A TUPU AI TE ATI, UA UI AˈENA ANEI OE: “NO TE AHA AITA TE ATUA I OHIPA ˈI?” AORE RA UA TUPU AˈENA ANEI TE HOÊ ATI I ROTO I TO OE ORARAA A UI ATU AI TE HAAPAO RA ANEI TE ATUA IA OE IHO?

Peneiaˈe e tu to oe manaˈo e to Sheila tei ora i te Hau Amui. Ua paari oia i roto i te hoê utuafare faaroo. Ua parau oia: “Mai to ˈu nainairaa, ua haapii au no nia i te Atua no te mea oia to tatou Atua poiete. Teie râ, aita roa ˈtu vau i faatupu i te auhoaraa piri e o ˈna. No ˈu, te hiˈo ra oia ia ˈu, na te atea noa râ. Aita vau i manaˈo e te riri ra te Atua ia ˈu. Aita atoa râ vau i tiaturi e te tâuˈa mai ra oia ia ˈu.” No te aha e ere i te mea papu no Sheila e te here ra te Atua ia ˈna? Te faataa ra oia: “Ua faaruru to ˈu utuafare e rave rahi ati e e au ra e aita te Atua i tauturu aˈe ia tatou.”

Mai ia Sheila, mea papu paha ia oe e te vai ra te hoê Atua Mana hope. Tera râ, te ui ra paha oe te haapao mai ra anei oia ia oe. Hoê â uiraa to te taata parau-tia o Ioba, tei faatupu i te faaroo i te puai e te paari o te Atua poiete. (Ioba 2:3; 9:4) Ua faaruru o Ioba hoê ati i muri i te tahi e e au ra e aita te reira e mou. Ua ani oia i te Atua: “Eaha hoi oe i huna ˈi i to mata, e i haapao mai ai oe ia ˈu ei enemi no oe?”—Ioba 13:24.

Eaha ta te Bibilia e parau ra? O te Atua anei te mea tano ia faahapahia no to tatou mau fifi? Te vai ra anei te mau haapapuraa e te tâuˈa ra te Atua i te mau taata atoa e ia tatou taitahi? E nehenehe anei tatou taitahi e ite te haapao ra anei te Atua ia tatou, te taa ra anei o ˈna i to tatou huru mau e te tauturu ra anei oia ia tatou i mua i te fifi?

I to muri nei mau tumu parau, e hiˈopoa tatou eaha ta te poieteraa e haapii mai ra no nia i te huru o te Atua i nia ia tatou. (Roma 1:20) I muri iho, e hiˈo tatou eaha ta te Bibilia e parau ra no nia i te reira. Hau atu oe e ite ai “o vai o ˈna” maoti ta ˈna i poiete e ta ˈna Parau, hau atu oe e papu ai e “te tâuˈa mai ra oia” ia oe.—Ioane 1, 2:3; Petero 1, 5:7.