TUMU PARAU HAAPIIRAA 30
HIMENE 36 Tiai i to tatou aau
Eaha te haapii mai i te mau arii o Iseraela?
“E ite faahou outou i te taa-ê-raa i rotopu i te taata parau-tia e te taata ino, i rotopu i te taata o te tavini i te Atua e te taata o te ore e tavini ia ˈna.”—MAL. 3:18.
MANAˈO FAUFAA
E haapii mai tatou eaha ta Iehova huru hiˈoraa i te mau arii o Iseraela ia taa ia tatou eaha ta ˈna e haapao a hiˈopoa ˈi oia i ta ˈna mau tavini i teie mahana.
1-2. Eaha ta te Bibilia e faaite ra no nia i te mau arii o Iseraela?
I ROTO i te Bibilia, ua faahitihia hau atu 40 taata tei riro ei arii o Iseraela. a Eita te Bibilia e huna eaha ta vetahi o ratou i rave. Ei hiˈoraa, e ohipa ino ta vetahi mau arii i rave noa ˈtu mea maitai ratou. O te arii Davida te tahi. Ua parau hoi Iehova no nia ia ˈna: “Ta ˈu tavini ia Davida . . . tei tavini ia ˈu ma te aau atoa, ma te rave noa i te mea maitai i mua ia ˈu.” (Arii 1, 14:8) Noa ˈtu râ, ua faaturi Davida e te hoê vahine faaipoipo e ua faanaho oia ia taparahihia ta ˈna tane i te tahua aroraa.—Sam. 2, 11:4, 14, 15.
2 I te tahi aˈe pae, e rave rahi arii faaroo ore tei rave i te mea maitai. O Rehoboama te tahi. “Ua rave . . . Rehoboama i te mea ino” i to Iehova aro. (Par. 2, 12:14) Tera râ, ua auraro oia i te faaueraa a te Atua eiaha e haere e aro i na hoê ahuru opu no Iseraela. Hau atu, no te paruru i to ˈna nunaa, ua haapaari atu â oia i te mau oire auahia i te patu.—Arii 1, 12:21-24; Par. 2, 11:5-12.
3. Eaha te uiraa e hiti mai e eaha ta tatou e hiˈopoa i roto i teie tumu parau?
3 E hiti mai ïa te hoê uiraa faufaa: Mai te peu ua rave te mau arii o Iseraela i te mea maitai e te mea ino, eaha ta Iehova e haapao no te haapapu e mea taiva ore anei hoê arii? Na te pahonoraa e tauturu atoa ia tatou ia taa eaha ta Iehova e hiˈopoa i roto ia tatou. E hiˈopoa tatou e toru ohipa no nia i te mau arii o Iseraela ta Iehova e haapao: to ratou aau, ta ratou huru faaiteraa i te tatarahapa e to ratou tururaa i te haamoriraa mau.
UA TAVINI RATOU IA IEHOVA MA TE AAU TAATOA
4. Eaha te taa-ê-raa i rotopu i te mau arii taiva ore e tei ore i faaroo ia Iehova?
4 Te mau arii tei faaoaoa ia Iehova, ua tavini ratou ia ˈna ma te aau taatoa. b Ei hiˈoraa, ua imi te arii maitai ra o Iehosaphata ia Iehova “ma to ˈna aau taatoa.” (Par. 2, 22:9) Te na ô ra te Bibilia no nia ia Iosia: “Aita hoê mai ia ˈna o tei hoˈi mai ia Iehova ra ma to ˈna aau taatoa.” (Arii 2, 23:25) Eaha ta te Bibilia e parau ra no Solomona tei rave i te mea ino i te pae hopea? “Aita ˈtura to ˈna aau i tia i mua ia Iehova.” (Arii 1, 11:4) Hoê â huru no te arii faaroo ore ra o Abiiama. Ia au i te Bibilia, “aita to ˈna aau i tia i mua ia Iehova.”—Arii 1, 15:3.
5. Eaha te auraa ia tavini ia Iehova ma te aau taatoa?
5 Eaha te auraa ia tavini ia Iehova ma te aau taatoa? Te hoê taata o te tavini ia Iehova ma te aau taatoa, eita o ˈna e na reira no te mea noa ua ite oia e mea tano te reira. E haamori oia ia Iehova no to ˈna here e faatura ia ˈna. E e tamau o ˈna i te here e i te faatura ia Iehova i te roaraa o to ˈna oraraa.
6. E nafea ia tamau i te tavini ia Iehova ma te aau taatoa? (Maseli 4:23; Mataio 5:29, 30)
6 E nafea ia pee i te hiˈoraa o te mau arii taiva ore e ia tamau i te tavini ia Iehova ma te aau taatoa? E haapae anaˈe i te mau mea atoa e iti mai ai to tatou here ia Iehova. Ei hiˈoraa, e vai ara tatou i te mau faaanaanataeraa tano ore, i te mau hoa ta tatou e maiti e e i te faariroraa i te moni ei mea faufaa roa ˈˈe o te oraraa. Ua tapao anaˈe tatou i te hoê ohipa o te faaiti mai i to tatou here ia Iehova, e tutava anaˈe ïa i te haapae roa i te reira.—A taio i te Maseli 4:23; Mataio 5:29, 30.
7. No te aha mea faufaa ia haapae roa i te mau manaˈo e ohipa tano ore?
7 Eiaha roa ˈtu to tatou ei aau piti. Eiaha e haavare ia tatou iho a manaˈo ai no te mea mea puai tatou i te pae varua, eita ïa te manaˈo tano ore e puta mai. Aore ra eita tatou e rave i te mea ino. A feruri na. Ua oti anaˈe outou i te tamâ i to outou fare, e tapiri outou i te opani aore ra te haamaramarama ia ore te repo e ô faahou mai. Hoê â huru no to tatou auhoaraa e Iehova. Eita e navai noa ia rave tatou i te mau ohipa pae varua no te haapuai i to tatou here ia ˈna. Mai ta tatou e rave no te tapiri i te opani ia ore te fare ia repo faahou, e titau-atoa-hia ia tapiri i to tatou aau, ia ore te mau ohipa e manaˈo tano ore e ô mai.—Eph. 2:2.
UA TATARAHAPA MAU Â RATOU
8-9. Eaha to Davida raua Hezekia huru a aˈohia ˈi raua? (A hiˈo i te hohoˈa.)
8 Mai tei faahitihia i te omuaraa, e hara rahi ta te arii Davida. I to te peropheta Natana râ aˈoraa ia ˈna, ua tatarahapa mau oia. (Sam. 2, 12:13) Aita Davida i haavarevare no te tamǎrû ia Natana aore ra ia ore oia e faautuahia. Ia taio tatou i te Salamo 51, e taa ia tatou e ua tatarahapa mau â Davida no ta ˈna i rave.—Sal. 51:3, 4, 17, upoo parau.
9 Ua hara atoa te arii Hezekia ia Iehova. Te parau ra te Bibilia: “Ua tupu hoi te teoteo i roto i to ˈna aau, e riri ihora te Atua ia ˈna, ia Iuda e Ierusalema.” (Par. 2, 32:25) No te aha Hezekia i teoteo ai? Eita e ore ua faateitei oia ia ˈna no te rahi o ta ˈna mau taoˈa, no ta ˈna mau upootiaraa i nia i to Asura. No te mea atoa paha ua faaora-semeio-hia o ˈna. No to ˈna teoteo i faaite ai oia i to Babulonia i ta ˈna rahiraa taoˈa a aˈo atu ai te peropheta Isaia ia ˈna. (Arii 2, 20:12-18) I muri mai râ, tatarahapa ihora Hezekia. (Par. 2, 32:26) I te pae hopea, ua hiˈo Iehova ia ˈna mai te hoê arii taiva ore tei rave “i te mea maitai.”—Arii 2, 18:3.
Ua tatarahapa mau â te arii Davida e Hezekia i to raua aˈoraahia no ta raua mau hapa (A hiˈo i te paratarafa 8-9)
10. Ua aha te arii Amazia i mua i te aˈoraa?
10 Taa ê atu ia Davida raua Hezekia, ua rave Amazia te arii o Iuda i te mea tia “eiaha râ ma te aau taatoa.” (Par. 2, 25:2) Eaha tei tupu? I to Iehova tautururaa ia ˈna ia aro i te ati Edoma, ua tipapa Amazia i mua i to ratou mau atua. c I to te peropheta a Iehova aˈoraa ˈtu ia ˈna, aita Amazia i haapao noa ˈˈe i tei parauhia no ˈna.—Par. 2, 25:14-16.
11. Ia au i te Korinetia 2, 7:9, 11, ia aha tatou ia faaorehia ta tatou mau hara? (A hiˈo atoa i te hohoˈa.)
11 Eaha te haapiiraa no tatou? Mea faufaa ia tatarahapa tatou no ta tatou mau hara a tutava ˈtu ai i te ore e tapiti faahou. E ia aˈohia mai tatou na te mau matahiapo, noa ˈtu e ere mea ino roa ta tatou i rave? Eiaha tatou ia manaˈo e ua faarue mai Iehova aore ra te mau matahiapo ia tatou. A haamanaˈo, noa ˈtu mea maitai vetahi mau arii o Iseraela, ua aˈo-atoa-hia ratou. (Heb. 12:6) Ia horoahia mai te hoê aˈoraa, mea faufaa (1) ia faatupu tatou i te haehaa, (2) ia rave i te mau tauiraa titauhia e (3) ia tamau i te tavini ia Iehova ma te aau taatoa. Ia tatarahapa mau â tatou no ta tatou mau hara, e faaore mai iho â Iehova.—A taio i te Korinetia 2, 7:9, 11.
Ia horoahia mai te hoê aˈoraa, mea faufaa (1) ia faatupu tatou i te haehaa, (2) ia rave i te mau tauiraa titauhia e (3) ia tamau i te tavini ia Iehova ma te aau taatoa (A hiˈo i te paratarafa 11) f
UA TURU RATOU I TE HAAMORIRAA MAU
12. No te aha mea taa ê iho â te mau arii taiva ore?
12 Ua turu te mau arii taiva ore i te haamoriraa mau e ua faaitoito ratou i te nunaa ia na reira atoa. Parau mau, ua hapa atoa ratou i te tahi taime. Tera râ, ua haamori ratou ia Iehova anaˈe e ua rohi ratou no te faaore roa i te haamoriraa idolo. d
13. No te aha e arii ino Ahaba i mua ia Iehova?
13 E no vetahi mau arii tei taiva ia Iehova? Eita e ore ua rave atoa ratou i te mea maitai i mua ia Iehova. Ei hiˈoraa, ua faaite te arii ino ra o Ahaba i te haehaa e ua tatarahapa oia i to ˈna faarooraa e ua taparahi-pohe-hia o Nabota. (Arii 1, 21:27-29) Ua patu atoa oia i te mau oire e a faatere ai ei arii, ua upootia te nunaa Iseraela. (Arii 1, 20:21, 29; 22:39) Tera râ, ua turai ta ˈna vahine ia ˈna ia haamori i te mau idolo e te mau atua hape e aita o ˈna i tatarahapa noa ˈˈe.—Arii 1, 21:25, 26.
14. (1) No te aha e arii ino Rehoboama no Iehova? (2) Eaha ta te rahiraa o te mau arii o Iseraela i rave?
14 E rave anaˈe i te hiˈoraa o te tahi arii ino ra o Rehoboama. Mai tei faahitihia na mua ˈtu, ua rave oia i te mea maitai. Tera râ, i to ˈna riroraa mai ei arii puai, faarue ihora oia i te Ture a Iehova no te turu i te haamoriraa hape. (Par. 2, 12:1) I muri iho, ua haamori oia i te tahi taime ia Iehova, oia atoa i te mau atua hape. (Arii 1, 14:21-24) E ere o Rehoboama raua Ahaba anaˈe tei turu i haamoriraa hape, o te rahiraa râ o te mau arii o Iseraela. Mea faufaa no Iehova te haamoriraa ia ˈna anaˈe. Te mau arii o te haamori ia ˈna e mea taiva ore ïa, area te toea o te haamori i te mau atua hape, mea ino ïa.
15. No te aha mea faufaa no Iehova te tururaa i te haamoriraa mau?
15 No te aha mea faufaa no Iehova te tururaa i te haamoriraa mau? A tahi, na te arii te hopoia e tauturu i to te Atua nunaa ia haamori ia ˈna ma te tano. No te mea atoa e turai te haamoriraa hape ia rave i te tahi atu mau hara. (Hos. 4:1, 2) Hau atu â, e nunaa pûpûhia Iseraela e te mau arii ia Iehova. No reira, ia taiva ratou ia Iehova ma te haamori i te mau atua hape mai te huru ra e ua faaturi ratou i te pae varua. (Ier. 3:8, 9) Ia faaturi te hoê tane faaipoipo, te taiva ra e te haamauiui ra ïa oia i ta ˈna vahine. Hoê â huru no te hoê tavini tei pûpûhia ia Iehova. Ia turu oia i te haamoriraa hape, te taiva ra ïa o ˈna ia Iehova. e—Deut. 4:23, 24.
16. I te aro o Iehova, eaha te taa-ê-raa i rotopu i te taata parau-tia e te taata ino?
16 Eaha te haapiiraa no tatou? E faaoti papu anaˈe eiaha e apiti i te haamoriraa hape. E titau-atoa-hia râ ia haamori ia Iehova ma te tano e ia tutava i te tavini ia ˈna. Ua haapapu te peropheta Malaki eaha te taa-ê-raa i rotopu i te taata parau-tia e te taata ino i te aro o Iehova. Ua parau oia: “E ite faahou outou i te taa-ê-raa i rotopu i te taata parau-tia e te taata ino, i rotopu i te taata o te tavini i te Atua e te taata o te ore e tavini ia ˈna.” (Mal. 3:18) No reira, eiaha roa ˈtu tatou ia vaiiho i te tahi noa ˈˈe mea, to tatou huru tia ore e ta tatou mau hape, e faatoaruaru ia tatou a faaea roa ˈi i te tavini ia Iehova. E hara ino mau ia faaea i te tavini ia Iehova!
17. No te aha mea faufaa ia maiti maitai tatou i te hoa faaipoipo?
17 Mai te peu te hinaaro ra oe e faaipoipo, e nehenehe te mau parau a Malaki e tauturu ia oe ia maiti i te hoê hoa faaipoipo. E rave rahi paha huru maitatai to te hoê taata, mai te peu râ aita oia e tavini ra ia Iehova, e taata parau-tia anei oia i to Iehova aro? (Kor. 2, 6:14) Ia faaipoipo orua, e tauturu anei o ˈna ia oe ia vai taiva ore ia Iehova? A feruri na i te hiˈoraa o Solomona. Papu, e huru maitatai to ta ˈna mau vahine faaipoipo. E ere râ ratou i te tavini na Iehova. Faafariu aˈera teie mau vahine i to ˈna aau no te tavini i te mau atua hape.—Arii 1, 11:1, 4.
18. Ia haapii te mau metua i te aha i ta ratou mau tamarii?
18 E te mau metua, a faaohipa na i te mau aamu Bibilia no nia i te mau arii o Iseraela no te haapii i ta outou mau tamarii ia turu maite i te haamoriraa a Iehova. A tauturu ia ratou ia taa mea maitai te hoê arii o te turu i te haamoriraa mau. Ia ore râ, e arii ino ïa. A haapii ia ratou na roto i te parau e to outou hiˈoraa o te haapiiraa Bibilia, te putuputuraa e te pororaa te mea faufaa roa ˈˈe o te oraraa. (Mat. 6:33) Aita anaˈe, e pee noa ta outou mau tamarii ia orua no te mea e Ite no Iehova orua, eiaha râ ma te hinaaro mau. Ia tae i te hoê mahana, e tuu paha ratou i te haamoriraa mau i te hiti aore ra e faaea roa i te tavini ia Iehova.
19. Te vai ra anei te ravea no tei faaea i te tavini ia Iehova? (A hiˈo atoa i te tumu parau tarenihia “ A hoˈi ia Iehova ra!”)
19 Ia faaea hoê i te tavini ia Iehova, te auraa anei e aita e ravea faahou no ˈna? Eita, e nehenehe oia e tatarahapa a tavini faahou ai ia Iehova. E titauhia ia ˈna ia faahaehaa e ia farii i te tauturu a te mau matahiapo. (Iak. 5:14) Mea hoona mau â ia na reira, inaha e fanaˈo faahou oia i ta Iehova farii maitai!
20. Ia pee tatou i te hiˈoraa o te mau arii taiva ore, eaha to Iehova manaˈo ia tatou?
20 Eaha ïa ta tatou i haapii mai i te mau arii o Iseraela? E pee tatou i te hiˈoraa o te mau arii taiva ore ma te tavini ia Iehova ma te aau taatoa. E huti anaˈe i te haapiiraa i ta tatou mau hape. E tatarahapa anaˈe a rave atu ai i te mau tauiraa titauhia. Ia haamanaˈo atoa tatou i te faufaaraa ia turu maite i te haamoriraa mau a te Atua. Ia mau maite oe ia Iehova, e riro oe ei taata parau-tia o te rave i te mea maitai i to ˈna aro.
HIMENE 45 Te manaˈoraa a to ˈu aau
a I roto i teie tumu parau, e faahitihia te parau “te mau arii o Iseraela.” O te mau arii atoa ïa tei faatere i te nunaa o Iehova, na opu e piti o Iuda anei, na hoê ahuru opu aore ra te taatoaraa o na 12 opu.
b NO TE TAA MAITAI ATU Â: Pinepine te Bibilia i te faaohipa i te taˈo “aau” no te faataa i te rotoraa o te hoê taata, to ˈna mau hinaaro, manaˈo, haerea, aravihi, manaˈo turai e ta ˈna mau fa.
c Papu maitai, e peu teie no roto mai i te mau taata ěê, oia hoi e haamori i te mau atua o te nunaa tei pau ia ratou.
d Ua hara te arii Asa ia Iehova. (Par. 2, 16:7, 10) Tera râ, te faahiti ra te Bibilia e ua rave oia i te mea tia i te aro o Iehova. Noa ˈtu i te omuaraa ua patoi oia i te aˈo, eita e ore ua tatarahapa oia i muri mai. No Iehova, mea rahi aˈe te mau huru maitatai o Asa i ta ˈna mau hape. Oia mau, o Iehova anaˈe ta Asa i haamori e ua tutava oia i te faaore roa i te mau idolo.—Arii 1, 15:11-13; Par. 2, 14:2-5.
e Mea faufaa te haamoriraa no Iehova, inaha i roto i na faaueraa ahuru a te Ture a Mose, te opani etaeta ra na piti ture matamua ia haamori i te tahi atu atua. O Iehova anaˈe te haamorihia.—Exo. 20:1-6.
f FAATAARAA O TE HOHOˈA: Te horoa ra te matahiapo apî i te aˈoraa i to ˈna taeae paari aˈe no nia i te inuraa i te ava. Ua farii te taeae i te aˈoraa, ua rave i te mau tauiraa titauhia e ua tamau i te tavini ia Iehova ma te taiva ore.
