“Na Iehova te haamaitairaa e taoˈahia ˈi tatou”

E HINAARO tatou paatoa ia haamaitaihia tatou. Te na ô ra The American Heritage College Dictionary e e faahotu te mau haamaitairaa i “te oaoa, te au-maitai-raa, aore ra te ruperupe.” I te mea e na Iehova e horoa mai ra i ‘te mau mea maitatai i hohia mai, e te mau mea tia roa e maitai roa ˈi,’ no ǒ mai ïa te mau haamaitairaa mau mure ore atoa i to tatou Atua Poiete î i te here ra. (Iakobo 1:17) E ninii oia i te mau haamaitairaa i nia i te huitaata atoa, tae noa ˈtu i nia i te feia aita i ite ia ˈna. Teie ta Iesu i parau no nia i to ˈna Metua: ‘Te faahiti nei oia i to ˈna mahana i nia i te feia iino e te feia maitatai, e te haamairi mai nei oia i te ûa i nia i te parau-tia e te parau-tia ore.’ (Mataio 5:45) E haapao taa ê râ Iehova i te feia e here ra ia ˈna.—Deuteronomi 28:1-14; Ioba 1:1; 42:12.

Ua papai te fatu salamo e: ‘Aore roa a Iehova maitai e tapea i te feia haerea piˈo ore ra.’ (Salamo 84:11) Oia, e oraraa taoˈahia to te feia e tavini ia Iehova, e oraraa e auraa to te reira. Ua papu ia ratou e ‘na Iehova te [haamaitairaa e taoˈahia ˈi ratou]; e ore hoi e apiti-atoa-hia mai te ino i te reira.’ Te na ô atoa ra te Bibilia e: ‘O tei haamaitaihia e Iehova ra, e riro ia ratou te fenua.’ (Maseli 10:22; MN; Salamo 37:22, 29) Auê ïa haamaitairaa e!

Nafea e noaa mai ai ia tatou te haamaitairaa a Iehova? Na mua, mea hinaarohia ia faahotu tatou i te mau huru maitatai e mauruuru ai oia. (Deuteronomi 30:16, 19, 20; Mika 6:8) E taa ia tatou te reira i roto i te hiˈoraa o na tavini e toru a Iehova i tahito ra.

E haamaitai Iehova i ta ˈna mau tavini

E tavini faahiahia o Noa na te Atua. I roto i te Genese 6:8, te taio nei tatou e: ‘Ua arohahia mai Noa e Iehova.’ No te aha? No te mea e taata auraro o Noa. Te na ô ra te aamu e: “Ua au to Noa haerea i te Atua.” Ua haapao o Noa i te mau faaueraa tumu parau-tia a Iehova e ua auraro i ta ˈna mau faaueraa. I tera ra tau a topa ˈi te ao i roto i te haavîraa uˈana e te hairiiri, ua turaihia Noa ia rave “i te mau mea atoa ta te Atua i faaue mai ia ˈna ra, o ta ˈna ïa i rave maite.” (Genese 6:9, 22) Ei faahopearaa, ua faaue Iehova ia ˈna ia hamani i ‘te hoê pahi ia ora to Noa fetii.’ (Hebera 11:7) Mea na reira ïa to Noa e to ˈna fetii—e oia atoa te nunaa taata na roto ia ratou—i ora mai ai i te haamouraahia taua ui ra. E ua pohe o Noa ma te tiaturiraa e e faatiahia mai oia no te ora e a muri noa ˈtu i nia i te hoê fenua paradaiso. Auê ïa haamaitairaa rahi ta ˈna i fanaˈo e!

E mau huru maitatai atoa to Aberahama i mauruuru ai Iehova. O te faaroo te matamua o te reira. (Hebera 11:8-10) Ua faarue o Aberahama i te hoê oraraa fanaˈo i Ura e i muri aˈe, i Harana no to ˈna faaroo i te parau fafau a Iehova e e rahi mai to ˈna huaai, e riro atu ai ei haamaitairaa no te mau nunaa atoa. (Genese 12:2, 3) Noa ˈtu te roa o te mau matahiti tamataraa, ua haamauruuruhia to ˈna faaroo i te fanauraahia mai ta ˈna tamaiti o Isaaka. Na roto ia ˈna, ua riro mai o Aberahama ei tupuna o Iseraela, te nunaa maitihia e te Atua, e o te Mesia i te pae hopea. (Roma 4:19-21) Hau atu â, o o ˈna te ‘metua no te feia atoa e faaroo ra,’ e ua parauhia oia te ‘taua no te Atua.’  (Roma 4:11; Iakobo 2:23; Galatia 3:7, 29) E auraa mau to to ˈna oraraa, e ua haamaitai-rahi-hia oia!

A hiˈo atoa na i te taata haapao maitai ra o Mose. Te mea faahiahia o to ˈna mau huru maitatai, o to ˈna ïa mauruuru no te mau mea pae varua. Ua faarue o Mose i te mau taoˈa a Aiphiti e “itoito maite atura oia i te hiˈoraa ˈtu i te Atua, i tei ore e itea ia hiˈo ra.” (Hebera 11:27) I muri aˈe e 40 matahiti i Midiana, ua hoˈi oia i Aiphiti ei taata paari e ua tia ˈtu oia i mua i te arii rahi roa ˈˈe i taua tau ra o Pharao, no te ani ia ˈna ia tuu i to ˈna mau taeae. (Exodo 7:1-7) Ua ite mata roa oia i na pohe hoê ahuru, te faataa-ê-raahia te Miti Uteute, e te haamouraahia te mau nuu a Pharao. Ua faaohipa Iehova ia ˈna no te horoa i te Ture ia Iseraela ra e ia riro ei arai no ta ˈNa faufaa i faaau i te nunaa apî. E 40 matahiti i te maoro to Mose aratairaa i te nunaa Iseraela na roto i te medebara. E tumu mau to to ˈna oraraa, e ua fanaˈo oia i te mau hopoia taviniraa faufaa e rave rahi.

Mau haamaitairaa no teie tau

Te faaite maira teie mau aamu e e auraa mau to te oraraa o te feia e tavini i te Atua. Ia faahotu te nunaa o Iehova i te mau huru maitatai mai te auraro, te faaroo, e te mauruuru no te mau mea pae varua, e haamaitai-rahi-hia ïa ratou.

Eaha ta tatou haamaitairaa? Te faaruru ra te mau mirioni taata i roto i te Amuiraa faaroo Kerisetiano i te poia i te pae varua, area tatou nei, ‘te [oaoa] ra ïa i te hamani maitai o Iehova.’ (Ieremia 31:12; MN) Na roto ia Iesu Mesia e “te tavini haapao maitai e te paari,” te horoa  maira Iehova i te maa rahi i te pae varua o te tauturu ia tatou ia haere noa na “te eˈa e tae atu ai i te ora.” (Mataio 7:13, 14; 24:45; Ioane 17:3) O te amuimuiraa i to tatou mau taeae Kerisetiano te tahi atu haamaitairaa rahi. I te mau putuputuraa e i te tahi atu â mau taime, e faatupu te amuimuiraa i te mau hoa Kerisetiano o te faaite ra i te here e o te faaitoito maite ra i te ahu i “te huru taata apî,” i te oaoa rahi. (Kolosa 3:8-10, MN; Salamo 133:1) Ta tatou râ haamaitairaa rahi roa ˈˈe, o te fanaˈoraa taa ê faufaa ïa e faatupu i te mau taairaa piri roa e te Atua ra o Iehova e e pee i te mau taahiraa avae o ta ˈna Tamaiti, te Mesia ra o Iesu.—Roma 5:1, 8; Philipi 3:8.

Ia feruri tatou i taua mau haamaitairaa ra, e taa ia tatou e mea faufaa mau â ta tatou taviniraa i te Atua. Te haamanaˈo ra paha tatou i te parabole a Iesu no nia i te hoê taata hohoo tei imi i te poe maitatai. Ua parau Iesu no nia i teie taata e: “E itea ihora ia ˈna te hoê poe maitai roa ra; haere atura hoo atura i te mau taoˈa atoa na ˈna ra, e ua hoo atura i taua poe ra.” (Mataio 13:46) Papu maitai e tera atoa to tatou manaˈo no nia i to tatou taairaa e te Atua, ta tatou fanaˈoraa taa ê faufaa e tavini ia ˈna, to tatou mau hoa Kerisetiano, to tatou tiaturiraa Kerisetiano, e te tahi atu â mau haamaitairaa atoa i taaihia i to tatou faaroo. Aita ˈtu mea faufaa aˈe i roto i to tatou oraraa.

A faahoˈi i ta Iehova

No te mea e farii tatou e na Iehova e horoa maira i te mau ô maitatai atoa ra, e turaihia ïa to tatou aau ia faaite i te mauruuru no te mau haamaitairaa ta tatou e fanaˈo ra. Nafea tatou e na reira ˈi? Na roto ïa i te tautururaa ia vetahi ê ia fanaˈo i teie mau haamaitairaa atoa. (Mataio 28:19) I roto e hau atu i te 230 fenua, te haa nei te mau Ite no Iehova i te farerei i to ratou  taata-tupu ia fanaˈo ratou i te reira. A na reira ˈi ratou, te horoa ra ratou i ta ratou iho mau ravea taotiahia—te taime, te puai, e te mau taoˈa materia—no te tauturu ia vetahi ê ia “noaa te ite i te parau mau.”—Timoteo 1, 2:4.

A rave na i te hiˈoraa o na pionie e faaea ra i Glendale, Kalifonia, i U.S.A. I te mau poipoi Mahana maa atoa, e haere raua i te hoê fare tapearaa na te Hau fatata 100 kilometera i te atea ia haere e ia hoˈi mai raua. Noa ˈtu e e poro noa raua i te feia tapeahia tau hora noa i te farereiraa hoê, aita raua e toaruaru ra. Te na ô ra hoê o raua e: “Mea hoona roa ia tavini i roto i teie tuhaa fenua matau-ore-hia. Te rave nei mâua i te reira ma te oaoa rahi. No te mea e mea rahi roa te feia e anaanatae ra, mea fifi roa ia haapao atu. I teie nei, te haapii nei mâua e e pae taata, e e maha taata ê atu tei ani i te hoê haapiiraa bibilia.”

Te oaoa nei te mau tavini Kerisetiano itoito roa i te horoa i te rima tauturu ma te tamoni ore no te rave i teie ohipa faaora. Te faaite ra ratou i te huru o Iesu, o tei parau e: “I horoa-noa-hia mai ta outou, e horoa noa hoi outou.” (Mataio 10:8) Te rave nei e mau mirioni taata e ati aˈe te ao nei i te hoê â taviniraa miimii ore, e ei faahopearaa, te farii nei te mau nahoa taata aau haavare ore e te riro nei ei pǐpǐ. I na pae matahiti noa i mahemo, fatata 1,7 mirioni tei pûpû i to ratou oraraa na Iehova. No te haapao i te mau mea e hinaarohia no teie maraaraa tamau, mea titauhia ia nenei i te mau Bibilia e te mau papai bibilia e ia hamani atoa i te mau Piha a te Basileia apî e te tahi atu â mau vahi haamoriraa. Nohea mai ïa te moni no te aufau i teie mau mea e hinaarohia? Mea horoa-noa-hia mai ïa ei ô.

No te veve i te tahi mau vahi o te fenua, mea rahi o te faaitoito ra i te horoa i te tahi mau mea e hinaarohia ia ora noa ˈˈe to ratou utuafare. Ia au i te vea New Scientist, hoê miria taata o te haamâuˈa e 70 aˈe i nia i te hanere o ta ratou moni no te hoo mai i te maa. Mea rahi o to tatou mau taeae e mau tuahine Kerisetiano i roto i taua huru tupuraa ra. Aita anaˈe te tauturu a te mau hoa faaroo, eita ïa e noaa mai ta ratou papai Kerisetiano aore ra Piha a te Basileia e tano.

Parau mau, e ere te auraa e te tiaturi ra ratou i nia ia vetahi ê no te amo i ta ratou hopoia. E hinaaro râ ratou i te tauturu. I to ˈna faaitoitoraa i te mau Iseraela ia horoa i te tahi mau ô materia no te haamauruuru ia Iehova no ta ratou mau haamaitairaa, teie ta Mose i parau: “E horoa te taata atoa i tei tia ia ˈna ra, i te maitai a to Atua a Iehova i horoa ˈtu ia oe ra.” (Deuteronomi 16:17) No reira, i to Iesu iteraa ˈtu i te hoê vahine ivi i te tuuraa “i na lepeta e piti” i roto i te hiero, ua arue oia ia ˈna i mua i ta ˈna mau pǐpǐ. Ua rave oia i tei maraa ia ˈna. (Luka 21:2, 3) Te rave atoa ra te mau Kerisetiano i roto i te mau huru tupuraa veve atu â i tei maraa ia ratou. Mai te peu e te vai ra te hoê fifi, e nehenehe te reira e faaafarohia maoti te mau ô a te mau hoa Kerisetiano e ere i te mea veve roa i te pae materia.—Korinetia 2, 8:13-15.

Ia faahoˈi tatou i ta Iehova na roto i teie mau ravea, mea faufaa ia na reira tatou ma te manaˈo maitai. (Korinetia 2, 8:12) Ua parau Paulo e: “E horoa te taata atoa i ta ˈna i opua i roto i to ˈna aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.” (Korinetia 2, 9:7) Ia horoa noa tatou ma te aau maitai, e turu ïa tatou i te maraaraa teotaratia e tupu nei i teie mahana e e faarahi tatou i to tatou oaoa.—Ohipa 20:35.

Te raveraa i te ohipa pororaa e te horoa-noa-raa i te mau ô, e nau ravea ïa e nehenehe ai tatou e faahoˈi i ta Iehova no te mau haamaitairaa ta ˈna e horoa maira na tatou. E mea faaitoito mau â ia ite e e hinaaro Iehova e ninii i ta ˈna haamaitairaa i nia e rave rahi atu â mau taata haavare ore tei ore paha i ite atura ia ˈna! (Petero 2, 3:9) No reira, e tamau noa anaˈe i te faaohipa i ta tatou mau ravea i roto i te taviniraa a te Atua ia itea mai ia tatou te feia aau haavare ore e ia tauturu ia ratou ia faahotu i te mau huru maitatai mai te auraro, te faaroo, e te mauruuru. Mea na reira ïa tatou e oaoa ˈi i te tauturu ia ratou ‘ia tamata e ia ite i te maitai o Iehova.’—Salamo 34:8.

[Tumu parau tarenihia i te mau api 28, 29]

Mau ravea taa ê no te horoa i te mau

Ô NO TE TURU I TE OHIPA PORORAA I TE AO NEI

Mea rahi o te tuu nei i te hiti aore ra o te faataa nei i roto i ta ratou tapura faufaa i te tahi moni no te tuu atu i roto i te mau afata ô tei papaihia i nia iho “Offrandes pour l’œuvre mondiale—Matthieu 24:14.”

I te mau avaˈe atoa, e hapono te mau amuiraa i te moni no roto mai i taua mau afata ra i te amaa fatata roa ˈˈe. E nehenehe atoa e hapono roa ˈtu i te hoê parau moni ei ô na te Betela. E tia ia papai i te hoê rata o te haponohia e taua mau ô ra no te faaite e e mau ô horoa noa tera.

MAU PARAU FAAAU NO TE HOROA I TE MONI

Ia au i te tahi mau faanahoraa taa ê, e nehenehe te hoê taata e horoa i te moni aita e apî na te hoê taatiraa faaohipahia e te Betela i ǒ tatou nei. *

TE TAHI ATU Â MAU RAVEA NO TE TURU I TE HAAMORIRAA

Ua rau te ravea no te horoa i te mau ô no te turu i te ohipa a te Basileia i te ao nei.

Mau ravea parururaa: E nehenehe e faataa teihea taatiraa faaroo aore ra taatiraa o te turu i te hoê haamoriraa i te pae moni, e fanaˈo i te hoê parau faaau parururaa.

Mau vairaa moni: E nehenehe te mau ô e tuuhia i nia i te hoê vairaa moni a te hoê taatiraa o te turu i te hoê haamoriraa aore ra te hoê taatiraa tauturu.

Mau faufaa maraa ore: I te tahi mau fenua, e nehenehe e horoa i te mau faufaa maraa ore ei ô na te mau taatiraa faatia-tamau-hia. E tia ia faaara ˈtu i te piha ohipa a te amaa hou e horoa ˈi i te mau faufaa maraa ore atoa ei ô.

Mau parau tutuu: E nehenehe te mau faufaa maraa ore aore ra te moni e tutuuhia na te hoê taatiraa o te turu i te hoê haamoriraa maoti te hoê parau tutuu haapapu-tamau-hia.

Hou e papai ai i te hoê parau tutuu, e tia i te taata ia hiˈo maitai i te tuhaa o ta ˈna mau faufaa ta ˈna e nehenehe e faaohipa mai ta ˈna e hinaaro. Mea titauhia ia afai te taata i ta ˈna parau tutuu i te hoê notera, mai te peu iho â râ e na ˈna iho i papai i te parau tutuu taatoa.

Mau ô no te turu i te mau ohipa: Ia au i te tahi mau titauraa, e nehenehe e horoa i te mau ô o te tauturu atu i te pae o te tute. I te fenua Farani, ei hiˈoraa, e nehenehe te mau ô o te horoahia na te mau taatiraa o te turu i te hoê haamoriraa e faaiti mai i te mau tute.

Mea titauhia ia feruri te taata horoa i te mau ravea rau e turu ai oia i te ohipa a te Basileia i te pae moni. I te mea e e ere hoê â huru tupuraa to te taatoaraa, mea titauhia paha ia ani i te mau haamaramaramaraa i te hoê notera aore ra te hoê taata aˈo aravihi. E nehenehe atoa e taniuniu aore ra e papai i te piha ohipa a ta outou amaa o te nehenehe e horoa mai i te mau haamaramaramaraa faufaa no nia anei i te tutuuraa e te tute i te pae o te mau ô e te mau ô tauturu.

[Nota i raro i te api]