Te parareraa o te riri

“Eita roa ˈtu e taa i te taata te feia ta ratou e riri ra.”—JAMES RUSSELL LOWELL, PAPAI BUKA E TIA HAU.

E AU ra e ua ati roa tatou i te riri i teie mahana. Ua puta roa te mau iˈoa mai te Timor Hitia o te râ, Kosovo, Liberia, Littleton, e Sarajevo—oia atoa te néo-Nazi, te skinhead (upoo hahuhia), e te feia e tiaturi e o te nunaa taata uouo te mea faahiahia roa ˈˈe—i roto i to tatou feruriraa mai te mau hohoˈa eita e moehia o te mau fare paapaa, te mau menema amui ô-apî-hia, e te mau tino pohe.

Ua pee ê te mau moemoeâ i te hoê tau a muri aˈe aita e riri, e aroraa e e haavîraa uˈana faahou. Te haamanaˈo ra o Danielle Mitterand, vahine a te peretiteni Farani i pohe, i to ˈna apîraa ra: “Te moemoeâ ra te taata i te hoê oraraa tiamâ i roto i te hoê totaiete autaeae ta ratou e nehenehe e tiaturi, i te fanaˈoraa i te hau o te feruriraa a ora ˈi e o vetahi ê; te moemoeâ ra ratou i te oraraa ma te ea maitai, te hau e te tura i roto i te hoê ao puai e te horoa maitai o te haapao mai ia ratou.” Teihea ˈtura ïa taua mau manaˈo maitai roa ra? Ua autâ oia e: “Afa senekele i muri aˈe, e tia ia fariihia e ua tinaihia ta matou moemoeâ.”

Eita roa ˈtu e nehenehe eiaha e ite atu i to teie nei tupu-apî-raa o te riri. Ua parare roa ˈtu â te reira, e te fa maira i roto i te mau huru taa maitai o te rahi noa ˈtura. Ua iti mai te manaˈo o te taata taitahi e eita oia e roohia i te ati e ta te mau mirioni taata e faariro ei mea mau iho â no te faraa mai te mau ohipa maamaa o te riri, o te riro ei mea riaria ˈtu â i to mua ˈtu. Noa ˈtu e aita tatou e farerei ra i te riri i te fare aore ra i to tatou fenua, te tiai maira te reira ia tatou i te tahi atu vahi. Te ite papu ra paha tatou i te reira i te mau mahana atoa i roto i te afata teata i roto i te mau parau apî. Ua tae roa atoa te tahi o te reira i roto i te Internet. E rave anaˈe i te tahi mau hiˈoraa.

I roto i na matahiti hoê ahuru i mairi, ua itehia te faraa mai te here aiˈa mai tei ore i itehia aˈenei. Ua tapao o Joseph S. Nye, taata faatere i te pu no te mau ohipa a te mau nunaa atoa no Harvard e: “Te puai roa ˈtura te here aiˈa i roto i te pae rahi o te ao nei, aita e paruparu atura. E ere te ao atoa i te hoê noa oire, e rave rahi râ oire na te ao atoa nei o te ite maite ra te tahi i te tahi. Na te reira râ e faarahi ra i te ravea e tupu ai te tamaˈi.”

Te vai ra te tahi atu mau huru riri huna aˈe, e tapuni ra i roto mai i te hoê fenua aore ra i roto noa iho i te feia tapiri. I to na skinhead e pae taparahi-pohe-raa i te hoê Sikh ruhiruhia i Kanada, ua “haamataratara” teie tupuraa “i ta te tahi pae e parau ra e fa-apî-raa mai o te mau taparahiraa taata no te riri i roto i te hoê fenua i haapopou-pinepine-hia na no to ˈna farii maitai i te nunaa ê.” I Helemani, i muri aˈe i te iti-tamau-raa mai i te mau matahiti i mairi atu, ua maraa mai te mau aroraa a te feia haerea uˈana roa i te nunaa ê i te faito e 27 % i te matahiti 1997. “E tupuraa faatoaruaru tera,” ta te Faatere hau no Roto ïa o Manfred Kanther i parau.

I Albanie apatoerau, ua faaite te hoê parau faataa e hau atu i te 6 000 tamarii tei riro ei tîtî mau i roto i to ratou iho fare no te mǎtaˈu e ia pupuhihia ratou e te mau enemi o to ratou utuafare. Te haapeapeahia ra teie mau tamarii no te peu tutuu a te tahoo, “tei faataupupu i te oraraa o te mau tausani utuafare.” I te mau Hau Amui, ia au i te  Federal Bureau of Investigation (FBI), “o te manaˈo ino i te nunaa ê te tumu o te hau atu i te afaraa o na 7 755 taparahiraa taata no te riri i faatupuhia i te matahiti 1998 tei faaitehia ˈtu i te FBI.” Te tahi o te mau tumu o te toea o te mau taparahiraa taata no te riri, o te manaˈo ino ïa i te haapaoraa, te opu taata aore ra te nunaa, e te mau paruparu.

Hau atu â, te faaite ra te mau upoo parau o te mau vea i te mau mahana atoa i te parareraa o te riaria i te nunaa ê, i te feia iho â râ no te fenua ê mai, tei hau atu i te 21 mirioni i teie nei. Te mea peapea, oia hoi e te rahiraa o te feia e faaite roa ra i te riri i nia i te feia ěê, o te mau taurearea ïa, e faaitoitohia ra e te feia politita aita e feruri ra e vetahi atu â o te imi i te tahi feia na ratou aˈe e amo i te hopoia. I roto i te tahi atu mau tapao o teie huru tupuraa aita e ite-maitai-hia ra, te vai ra te tiaturi ore, te farii ore e te faataaraa tumu ore i te huru o te taata mea ê ratou.

Eaha te tahi mau tumu o teie parareraa o te riri? Eaha te nehenehe e ravehia no te tinai i te riri? E tauaparau te tumu parau i muri nei i teie mau uiraa.

 [Faaiteraa i te fatu o te hohoˈa i te api 2]

Api matamua, i nia: UN PHOTO 186705/J. Isaac

[Faaiteraa i te fatu o te hohoˈa i te api 3]

Daud/Sipa Press