1-2. No te aha e nehenehe te hoê Kerisetiano e faaauhia i te hoê fare tahua teitei? (Korinetia 1, 15:58)

 I 1978, ua patuhia te hoê fare teitei e 60 tahua i Tokyo, i te fenua Tapone. Ua uiui te taata e nafea teie fare e tia noa ˈi noa ˈtu te mau aueueraa fenua. Ua hamanihia teie fare ia etaeta maitai e ia nehenehe e hautiuti rii, ia ore hoi te reira e fati i te aueueraa fenua. E au te mau Kerisetiano i teie fare tahua teitei. No te aha hoi?

² E titauhia i te hoê Kerisetiano ia vai aifaito noa, ia mau papu e ia ore e aueue. E haapao maite e e auraro noa o ˈna i te mau ture aveia a Iehova. (A taio i te Korinetia 1, 15:58.) Ua ineine o ˈna i te auraro e i te ore roa ˈtu e taiva. I te tahi atu pae, ia au i te tupuraa ta ˈna e farerei, e titauhia ia ˈna ia faatupu i te huru “au noa” aore ra ia vai aifaito. (Iak. 3:17) E haapao te hoê Kerisetiano ia vai aifaito noa, eiaha o ˈna e faatupu i te hoê huru etaeta roa aore ra e haapao ore i tei parauhia mai. I roto i teie tumu parau haapiiraa, e hiˈopoa tatou e nafea tatou e ore ai e aueue. E hiˈo atoa tatou e pae ravea ta Satani e faaohipa ra no te haafifi ia tatou e e nafea ia mau papu i mua i te reira.

3. Eaha te mau ture a te Iriti ture Rahi roa ˈˈe itehia i roto i te Ohipa 15:28, 29?

³ Ei Iriti ture Rahi roa ˈˈe, mea tano iho â na Iehova e haamau i te mau ture. E haamau o ˈna i te ture mea ohie no ta ˈna mau tavini ia taa. (Isa. 33:22) Ei hiˈoraa, ua faaite te Tino aratai o te senekele matamua e toru tuhaa e titauhia ˈi i te mau Kerisetiano ia mau papu: (1) Te patoiraa i te haamoriraa idolo e te haamoriraa ia Iehova anaˈe. (2) Te faaturaraa i te moˈaraa o te toto. (3) Te auraroraa i te mau ture aveia teitei a Iehova. (A taio i te Ohipa 15:28, 29.) I  teie mahana, e nafea te mau Kerisetiano e mau papu ai i roto i tera na toru tuhaa?

4. No te aha e titauhia ia haamori ia Iehova anaˈe? (Apokalupo 4:11)

⁴ E patoi tatou i te haamoriraa idolo e e haamori tatou ia Iehova anaˈe. Ua faaue Iehova i te mau Iseraela ia haamori ia ˈna anaˈe. (Deut. 5:6-10) A tamatahia ˈi Iesu e Satani, ua faaite roa ˈtu Iesu e, e tia ia haamori tatou ia Iehova anaˈe. (Mat. 4:8-10) Eiaha roa ˈtu râ tatou e haamori i te idolo, e faahanahana i te taata, mai te tia haapaoraa, te feia mana aore ra te taata tuiroo i te pae o te tuaro, hautiraa teata e himene. Eiaha roa ˈtu tatou e faariro ia ratou ei atua. E tia noa tatou i te pae o Iehova e e haamori noa tatou i tei “poiete i te mau mea atoa.”—A taio i te Apokalupo 4:11.

5. No te aha tatou e faatura ˈi i te ture a Iehova no nia i te moˈaraa o te ora e te toto?

⁵ E faatura tatou i te ture a Iehova no nia i te moˈaraa o te ora e te toto. No te aha? No te mea no Iehova, te toto, o te ora ïa e e ô faufaa roa te ora no ǒ mai ia ˈna ra. (Lev. 17:14) I te taime matamua i faatia ˈi Iehova i te taata ia amu i te iˈo animara, ua faaue o ˈna ia ratou eiaha ia amu i te toto. (Gen. 9:4) Ua faahiti-faahou-hia tera faaueraa i roto i te Ture a Mose horoahia i te mau Iseraela. (Lev. 17:10) Ua aratai atoa Iehova i te Tino aratai o te senekele matamua ia haapii i te mau Kerisetiano ia “haapae . . . i te toto.” (Ohi. 15:28, 29) E faaoti papu tatou i te pee i teie faaueraa, ia titauhia ia tatou ia rave i te faaotiraa no nia i te hoê ravea rapaauraa. b

6. Eaha te mau tutavaraa ta tatou e rave no te ora ia au i te mau ture aveia teitei a Iehova?

⁶ E faaoti papu anaˈe i te auraro i te mau ture aveia teitei a Iehova. (Heb. 13:4) Maoti te hoê faahohoˈaraa, ua aˈo te aposetolo Paulo ia tatou ma te parau: “A haapohe i te mau mero o to outou tino.” Te auraa, e rave tatou i te mau mea atoa no te haapae roa i te mau hinaaro tia ore o te tino. E patoi tatou i te mataitai aore ra i te rave i te tahi noa ˈˈe mea o te aratai ia tatou i te peu taotoraa tia ore. (Kol. 3:5; Ioba 31:1) I mua i te faahemaraa, oioi tatou i te patoi i te mau manaˈo tano ore e i te haapao i to tatou haerea o te nehenehe e haafifi i to tatou auhoaraa e te Atua.

7. Eaha ta tatou e faaoti papu i te rave e no te aha?

⁷ Te hinaaro ra Iehova ia auraro tatou ia ˈna “ma te aau tae.” (Roma 6:17) Eita tatou e nehenehe e maiti eaha te mau ture ta tatou e hinaaro e haapao, ua papu râ ia tatou ua horoa mai Iehova i te reira no to tatou maitai. (Isa. 48:17, 18; Kor. 1, 6:9, 10) E tutava tatou i te faaoaoa ia Iehova e i te faaite i te hoê â manaˈo e to te papai Salamo tei parau: “Ua faaoti au e auraro i ta oe mau faatureraa i te mau taime atoa e tae noa ˈtu i te hopea.” (Sal. 119:112) Noa ˈtu râ, e tamata noa Satani i te haaparuparu ia tatou. Eaha ta ˈna e faaohipa?

8. E nafea Satani e faaohipa ˈi i te hamani-ino-raa no te haaparuparu ia tatou?

⁸ Te hamani-ino-raa. E haamauiui te Diabolo ia tatou i te pae tino e feruriraa no te haaparuparu ia tatou. Te imi nei o ˈna i te ravea no te “amu” ia tatou e no  te faataa ê ia tatou ia Iehova. (Pet. 1, 5:8) Ua haamǎtaˈuhia te mau Kerisetiano matamua, ua tairihia e ua haapohehia ratou no te mea ua faaoti ratou i te mau papu. (Ohi. 5:27, 28, 40; 7:54-60) Te faaohipa noa nei Satani i te hamani-ino-raa i teie mahana. Inaha, te hamani-ino-hia ra to tatou mau taeae e tuahine i Rusia e i te tahi atu mau fenua.

9. No te aha e ara anaˈe i te mau faaheporaa? A horoa i te hiˈoraa.

⁹ Te faaheporaa. Hau atu i te hamani-ino-raa, te faaohipa nei Satani i “te mau ravea paari.” (Eph. 6:11) Teie te hiˈoraa o te taeae Bob. Ua tapeahia o ˈna i te fare maˈi e ua titauhia ia tâpûhia o ˈna. Ua faaara o ˈna i te mau taote e noa ˈtu eaha te tupu, eita roa ˈtu o ˈna e farii i te toto. Ua faatura te taote tâpû i ta ˈna i ani. I te po râ hou o ˈna a tâpûhia ˈi, i te faarueraa to ˈna utuafare i te fare maˈi, haere mai nei te taote faataoto e farerei mai ia Bob. Parau atura o ˈna ia Bob e faaineine noa ratou i te toto mai te peu noa ˈtu e fifihia o ˈna. Ua manaˈo paha te taote e taui Bob i to ˈna manaˈo aita anaˈe to ˈna utuafare i pihai iho ia ˈna. Aita roa ˈtu râ Bob i taui i ta ˈna faaotiraa. Ua parau o ˈna i te taote e eita roa ˈtu o ˈna e farii i te toto noa ˈtu eaha te tupu.

10. No te aha mea atâta roa te manaˈo taata? (Korinetia 1, 3:19, 20)

¹⁰ Te manaˈo taata. Mai te peu e manaˈo tatou mai te feia o teie nei ao, eita paha tatou e pee faahou ia Iehova e i ta ˈna mau ture aveia. (A taio i te Korinetia 1, 3:19, 20.) Pinepine “te paari o teie nei ao” i te faatupu i te mau hinaaro o te tino. Ua pee vetahi mau Kerisetiano i Peregamo e i Tuatira i te hiˈoraa o te feia e haaati ra ia ratou ma te haamori i te idolo e ma te rave i te ohipa tano ore. Ua aˈo etaeta Iesu i teie na amuiraa no te mea ua faatia noa ratou i te peu taotoraa tia ore. (Apo. 2:14, 20) I teie mahana, te turai ra te feia o teie nei ao ia tatou ia farii i to ratou mau manaˈo tano ore. E nehenehe te mau mero utuafare e te feia matauhia e tatou e turai ia tatou ia manaˈo e mea etaeta roa tatou e mea maitai aˈe ia ore e pee faahou i te mau ture a Iehova. Ei hiˈoraa, e parau ratou e aita e faufaa ia tapea i te hoê haerea viivii ore e eita te mau aratairaa Bibilia e tano faahou no teie tau.

11. Eaha te tia ia patoi ia mau papu noa tatou?

¹¹ I te tahi taime, e manaˈo paha tatou e eita e taa-maitai-hia te mau faaueraa a Iehova. E nehenehe paha tatou e “na nia ˈtu i tei papaihia.” (Kor. 1, 4:6) E peu-matau-hia te reira e te mau tia haapaoraa i te tau o Iesu. Taa ê atu i te Ture, ua tuu atoa ratou i te mau faaueraa taata a teimaha ˈtu ai te hopoia a te nunaa. (Mat. 23:4) Maoti ta ˈna Parau e ta ˈna faanahonahoraa, te horoa ra Iehova i te mau aratairaa papu. Eita ïa e titauhia ia tuu i te tahi atu faaueraa. (Mas. 3:5-7) No reira, eiaha roa ˈtu tatou e na nia ˈtu i tei papaihia i roto i te Bibilia aore ra e faahepo i te mau taeae e tuahine ia pee i to tatou manaˈo.

12. E nafea Satani e faaohipa ˈi i “te haavare faufaa ore”?

¹² Te mau haavare. Te faaohipa nei Satani i “te haavare faufaa ore” e “te mau mea rii a teie nei ao” ia vare e ia amahamaha te taata. (Kol. 2:8) I te senekele matamua, ua ô atoa mai te mau haapiiraa philosopho niuhia i nia i te manaˈo taata, te haapiiraa a te ati Iuda e te haapiiraa e parau ra mea tia ia haapao i te Ture a Mose. E mau haapiiraa hape anaˈe tera o te faaatea ê i te taata ia Iehova, te Atua î i te paari. I  teie mahana, te faaohipa nei Satani i te mau ravea apî e te mau tia mana no te haapurara i te mau parau haavare. Ua ite maitai tatou i te reira i te roaraa o te maˈi parare COVID-19. c Ua faufaahia te mau Ite no Iehova tei pee i te mau aratairaa no ǒ mai i te faanahonahoraa, aita ratou i haapeapea noa ˈˈe mai te feia tei faaroo i te mau parau hape.—Mat. 24:45.

13. No te aha mea tia ia ara i te mau faaanaanataeraa?

¹³ Te mau faaanaanataeraa. Mea tia ia haapao tatou i “te mea faufaa roa ˈˈe.” (Phil. 1:9, 10) E nehenehe te mau faaanaanataeraa e amu rahi roa i to tatou taime. E nehenehe te mau ohipa o te oraraa mai te maa, te inu, te faaanaanataeraa e te ohipa e riro ei mea faufaa aˈe i roto i to tatou oraraa. (Luka 21:34, 35) Hau atu, i te mau mahana atoa, ua î te mau vea i te mau parau no nia i te mau tatamaˈiraa poritita. Eiaha roa ˈtu tatou e toro i te tariˈa i taua mau parau ra a pee atu ai i teie mau manaˈo. Te faaohipa nei Satani i te mau ravea faahitihia i nia ˈtu no te turai ia tatou ia rave i te mea tano ore. E hiˈopoa anaˈe e nafea ia patoi i te reira e ia mau papu noa.

14. Eaha te hoê mea o te tauturu ia tia i te pae o Iehova?

¹⁴ A feruri no te aha oe i pûpû e i bapetizo ai ia oe. Ua na reira oe no to oe hinaaro e tia i te pae o Iehova. A feruri na i tei tauturu ia oe ia tiaturi papu e ua itehia ia oe te parau mau. Ua ite oe o vai Iehova e haamata ˈtura oe i te faatura e i te here i to oe Metua i te raˈi. Faatupu atura oe i te faaroo ia ˈna e tatarahapa aˈera oe. No to oe here, ua faarue oe i te peu iino e ua rave oe i te hinaaro o te Atua. Ua oaoa roa oe i to oe iteraa e ua faaore te Atua i ta oe mau hara. (Sal. 32:1, 2) Ua apiti oe i te mau putuputuraa e ua haamata oe i te faaite ia vetahi ê i te mau mea faahiahia atoa ta oe i haapii. Ei Kerisetiano pûpûhia e bapetizohia, te haere nei oe na nia i  te eˈa o te ora e e faaoti papu oe i te tamau i te na reira.—Mat. 7:13, 14.

15. No te aha mea faufaa ia haapii i te Bibilia e ia feruriruri i nia i te reira?

¹⁵ A haapii i te Bibilia e a feruriruri i nia i te reira. Mai te hoê tumu raau tei aˈa maitai i roto i te repo, e mau papu atoa tatou mai te peu mea puai to tatou tiaturi i te Parau a te Atua. A tupu noa ˈi te tumu raau, e haere hohonu roa ˈtu â te aˈa. Ia haapii e ia feruriruri tatou, e puai atu â to tatou faaroo e e papu atu â ia tatou e o te mau raveraa a te Atua te mea maitai roa ˈˈe. (Kol. 2:6, 7) A feruri na mea nafea te mau faaueraa, te mau aˈoraa e te paruru a Iehova i tauturu ai i ta ˈna mau tavini i tahito ra. Ei hiˈoraa, ua ite orama Ezekiela i te hoê melahi e faito maite ra i te hiero. Ua faaitoito mau â teie orama ia Ezekiela e mea rahi te haapiiraa faufaa ta tatou e fanaˈo. Ua ite ïa tatou e nafea ia pee i te mau ture aveia a Iehova i roto i ta tatou haamoriraa viivii ore. d (Ezk. 40:1-4; 43:10-12) E faufaahia tatou a rave ai i te taime no te haapii e no te feruriruri i nia i te mau haapiiraa hohonu o te Parau a te Atua.

16. Mea nafea Bob i te faaiteraa e aau aueue ore to ˈna? (Salamo 112:7)

¹⁶ Ei aau aueue ore to oe e tia ˈi. Ua faaite te arii Davida i to ˈna here ia Iehova ma te himene: “E aau aueue ore to ˈu, e te Atua e.” (Sal. 57:7) E nehenehe atoa tatou e faaite e e aau aueue ore to tatou ma te tiaturi papu ia Iehova. (A taio i te Salamo 112:7.) Mea nafea te reira i te tautururaa ia Bob? I to te taote faaararaa ia ˈna e ua faaineinehia te toto mai te peu noa ˈtu e fifihia o ˈna, oioi Bob i te pahonoraa, mai te peu eita te taote e faatura i ta ˈna aniraa e faarue o ˈna i te fare maˈi i tera iho â taime. I muri iho, ua parau Bob: “Aita vau i feaa e i haapeapea noa ˈˈe.”

17. Eaha te haapii mai i te hiˈoraa o Bob? (A hiˈo atoa i te hohoˈa.)

¹⁷ Aita Bob i aueue noa ˈˈe no te mea hou a tapeahia ˈi oia i te fare maˈi, ua faaoti aˈena o ˈna i te mau papu. A tahi, ua hinaaro o ˈna e faaoaoa ia Iehova. A piti, i roto i te Bibilia e i ta tatou mau papai, ua  heheu o ˈna i te parau no nia i te moˈaraa o te ora e te toto. A toru, ua papu ia ˈna e ia pee maite o ˈna i te mau aratairaa a Iehova, e haamaitaihia oia. Noa ˈtu eaha te fifi ta tatou e faaruru, ei aau aueue ore noa to tatou e tia ˈi.

18. E nafea te hiˈoraa o Baraka e haapii ai ia tatou ia tiaturi ia Iehova? (A hiˈo i te hohoˈa i te api matamua.)

¹⁸ A tiaturi ia Iehova. E hiˈo anaˈe mea nafea to Baraka faufaaraahia i te tiaturi i ta Iehova aratairaa. Noa ˈtu aita i itehia hoê noa ˈˈe paruru e omore i Iseraela, ua faaue Iehova ia Baraka ia haere e aro ia Sisera, te raatira o te nuu Kanaana. (Tav. 5:8) Ua parau te peropheta vahine ra o Debora ia Baraka ia pou mai nia mai i te mouˈa Tabora no te aro ia Sisera e ta ˈna na 900 pereoo tamaˈi. Ua ite Baraka e mea fifi ia aro i te mau pereoo tamaˈi tei te vahi papu anaˈe ratou. Noa ˈtu râ, ua auraro o ˈna. A pou ai te mau faehau mai nia mai i te mouˈa Tabora, ua faatopa Iehova i te ua. Mau atura te mau pereoo tamaˈi a Sisera i roto i te vari. Maoti Iehova i upootia ˈi Baraka. (Tav. 4:1-7, 10, 13-16) E upootia atoa tatou maoti Iehova mai te peu e tiaturi tatou ia ˈna e i te mau aratairaa ta ˈna e horoa mai na roto i ta ˈna faanahonahoraa.—Deut. 31:6.

19. No te aha mea faufaa ia mau papu tatou?

¹⁹ A ora noa ˈi tatou i roto i teie ao ino, e titauhia ia tamau i te mau papu. (Tim. 1, 6:11, 12; Pet. 2, 3:17) Eiaha roa ˈtu tatou e aueue i mua i te hamani-ino-raa, te faaheporaa, te manaˈo taata, te mau parau haavare e te mau faaanaanataeraa. (Eph. 4:14) E mau papu tatou e e tamau tatou i te here ia Iehova e i te auraro i ta ˈna mau faaueraa. E faaoti papu anaˈe i te ore roa ˈtu e aueue. I te hoê â taime, e faaite noa tatou i te huru au noa. I roto i te tumu parau haapiiraa i muri mai, e hiˈo tatou no te aha o Iehova raua Iesu te hiˈoraa maitai roa ˈˈe tei faaite i te huru au noa.