Te faatia ra te feia poro i te Basileia

E matara te mau Piha a te Basileia i te taata atoa

A FAAINEINE ai o ˈna i ta ˈna mau pǐpǐ no te taviniraa i mua i te taata, ua faaitoito Iesu Mesia ia ratou ia “[poro] i nia iho i te mau fare.” (Mataio 10:27; MN) Oia, ua titauhia ia rave ratou i ta ratou taviniraa Kerisetiano ma te tapuni ore, i mua i te taata. Na roto i te faaohiparaa i teie aˈoraa, te rave-atoa-hia nei te ohipa a te mau Ite no Iehova ma te tapuni ore. Na teie tapuni-ore-raa i tauturu i te mau Ite ia upootia i nia i te patoiraa e ia manaˈo maitai te taata ia ratou.

Noa ˈtu e e fariihia te taata atoa i te mau putuputuraa a te amuiraa a te mau Ite no Iehova, te taiâ ra te tahi mau taata ia tomo i roto i te hoê Piha a te Basileia no te faainoraa. E parau mau te reira i Filelane. E haama noa vetahi ê ia haere i te mau vahi apî. Ia patuhia te hoê Piha a te Basileia apî aore ra ia faaapîhia te hoê piha, e faataa-noa-hia te hoê mahana mataitairaa. E ravehia paha te hoê tutavaraa taa ê no te titau manihini i te mau taata tapiri ia mataitai i te Piha a te Basileia e ia ite i te ohipa a te mau Ite no Iehova.

I te hoê vahi, ua faaineine te mau Ite e ia operehia te vea i te hoê â mahana e tei faataahia no te mataitai i ta ratou Piha a te Basileia apî. Ua farerei e piti Ite i te hoê tane ruhiruhia o tei parau e e mea au na ˈna e taio i Te Pare Tiairaa e te Réveillez-vous! Ua paraparau te mau taeae ia ˈna no nia i te mahana i faataahia no te mataitairaa e ua pûpû atu i te afai ia ˈna i te Piha a te Basileia. Ua parau tera taata e e oaoa o ˈna i te apiti atu ia raua. Ua tuô maira ta ˈna vahine, o tei faaroo i te aparauraa, e “E haere atoa vau!”

I to ˈna tomoraa ˈtu i roto i te Piha a te Basileia, ua hiˈo haere tera taata e ua parau e: “E ere roa ˈtu i te mea poiri. Inaha, mea nehenehe e te maramarama. Ua parauhia mai e e mea poiri te Piha a te Basileia!” Ua faaea rii na taata faaipoipo e ua ani i te tahi mau papai e faaiteitehia ra.

Ua hinaaro te hoê amuiraa e faaara na roto i te vea no te fenua e e mahana mataitairaa tei faataahia ia avarihia ta ratou Piha a te Basileia. I te taeraa ˈtu te parau faaite no nia i tera tupuraa, ua ani te vahine papai vea rahi e ia papaihia te hoê tumu parau no nia i tera tupuraa. Ua farii te mau taeae, e tau taime i muri aˈe, ua neneihia te hoê tumu parau au maitai afa api i roto i te vea, no nia i te tupuraa e te faataaraa o te mau ohipa a te amuiraa a te mau Ite no Iehova no reira.

I te neneiraahia teie tumu parau, ua farerei te hoê Ite ruhiruhia i te hoê taata tapiri o tei parau mai e: “E tumu parau faahiahia no nia i te mau Ite no Iehova to roto i te vea o teie mahana!” Ua nehenehe te tuahine e horoa i te hoê faaiteraa e e pûpû i muri iho i te buka rairai Les Témoins de Jéhovah du XX^e siècle.

Hau atu i te faataaraa i te tahi mau manaˈo tano ore no nia i te mau Ite no Iehova, ua faaitoito teie mau faaineineraa no nia i te mahana mataitairaa e te porotarama tomoraa i te mau Piha a te Basileia apî i te mau taata poro ia titau manihini e rave rahi atu â taata ia haere i te mau putuputuraa. Oia, i te mau fenua e rave rahi, e tae noa ˈtu i Filelane, ua ite te mau taata e e matara te mau Piha a te Basileia a te mau Ite no Iehova i te taata atoa.