai i te Atua ra, no te huru tia ore râ i tutuuhia mai. (Roma 5:12; 6:23) Ua tamahanahana rahi te parau fafau o te Bibilia no nia i te hoê tia-faahou-raa ia ˈna no te mea ua taa ia ˈna e te reira te niu papu e ite faahou ai oia i to ˈna mama. (Ioane 5:28, 29; Ohipa 24:15) Te vahi peapea, e maha matahiti noa i muri aˈe, ua pohe to ˈna papa. I taua taime ra râ, ua faaruru maitai aˈe o Castro i te reira. I teie mahana, te here ra oia ia Iehova e te faaohipa ra oia i to ˈna ora ma te taiva ore i roto i te taviniraa a te Atua. Te itehia ra te oaoa tei itea ia ˈna e te taata atoa o tei matau ia ˈna.

Te ite ra te taata e rave rahi o tei ere i te feia here i te tamahanahanaraa i roto i te hoê â pue parau mau bibilia o tei tamahanahana ia Castro. Te ui ra te tahi pae o tei faaruru i te fifi rahi no te mau ohipa a te feia iino, mai ia Ioba: “Eaha te mea i ora ˈi te paieti ore nei?” (Ioba 21:7) Ia faaroo mau te taata i ta Iehova e parau ra i roto i ta ˈna Parau, e haapii ratou e no to ratou iho maitai te ravea e faatitiaifaro ai te Atua i te mau mea.—Petero 2, 3:9.

Aita o Barbara, o tei paari i te Hau Amui no Marite, i û roa i te mau mea riaria o te tamaˈi. Ua paari râ oia i roto i te hoê ao e tamaˈi noa ra. Ua faaitehia te mau parau faataa no nia i te mau mea riaria o te tamaˈi i roto i te mau vea i te mau mahana atoa. A haere noa ˈi oia i te haapiiraa, ua maere oia i te mau tupuraa o te tuatapaparaa tei faaitehia ma te huru manaˈo-ore-hia. No te aha? Ua haapao anei te Atua i tei tupu? Ua tiaturi oia e te vai mau ra te Atua, e mau manaˈo papu ore râ to ˈna no nia ia ˈna.

Ua taui riirii râ to Barbara manaˈo no nia i te oraraa i to ˈna amuiraa ˈtu i te mau Ite no Iehova i te pae hopea. Ua faaroo oia ia ratou e ua haapii i te Bibilia e o ratou. Ua haere oia i te mau putuputuraa i te hoê Piha a te Basileia. Ua haere atoa oia i te hoê o ta ratou mau tairururaa rarahi. Hau atu â, i to ˈna uiraa i te tahi mau uiraa, ua tapao oia e aita te mau manaˈo o te mau Ite i taa ê. Area râ, ua tu te paraparau a te mau Ite no te mea ua niu ratou i to ratou manaˈo i nia i te Bibilia.

Ua haapapu te mau Ite na roto i te Bibilia e te manahia ra te ao e te Diabolo ra o Satani, te arii, e te faaite ra oia i to ˈna huru feruriraa. (Ioane 14:30; Korinetia 2, 4:4; Ephesia 2:1-3; Ioane 1, 5:19) Ua faataa ratou e ua tohuhia te mau tupuraa ta Barbara i maere i roto i te Bibilia. (Daniela, pene 2, 7, e 8) Ua tohu te Atua i te reira no te mea tei ia ˈna te aravihi e ite i te tau a muri aˈe ia maiti oia i te na reira. Ua faatupuhia te tahi o taua mau tupuraa ra e te  Atua. No te tahi atu, ua vaiiho noa ïa oia ia tupu. Ua faaite te mau Ite ia Barbara e te faaite atea atoa ra te Bibilia i te mau tupuraa maitai e te mea iino o to tatou tau e te faataa ra i to ratou auraa. (Mataio 24:3-14) Ua faaite ratou ia ˈna i te mau parau fafau bibilia o te hoê ao apî i reira e tupu ai te parau-tia e e riro ai te mauiui no mutaa iho.—Petero 2, 3:13; Apokalupo 21:3, 4.

Ua haamata riirii o Barbara i te taa e noa ˈtu e ere te Atua ra o Iehova te tumu e mauiui ai te  taata, aita oia e arai ra i te reira ma te faahepo i te taata ia faaroo i ta ˈna mau faaueraa ia maiti ratou i te ore e auraro atu. (Deuteronomi 30:19, 20) Ua rave Iehova i te mau faanahoraa e nehenehe ai tatou e ora e a muri noa ˈtu ma te oaoa, te horoa maira râ oia i te ravea i teie nei no te faaite e e ora anei tatou ia au i to ˈna mau eˈa parau-tia. (Apokalupo 14:6, 7) Ua faaoti Barbara i te haapii i te mau titauraa a te Atua e i te ora ia au i te reira. Ua itea atoa ia ˈna i rotopu i te mau Ite no Iehova te huru aroha ta Iesu i faahiti e itehia mai ai ta ˈna mau pǐpǐ mau.—Ioane 13:34, 35.

E nehenehe atoa outou e faufaahia i te mau faanahoraa tei tauturu ia ˈna.

E auraa to te oraraa

No te feia atoa e au ra e mea maitai to ratou oraraa, e imi paha ratou i te tahi mau pahonoraa i te mau uiraa ta ratou e manaˈonaˈo ra. Ei hiˈoraa, ua hinaaro noa iho â o Matthew, te hoê tane apî i Beretane, e ite i te Atua mau e te tumu o te oraraa. Ua pohe to ˈna papa i te 17raa o to Matthew matahiti. I muri aˈe, ua noaa mai ia Matthew te hoê parau tuite no te upaupa. Ua ite maite noa ˈtura oia i te faufaa ore o to ˈna huru oraraa nounou taoˈa. Faarue aˈera oia i te fare no te ora i Lonedona, e i reira ua rave atura i te raau taero, ua haere i te fare arearearaa, ua rave i te peu hiˈo fetia, te peu tahutahu, e ua haapii i te Bouddhisme zen, e te tahi atu mau philosophia—ua rave oia i teie mau mea atoa no te mea te imi ra oia i te hoê oraraa mauruuru. No te hepohepo, ua pii hua ˈtu oia i te Atua ia tauturu mai ia ˈna ia ite i te parau mau.

E piti mahana i muri aˈe, ua farerei o Matthew i te hoê hoa tahito e ua faataa i to ˈna fifi. Ua haapii teie taata e te mau Ite no Iehova. I to Matthew faaiteraahia te Timoteo 2, 3:1-5, ua maere oia e nafea te Bibilia ia faataa i te ao e haaati ra ia tatou ma te tano. I to ˈna taioraa i te Aˈoraa i nia i te mouˈa, ua putapû to ˈna aau. (Mataio, pene 5-7) I te omuaraa, ua feaa oia no te mea i taio na oia i te tahi mau parau o te faahapa ra i te mau Ite no Iehova, i te pae hopea râ, opua ihora i te haere i te mau putuputuraa i te hoê Piha a te Basileia tapiri.

Ua oaoa o Matthew i ta ˈna i faaroo e ua haamata i te haapii i te Bibilia e te hoê o te mau matahiapo a te amuiraa. Aita i maoro, ua taa aˈera ia ˈna e te mea ta ˈna e haapii ra o ta ˈna ïa e imi ra, te pahonoraa i ta ˈna pure na mua ˈtu i te Atua. Ua fanaˈo oia i te mau maitai a faarue ai oia i te mau peu ta Iehova e au ore ra. A faahotu noa ˈi oia i te mǎtaˈu maitai i te Atua, ua turaihia oia ia faaau i to ˈna oraraa i nia i te mau faaueraa a te Atua. Ua haapii o Matthew e e auraa mau to te oraraa mai teie.—Koheleta 12:13.

Aita i faanaho-aˈena-hia e ia ite o Matthew aore ra vetahi ê i faahitihia i roto i teie tumu parau i te hoê huru oraraa mauruuru. Noa ˈtu râ, ua haapii ratou e e opuaraa î i te here ta te Atua ra o Iehova no te taata atoa o te maiti ma te oaoa i te auraro i ta ˈna mau faaueraa. (Ohipa 10:34, 35) I roto i taua opuaraa ra, te vai ra te ora mure ore i roto i te hoê ao aita faahou e tamaˈi, e maˈi e te poia—aita faahou atoa te pohe. (Isaia 2:4; 25:6-8; 33:24; Ioane 3:16) Tera anei ta outou e hinaaro ra? Mai te peu e e, e nehenehe outou e haapii hau atu â no nia i te iteraa i te ravea o te hoê oraraa mauruuru ma te haere i te mau putuputuraa i niuhia i nia i te Bibilia i te hoê Piha a te Basileia a te mau Ite no Iehova. Te titau-manihini-hia ˈtu nei outou ma te mahanahana ia na reira.

[Hohoˈa i te api 5]

A pure uˈana i te Atua, ma te faaohipa i to ˈna iho iˈoa

[Hohoˈa i te api 5]

A haapii i te Bibilia e te feia o te haapii mau ra i te mea e vai ra i roto

[Hohoˈa i te api 5]

A haere i te mau putuputuraa i te Piha a te Basileia

 [Faaiteraa i te fatu o te hohoˈa i te api 2]

API MATAMUA: Chad Ehlers/Index Stock Photography