“Na ˈna e haafatata mai ia outou”

‘Aita te Atua i atea ê atu ia tatou atoa nei.’—OHIPA 17:27.

1, 2. (a) Ia hiˈo tatou i nia i te raˈi î i te fetia, eaha te uiraa ta tatou paha e ui no nia i te Atua Poiete? (b) E nafea te Bibilia ia haapapu mai e e ere roa ˈtu te taata i te mea faufaa ore na Iehova?

 UA HIˈO aˈena anei outou i nia i te raˈi î i te fetia i te hoê po maramarama e, maere roa ˈtu ai outou? E faatupu te rahiraa fetia e te aano o te reva teitei i te umere faatura. I roto i teie ao nui, e taoˈa huˈa noa ïa te fenua. O te auraa anei ïa e to nia ê roa te Atua Poiete, “tei Teitei i te fenua atoa nei,” e haapeapea mai ai no te taata nei aore ra e atea ê roa oia e noaa ˈi ia ratou te ite ia ˈna?—Salamo 83:18.

² Te haapapu maira te Bibilia e e ere roa ˈtu te taata i te mea faufaa ore na Iehova. Oia mau, te faaitoito maira te Parau a te Atua ia imi ia ˈna a na ô ai e: “Aita . . . oia i atea ê atu ia tatou atoa nei.” (Ohipa 17:27; Paraleipomeno 1, 28:9) Oia mau, ia rave tatou i te mau taahiraa no te haafatata ˈtu i te Atua, e pahono mai oia i ta tatou mau tutavaraa. E nafea hoi? Te horoa maira te mau parau o ta tatou irava matahiti no 2003 i teie pahonoraa haamahanahana: “Na ˈna e haafatata mai ia outou.” (Iakobo 4:8) E tauaparau anaˈe i te tahi o te mau haamaitairaa faahiahia ta Iehova e ninii mai i nia i te feia i fatata ia ˈna.

Te hoê ô a Iehova na tatou iho

3. Eaha te ô ta Iehova e horoa i te feia e haafatata ˈtu ia ˈna?

³ Na mua, e ô faahiahia ta te mau tavini a Iehova, ta ˈna i faataa na to ˈna nunaa. Eita te mana, te taoˈa, te haapiiraa atoa ta teie faanahoraa o te mau mea e pûpû e nehenehe e horoa mai i teie ô. E ô tera na tatou iho, ta Iehova e horoa na te feia noa i fatata ia ˈna. Eaha ïa taua mea ra? Te pahono ra te Parau a te Atua e: ‘Ia faateitei oe i to reo ia noaa te [haroaroaraa] ra; ia imi hua oe ia ˈna mai te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua. O Iehova hoi tei horoa mai i te paari.’ (Maseli 2:3-6; MN) A feruri na, e noaa i te taata  tia ore “te ite i te Atua”! Te faaauhia ra taua ô ra—te ite e vai ra i roto i te Parau a te Atua—i “te taoˈa hunahia ra.” No te aha hoi?

4, 5. No te aha “te ite i te Atua” e nehenehe ai e faaauhia i “te taoˈa hunahia ra”? A horoa na i te hiˈoraa.

⁴ Te hoê tumu, oia hoi e faufaa rahi to te ite i te Atua. Te hoê o te mau haamaitairaa faahiahia o te reira, o te tiaturiraa ïa o te ora mure ore. (Ioane 17:3) E haamaitai aˈena râ taua ite ra i to tatou oraraa i teie nei. Ei hiˈoraa, ei faahopearaa o ta tatou haapii-maitai-raa i te Parau a te Atua, ua itea mai ia tatou te mau pahonoraa i te mau uiraa faufaa mai teie: O vai to te Atua iˈoa? (Salamo 83:18) Eaha te huru mau o tei pohe? (Koheleta 9:5, 10) Eaha te opuaraa a te Atua no te fenua e te huitaata? (Isaia 45:18) Ua itea atoa mai ia tatou te huru oraraa maitai roa ˈˈe, o te faaohiparaa ïa i te aˈoraa paari o te Bibilia. (Isaia 30:20, 21; 48:17, 18) E aratairaa maitai ïa ta tatou o te tauturu mai ia faaruru i te mau ahoaho o te oraraa e ia fanaˈo i te hoê huru oraraa o te faatupu i te oaoa e te mauruuru. Te mea faufaa ˈtu â, maoti ta tatou haapiiraa i te Parau a te Atua i ite ai tatou i te mau huru maitatai o Iehova e i haafatata ˈtu ai tatou ia ˈna. Eaha te mea e faufaa ˈtu â i te hoê taairaa piri e o Iehova tei niuhia i nia i “te ite i te Atua”?

⁵ Te vai ra te tahi atu tumu e nehenehe ai te ite i te Atua e faaauhia i “te taoˈa hunahia ra.” Mai te rahiraa o te mau taoˈa, mea varavara te reira i te ao nei. I nia i na ono miria taata i te fenua nei, fatata e ono mirioni feia haamori ia Iehova, aore ra fatata 1 i nia i te 1 000, ua noaa ia ratou “te ite i te Atua.” Ei faaiteraa e e taoˈa faahiahia mau te iteraa i te parau mau o te Parau a te Atua, e rave anaˈe hoê noa uiraa bibilia: Eaha te tupu i nia i te taata ia pohe oia? Ua ite tatou maoti te mau Papai e e pohe te nephe e aita ta tei pohe e parau itea. (Ezekiela 18:4) Teie râ, ua farii te rahiraa o te mau haapaoraa a teie nei ao i te tiaturiraa hape e e tamau noa te hoê mea i roto mai i te taata i te ora i muri aˈe i te poheraa. Ua riro te reira ei tuhaa tumu o te mau haapaoraa no te Amuiraa faaroo Kerisetiano. To roto atoa te reira i te Bouddhisme, te Hindouisme, te Jaïnisme, te Judaïsme, te haapaoraa Mahometa, te Shintoïsme, te Sikhisme e te Taoïsme. A feruri noa na—e mau miria taata tei haavarehia e teie noa haapiiraa hape!

6, 7. (a) Ia vai ma noa e noaa ˈi “te ite i te Atua”? (b) Eaha te hiˈoraa e faaite ra e e haamaitai Iehova ia tatou i te haroaroaraa i hunahia i “te feia paari e te ite” e rave rahi?

⁶ No te aha i ore ai i rahi atu â te taata tei noaa ia ratou “te ite i te Atua”? No te mea eita e taa i te hoê taata te auraa o te Parau a te Atua aita anaˈe ta ˈNa tauturu. A haamanaˈo na, e ô teie ite. E horoa Iehova i te reira i te feia noa e anaanatae i te imi i ta ˈna Parau ma te tia e te haehaa. E ere paha ratou i te mea “paari i te haapaoraa i te tino nei.” (Korinetia 1, 1:26) E rave rahi o te nehenehe atoa e parauhia e mea ‘haapii-ore-hia e te itea ore’ ia au i te mau ture aveia a teie nei ao. (Ohipa 4:13) Aita râ e peapea. E haamaitai Iehova ia tatou i “te ite i te Atua” no te tahi mau huru maitatai ta ˈna e ite ra i roto i to tatou aau.

⁷ E rave anaˈe i te hoê hiˈoraa. Ua papai te mau aivanaa e rave rahi no roto i te Amuiraa faaroo Kerisetiano i te mau tatararaa roa i te Bibilia. E faataa paha taua mau faatoro bibilia ra i te huru tupuraa i roto i te tuatapaparaa, te auraa o te mau taˈo Hebera e Heleni, e te vai ra ˈtu â. Noa ˈtu te mau mea atoa ta ratou i haapii, ua noaa mau anei i taua mau aivanaa ra “te ite i te Atua”? Oia, te taa maitai ra anei ia ratou te parau tumu o te Bibilia—te faatiaraa i te mana arii o Iehova na roto i to ˈna Basileia i te raˈi? Ua ite anei ratou e e ere te Atua ra o Iehova i te hoê tuhaa o te Toru tahi? Area o tatou ra, ua taa maitai ïa ia tatou taua mau mea ra. No te aha? Ua haamaitai Iehova ia tatou i te haroaroaraa i te pue parau mau pae varua tei hunahia i “te feia paari e te ite ra.” (Mataio 11:25) Auê ïa Iehova i te haamaitai i te feia i fatata ia ˈna!

“Te tiai nei Iehova i te feia i hinaaro ia ˈna”

8, 9. (a) Mea nafea to Davida faataaraa i te tahi atu haamaitairaa na te feia i fatata ia Iehova? (b) No te aha te mau Kerisetiano mau e hinaaro ai i te parururaa a te Atua?

⁸ E fanaˈo te feia i fatata ia Iehova i te tahi atu  haamaitairaa—te parururaa a Iehova. Ua papai te fatu salamo ra o Davida, tei farerei hoi i te mau ati e rave rahi, e: “Te fatata maira Iehova i te feia e tiaoro atu ia ˈna, i te feia atoa i tiaoro atu ia ˈna ma te haavare ore. E faatia oia i te hinaaro o te feia i mǎtaˈu ia ˈna, e faaroo mai oia i ta ratou tiaoro, e e faaora hoi ia ratou. Te tiai nei Iehova i te feia i hinaaro ia ˈna.” (Salamo 145:18-20) Oia, tei pihai iho Iehova i te feia e here ia ˈna e e pahono oioi ïa oia i ta ratou mau tiaoro i te tauturu.

⁹ No te aha tatou e hinaaro ai i te parururaa a te Atua? Hau atu i te iteraa i te mau faahopearaa o te oraraa i teie nei “mau taime ati rahi faaruru atâ,” ua riro te mau Kerisetiano mau ei fa taa ê na te Enemi rahi o Iehova, o Satani te Diabolo. (Timoteo 2, 3:1, MN) Ua opua maite taua enemi ravea haavare ra ‘e haapau’ ia tatou. (Petero 1, 5:8) E hamani ino, e faahepo, e e tamata Satani ia tatou. E imi atoa oia i te mau huru feruriraa e te mau huru aau ta ˈna e nehenehe e faaohipa. E fa ta ˈna i haamau: e haaparuparu i to tatou faaroo e e faaore i to tatou ea pae varua. (Apokalupo 12:12, 17) No te puai o te enemi ta tatou e aro ra, e ere anei i te mea mahanahana ia ite e “te tiai nei Iehova i te feia i hinaaro ia ˈna”?

10. (a) E nafea Iehova ia tiai i to ˈna nunaa? (b) Eaha te parururaa faufaa roa ˈˈe, e no te aha?

¹⁰ E nafea râ hoi Iehova ia tiai i to ˈna nunaa? E ere ta ˈna parau fafau i te haapapuraa i te oraraa fifi ore i roto i teie faanahoraa; e ere atoa i te auraa e e tia ia ˈna ia faatupu i te semeio no tatou. Teie râ, e paruru mau Iehova i to ˈna nunaa ei taatoaraa i te pae tino. Inaha hoi, eita roa ˈtu oia e vaiiho i te Diabolo ia faaore i te feia haamori mau i te ao nei! (Petero 2, 2:9) Hau atu â, e paruru Iehova ia tatou i te pae varua. E horoa mai oia i te ravea e hinaarohia ia faaoromai tatou i te ati e ia tapea i to tatou taairaa e oia. I te pae hopea, o te parururaa pae varua te mea faufaa roa ˈˈe. No te aha? A vai noa ˈi to tatou taairaa e Iehova, aita e mea—tae noa ˈtu te pohe—e nehenehe e faaino ia tatou ma te taraire.—Mataio 10:28.

11. Eaha te mau faanahoraa ta Iehova i rave no te paruru i to ˈna nunaa i te pae varua?

¹¹ Ua rave Iehova i te mau faanahoraa e rave rahi no te paruru i te feia i fatata ia ˈna i te pae varua. Na roto i ta ˈna Parau, te Bibilia, te horoa maira oia i te paari no te faaruru i te ati huru rau. (Iakobo 1:2-5) E noaa te parururaa ia faaohipa tatou i te aˈoraa nanonano e vai ra i roto i te mau Papai. Hau atu â, e horoa Iehova i ‘te varua moˈa i te feia e ani atu ia ˈna.’ (Luka 11:13) O taua varua ra te mea puai roa ˈˈe i te ao taatoa, e tia mau ïa i te reira ia faaineine mai ia manuïa tatou i te faaruru atu i te mau ati aore ra te mau tamataraa atoa e nehenehe e tupu noa mai. Na roto i te Mesia, e horoa mai Iehova i “te mau ô taata.” (Ephesia 4:8, MN) Te tutava ra teie mau taata maitatai i te pae varua i te pee i te aumihi rahi o Iehova iho ia tauturu ratou i te mau hoa faaroo.—Iakobo 5:14, 15.

12, 13. (a) Mea na roto i teihea ravea e horoa mai ai Iehova i te maa varua i te hora mau? (b) Eaha to outou manaˈo i te mau faanahoraa a Iehova no to tatou ea pae varua?

¹² E horoa mai Iehova i te tahi atu â mea no te tiai ia tatou: te maa varua i te hora mau. (Mataio 24:45) Na roto i te mau papai, tae noa ˈtu i na vea Te Pare Tiairaa e te Réveillez-vous!, e oia  atoa i te mau putuputuraa, te mau tairururaa, e horoa mai Iehova i te mea ta tatou e hinaaro ra i te taime e hinaaro ai tatou. Te haamanaˈo ra anei outou i te hoê taime i faaroo ai outou i te hoê mea i te hoê putuputuraa Kerisetiano, te hoê tairururaa, tei haaputapû i to outou mafatu e tei faaitoito aore ra tei haamahanahana ia outou? Ua taio ê na anei outou i te hoê tumu parau i roto i te hoê o na vea i faahitihia aˈenei a manaˈo atu ai e no outou tera mea i papaihia ˈi?

¹³ Hoê o te mau mauhaa a Satani o te manuïa roa ˈˈe, o te toaruaruraa ïa, e aita tatou i paruruhia i te mau faahopearaa o te reira. Ua ite maitai oia e e nehenehe te hepohepo maoro e faaere ia tatou i te itoito, e e haaparuparu roa ia tatou. (Maseli 24:10) No te mea te tamata ra Satani i te faaohipa i te mau manaˈo toaruaru, e hinaaro tatou i te tauturu. Ua neneihia i te tahi taime te mau tumu parau no te tauturu mai ia faaruru i te toaruaruraa i roto i na vea ra Te Pare Tiairaa e te Réveillez-vous! No nia i te hoê o taua mau tumu parau ra, ua papai te hoê tuahine Kerisetiano e: “Te taio nei au i te tumu parau ra fatata i te mau mahana atoa, e te tahe noa râ to ˈu roimata. E tuu noa vau i te reira i pihai i to ˈu roi e ia noaa noa ia ˈu i te mau taime atoa e toaruaru ai au. Na roto i te mau tumu parau mai teie, e taa noa ia ˈu e te tauahi maira te rima paruru o Iehova.” a Aita anei tatou e mauruuru ra ia Iehova no to ˈna horoaraa mai i te maa varua i te hora mau? A haamanaˈo na, e haapapuraa ta ˈna mau faanahoraa no to tatou ea pae varua e tei pihai iho oia ia tatou e te haapao e te paruru maira oia ia tatou.

Te tapiriraa ˈtu i ‘Tei faaroo i te pure ra’

14, 15. (a) Eaha te ô ta Iehova e horoa na te feia i fatata ia ˈna? (b) No te aha e parauhia ˈi e e ô faahiahia te neheneheraa e tapiri noa ˈtu ia Iehova na roto i te pure?

¹⁴ Ua tapao anei outou e a mana noa ˈtu ai te taata, e pinepine ratou i te ore e tapiri-ohie-hia ˈtu e te feia i raro aˈe ia ratou? Eaha râ ïa no te Atua ra o Iehova? E atea ê roa anei oia no te anaanatae mai i te mau parau i faataehia ˈtu e te taata haihai? Eita roa ˈtu! E haamaitairaa â ïa te ô o te pure ta Iehova e horoa na te feia i fatata ia ˈna. E ô faahiahia mau te neheneheraa e tapiri noa ˈtu i ‘Tei faaroo i te pure ra.’ (Salamo 65:2) No te aha hoi?

¹⁵ Ei hiˈoraa: E rave rahi hopoia ta te raatira ohipa o te hoê taiete rahi. E faaoti oia teihea mau mea na ˈna iho e haapao e teihea ta ˈna e vaiiho na vetahi ê. Oia atoa, ua faataa te Arii o te ao taatoa teihea mau mea na ˈna iho e rave e teihea ta ˈna e horoa. A feruri na i te mau mea atoa ta Iehova i vaiiho na ta ˈna Tamaiti here, o Iesu, e haapao. Ua horoahia “te mana ia ˈna ia haava ra.” (Ioane 5:27) “Ua tuuhia te mau melahi . . . i raro aˈe ia ˈna.” (Petero 1, 3:22) E nehenehe noa ta Iesu e faaohipa i te varua moˈa mana o Iehova no te aratai i ta ˈna mau pǐpǐ i te ao nei. (Ioane 15:26; 16:7) No reira  Iesu i parau ai e: “O te mana atoa i te raˈi e te ao atoa nei ua pûpûhia mai tei ia ˈu anaˈe.” (Mataio 28:18) Teie râ, no ta tatou mau pure, ua maiti Iehova e na ˈna iho te reira e haapao. No reira te Bibilia e faaue mai ai e faatae i ta tatou mau pure ia Iehova anaˈe ra, na roto i te iˈoa o Iesu.—Salamo 69:13; Ioane 14:6, 13.

16. No te aha tatou e tiaturi ai e e faaroo mau mai Iehova i ta tatou mau pure?

¹⁶ E faaroo mau anei Iehova i ta tatou mau pure? Ahiri Iehova e mea tâuˈa ore, eita ïa oia e faaitoito mai e “tamau uˈana maite â i te pure” aore ra e huri i ta tatou mau hopoia e to tatou mau ahoaho i nia ia ˈna. (Roma 12:12; Salamo 55:22; Petero 1, 5:7) I tiaturi roa na te mau tavini haapao maitai i te tau bibilia e e faaroo Iehova i te pure. (Ioane 1, 5:14) No reira te papai salamo ra o Davida i parau ai e: “Ia itea mai [ia Iehova] tau reo.” (Salamo 55:17) E tumu atoa ta tatou e tiaturi ai e tei pihai iho Iehova ia tatou ma te ineine noa i te faaroo mai i to tatou mau manaˈo e mau haapeapearaa atoa.

E haamaitai Iehova i ta ˈna mau tavini

17, 18. (a) Eaha to Iehova manaˈo i te taviniraa ma te taiva ore a te mau mea ora maramarama ta ˈna i poiete? (b) A faataa na e nafea te Maseli 19:17 ia faaite e te tapao ra Iehova i ta tatou mau ohipa hamani maitai.

¹⁷ Eita te tiaraa o Iehova ei Arii o te ao taatoa e taui no ta te taata haihai e rave aore ra e ore e rave. Teie râ, e mauruuru haere noa oia. E haafaufaa oia—oia mau, e poihere oia—i te taviniraa ma te taiva ore a te mau mea ora maramarama ta ˈna i poiete. (Salamo 147:11) Teie ïa te tahi atu ô fanaˈohia e te feia i fatata ia Iehova: E haamaitai oia i ta ˈna mau tavini.—Hebera 11:6.

¹⁸ Te faaite maitai ra te Bibilia e e haafaufaa Iehova i ta to ˈna feia haamori e rave. Ei hiˈoraa, te taio nei tatou e: “O tei hamani maitai i te taata rii ra, ua horoa oia i te taoˈa na Iehova; e na ˈna e hopoi mai i ta ˈna utua.” (Maseli 19:17) Te itehia ra to Iehova aroha hamani maitai i te feia riirii i roto i te Ture a Mose. (Levitiko 14:21; 19:15) Eaha to Iehova huru ia pee tatou i to ˈna aroha hamani maitai i roto i ta tatou mau  haaraa e te feia riirii? Ia horoa tatou na te taata rii, ma te tiai ore ia faahoˈihia mai, e faariro Iehova i te reira mai te hoê horoa-tarahu-raa na ˈNa. Ua fafau Iehova e aufau i taua tarahu ra i te farii maitai e te mau haamaitairaa. (Maseli 10:22; Mataio 6:3, 4; Luka 14:12-14) Oia, ia faaite tatou i te aumihi i te hoê hoa haamoriraa e fifihia ra, e putapû te mafatu o Iehova. Auê tatou i te mauruuru ia ite e te tapao ra to tatou Metua i te raˈi i ta tatou mau ohipa hamani maitai!—Mataio 5:7.

19. (a) No te aha e papu ai ia tatou e e haafaufaa Iehova i ta tatou e rave i roto i te ohipa pororaa e faariroraa i te taata ei pǐpǐ? (b) E nafea Iehova ia haamaitai i te mau ohipa taviniraa i ravehia no te turu i to ˈna Basileia?

¹⁹ E haafaufaa iho â râ Iehova i ta tatou e rave no to ˈna Basileia. Ia haafatata ˈtu tatou ia Iehova, e hinaaro iho â ïa tatou e faaohipa i to tatou taime, to tatou ito, e ta tatou mau faufaa no te apiti hope i roto i te ohipa pororaa i te Basileia e faariroraa i te taata ei pǐpǐ. (Mataio 28:19, 20) I te tahi taime, e manaˈo paha tatou e e iti roa ta tatou e rave ra. E turai atoa paha to tatou mafatu hara ia ui e e oaoa anei Iehova i ta tatou mau tutavaraa. (Ioane 1, 3:19, 20) E poihere râ Iehova i te mau ô atoa—aita e peapea te iti—no roto roa mai i te aau turaihia e te aroha. (Mareko 12:41-44) Te haapapu maira te Bibilia e: “E ere te Atua i te Atua parau-tia ore, a haamoe ai oia i ta outou ohipa i rave, e to outou hinaaro i to ˈna ra iˈoa.” (Hebera 6:10) Oia mau, e haamanaˈo e e haamaitai Iehova tae noa ˈtu i te ohipa taviniraa nainai roa ˈˈe i ravehia no te turu i to ˈna Basileia. Hau atu i te mau haamaitairaa rarahi i teie nei, e nehenehe tatou e hiˈo i mua i te mau oaoaraa o te oraraa i roto i te ao apî e fatata maira, i reira Iehova e horoa rahi roa ˈi e e haamâha ˈi i te mau hinaaro tia o te taata atoa i fatata ia ˈna!—Salamo 145:16; Petero 2, 3:13.

20. I te roaraa o te matahiti 2003, e nafea tatou ia haamanaˈo i te mau parau o ta tatou irava matahiti, e ma teihea faahopearaa?

²⁰ I te roaraa o te matahiti 2003, e ui anaˈe ia tatou iho e te tutava tamau ra anei tatou i te haafatata ˈtu i to tatou Metua i te raˈi. Mai te peu e e, e nehenehe e papu ia tatou e e pahono mai oia mai ta ˈna i fafau. Inaha hoi, ‘e ore e tia i te Atua ia haavare.’ (Tito 1:2) Ia haafatata ˈtu outou ia ˈna, e haafatata mai oia ia outou. (Iakobo 4:8) E ma teihea faahopearaa? Ma te mau haamaitairaa rarahi ïa i teie nei e te tiaturiraa e haafatata noa ˈtu â ia Iehova i te roaraa o te tau mure ore!

[Nota i raro i te api]

Te haamanaˈo ra anei outou?

• Eaha te ô ta Iehova e horoa na te feia e haafatata ˈtu ia ˈna?

• Eaha te mau faanahoraa ta Iehova e rave no te paruru i to ˈna nunaa i te pae varua?

• No te aha te neheneheraa e tapiri atu ia Iehova na roto i te pure e riro ai ei fanaˈoraa taa ê?

• E nafea te Bibilia ia faaite e e haafaufaa Iehova i te taviniraa ma te taiva ore a te mau mea ora maramarama ta ˈna i poiete?

[Uiraa haapiiraa]

[Hohoˈa i te api 15]

Ua haamaitai Iehova ia tatou i te haroaroaraa i te pue parau mau pae varua

[Hohoˈa i te mau api 16, 17]

E horoa Iehova i te parururaa pae varua

[Hohoˈa i te api 18]

Tei pihai iho Iehova ia tatou ma te ineine noa i te faaroo i ta tatou mau pure atoa