Aamu

Te tapea-noa-raa i te hoê oraraa ohie no te tavini ia Iehova

FAATIAHIA E CLARA GERBER MOYER

E 92 matahiti to ˈu e mea fifi roa no ˈu ia haere, area to ˈu feruriraa ra, mea maramarama maitai ïa e te tamau maitai i te mau mea. Te mauruuru mau â nei au i te fanaˈoraa i te haamaitairaa taa ê e tavini ia Iehova mai te tamarii-rii-raa mai â! Ua turu rahi roa mai te hoê oraraa ohie e te fifi ore i taua taoˈa faufaa roa ra.

UA FANAUHIA vau i te 18 no Atete 1907, i Alliance, i Ohio, i te mau Hau Amui no Marite, o vau te matahiapo o na tamarii e pae. I te vauraa o to ˈu matahiti, ua haere mai te hoê tavini ma te taime taatoa a te Feia haapii Bibilia, te iˈoa ïa o te mau Ite no Iehova i taua tau ra, i ta matou fare faateraa û na nia i te hoê pereoo taataahi. Ua farerei oia i to ˈu metua vahine, o Laura Gerber, i te uputa e ua ani oia e ua ite anei o ˈna no te aha te ino i faatia-noa-hia ˈi. Ua uiui noa na hoi Mama i te reira.

I muri aˈe i te aniraa ia Papa, tei roto hoi oia i te fare vairaa puaatoro, ua ani Mama i na buka e ono o te mau Études des Écritures. Ua taio oia ma te anaanatae rahi i teie mau buka e ua putapû roa oia i te mau parau mau Bibilia ta ˈna e haapii ra. Ua haapii oia i te Buka 6, La Nouvelle Création, e ua taa maitai ia ˈna te faufaaraa ia bapetizohia te hoê Kerisetiano i roto i te pape. No te mea aita oia i ite teihea te Feia haapii Bibilia, ua ani oia ia Papa e bapetizo ia ˈna i roto i te hoê anavai iti o te fare faaamuraa animala i te avaˈe Mati 1916, noa ˈtu e mea toetoe.

Aita i maoro roa i muri aˈe, ua ite Mama i te hoê parau pia i roto i te vea e faaite ra i te hoê oreroraa parau i te Daughters of Veterans Hall i Alliance. Teie te tumu parau o te oreroraa parau, “Te tabula anotau a te Atua.” Ua pahono oioi atura oia, i te mea e hoê â upoo parau to te Buka 1 o te mau Études des Écritures e te oreroraa parau. Ua faaineinehia te pereoo, e haere atura te utuafare taatoa i ta matou putuputuraa matamua na nia i te puaahorofenua e te pereoo. Mai reira mai, ua haere noa matou i te mau putuputuraa i te mau fare o te mau taeae i te mau po Sabati e Mahana toru. I muri iti  noa ˈˈe, ua bapetizo-faahou-hia Mama na te hoê tia o te amuiraa Kerisetiano. I te pae hopea, ua anaanatae atoa o Papa, e rohi noa ra i roto i te fare faaamuraa animala, i te haapii i te Bibilia, e ua bapetizohia oia tau matahiti i muri aˈe.

Te farereiraa i te mau aratai

I te 10 no Tiunu 1917, ua haere mai o J. F. Rutherford, te peretiteni o te Taiete Watch Tower i taua tau ra, i Alliance no te hohora i te tumu parau ra “No te aha te mau nunaa e tamaˈi ai?” E iva matahiti to ˈu i taua taime ra e ua haere matou, to ˈu mau metua e to ˈu na taeae e piti, o Willie e o Charles, i ta ˈna oreroraa parau. Ua hau atu i te hoê hanere taata tei tae mai. I muri aˈe i te oreroraa parau a Taeae Rutherford, ua patahia te hohoˈa o te rahiraa o te feia i tae mai i rapaeau i te Columbia Theater, i reira te hohoraraahia ta ˈna oreroraa parau. I te hebedoma i muri iho, i taua noâ vahi ra, na A. H. Macmillan i hohora i te hoê oreroraa parau i nia i te tumu parau ra “Te Basileia o te Atua no a muri aˈe.” E haamaitairaa mau â te haereraa mai teie mau taeae i to matou oire iti.

Te mau tairururaa matamua e ore e moehia

Ua tupu te tairururaa matamua ta ˈu i haere i te matahiti 1918 i Atwater, i Ohio, tau kilometera i te atea ia Alliance. Ua ani Mama i te tia a te Taiete i reira e ua naeahia anei to ˈu matahiti no te bapetizo ia ˈu. Ua manaˈo vau e ua rave au i te hoê euhe papu maitai i te Atua no te rave i to ˈna hinaaro, ua faatiahia ˈtura vau e bapetizo i taua mahana ra i roto i te hoê anavai iti i pihai iho i te hoê faaapu apara rahi. Ua taui au i to ˈu ahu i roto i te hoê fare ie ta te mau taeae i faatia no taua tumu ra e ua bapetizohia vau e te hoê ahu taotoraa tahito e te meumeu.

I te avaˈe Setepa 1919, ua haere matou to ˈu mau metua na nia i te pereoo auahi i Sandusky, i Ohio, i te Roto Érié. I reira, ua paiuma matou i nia i te hoê pahi, e i roto maa taime poto, ua tae matou i Cedar Point i reira ta matou mau tairururaa e ore e moehia e faatupuhia ˈi. I to matou pouraa mai nia mai i te pahi, te vai ra te hoê vahi tamaaraa nainai i nia i te uahu. E hamburger ta ˈu i amu, e maa faahiahia roa ïa no ˈu i taua tau ra. Auê te monamona e! E 7 000 taata tei tae mai i ta matou tairururaa e vau mahana. Aita hoi e ravea haapurororaa reo, ua tia ïa ia ˈu ia faaroo maitai.

I teie tairururaa te matararaa mai te vea apiti o Te Pare Tiairaa, oia hoi L’Âge d’Or (A ara mai na! i teie mahana). No te haere i taua tairururaa ra, ua mairi au i te hebedoma matamua o te haapiiraa, aita râ te reira i mâuˈa. Ua riro o Cedar Point ei vahi faafaaearaa, e e mau tutu ta ratou i te fare tamaaraa o te faaineine i te maa na te mau tia. No te tahi râ tumu, ua faaea te mau tutu maa e te mau tuati vahine i ta ratou ohipa, no reira na te mau taeae Kerisetiano ïa i haapao e i faaineine i te maa na te mau tia. E rave rahi ahuru matahiti i te maoro i muri aˈe, ua faaineine te nunaa o Iehova i ta ratou iho maa i te mau tairururaa.

Ua nehenehe atoa matou e hoˈi i Cedar Point i te avaˈe Setepa 1922 no te hoê tairururaa e iva mahana, hau atu i te 18 000 taata tei tae mai. I reira ïa to Taeae Rutherford faaitoitoraa ia matou ia ‘faaite, ia faaite, ia faaite i te Arii e to ˈna basileia.’ Ta ˈu iho râ taviniraa, ua haamata ïa na roto i te opereraa i te mau api parau iti e te vea ra L’Âge d’Or e rave rahi matahiti aˈenei.

Te mauruuru no te taviniraa

I te omuaraa o te matahiti 1918, ua apiti au i roto i te opereraa i te api parau iti ra La chute de Babylone i te mau vahi faaapuraa tapiri. No te toetoe hoi, e faaahu matou i te hoê stéatite i nia i te umu tahuhia i te vahie e a tuu atu ai i roto i te pereoo no te tamahanahana i to matou avae. E oomo matou i te mau pereue e te mau taupoo rarahi, i te mea e e tafare e e paruru i na pae e piti noa to te pereoo, aita râ e matini haamahanahana. E mau tau oaoa râ hoi te reira.

I te matahiti 1920, ua faaineinehia te hoê neneiraa taa ê o te buka ra Le Mystère de Dieu accompli, i parauhia te ZG, ei vea. * Ua opere matou to ˈu mau metua i teie papai i Alliance. I taua tau ra, hoê noa taata te haere mai i te opani, ua taiâ aˈera vau i to ˈu paiumaraa i nia i te hoê taupee mea rahi te taata e parahi ra. I muri aˈe i to ˈu hohoraraa i ta ˈu faaiteraa, ua na ô te hoê vahine e: “E oreroraa parau iti maitai roa ta ˈna i hohora mai,” e farii atura oia i te  vea. Ua vaiiho vau 13 ZG i taua mahana ra, a tahi ra vau i horoa ˈi i te hoê faaiteraa roa e te maramarama maitai na te mau fare.

Tei roto vau i te piha 3^ème i te tupuraahia Mama i te maˈi mahaha e ua tarava noa oia i nia i te roˈi hoê avaˈe hau i te maoro. E aiû noâ to ˈu tuahine hopea ra o Hazel, no reira, faarue atura vau i te haapiiraa no te tauturu i te raveraa i te ohipa faaamu animala e i te haapaoraa i te mau tamarii. Noa ˈtu râ, ua haafaufaa noa to matou utuafare i te parau mau Bibilia, e ua haere tamau noa matou i te mau putuputuraa atoa a te amuiraa.

I te matahiti 1928, i te oroa Haamanaˈoraa i te poheraa o te Mesia, ua horoahia te hoê api parau iti ra “Où sont les neufs?” (Beretane) na te feia atoa i tae mai. E tuatapaparaa teie i te Luka 17:11-19, te na ô ra te Bibilia e hoê anaˈe o na lepera hoê ahuru i tamâhia, tei haamauruuru ma te haehaa ia Iesu no te faaoraraa semeio. Ua putapû roa to ˈu mafatu. Ua uiui au e, ‘Te mauruuru ra anei au?’

I te mea e ua afaro mai te mau mea i te fare e mea oraora maitai au e te fifi ore, ua faaoti aˈera vau e faarue i te fare e e rave i te taviniraa pionie, te taviniraa ma te taime taatoa i teie nei. Ua faaitoito mai to ˈu mau metua ia ˈu. No reira, ua noaa mai ta mâua to ˈu apiti, o Agnes Aleta, tuhaa taviniraa, e i te 28 no Atete 1928, ua rave mâua i te hoê pereoo auahi i te hora 9 i te po. Hoê anaˈe ta mâua taitahi pute ahu e te hoê pute no te tari i ta mâua mau papai Bibilia. I te tapearaa pereoo auahi, te taˈi ra to ˈu mau tuahine e mau metua, e o mâua atoa. Ua manaˈo vau e e ore roa ˈtu matou e farerei faahou, i te mea ua manaˈo matou e te piri maira o Aramagedo. Ia poipoi aˈe, ua tae mâua i ta mâua tuhaa taviniraa i Brooksville, i Kentucky.

Ua tarahu mâua i te hoê piha iti i roto i te hoê fare fetii, ua hoo mai i te mau punu spaghetti e ua hamani atoa i te faraoa inaˈi na mâua. I te mahana taitahi, mea ê to mâua haereraa, e poro vau i to ˈu pae e to ˈu hoa i to ˈna pae ma te opere na te mau taata e pae buka tahoêhia no te hoê tino moni 1,98 dala Marite. Ua poro mǎrû noa mâua i te oire taatoa, ma te farerei e rave rahi taata i anaanatae i te Bibilia.

I roto fatata e toru avaˈe, ua farerei mâua i te taata atoa i roto e ati aˈe ia Brooksville e ia Augusta. Ua haere atura mâua e poro i te mau oire no Maysville, Paris, e Richmond. I te roaraa o na matahiti e toru i muri iho, ua poro mâua i roto e rave rahi mataeinaa i Kentucky, aita hoi e amuiraa i reira. E pinepine mâua i te tauturuhia e te mau hoa e te mau melo utuafare no Ohio i tere mai no te apiti i roto i te taviniraa hoê hebedoma aore ra hau atu i te maoro i te tahi mau taime.

Te tahi atu â mau tairururaa e ore e moehia

Eita mau â e moehia te tairururaa i tupu i Columbus, i Ohio, mai te 24 e tae atu i te 30 no Tiurai 1931. I reira te faaararaahia e e parauhia matou te mau Ite no Iehova, te hoê iˈoa Bibilia. (Isaia 43:12) Na mua ˈˈe i te reira, ia ui mai te taata eaha ta matou haapaoraa, e parau matou e, “Feia haapii Bibilia na te mau nunaa atoa.” Aita râ te reira i faataa ê maitai ia matou, i te mea e te vai ra te tahi feia haapii Bibilia e amui ra i te tahi atu â mau pǔpǔ faaroo huru rau.

Ua faaipoipo to ˈu hoa pionie, o Agnes, e o vau anaˈe tei toe mai; no reira, ua oaoa roa vau i te faaararaahia e e tia i te feia e imi ra i te hoê apiti pionie ia haere atu i te hoê vahi. I reira, ua farerei au ia Bertha, ia Elsie Garty e ia Bessie Ensminger. E piti pereoo to ratou e te imi ra ratou i te maha o te tuahine pionie no te poro e o ratou. Ua faarue matou pauroa i te tairururaa noa ˈtu e aita matou i farerei aˈenei.

I te tau veavea, ua poro matou na roto i te hau no Pennsylvanie. I muri aˈe, a piri mai ai te tau toetoe, ua ani matou i te tahi mau tuhaa taviniraa i te pae apatoa i te mau hau mahanahana aˈe no Caroline Apatoerau, Virginie, e Maryland. I te tau uaaraa tiare, ua hoˈi matou i te pae apatoerau. E peu matauhia teie e te mau pionie i taua tau ra. I te matahiti 1934, ua rave o John Booth raua Rudolph Abbuhl, o tei matau i teie peu, ia Ralph Moyer e to ˈna taeae apî aˈe o Willard, na muri ia raua e ua haere ratou i Hazard, i Kentucky.

Mea rahi te taime to ˈu farereiraa ia Ralph, e ua matau maitai aˈe mâua i te roaraa o te tairururaa rahi i tupu i te oire no Washington, mai te 30 no Me e tae atu i te 3 no Tiunu 1935. I pihai iho vau ia Ralph i te parahiraa i nia i te taupee iti i te hohoraraahia te oreroraa parau i te “nahoa rahi,” aore ra te “feia rahi roa.” (Apokalupo 7:9-14) E tae roa mai i taua taime ra, ua tiaturi matou e o to te nahoa rahi te mau melo o te hoê pǔpǔ no te raˈi, mea  iti aˈe to ratou haapao maitai i to te mau 144 000. (Apokalupo 14:1-3) No reira, aita vau i hinaaro e riro mai ia ratou!

I to Taeae Rutherford faataaraa e e pǔpǔ taata haapao maitai i te fenua nei to te nahoa rahi, o te ora ˈtu ia Aramagedo, mea rahi tei maere. I muri iho, ua ani oia i to te nahoa rahi atoa ia tia i nia. O Ralph tei tia, aita râ vau. I muri aˈe, ua maramarama ˈtu â te mau mea i roto i to ˈu feruriraa, no reira te matahiti 1935 i riro ai ei matahiti hopea o to ˈu raveraa i te pane e te uaina i te oroa Haamanaˈoraa i te poheraa o te Mesia. O Mama râ, ua tamau noa ïa i te rave i te mau taipe e tae noa ˈtu i to ˈna poheraa i te avaˈe Novema 1957.

Te hoê apiti tamau

Ua tamau noa mâua Ralph i te papai te tahi i te tahi. Te tavini ra vau i Lake Placid, i New York, e o ˈna i Pennsylvanie. I te matahiti 1936, ua hamani oia i te hoê fare tavere ta to ˈna pereoo e nehenehe e tavere. Ua haere oia mai Pottstown atu, i Pennsylvanie, i Newark, i New Jersey, no te tairururaa i reira mai te 16 e tae atu i te 18 no Atopa. I muri aˈe i te porotarama i te hoê po, mea rahi matou te mau pionie tei haere e hiˈo i te fare tavere apî o Ralph. Te parahi ra mâua i roto i te fare tavere i pihai iho i te horoiraa mata nainai, ua ani maira oia e, “Mea au anei na oe te fare tavere?”

I to ˈu pahonoraa e, ma te tairiiri i te upoo, ua ani mai oia e, “E hinaaro anei oe e faaea i roto?”

“E,” ta ˈu ïa i pahono, e ua apa mǎrû maira oia ia ˈu, o te ore roa e moehia ia ˈu. Tau mahana i muri aˈe, ua noaa mai ta mâua parau faatia no te faaipoipo. I te 19 no Atopa, te mahana i muri aˈe i te tairururaa, ua haere mâua i Brooklyn e mataitai i te fare neneiraa a te Taiete Watch Tower. I muri iho, ua ani mâua i te hoê tuhaa fenua no te taviniraa. Na Grant Suiter e haapao ra i te mau tuhaa fenua, e ua ani mai oia o vai te haere i ǒ. Na ô atura o Ralph e, “O mâua mai te peu e e nehenehe mâua e faaipoipo.”

“Mai te peu e e hoˈi mai orua i te hora 5 i te ahiahi, e nehenehe tatou e faanaho i te reira,” ta Taeae Suiter ïa i pahono mai. No reira, ua faaipoipo mâua i taua po ra i te fare o te hoê Ite i Brooklyn Heights. Ua tamaa mâua e te tahi mau hoa i te hoê fare tamaaraa no reira e i muri iho, ua rave mâua i te hoê pereoo uta taata no te hoˈi i te fare tavere o Ralph i Newark, i New Jersey.

I muri iti noa ˈˈe, ua tere mâua i Heathsville, i Virginie, ta mâua tuhaa taviniraa pionie matamua. Ua poro mâua i Northumberland County e ua haere atu i te mau mataeinaa no Fulton e Franklin i Pennsylvanie. I te matahiti 1939, ua anihia ia Ralph e rave i te ohipa no te tuhaa fenua, e tere ïa mâua i roto e rave rahi amuiraa ma te faaohu noa. Ua haapao mâua i te mau amuiraa i te hau no Tennessee. I te matahiti i muri iho, ua fanauhia mai ta mâua tamaiti, o Allen, e i te matahiti 1941, ua mau te ohipa no te tuhaa fenua. Ua tonohia mâua i muri iho i Marion, i Virginie, ei pionie taa ê. I taua tau ra, e titauhia ïa e 200 hora i te avaˈe i roto i te taviniraa.

Te raveraa i te tahi mau tauiraa

I te matahiti 1943, ua hiˈo aˈera vau e mea tia ia vaiiho vau i te taviniraa pionie taa ê. Te faaearaa i roto i te hoê fare tavere nainai, te haapaoraa i te  hoê aiû, te faaineineraa i te maa, te puˈaraa i to matou atoa mau ahu, e te raveraa fatata e 60 hora i roto i te taviniraa i te avaˈe, tera noa ïa tei maraa ia ˈu. Ua tamau noa râ o Ralph i te taviniraa pionie taa ê.

Ua hoˈi mâua i Alliance, i Ohio, i te matahiti 1945, ua hoo i to mâua fare tavere ta mâua i faaea e iva matahiti i te maoro, e ua noho i roto i te fare o to ˈu mau metua. I reira ïa i nia i te taupee mua to ta mâua tamahine, o Rebekah, fanauraahia. Ua rave o Ralph i te ohipa afa taime i te oire e ua tamau noa i te taviniraa pionie tamau. Ua haa vau i roto i te fare faaamuraa animala e ua rave au i ta ˈu e nehenehe no te tauturu ia ˈna ia tamau noa i te taviniraa pionie. Noa ˈtu e ua pûpû mai to ˈu utuafare i te hoê tâpû fenua e te hoê fare ma te tamoni ore, aita o Ralph i farii. Aita oia i hinaaro ia fifihia matou, a nehenehe atu ai matou e haapao hau atu â i te mau faufaa a te Basileia.

I te matahiti 1950, ua haere matou e faaea i Pottstown, i Pennsylvanie, e ua tarahu i te hoê fare e 25 dala Marite i te avaˈe. I te roaraa o na matahiti e 30 i muri iho, ua maraa te tarahu i nia noa i te 75 dala Marite. Ua taa ia mâua e te tauturu maira Iehova ia tapea noa mâua i te hoê oraraa ohie. (Mataio 6:31-33) E rave o Ralph i te ohipa tâpû rouru e toru mahana i te hebedoma. I te mau hebedoma atoa, e haapii mâua i te Bibilia i ta mâua na tamarii e piti, e haere matou i te mau putuputuraa a te amuiraa e e poro i te parau apî maitai o te Basileia ei utuafare. Ua tavini o Ralph ei tiaau peretiteni i te amuiraa no reira. Na roto i te tapea-noa-raa i to mâua oraraa ohie, ua nehenehe mâua e rave hau atu â i roto i te taviniraa a Iehova.

Te poheraa ta ˈu tane here

I te 17 no Me 1981, te parahi ra matou i roto i te Piha a te Basileia, a faaroo noa ˈi i te hoê oreroraa parau huiraatira. Ua mauiui aˈera o Ralph, haere atura oia i muri i te piha, e horoa ihora i te hoê parau faaite i te hoê taata i reira o te faaara mai ia ˈu e te hoˈi ra oia i te fare. I te mea e aita o Ralph i na reira aˈenei, ua ani au i te hoê taata e faahoro oioi ia ˈu i te fare. Ua pohe o Ralph i te hoê apoplexie puai i roto hoê noa hora. I te otiraa te haapiiraa o Te Pare Tiairaa i taua poipoi ra, ua faaarahia ˈtura te amuiraa e ua pohe oia.

Ua rave aˈena o Ralph i taua avaˈe ra hau atu i te 50 hora i roto i te taviniraa. Hau atu i te 46 matahiti i te maoro to ˈna raveraa i ta ˈna toroa ma te taime taatoa ei pionie. Ua faatere oia i te mau haapiiraa Bibilia e hau atu i te hoê hanere taata, o tei riro mai i muri iho ei Ite no Iehova bapetizohia. Mea hoona aˈe te mau haamaitairaa pae varua ta mâua i fanaˈo i te mau haapaeraa atoa ta mâua i rave i te roaraa o te mau matahiti.

Te mauruuru no ta ˈu mau haamaitairaa taa ê

I na 18 matahiti i mairi aˈenei, ua ora noa vau o vau anaˈe, ma te haere i te mau putuputuraa, te pororaa ia vetahi ê ia au i tei maraa ia ˈu, e te haapiiraa i te Parau a te Atua. I teie nei, te faaea ra vau i roto i te hoê fare faatufaraa o te ruhiruhia. Aita i rahi ta ˈu mau tauihaa e ua maiti au eiaha e rave i te afata teata. E oraraa î maitai e te faahiahia râ to ˈu i te pae varua. Ua tapea noa to ˈu mau metua e to ˈu na taeae e piti i to ratou haapao maitai e tae noa ˈtu i to ratou poheraa, e tei roto noa to ˈu na tuahine e piti i te parau mau ma te taiva ore.

Te oaoa nei au e te tavini ra ta ˈu tamaiti o Allen ei matahiapo Kerisetiano. E rave rahi matahiti to ˈna tamaumauraa i te mau ravea haapuroro reo i roto i te Piha a te Basileia, i te Piha Tairururaa, e no te mau tairururaa i te tau veavea. E tavini taiva ore ta ˈna vahine i te Atua, e e matahiapo ta raua na tamaiti e piti. Hau atu i te 35 matahiti to ta ˈu tamahine o Rebekah Karres taviniraa ma te taime taatoa, tae noa ˈtu e maha matahiti i te pu rahi a te mau Ite no Iehova i Brooklyn. I na matahiti e 25 i mairi aˈenei, ua haa raua ta ˈna tane i roto i te ohipa ratere i roto e rave rau tuhaa fenua o te mau Hau Amui no Marite.

Ua parau Iesu e e au te Basileia i te hoê taoˈa faufaa roa i hunahia o te nehenehe e itehia. (Mataio 13:44) Te mauruuru nei au e ua itea i to ˈu utuafare taua taoˈa faufaa roa ra ehia matahiti aˈenei. Auê ïa haamaitairaa e haamanaˈo i na matahiti e 80 i roto i te taviniraa i te Atua—ma te ore e tatarahapa! Ahiri e e nehenehe ta ˈu e ora faahou i to ˈu oraraa, e na reira faahou â vau no te mea ‘e maitai rahi to te hamani maitai o te Atua i te ora.’—Salamo 63:3.

[Nota i raro i te api]

[Hohoˈa i te api 23]

Te faaroo ra matou i te oreroraa parau a Taeae Rutherford i te matahiti 1917 i Alliance, i Ohio

[Hohoˈa i te api 23]

E o Ralph i mua i te fare tavere ta ˈna i hamani

[Hohoˈa i te api 24]

E ta ˈu na tamarii e piti i teie mahana