1. No te aha e ere i te mea ohie no vetahi ia rave i ta ratou iho haapiiraa Bibilia?

 MEA fifi te oraraa i teie mau mahana hopea! No te faatamaa i to ratou utuafare, te ohipa nei te tahi mau taeae e rave rahi hora, te tere nei vetahi na nia i te pereoo i te vahi atea, area te tahi atu e ohipa rohirohi mau ïa ta ratou. Ia hope te mahana, ua rohirohi roa tera mau taeae e tuahine! E ere atura ïa i te mea ohie ia rave i ta ratou iho haapiiraa Bibilia.

2. Eaha te taime ta outou i maiti no te haapii i te Bibilia?

² E titauhia ia faaherehere i te taime no te haapii maite i te Parau a te Atua e te mau papai Kerisetiano. Mea faufaa te reira no te vai piri noa ia Iehova e no te fanaˈo i te ora mure ore. (Tim. 1, 4:15, 16) I te mau mahana atoa, e ara oioi vetahi no te haapii i te Bibilia, e taime tano no te feruri maite e aita e maniania i te fare. No te tahi atu, e rave ratou maa minuti i te hopea mahana no te haapii e no te feruriruri.

3-4. Eaha te tahi mau faanahoraa i ravehia no nia i ta tatou mau papai e no te aha?

³ E titauhia ia faaherehere i te taime, mea faufaa atoa râ ta tatou e maiti i te haapii. Te vai ra te tahi mau taeae e tuahine o te taio pauroa nei i te maa pae varua. E na ô râ paha outou, ‘Eita e pau ia taio i te mau papai atoa!’ Ua ite te Tino aratai i te reira, faaoti atura ratou i te faaiti mai i te mau papai.

 ⁴ Ei hiˈoraa, ua faaea te faanahonahoraa i te pia i te Buka matahiti a te mau Ite no Iehova. E nehenehe râ e taio e e mataitai i te mau aamu faaitoito mau i nia i te jw.org^® aore ra i te JW Haapurororaa teata. I teie nei, e toru anaˈe Pare Tiairaa e A ara mai na! te matara i te matahiti hoê. Aita tera mau faanahoraa i ravehia ia horoa tatou i te taime i roto i te tahi atu mau ohipa. Ua na reirahia râ ia haapao maite tatou “eaha te mea faufaa roa ˈˈe”! (Phil. 1:10) E hiˈo anaˈe e nafea ia taa maitai eaha te tuu i te parahiraa matamua e e nafea tatou ia faufaahia i ta tatou iho haapiiraa Bibilia.

5-6. Eaha te mau papai te titauhia ia haafaufaa i roto i ta tatou iho haapiiraa Bibilia?

⁵ Eaha te titauhia ia haafaufaa na mua? O te haapiiraa ïa i te Parau a te Atua i te mau mahana atoa. Ua faaitihia mai te mau pene o te taioraa Bibilia o te putuputuraa o te hebedoma. E taime rahi atu â ïa to tatou no te feruriruri e no te rave i te mau maimiraa. Eita râ e navai noa ia taio, mea faufaa atoa ia putapû to tatou aau i te poroi Bibilia a piri roa ˈtu ai tatou ia Iehova.—Sal. 19:14.

⁶ Eaha ˈtu â te faaô i roto i ta tatou iho haapiiraa Bibilia? Mea faufaa atoa ia faaineine no te mau putuputuraa atoa mai te Haapiiraa o Te Pare Tiairaa, te Haapiiraa Bibilia a te amuiraa e te tahi atu mau tuhaa o te putuputuraa. E titau-atoa-hia ia taio i te mau Pare Tiaraa e A ara mai na! atoa.

7. E nafea ia ore e tia ia tatou ia taio i te mau mea atoa i nia i ta tatou tahua natirara jw.org e te JW Haapurororaa teata?

⁷ E na ô paha outou, ‘Mea rahi atoa te titauhia ia taio e ia mataitai i nia i ta tatou tahua natirara jw.org e te JW Haapurororaa teata!’ A feruri na i teie faahohoˈaraa: Ia haere outou i te fare tamaaraa e rave rahi maa te tuuhia i nia i te airaa maa. Eita iho â te hoani e nehenehe e amu i te mau maa atoa. E maiti râ ratou i te amu tau maa rii noa. I nia i ta tatou mau reni, eita atoa e tia ia tatou ia amu i te maa pae varua atoa e pûpûhia mai. Na tatou iho ïa e hiˈo eaha te taio e te mataitai ia au i te maraa ia tatou. I teie nei, e hiˈopoa anaˈe i te tahi mau manaˈo tauturu no te haamaitai atu â i ta tatou iho haapiiraa ia faufaahia tatou i te reira.

8. Eaha te tahi mau manaˈo tauturu no te faaineine i te Haapiiraa o Te Pare Tiairaa e e nafea tatou e faufaahia ˈi ia na reira?

⁸ Ia faufaahia tatou, eita e navai noa ia taio e ia reni i te mau pahonoraa. E titau-atoa-hia ia feruri maite i ta tatou e haapii ra. Ia faaineine outou i te Haapiiraa o Te Pare Tiairaa, a taio na mua i te haapotoraa i te omuaraa o te tumu parau. Ia oti, a feruri i te upoo parau, te mau upoo parau iti e te mau uiraa haamanaˈoraa. A taio maite ai  i te haapiiraa, a feruri i te manaˈo faufaa e matara mai ra i roto i te paratarafa tataitahi. A tamata atoa i te taa e nafea te paratarafa e tuati ai i te upoo parau iti e i te manaˈo tumu o te haapiiraa. A tapaopao i te mau taˈo matau-ore-hia e te mau manaˈo e titauhia ia rave i te maimiraa.

9. (a) No te aha e e nafea ia haapao maite i te mau irava e horoahia i roto i Te Pare Tiairaa? (b) Ia au i te Iosua 1:8, eaha te titau-atoa-hia ia rave a taio ai i te mau irava Bibilia?

⁹ E haapiiraa Bibilia te Haapiiraa o Te Pare Tiairaa. A haapao maite ïa i te mau irava Bibilia e horoahia, te mau irava iho â râ e taiohia i mua i te amuiraa. I roto i te mau irava atoa, a imi eaha te mau parau e turu ra i te manaˈo faufaa o te paratarafa. A feruri maite atoa e nafea ia faaohipa i ta outou i haapii mai i roto i to outou oraraa.—A taio i te Iosua 1:8.

10. Ia au i te Hebera 5:14, no te aha e titauhia ia faaite i te tamarii e nafea ia haapii ia ratou iho e ia rave i te maimiraa?

¹⁰ E hinaaro te mau metua ia oaoa ta ratou tamarii i te haamoriraa utuafare. E faaineine atea te mau metua i ta ratou e rave i tera arui, eita râ e titauhia i te hoê faanahoraa taa ê i te mau hebedoma atoa. E nehenehe hoi e mataitai i te JW Haapurororaa teata e i te tahi atu taime, e faatupu i te hoê ohipa taa maitai mai te hamaniraa i te araka o Noa. Mea faufaa atoa hoi ia faaite i te mau tamarii e nafea ia haapii ia ratou iho. E nafea ia faaineine no te mau putuputuraa aore ra ia rave i te maimiraa no te tahi tupuraa i te fare haapiiraa. (A taio i te Hebera 5:14.) Ia matau ratou i te haapii ia ratou iho i te fare, mea ohie no te tamarii ia pee maite i te mau putuputuraa e tairururaa. E titauhia ia haapao i te faito matahiti e te huru o te tamarii no te faaoti i te maoro o te haapiiraa.

11. No te aha mea faufaa ia faaite i te piahi e nafea ia haapii ia ˈna iho?

¹¹ E titau-atoa-hia ia faaite i ta tatou piahi e nafea ia haapii ia ˈna iho. I te omuaraa, e mauruuru tatou ia reni noa oia i te pahonoraa no ta ˈna haapiiraa  aore ra no te mau putuputuraa. Mea faufaa roa râ ia ite atoa te piahi e nafea ia rave i te maimiraa e i ta ˈna iho haapiiraa Bibilia. Ia tupu noa ˈtu te hoê fifi, e rave na mua oia i te maimiraa i roto i te mau papai Kerisetiano hou a ani ai i te tauturu i te mau taeae e tuahine.

12. Eaha te tahi mau fa ta tatou e nehenehe e haamau a rave ai i ta tatou iho haapiiraa?

¹² Eiaha e haaparuparu e ere anaˈe outou i te taata o te au i te haapii. I te omuaraa a haapoto mai i te taime o ta outou haapiiraa a faaroa rii mǎrû noa ˈtu ai i te reira i muri aˈe. Ua ite tatou te fa matamua o ta tatou iho haapiiraa, no te piri roa ˈtu â ïa ia Iehova. Mea maitai atoa ia haamau i te tahi atu fa e naea oioi ia tatou mai te imiraa i te pahonoraa i te hoê uiraa aore ra i te hoê ravea no te faaafaro i te hoê fifi.

13. (a) A faaite e nafea te feia apî ia faataa ia vetahi ê i ta ratou e tiaturi ra. (b) E nafea ia haapao i te aˈoraa i roto i te Kolosa 4:6?

¹³ E te feia apî, eita e ore te faatupu ra te tahi mau hoa haapiiraa i to ratou oroa fanauraa. E hinaaro paha outou e faaohipa i te Bibilia no te faataa i te tumu e ore ai outou e apiti atu, na te taiâ râ e tapea ra ia outou. E tumu parau maitai tera no ta outou iho haapiiraa Bibilia! E nehenehe outou e haamau e piti fa: (1) Ia papu atu â ia outou mea au ore na te Atua te oroa fanauraa. (2) Ia aravihi atu â outou i te paturu i te parau mau. (Roma 1:20; Pet. 1, 3:15) E ere i te mea ohie ia faataa i ta outou e tiaturi ra, eaha ïa te tauturu atu? A feruri na mua no te aha to outou mau hoa haapiiraa e au ai i tera oroa. E ere anei no te pee noa i te rahiraa? A rave i ta outou iho maimiraa. E nehenehe te mau hoa haavare ore e mauruuru i te hoê aore ra e piti noa manaˈo.—A taio i te Kolosa 4:6.

14-16. (a) E nafea outou a hiˈopoahia ˈi te hoê buka ta outou i ore i matau maitai? (b) Ia au i te mau irava faahitihia, e nafea ia taa papu atu â i te buka Amosa? (A hiˈo atoa i te tumu parau “ A haamatau atu â ia ratou!”)

¹⁴ A feruri na! I te putuputuraa i mua nei, e hiˈopoahia te hoê buka Bibilia ta outou i ore i matau maitai. E nafea outou?

¹⁵ A ui na mua ia outou, ‘Eaha ta ˈu i ite no nia i te taata papai? O vai o ˈna? Ihea o ˈna i te faaearaa? Eaha te mau ohipa ta ˈna i rave?’ E nehenehe ïa outou e taa no te aha oia i faahiti ai i te tahi parau aore ra faahohoˈaraa. A taio ai i tera buka, a imi i te mau parau e tauturu ia outou ia taa i te huru o te taata papai.

¹⁶ Mea maitai atoa ia ite afea tera buka i te papairaahia. A hiˈo i te “Tapura buka Bibilia” i te hopea o te Traduction du monde nouveau. Mai te peu e buka papaihia e te hoê peropheta, e nehenehe atoa e hiˈo i te tuhaa hau A6 no nia i te mau peropheta e arii no Iseraela. A imi eaha te tupuraa  i te tau i papai ai o ˈna i tera buka. Eaha te mau peu iino ta te peropheta i faahapa? O vai tei ora atoa na i te hoê â tau? E titau-atoa-hia paha ia hiˈopoa i te tahi atu mau buka Bibilia. Ei hiˈoraa, no te ite eaha tei tupu i te tau o te peropheta Amosa, e titauhia ia taio atoa i Te mau arii 2 e te Paraleipomeno 2.—Arii 2, 14:25-28; Par. 2, 26:1-15; Hos. 1:1-11; Am. 1:1.

17-18. Maoti na hiˈoraa o te paratarafa aore ra te tahi atu, a faataa na e nafea tatou e faufaahia ˈi i te mau tuhaa rii o te mau irava Bibilia.

¹⁷ Mea faufaa ia taio i te Bibilia ma te imi maite i te mau poe pae varua. A feruri na te taio ra outou i te pene 12 o te buka Zekaria tei tohu no nia i te pohe o te Mesia. (Zek. 12:10) I te irava 12, te tohuhia ra e oto “te fetii o Natana” ia pohe te Mesia. A faaea rii maa taime e a uiui, ‘E auraa fetii anei to Natana e te Mesia? E nafea ia papu?’ Haamanaˈo ihora outou ua tohuhia e huaai Iesu na Davida. (Mat. 22:42) E 20 râ tamaiti ta Davida, te taa ra ïa ia outou no te aha Zekaria i faahiti maitai ai o te fetii o Natana te oto mau â i te poheraa o Iesu. *

 ¹⁸ Teie te tahi atu hiˈoraa. I te pene 1 o te evanelia a Luka, teie ta te melahi Gaberiela i parau ia Maria no nia i te tamaiti i roto i to ˈna opu: “E riro oia ei taata faufaa e e parauhia oia Tamaiti a te Teitei, e e horoa te Atua ra o Iehova i te terono o Davida to ˈna metua no ˈna, e faatere oia ei Arii i nia i te utuafare o Iakoba e a muri noa ˈtu.” (Luka 1:32, 33) E faaea noa paha outou i nia i te tuhaa matamua, i te parauraahia “Tamaiti a te Teitei.” A tapao atoa râ ua tohu Gaberiela e faatere Iesu “ei Arii.” E uiraa te hiti mai i teie mau tuhaa rii: Ua manaˈo anei Maria e mono Iesu i te arii Heroda o tei faatere na ia Iseraela? Mai te peu e e, ua manaˈo paha ïa Maria e metua vahine hui arii oia e e ora to ˈna utuafare i roto i te aorai! Aita râ rea parau e faaite ra ua paraparau Maria mai tera ia Gaberiela! Aita atoa Maria i titau i te hoê tiaraa faahiahia i roto i te Faatereraa arii mai na pǐpǐ e piti a Iesu. (Mat. 20:20-23) E ere anei Maria i te vahine haehaa mau?

19-20. Ia au i te Iakobo 1:22-25 e te 4:8, e tauturu mai ta tatou iho haapiiraa ia aha?

¹⁹ E tauturu mai ta tatou iho haapiiraa Bibilia e te mau papai Kerisetiano ia faafatata ˈtu â ia Iehova. E faufaa-mau-hia tatou ia taparu i to Iehova varua moˈa no te ite i to tatou “huru mau” e te mau tauiraa atoa e titauhia ia rave ia here noa mai oia ia tatou.—A taio i te Iakobo 1:22-25; 4:8.

²⁰ Mai ta te papai Salamo e faahiti ra, ia riro ïa tatou paatoa ei taata o “tei hinaaro . . . i te ture a Iehova; e tei ta ˈna ture to ˈna manaˈoraa i te rui e te ao. . . . O ta ˈna atoa e rave ra, te maitai ra ïa.”—Sal. 1:2, 3.