TE HIˈORAA O TO ˈU NA METUA

I 1957, ua faarue to ˈu na metua i Italia no te haere i Kindersley, i Saskatchewan i te fenua Kanada. I muri noa ˈˈe, ua haapii raua i te parau mau e ua riro te reira ei mea faufaa roa ˈˈe i roto i to matou oraraa. Te haamanaˈo ra vau i to ˈu tamariiraa, pinepine matou i te poro i te mahana taatoa. Ua hauti ïa vau i te tahi taime ma te parau “Iae, e vaˈu noa matahiti to ˈu, era ua riro mai au ei pionie tauturu.”

Mea veve roa to ˈu na metua, noa ˈtu râ ua horoa raua i te hiˈoraa maitai. Inaha, ua rave raua i te mau haapaeraa no te tavini ia Iehova. Ei hiˈoraa, i 1963, ua hoo raua e rave rahi o ta raua mau faufaa ia nehenehe matou pauroa e haere i te tairururaa nunaa rau i Pasadena, i Kalifonia i Marite. I 1972, ua haere matou e ora i Trail, Colombie i Kanada no te tauturu i te feia e paraparau ra i te reo Italia. Ua hau atu ïa 1 000 kilometera te atea i to matou fare. Ua ohipa to ˈu papa ei taata tamâ fare toa. Aita o ˈna i farii i te tahi atu mau hopoia ia rahi mai te moni no te mea ua tiatonu o ˈna i te mau ohipa pae varua.

Ua mauruuru roa vau i to ˈu na metua no te hiˈoraa maitai ta raua i faaite mai ia ˈu, to ˈu tuaana e to ˈu na tuahine. Ua riro te reira ei faaineineraa ia ˈu i roto i te taviniraa ia Iehova, inaha ua haapii mai raua te mea faufaa roa ˈˈe: E aupuru mai iho â Iehova ia imi na mua vau i te Faatereraa arii a te Atua.—Mat. 6:33.

TE HAAMATARAA I TE TAVINIRAA TAIME TAATOA

I 1980, ua faaipoipo vau ia Debbie. E tuahine haviti mau e te feruriraa paari i te pae varua. Ua hinaaro mâua e rave i te taviniraa taime taatoa. Haamata ˈtura ïa Debbie i te taviniraa pionie e toru avaˈe i muri aˈe i to mâua faaipoiporaa. Tau avaˈe i muri iho, ua haere mâua e tavini i roto i te hoê amuiraa nainai e hinaaro-rahi-hia te tauturu e ua rave atoa vau i te taviniraa pionie.

 I te hoê râ taime, ua toaruaru mâua e ua hinaaro mâua e haere e tavini i te tahi atu vahi. Tera râ, ua paraparau na mua mâua i te tiaau haaati. Ua faataa mai o ˈna ma te here: “No orua te fifi. Tiatonu noa paˈi orua i te mau fifi ta orua e farerei ra, eiaha râ i te mau maitai o to orua oraraa.” Ua tano maitai teie aˈoraa no mâua. (Sal. 141:5) E ua taa ia mâua e rave rahi tupuraa faaitoito ta mâua i ite. Ei hiˈoraa, i roto i ta mâua amuiraa, e rave rahi mero o te hinaaro ra e rave hau atu â no Iehova. Oia atoa te mau tamarii e te mau taeae e tuahine aita to ratou apiti i roto i te parau mau. Ua riro te reira ei haapiiraa faufaa roa. Ua taa ia mâua te faufaaraa ia imi i te maitai i roto i to mâua nei tupuraa, e ia tiai na Iehova e faatitiaifaro i te hoê fifi. (Mika 7:7) Ua oaoa faahou mâua e ua maitai mai to mâua tupuraa.

I ta mâua haapiiraa no te mau pionie, e maha taeae haapii. I tavini na ratou i e rave rahi mau fenua. Ua faaite mai ratou i te mau hohoˈa e ua faatia mai ratou i te mau fifi ta ratou i faaruru, oia atoa râ te mau haamaitairaa ta ratou i fanaˈo. Hinaaro roa ˈtura mâua e tavini ei mitionare. Mai reira mai, faaoti atura mâua e tamata i tera taviniraa.

Ia naea tera fa, i 1984, ua haere mâua Debbie e tavini i roto i te amuiraa reo Farani i Québec. Ua hau ïa 4 000 kilometera i te atea i to mâua fare, i Colombie-Britannique. Te auraa, e taˈere apî e e reo apî. Te tahi atu fifi ta mâua i faaruru, pinepine aita i rahi ta mâua moni. I te hoê taime, ta mâua noa maa, o te toea umara putete ïa ta mâua i ohi haere i roto i te hoê faaapu. Mea ite Debbie i te tunu i te maa huru rau maoti teie mau umara putete. Noa ˈtu teie mau fifi, ua oaoa noa mâua. Te mea papu, ua taa ia mâua e ua aupuru mai iho â Iehova.—Sal. 64:10.

I te hoê mahana, ua titau-manihini-hia mâua ia tavini i te Betela i Kanada. Tera noa râ, ua faaî mâua i te hoê titauraa e apiti i te Haapiiraa no Gileada. E piti ïa huru to mâua i tera taime. Hoê pae, ua oaoa mâua i te haere i te Betela e te tahi atu pae, ua hepohepo no ta mâua titauraa. Tera râ, ua farii mâua i te titau-manihini-raa. Taeraa ˈtu i te Betela, ua ani mâua ia taeae Kenneth Little, hoê mero o te Tomite amaa: “Eaha ˈtura no ta mâua aniraa e  haere i Gileada?” Pahono mai nei o ˈna: “A tiai noa ˈtu mai te peu e titau-manihini-hia orua.”

Tera iho â tei tupu. Hoê hebedoma i muri aˈe, ua titau-manihini-hia mâua Debbie ia haere i te Haapiiraa no Gileada e ua titauhia ia rave mâua hoê faaotiraa. Ua parau mai te taeae Little: “Noa ˈtu eaha ta orua e faaoti, hoê mahana e parau paha ïa orua, ‘Ahani tâua i rave i te tahi atu faaotiraa.’ E faaotiraa maitai tera e piti toa ra ta Iehova ïa e haamaitai.” Farii ihora mâua i te titau-manihini-raa e haere i Gileada. I te roaraa o te mau matahiti, ua taa ia mâua mea papu roa te mau aˈoraa ta taeae Little i horoa mai. Pinepine mâua i te faahiti i ta ˈna mau aˈoraa i te mau taeae e tuahine tei titauhia ia maiti i roto e piti huru taviniraa ia Iehova.

TE TAVINIRAA MITIONARE

E 24 piahi matou pauroa i te 83raa o te Piha haapiiraa no Gileada. Ua tupu te reira i Brooklyn, i New York i Eperera 1987. O taeae Ulysses Glass raua Jack Redford to matou taeae haapii. E pae avaˈe te roaraa o teie haapiiraa e ua noaa mai ta mâua parau tuite i te 6 no Tetepa 1987. Ua tonohia mâua i te fenua no Haïti e te taeae John raua ta ˈna vahine o Marie Goode.

Aita faahou e mitionare no Gileada tei tonohia i Haïti mai te matahiti 1962. Inaha i tera matahiti, ua titauhia i te mau mitionare ia faarue i tera fenua. Toru hebedoma i muri aˈe, i te noaaraa mai i ta mâua parau tuite, ua haere mâua e tavini i Haïti i roto i te hoê amuiraa nainai. E 35 feia poro i roto roa i te mau mouˈa. Mea apî noa ïa mâua i tera  taime e aita mâua i ite rahi roa no nia i te taviniraa. O mâua anaˈe i te fare o te mau mitionare. Mea veve roa te taata e ora ra i Haïti e aita te rahiraa o ratou i ite i te taio. I te mau mahana matamua o ta mâua taviniraa, ua ite mâua i te mau faahuehueraa i roto i te huiraatira. Ua tamata atoa te feia patoi i te haru i te faatereraa. Te vai atoa ra te mau opaniraa purumu e ura noa ra e te mau vero.

E rave rahi haapiiraa faufaa ta mâua i apo mai i te mau taeae e tuahine itoito i Haïti. Mea fifi roa to ratou oraraa. Noa ˈtu râ, mea puai to ratou here ia Iehova e mea itoito ratou i roto i te taviniraa. Ei hiˈoraa, aita te hoê tuahine ruhiruhia i ite i te taio. Tera râ, ua mau aau ia ˈna 150 irava Bibilia. Ua faaitoito teie mau tupuraa ia mâua ia tamau i te faaite o te Faatereraa arii a te Atua anaˈe te nehenehe e faatitiaifaro i te mau fifi o te taata. Ua putapû atoa mâua i te iteraa i te mau piahi Bibilia ia nuu i mua i te pae varua a tavini atu ai ei pionie tamau, ei pionie taa ê e ei matahiapo.

I Haïti, ua farerei au ia Trevor hoê taurearea e mitionare Momoni o ˈna. E rave rahi taime to mâua tauaparauraa no nia i te Bibilia. Tau matahiti i muri aˈe, ua hapono mai o ˈna hoê rata. Te na ô ra o ˈna i roto: “E bapetizohia vau ei Ite no Iehova i to muri nei tairururaa! Te opua ra vau e hoˈi i Haïti no te tavini ei pionie taa ê i te vahi i reira vau i te taviniraa ei mitionare Momoni.” Tera iho â ta ˈna i rave i te roaraa e rave rahi matahiti e ta ˈna vahine.

I EUROPA E I AFIRIKA I MURI MAI

Ua tonohia mâua i te hoê tuhaa o Europa, ua matara faahou hoi te ohipa pororaa i reira. I 1992, ua tapae mâua i Ljubljana i Slovénie, te hoê vahi i reira to ˈu na metua i te paariraa hou raua a haere ai i Italia. Te tupu noa ra te aroraa i te tahi mau vahi i Yougoslavie. Na te amaa o Vienne i Auteteria, oia atoa te piha i Zagreb i Croatie, e i Belgrade i Serbie e tiaau ra i te ohipa pororaa i tera fenua. No reira, ua titauhia hoê Betela no teie mau fenua tataitahi.

Ua titauhia ïa ia haapii mâua i te reo ê e ia haamatau i to ratou taˈere. E parau mai to reira mau taata: “Jezik je težek.” Teie te auraa: “Mea fifi roa ia haapii i to matou reo.” E tera iho â! Noa ˈtu  râ, ua faahiahia mâua i te taiva ore o te mau taeae e tuahine o te ineine i te auraro i te mau faanahoraa apî no ǒ mai i te faanahonahoraa. E ua ite mâua mea nafea Iehova i te haamaitairaa ia ratou. I reira atoa, ua ite mâua mea nafea Iehova i te faatitiaifaroraa i te mau ohipa ma te here e te tano. Hou mâua a haere ai i Slovénie, e rave rahi haapiiraa ta mâua i haapii ê na. I to mâua râ taviniraa i ô, ua haapii mâua i te tahi atu mea faufaa.

Ua tupu râ te tahi mau tauiraa i muri mai. Inaha i 2000, ua tonohia mâua i Côte d’Ivoire, i Afirika tooa o te râ. I muri mai i Novema 2002, no te tamaˈi ua faarevahia mâua i Sierra Leone. Ua tupu te tamaˈi i tera fenua 11 matahiti te maoro, e no hope noa ˈtura te reira. Mea fifi roa no mâua ia faarue taue noa i Côte d’Ivoire. Noa ˈtu râ, ua tauturu mai ta mâua i haapii ê na ia oaoa noa.

Ua tiatonu noa mâua i te taata e ora ra i ǒ. E rave rahi hoi tei anaanatae i te parau mau. Ua putapû mâua i te hiˈoraa o te mau taeae e tuahine tei faaoromai i te tamaˈi e rave rahi matahiti. Noa ˈtu to ratou veve, ua ineine ratou i te horoa i te mea e vai nei ia ratou. Ei hiˈoraa, ua horoa te hoê tuahine i te ahu na Debbie. Aita Debbie i farii no to ˈna aroha i teie tuahine. Na ô mai nei o ˈna: “I te roaraa o te tamaˈi, na te mau taeae e tuahine no te tahi mau fenua i tauturu ia matou. I teie nei râ, na matou e tauturu atu.” Ua hinaaro roa mâua e pee i to ratou hiˈoraa.

I te pae hopea, ua hoˈi mâua i Côte d’Ivoire, ua tupu faahou râ te faahuehueraa i ǒ. No reira i Novema 2004, ua faarevahia mâua na nia i te manureva tautau. E pute 10 kilo noa ta ˈu e ta Deb⁠bie. Ua taoto mâua i te aua nuu faehau Farani, aita e roˈi mea taoto noa i raro. Poipoi aˈe ua faarevahia mâua i Helevetia. Maororaa po to mâua taeraa ˈtu i te amaa. Na te mero o te Tomite amaa, e te mau taeae haapii o te Haapiiraa faaineineraa no te taviniraa, e ta ratou mau vahine, i farii ia mâua. Ua tauahi roa mai ratou, e ua horoa mai i te maa e te totora na mâua. Ua putapû roa mâua Debbie.

I muri aˈe, ua tonohia mâua i Ghana no te hoê taime poto noa e ua faahoˈihia mâua i Côte d’Ivoire inaha ua iti mai te mau faahuehueraa i reira. Na te here o te mau taeae e tuahine i tauturu ia mâua i roto i teie mau tupuraa fifi e tauiraa. Ua taa ia mâua Debbie e noa ˈtu tera iho â te hinaarohia i roto i te nunaa o Iehova, aita râ mâua i haafaufaa ore teie here taeae. Inaha ua riro teie mau haafifiraa ei faaineineraa ia mâua.

I HITIA O TE RÂ NO ROPU

I 2006, ua faataehia mai te hoê rata no ǒ mai i te pu rahi tei faaite mai e tonohia mâua i Hitia o te râ no ropu. E titauhia ïa ia haapii mâua i te tahi atu mau reo e te taˈere. E tupuraa apî ïa ta mâua e farerei. Mea rahi ta mâua i haapii mai inaha mea puai te ohipa poritita i ǒ e te haapaoraa. Ua au roa mâua i te mau amuiraa. Noa ˈtu ua rau te mau reo, mea tahoê ratou pauroa no te mea te pee nei ratou i te mau aratairaa. Ua faahiahia mâua i te itoito o te mau taeae e tuahine no te mea ua faaruru ratou i te patoiraa a te fetii, te mau hoa haapiiraa e hoa ohipa, oia atoa te feia tapiri.

I 2012, ua apiti mâua i te tairururaa taa ê i Tel Aviv, i Iseraela. A tahi ra te nunaa o Iehova i ruru ai  i tera vahi mai te Penetekose 33 mai â. Eita roa ˈtu e moˈehia ia mâua tera mahana!

I tera roaraa, ua tere mâua i te vahi ua opanihia te ohipa pororaa i reira. Ua afai atu mâua te tahi o ta tatou mau papai, ua haere mâua e poro e i te tairururaa. I te mau vahi atoa, e itehia te mau faehau e ta ratou mau vahi hiˈopoaraa, aita râ mâua i haapeapea noa ˈˈe a poro ai na muri i te mau taeae.

UA HOˈI MÂUA I AFIRIKA

I 2013, ua anihia mâua ia tavini i te amaa no Kinshasa, i Congo. E fenua nehenehe mau teie. Mea veve roa râ te taata, e pinepine atoa te aroraa i te tupu i reira. I te omuaraa, ua parau mâua: “Ua matau ia mâua i Afirika, ua ineine ïa mâua.” Tera noa râ, e rave rahi atu â ohipa tei titauhia ia haapii mâua, i te taime e tere ai mâua na te mau vahi aita e purumu. Noa ˈtu râ, ua tiatonu mâua i te mau mea maitai. Ei hiˈoraa, te itoito e te oaoa o te mau taeae e tuahine. Noa ˈtu to ratou veve, mea itoito ratou i roto i te pororaa, no te haere i te putuputuraa e i te tairururaa. Ua ite mâua e rave rahi taata tei anaanatae i te parau mau maoti noa te haamaitairaa a Iehova. Ua au roa mâua i te taviniraa i Congo, e ua fanaˈo mâua i te mau hoa here.

I te hopea o te matahiti 2017, ua tonohia mâua i Afirika apatoa. To reira te amaa rahi roa ˈˈe ta mâua i tavini na. Ua horoahia mai te tahi ohipa ia haapao e a tahi ra mâua i rave ai i te reira. Ua haapii atoa mai mâua te mau haapiiraa faufaa e ua tauturu rahi mai ta mâua i haapii na mua ˈtu. Ua faahiahia mâua i te mau taeae e tuahine tei faaoromai tamau. Mea putapû atoa ia ite e mea tahoê te utuafare o te Betela noa ˈtu e ere hoê â taˈere e reo to ratou. E vai noa te hau i roto i to Iehova nunaa no te mea te tutava nei ta ˈna mau tavini i te ahu mai i te huru taata apî.

I tera rahiraa matahiti, ua fanaˈo mâua Debbie e rave rahi haamaitairaa, e ua haapii mâua i te taˈere apî e te mau reo apî. E ere i te mea ohie. Tera râ, ua fanaˈo mâua i to Iehova here taiva ore na roto i ta ˈna faanahonahoraa e te mau taeae e tuahi⁠ne. (Sal. 144:2) Te mau ohipa faufaa ta mâua i haapii a tavini ai ma te taime taatoa, ua tauturu te reira ia mâua ia riro ei Kerisetiano maitai aˈe.

Te poihere nei au i ta to ˈu na metua i haapii mai ia ˈu. Te mauruuru atoa nei au i ta ˈu vahine ra o Debbie no ta ˈna tauturu, e te mau hiˈoraa maitai ta ˈu i ite i roto i te utuafare pae varua ati aˈe te ao nei. A feruri ai mâua i te tupu a muri aˈe, ua faaoti papu mâua i te apo mai i te mau haapiiraa no ǒ mai ia Iehova ra, to tatou Orometua Rahi roa ˈˈe.