1-2. (1) Eaha ta Iesu i faaara i ta ˈna mau pǐpǐ? (2) No te aha te mau pǐpǐ i faarue ai ia Iesu? (A hiˈo atoa i te hohoˈa.)

 “E HINAARO iho â te aau, te tino râ, mea paruparu ïa.” a (Mat. 26:41b) Ia au i teie mau parau, ua taa ia Iesu to tatou huru tia ore. E faaararaa atoa râ ta ˈna e horoa ra. Eiaha tatou e manaˈo eita tatou e hema. Tau hora hoi hou Iesu a faahiti ai i tera mau parau, ua haapapu te mau pǐpǐ eita ratou e faarue ia ˈna. (Mat. 26:35) Ua hinaaro iho â ratou e rave i te mea maitai. Tera râ, aita i taa ia ratou e i mua i te hoê tupuraa fifi, mea oioi roa ia hema. No reira Iesu faaara mai ai: “A vai ara e a tamau i te pure ia ore outou ia hema.”—Mat. 26:41a.

² Aita râ te mau pǐpǐ i vai ara. I to Iesu haruraahia, ua faaea anei ratou i pihai iho ia ˈna aore ra ua horo no te mǎtaˈu? Ua faarue ratou ia Iesu no te mea aita ratou i vai ara. Aita ratou i rave mai ta ratou i parau.—Mat. 26:56.

3. (1) No te aha eiaha ˈi tatou e manaˈo eita tatou e hema? (2) Eaha ta tatou e hiˈopoa i roto i teie haapiiraa?

³ Eiaha tatou e manaˈo eita tatou e hema. Noa ˈtu ua faaoti tatou eiaha e rave i te tahi mea o te haamauiui ia Iehova, e taata tia ore noa tatou o te nehenehe e hema hanoa. (Roma 5:12; 7:21-23) Ma te manaˈo-ore-hia, e nehenehe tatou e faahemahia ia rave i te tahi ohipa ino.  Mea faufaa roa ia vai ara tatou ia ore ia hema mai ta Iesu i faaara mai. E vai taiva ore ïa tatou ia Iehova e i ta ˈna Tamaiti. E tauturu mai teie haapiiraa ia tatou. A tahi, e hiˈopoa tatou eaha te mau mea e titauhia ia ara tatou. A piti, e nafea ia vai ara ia ore ia hema. A toru, e nafea ia tamau i te vai ara.

EAHA TE MAU MEA E TITAUHIA IA ARA TATOU?

4-5. No te aha e vai ara ˈi noa ˈtu e ere i te hara rahi?

⁴ Noa ˈtu e hara rii noa, e fifihia to tatou auhoaraa e o Iehova. E nehenehe atoa te reira e turai ia tatou ia rave i te hara rahi.

⁵ O tatou pauroa te faahemahia ia rave i te mea ino. E no te mea e ere hoê â paruparu to tatou tataitahi, te vai ra ïa te tahi mau faahemaraa puai aˈe o te turai i tera e tera ia rave i te mea ino. Ei hiˈoraa, te aro ra paha te tahi i te faahemaraa e rave i te peu taotoraa tia ore. Te aro ra te tahi atu i te tahi peu viivii, mai te mirimiriraa i te mero atiraa aore ra te mataitairaa i te peu faufau. Te tautoo ra paha te tahi atu i te haavî i to ˈna mǎtaˈu i te taata, to ˈna huru iria aore ra teoteo. Mai ta Iakobo i parau, “e faahemahia . . . te taata tataitahi ia umehia oia e to ˈna iho hinaaro tia ore a hema ˈtu ai oia.”—Iak. 1:14.

6. Mea faufaa ia farii tatou i te aha?

⁶ Ua ite anei oe eaha te mau mea e hema hanoa ˈi oe? Mea atâta ia ore e tâuˈa i to tatou mau paruparu aore ra ia manaˈo eita tatou e hema. (Ioa. 1, 1:8) A haamanaˈo, o “te feia paari i te pae varua” atoa ta Paulo i aˈo ia haapao maitai ia ratou iho. (Gal. 6:1) Mea faufaa ia taa ia tatou e ia farii i roto i teihea mau tuhaa e ere tatou i te mea puai maitai.—Kor. 2, 13:5.

7. Eaha ta tatou e haapao maitai? A faataa.

⁷ Ua taa anaˈe ia tatou eaha te mau mea e hema hanoa tatou, e nahea ïa tatou? E rohi anaˈe i te haapaari ia tatou. I tahito ra, o te mau uputa o te hoê oire te titauhia ia paruru maitai. Mea na reira hoi e tomo noa mai ai te enemi. No reira e tuuhia ˈi e rave rahi tiai i reira. Oia atoa mea faufaa roa ia haapao maitai tatou i te mau mea ua ite tatou e hema hanoa tatou.—Kor. 1, 9:27.

 E NAFEA IA VAI ARA?

8-9. Ahani te tane apî o te Maseli pene 7 i aha e ore ai oia e hara? (Maseli 7:8, 9, 13, 14, 21)

⁸ E nafea tatou e vai ara ˈi? E hiˈo mai tatou i te tahi mau haapiiraa e huti mai i te tupuraa o te tane apî o te Maseli pene 7. Ua taoto oia i te hoê vahine taiata. Te na ô ra te irava 22, “i reira iho” to ˈna peeraa i taua vahine ra. Ia au râ i te mau irava na mua ˈtu, ua rave oia i te tahi mau mea na mua ˈˈe, o tei turai riirii noa ia ˈna ia rave i te hara.

⁹ Eaha ta ˈna i rave? Na mua, ua ‘na pihai iho oia i te poro aroâ o te vahine’ taiata i te ahiahi. E ua haere tia ˈtu oia i to ˈna fare. (A taio i te Maseli 7:8, 9.) I muri iho, i to ˈna iteraa i taua vahine ra, aita o ˈna i fariu ê. Ua vaiiho o ˈna i tera vahine ia apa ia ˈna e ia faahiti i te tusia no te hau ta ˈna i pûpû, ia manaˈo paha te tane apî e vahine maitai o ˈna. (A taio i te Maseli 7:13, 14, 21.) Ahani te tane apî i vai ara ia ore o ˈna ia hema e ia hara, eita ïa o ˈna e rave i teie mau mea maamaa.

10. Eaha te nehenehe e tupu i nia i te hoê tavini a Iehova mai no te tane apî o te Maseli?

¹⁰ Te faaite ra teie aamu eaha te nehenehe e tupu i nia i te hoê tavini a Iehova. E rave paha oia i te hoê hara rahi, a parau atu ai e mea tupu taue noa mai te faahemaraa. Ia feruri maitai râ oia, eita e ore e taa ia ˈna e ua hara oia no te mea ua rave oia i te tahi mau mea i fifihia ˈi o ˈna. Mai te amuimuiraa e te faaanaanataeraa ino, aore ra te tia-noa-raa i te mau vahi e ere no te hoê Kerisetiano, mea haere tino roa ˈtu aore ra i nia i te reni faahoaraa. Ua faaea atoa paha oia i te pure, i te taio i te Bibilia, i te haere i te mau putuputuraa aore ra i te pororaa. Mai no te tane apî o te Maseli, no ta ˈna mau faaotiraa maamaa i hara ˈi oia.

11. Ia ore tatou e hara, e titauhia ia aha tatou?

¹¹ Eaha te haapiiraa no tatou? Mea faufaa roa ia vai ara tatou ia ore ia hara, oia atoa i te mau mea o te aratai ia tatou i te hara. O ta Solomona ïa i faataa maitai i muri iho. Ua horoa oia i teie aˈoraa: “Eiaha e tioi i to [te vahine taiata] mau eˈa.” (Mas. 7:25) Teie atoa ta ˈna i parau no nia i tera vahine taivaiva: “Ia atea ê noa oe ia ˈna. Eiaha e tapiri atu i te tomoraa o to ˈna fare.” (Mas. 5:3, 8) Ia ore tatou e hara, e titauhia ia faaatea ê noa mai i te mau tupuraa o te aratai ia tatou i te hara. b Te auraa, eita tatou e rave i te tahi ohipa, noa ˈtu e ere mea ino no te mau Kerisetiano, ua ite anaˈe tatou e nehenehe tatou e hema a hara ˈtu ai.—Mat. 5:29, 30.

12. Eaha ta Ioba i faaoti papu e rave, e mea nafea te reira i te parururaa ia ˈna ia ore ia hema? (Ioba 31:1)

¹² Mea faufaa roa ia faaoti papu tatou e vai ara. O ta Ioba ïa i rave. ‘Ua faaau oia i te hoê faufaa i to ˈna mata’ ia ore roa ˈtu oia e hiˈo faahinaaro i te tahi atu mau vahine. (A taio i te Ioba 31:1.) Ma te tapea maite i ta ˈna faaotiraa i paruruhia ˈi oia i te faahemaraa e faaturi. E nehenehe tatou atoa e pee i to ˈna hiˈoraa.

13. No te aha mea faufaa roa ia paruru i to tatou feruriraa? (A hiˈo atoa i te hohoˈa.)

¹³ Mea faufaa roa atoa ia paruru i to  tatou feruriraa. (Exo. 20:17) No vetahi, aita e fifi mai te peu to roto noa i to oe feruriraa te mau hinaaro tia ore, aita hoi oe e rave roa ra. E manaˈo hape teie. Ia manaˈo noa te hoê taata i te hoê hinaaro tia ore, e puai mai tera hinaaro. E mea fifi roa ˈtu â ïa ia haavî atu. E puta mai iho â te manaˈo tano ore i te tahi taime. Mea faufaa râ ia mono oioi i te reira na roto i te mau manaˈo maitatai. Ia na reira tatou, e paruruhia tatou i te hara rahi, no te mea aita tatou i vaiiho i tera mau manaˈo tia ore ia riro mai ei hinaaro puai.—Phil. 4:8; Kol. 3:2; Iak. 1:13-15.

14. E nahea ˈtu â tatou ia ore ia hema?

¹⁴ Eaha ˈtu â ta tatou e nehenehe e rave ia ore tatou ia hema? E titauhia ia papu roa ia tatou e maitai-noa-hia tatou i te peeraa i ta Iehova mau ture. E ere paha mea ohie no tatou i te tahi taime ia faatano i to tatou mau manaˈo e hinaaro i nia i to Iehova. Ia tutava râ tatou i te na reira, e oaoa mau â tatou.

15. E nafea te faatupu-noa-raa i te mau hinaaro tia e paruru ai ia tatou?

¹⁵ Mea faufaa roa ia faatupu noa i te mau hinaaro tia. Ia haapii tatou i te “faufau i te mea ino e [i te] hinaaro i te mea maitai,” e faaoti atu â ïa tatou e rave i te mea maitai, e faaatea ê atoa mai i te mau tupuraa o te aratai ia tatou i te hara. (Am. 5:15) E hinaaro tia anaˈe to tatou, e mau papu atoa tatou ia û taue noa ˈtu tatou i te tahi tupuraa.

16. E nafea te mau ohipa pae varua e tauturu mai ai ia tamau i te vai ara? (A hiˈo atoa i te hohoˈa.)

¹⁶ E nafea ia faatupu noa i te mau hinaaro tia? Ma te rohi noa i roto i te mau ohipa pae varua. Ia haere tatou i te mau putuputuraa aore ra i roto i te pororaa, e puai atu â to tatou hinaaro e faaoaoa ia Iehova, a ore atu ai tatou e hema (Mat. 28:19, 20; Heb. 10:24, 25) Ia taio, ia haapii e ia feruriruri tatou i te Bibilia,  e au roa ˈtu â tatou i te mea maitai, a faufau roa ˈtu ai i te mea ino. (Ios. 1:8; Sal. 1:2, 3; 119:97, 101) A haamanaˈo i ta Iesu i parau i ta ˈna mau pǐpǐ: “A tamau i te pure ia ore outou ia hema.” (Mat. 26:41) Ia pure tatou i to tatou Metua i te raˈi, te ani ra tatou ia ˈna ia tauturu mai ia faaoti papu noa tatou i te faaoaoa ia ˈna.—Iak. 4:8.

A TAMAU I TE VAI ARA

17. Eaha te paruparu o Petero tei hoˈi noa mai?

¹⁷ Te vai ra te tahi mau paruparu e noaa ia tatou ia haavî. Area te tahi atu ra, aita â ïa. A hiˈo ia Petero. No to ˈna mǎtaˈu i te taata i haavare ai oia e toru taime aita o ˈna i ite ia Iesu. (Mat. 26:69-75) E au ra e ua vî ia ˈna to ˈna mǎtaˈu. Inaha ua poro oia ma te itoito no nia ia Iesu i mua i te Sunederi. (Ohi. 5:27-29) Tau matahiti râ i muri aˈe, “no to ˈna mǎtaˈu i te feia e turu ra i te peritomeraa,” aita o ˈna i tamaa faahou na muri i te mau Kerisetiano e ere i te ati Iuda. (Gal. 2:11, 12) Ua hoˈi faahou mai to ˈna mǎtaˈu. Peneiaˈe aita roa ˈtu i vî ia ˈna taua paruparu ra.

18. Eaha te nehenehe e tupu no nia i te tahi mau paruparu?

¹⁸ Mai no Petero, e nehenehe te hoê paruparu ta tatou i manaˈo e ua vî ia tatou e hoˈi faahou mai. Te faˈi ra te hoê taeae: “Hoê ahuru matahiti to ˈu faaearaa i te mataitai i te hohoˈa faufau. Ua manaˈo roa vau e ua ore taua fifi ra. Aita râ, te tamoemoe noa ra tera peu hairiiri i te taime tano maitai no te faura faahou mai.” Auaˈe aita o ˈna i tuu. Ua taa ia ˈna e titauhia ia tautoo oia pauroa te mahana i te haavî i tera peu, peneiaˈe i te roaraa o to ˈna oraraa i roto i teie nei ao ino. Maoti te tauturu a ta ˈna vahine faaipoipo e a te mau matahiapo, ua vai ara ˈtu â oia i te faaatea ê ia ˈna i te peu faufau.

19. Eaha te rave ia ore tatou ia hema i te hoê paruparu aita â i vî atura ia tatou?

¹⁹ Eaha te rave ia ore tatou ia hema i te hoê paruparu aita â i vî atura ia tatou? E pee anaˈe i ta Iesu aˈoraa: “A vai ara.” I te  mau taime atoa mea pautuutu oe, a tamau i te faaatea ê mai i te mau tupuraa o te nehenehe e riro ei faahemaraa. (Kor. 1, 10:12) A faaohipa noa i te mau ravea o tei tauturu ê na ia oe. Te na ô ra te Maseli 28:14: “E oaoa te taata o te vai ara noa.”—Pet. 2, 3:14.

TE MAU HAAMAITAIRAA IA VAI ARA

20-21. (1) Eaha te mau haamaitairaa ia vai ara tatou ia ore ia hema? (2) Ia rave tatou i ta tatou tuhaa, eaha ta Iehova e rave? (Korinetia 2, 4:7)

²⁰ Mea papu e maitai-noa-hia tatou ia vai ara tatou. Noa ˈtu “te mau mea navenave poto noa” o te hara, e oaoa aˈe tatou i te peeraa i te mau ture aveia a Iehova. (Heb. 11:25; Sal. 19:8) Ua hamanihia hoi tatou no te ora ia au i to ˈna hinaaro. (Gen. 1:27) E fanaˈo ïa tatou i te manaˈo haava maitai, e te ora mure ore ia tae i te hoê mahana.—Tim. 1, 6:​12; Tim. 2, 1:3; Iuda 20, 21.

²¹ Parau mau, ‘mea paruparu te tino.’ E ere râ te auraa e aita e ravea. Ua ineine noa Iehova i te horoa mai i te puai hinaaro-mau-hia. (A taio i te Korinetia 2, 4:7.) A tapao na râ o te puai o te hau ê i to te taata nei ta ˈna e horoa mai. Na mua râ, e faaohipa tatou i to tatou iho puai, oia hoi e tutava tatou i tera e tera mahana i te vai ara ia ore ia hema. Na tatou tera hopoia. Ia rave tatou i ta tatou tuhaa, e pahono iho â Iehova i ta tatou mau pure no te ani i te puai hau ê. (Kor. 1, 10:13) No reira, maoti Iehova e vai ara ˈi tatou ia ore ia hema.