1. No te aha e titauhia ia auraro tatou ia Iehova?

 NO TE aha e titauhia ia auraro * tatou ia Iehova? No te mea o ˈna to tatou Atua poiete, e mana ïa to ˈna no te titau mai ia haapao i ta ˈna mau ture aveia. (Apo. 4:11) Te tahi atu tumu, ta ˈna anaˈe te faatereraa maitai aˈe. I te roaraa o te tau, e rave rahi feia mana tei faatere i te taata. Ia hiˈohia râ, o Iehova te faatere paari roa ˈˈe, tei î i te here e te aroha hamani maitai.—Exo. 34:6; Roma 16:27; Ioa. 1, 4:8.

2. Ia au i te Hebera 12:9-11, eaha te mau tumu e auraro ai tatou ia Iehova?

² Te hinaaro ra Iehova ia auraro tatou ia ˈna no te mea te here ra tatou ia ˈna, eiaha râ no te mea e faaheporaa. I roto i ta ˈna rata i te mau Hebera, ua faataa Paulo e titauhia ia tatou ia “auraro noa ˈtu â i te Metua . . . no to tatou maitai.”—A taio i te Hebera 12:9-11.

3. (a) E nafea tatou ia auraro ia Iehova? (b) Eaha te mau uiraa ta tatou e pahono?

³ E nafea tatou ia auraro ia Iehova? Ma te faaroo ia ˈna i roto i te mau tuhaa atoa o to tatou oraraa e ma te ore e turui i nia i to tatou iho ite. (Mas. 3:5) E tauturu mai te iteraa i to Iehova mau huru maitatai ia auraro ia ˈna. Te tumu, e itehia to ˈna mau huru maitatai i roto i te mau ohipa atoa ta ˈna e rave. (Sal. 145:9) Rahi atu â tatou i te ite i to ˈna mau huru maitatai, rahi atu â tatou  i te here ia ˈna e i te auraro atu. I tera taime, eita ïa e titauhia te hoê tapura o te mau mea atoa e tia ia rave e te ore e tia ia rave. E haroˈaroˈa râ tatou e nafea ia rave i te mea maitai e ia patoi i te mea ino. (Sal. 97:10) E ere râ te auraa mea ohie ia auraro i te Atua i te mau taime atoa. No te aha? E nafea te mau matahiapo, metua tane e metua vahine ia pee i te hiˈoraa o Nehemia, Davida e Maria? E pahonohia ïa i roto i teie tumu parau haapiiraa.

4-5. Ia au i te Roma 7:21-23, no te aha e ere i te mea ohie ia auraro ia Iehova i te tahi taime?

⁴ No te aha e ere i te mea ohie ia auraro ia Iehova i te tahi taime? No te mea ua raea tatou paatoa i te hara e te huru tia ore. I to Adamu e Eva faaroo-ore-raa i te Atua, ua faaoti raua eaha te mea maitai e te mea ino no raua! (Gen. 3:22) I teie mahana, eita atoa te rahiraa e tâuˈa ia Iehova, e rave noa râ ratou i ta ratou e manaˈo ra e mea maitai noa ˈtu e mea ino.

⁵ I te tahi taime, e ere atoa i te mea ohie no te mau Kerisetiano ia auraro ia Iehova noa ˈtu ua ite e ua here ratou ia ˈna. Tera atoa ta te aposetolo Paulo i ite i roto i to ˈna tupuraa. (A taio i te Roma 7:21-23.) Mai ia Paulo, te vai ra i roto ia tatou te hinaaro e rave i te mea maitai i te aro o Iehova, mea puai atoa râ te hinaaro e rave i te mea ino.

6-7. Eaha te piti o te tumu e ere ai i te mea ohie ia auraro ia Iehova? A horoa i te hiˈoraa.

⁶ Te tahi atu tumu e ere ai i te mea ohie ia auraro ia Iehova, ua aˈa roa te tahi mau peu e manaˈo o te ore e tuati i to Iehova hinaaro i roto i to tatou feruriraa. Teie te tahi hiˈoraa.

⁷ I te tahi mau fenua, e turaihia te feia apî ia imi i te oraraa fanaˈo. Hou a haapii ai o vai Iehova, ua haere te tuahine Mary * i te fare haapiiraa teitei faahiahia roa ˈˈe o to ˈna fenua. Ua turai to ˈna utuafare ia ˈna ia titau i te hoê ohipa faaturahia e aufau-maitai-hia. Tera atoa ta ˈna i hinaaro! I muri aˈe i to ˈna iteraa i te parau mau no nia i te Atua e hereraa ia Iehova, taui atura Mary i ta ˈna mau fa. Noa ˈtu râ, te faˈi ra oia: “I te tahi taime, ia pûpûhia mai te hoê ohipa aufau-maitai-hia, e hoˈi mai tera hinaaro e titau i te oraraa fanaˈo. No tei haapiihia mai ia ˈu i te tamariiraa, mea fifi roa no ˈu ia patoi. E taparu vau ia Iehova ia tauturu mai ia ore e farii i te hoê ohipa o te haafariu ê ia ˈu i te taviniraa ia ˈna.”—Mat. 6:24.

8. Eaha ta tatou e hiˈopoa mai?

⁸ No to tatou iho maitai tatou e auraro ai ia Iehova. No te mau matahiapo, metua tane e metua vahine râ, e titauhia ˈtu â ia ratou ia haapao i ta te Atua mau aratairaa no te mea e nehenehe ratou e tauturu ia vetahi ê. E hiˈopoa mai ïa tatou mea nafea te tahi mau tavini a te Atua i roto i te Bibilia i te amoraa i ta ratou hopoia mai ta te Atua e titau ra.

9. Eaha te mau tupuraa fifi ta Nehemia i farerei?

⁹ Ua horoa Iehova i te mau matahiapo te hopoia faufaa ia aupuru i to ˈna  nunaa. (Pet. 1, 5:2) Mea rahi te haapiiraa ta te mau matahiapo e huti mai i to Nehemia huru i nia i to Iehova nunaa i tahito ra. Ei tavana i Iuda, e hopoia rahi ta Nehemia. (Neh. 1:11; 2:7, 8; 5:14) A feruri na i te mau tupuraa fifi ta ˈna i farerei. Ua faarooroo Nehemia ua haaviiviihia te hiero e aita te tufaa a te mau ati Levi e horoahia ra mai ta te ture a Mose i faaue. Ua ofati te mau ati Iuda i te Sabati e ua faaipoipo atoa vetahi tane i te vahine ěê. E nafea Nehemia ia faaafaro i teie mau ohipa?—Neh. 13:4-30.

10. Mea nafea Nehemia i te faaafaroraa i te mau fifi farereihia?

¹⁰ Aita Nehemia i faahepo i te mau ati Iuda ia farii i to ˈna mau manaˈo. Ua imi râ i ta Iehova aratairaa na roto i te pure e ua haapii atoa ia ratou i te ture a Mose. (Neh. 1:4-10; 13:1-3) Ma te haehaa, ua ohipa maite atoa Nehemia na muri i to ˈna mau taeae e ua tauturu atu ia tataî i te mau patu o Ierusalema.—Neh. 4:15.

11. Ia au i te Tesalonia 1, 2:7, 8, mai te aha te huru o te mau matahiapo i nia i te amuiraa e tia ˈi?

¹¹ E farerei atoa paha te mau matahiapo i te mau tupuraa fifi. E nehenehe râ ratou e pee i te hiˈoraa o Nehemia e e haa ma te itoito no te maitai o te mau taeae e tuahine. E poihere ratou i te amuiraa ma te ore e manaˈo mea hau aˈe ratou. (A taio i te Tesalonia 1, 2:7, 8.) E itehia to ratou here e haehaa na roto i ta ratou huru paraparau i te mau taeae e tuahine. Ua tavini maoro Andrew ei matahiapo, teie ta ˈna e parau ra: “E putapû aˈe te aau o te mau taeae e tuahine ia faaite te matahiapo i te hamani maitai e te mǎrû. E tauturu te reira ia ratou ia auraro i te mau matahiapo.” Te faataa ra Tony tei tavini maoro atoa ei matahiapo: “E tutava noa vau i  te haapao i te aˈoraa a te Philipi 2:3 e i te haamanaˈo mea hau aˈe vetahi ê ia ˈu. Eita vau e hinaaro e faahepo ia vetahi ê ia auraro ia ˈu!”

12. No te aha mea faufaa ia faaite te mau matahiapo i te haehaa?

¹² Noa ˈtu o Iehova te Arii hau ê, te piˈo nei oia i raro no te “faateitei . . . i tei haehaa ra.” (Sal. 18:35; 113:6, 7) Mai ia Iehova, e titauhia i te mau matahiapo ia faaite i te haehaa. Mea au ore roa hoi na ˈna te feia faarahi e te teoteo.—Mas. 16:5.

13. No te aha e titauhia i te mau matahiapo ia “haavî” i to ratou vaha?

¹³ No te auraro ia Iehova, e titauhia i te hoê matahiapo ia “haavî” i to ˈna vaha. Ia ore, e nehenehe oia e faahiti i te parau mauiui. (Iak. 1:26, nota; Gal. 5:14, 15) Te parau faahou ra Andrew: “I te tahi taime, e hinaaro vau e vaha i nia i te hoê taeae aore ra tuahine faatura ore. E feruri râ vau i te mau aamu Bibilia o te haapii mai ra i te faufaaraa o te haehaa e te mǎrû.” E auraro te mau matahiapo ia Iehova ma te here e ma te hamani maitai i te mau taeae e tuahine, oia atoa i te tahi atu mau matahiapo.—Kol. 4:6.

14. Eaha te hopoia ta Iehova i horoa i te mau metua tane e eaha ta ˈna e titau ra ia ratou?

¹⁴ Ua horoa Iehova i te hopoia upoo utuafare i te metua tane, na ˈna ïa e haapii, e aratai e e aˈo i ta ˈna mau tamarii. (Kor. 1, 11:3; Eph. 6:4) Eiaha râ te metua tane e rave noa mai ta ˈna e hinaaro. E haava hoi Iehova ia ˈna ia au i to ˈna huru i nia i te mero tataitahi o to ˈna utuafare. (Eph. 3:14, 15) E auraro te mau metua tane ia Iehova ma te amo i ta ratou hopoia mai ta ˈna e titau ra. Mea rahi te haapiiraa ta ratou e huti mai i te hiˈoraa o te arii Davida.

15. No te aha e hiˈoraa maitai te arii Davida no te mau metua tane?

¹⁵ O Davida te upoo o to ˈna utuafare, e upoo atoa râ oia no te nunaa Iseraela. Ei arii, e mana rahi to Davida. I te hoê râ taime, ua faaohipa hape oia i te reira e rave atura i te hara rahi. (Sam. 2, 11:14, 15) I to Iehova râ aˈoraa ia ˈna, ua auraro atu Davida e ua haamahora i to ˈna aau na roto i te pure. (Sal. 51:1-4) Mea haehaa atoa Davida no te farii i te aˈoraa no ǒ mai i te tane e te vahine atoa. (Sam. 1, 19:11, 12; 25:32, 33) Ua  huti mai Davida i te haapiiraa i te mau hape ta ˈna i rave e ua haafaufaa i ta ˈna taviniraa ia Iehova.

16. Eaha te tahi mau haapiiraa ta te mau metua tane e huti mai i te hiˈoraa o Davida?

¹⁶ E te mau metua tane, teie te tahi mau haapiiraa e huti mai i te hiˈoraa o te arii Davida: Eiaha e faaohipa hape i te hopoia ta Iehova i tuu atu. A farii ua hape outou e a pee i te aˈoraa Bibilia ta vetahi ê e horoa ˈtu. A pure ai e to outou utuafare, a ninii hua i to outou aau ia papu ia ratou te turui ra outou i nia ia Iehova. Te mea faufaa roa ˈtu â, a tuu i te taviniraa ia Iehova i te parahiraa matamua. (Deut. 6:6-9) Ma te na reira, e faaturahia ïa outou. O to outou hiˈoraa te tufaa maitai roa ˈˈe ta outou e horoa i to outou utuafare!

17. Eaha te hopoia ta Iehova i horoa i te metua vahine?

¹⁷ E hopoia faufaa atoa ta Iehova i horoa i te metua vahine. E nehenehe atoa hoi ratou e haapii i ta ratou tamarii. (Mas. 6:20) Noa ˈtu ua riro mai te tamarii ei taata paari, e nehenehe ratou e haamanaˈo maitai i te mau parau e ohipa a to ratou mama. (Mas. 22:6) E te mau metua vahine, a huti mai na i te haapiiraa i te hiˈoraa o Maria, te metua vahine o Iesu.

18-19. E nafea te mau metua vahine ia pee i te hiˈoraa o Maria?

¹⁸ Mea ite roa Maria i te mau Papai moˈa. Mea faatura na ˈna ia Iehova e e auhoaraa piri to raua. Ua farii oia i te auraro i ta Iehova faanahoraa noa ˈtu e taui te reira i to ˈna oraraa.—Luka 1:35-38, 46-55.

¹⁹ E nafea outou, te mau metua vahine, ia pee i te hiˈoraa o Maria? A tahi, ma te faatupu i te auhoaraa piri e o Iehova maoti ta outou iho haapiiraa Bibilia e te pure. A piti, ma te farii i te rave i te mau tauiraa ia mauruuru Iehova ia outou. Te tahi hiˈoraa, ua paari paha outou e te metua o te riri e o te tuhi hanoa. Peneiaˈe, ua riro roa mai te reira ei peu matauhia na outou. A haapii ai râ i ta Iehova mau ture aveia, e ite outou e ere i te mea ohie ia faaoromai e ia ore ia riri. I te taime iho â râ e faariri te tamarii e ua rohirohi roa outou. (Eph. 4:31) I tera mau taime, mea faufaa roa ia pure ia Iehova. Te na ô ra te hoê metua vahine o Lydia te iˈoa: “I te tahi taime, ua titauhia ia taparu na roto i te pure  no te ore e paraparau ma te riri ia faaroo ore ta ˈu tamaiti. E faaea taue au i te vaha a pure atu ai ia Iehova i roto i to ˈu aau. E tauturu mai te pure ia ore au ia riri.”—Sal. 37:5.

20. Eaha te fifi ta te tahi mau metua vahine e farerei, e nafea ratou ia faaruru i te reira?

²⁰ Te tahi fifi ta te mau metua vahine e nehenehe e farerei, o te faaiteraa ïa e te here ra ratou i ta ratou tamarii. (Tito 2:3, 4) Ua paari mai vetahi mau vahine i roto i te hoê utuafare aita e auhoaraa piri to te metua e te tamarii. Mai te peu e mai tera atoa to outou tupuraa, eita e titauhia ia pee outou i te hiˈoraa o to outou metua. E haapii te hoê metua vahine o te faaite i te auraro ia Iehova i te here i ta ˈna tamarii. Noa ˈtu mea fifi no ˈna ia taui i to ˈna huru feruriraa e ta ˈna huru raveraa, e maitaihia to ˈna utuafare e o ˈna atoa i ta ˈna mau tutavaraa.

21-22. Ia au i te Isaia 65:13, 14, eaha te faufaaraa ia auraro ia Iehova?

²¹ Ua ite te arii Davida i te faufaaraa ia auraro ia Iehova. Teie ta ˈna i papai: “Te haapaoraa a Iehova e mea tia ïa, e oaoa ˈi te aau; te aˈo a Iehova e mea maramarama ïa, e maramarama ˈi te mata nei; Na te reira hoi i haapii mai i to tavini; e tei te haapao i te reira te utua rahi.” (Sal. 19:8, 11) Te ite ra tatou i teie mahana i te taa-ê-raa i rotopu i te feia e auraro ra ia Iehova e te feia e patoi ra i ta ˈna aˈoraa î i te here. Inaha te himene hua nei te feia e auraro ra ia Iehova “i te oaoa aau ra.”—A taio i te Isaia 65:13, 14.

²² Ia auraro te mau matahiapo, metua tane e metua vahine ia Iehova, e maitai mai to ratou oraraa, e oaoa aˈe te utuafare e e hoê atu â te amuiraa. Te mea faufaa roa ˈtu â, e faaoaoa ratou i te aau o Iehova. (Mas. 27:11) Auê ïa haamaitairaa rahi e!