1-2. (1) No te aha eita tatou e maere e e faaruru tatou i te fifi? (2) Eaha ta tatou e hiˈopoa mai i roto i teie tumu parau haapiiraa?

 EI ITE no Iehova, eita tatou e maere ia faaruru anaˈe tatou i te fifi. Te taa ra ia tatou i ta te Bibilia e parau ra: “E na roto atu tatou i te ati e rave rahi e ô ai tatou i roto i te Faatereraa arii a te Atua.” (Ohi. 14:22) Ua ite atoa tatou e e ore roa vetahi o to tatou mau fifi ua tae anaˈe tatou i roto i te ao apî, i reira ‘te pohe, te oto, te auê e te mauiui’ e ore roa ˈi.​—Apo. 21:4.

² E vaiiho Iehova ia tatou ia faaruru i te fifi, e tauturu râ o ˈna ia tatou ia faaoromai tamau i te reira. E hiˈo anaˈe eaha ta te aposetolo Paulo i parau i te mau Kerisetiano no Roma. Ua faahiti na mua oia i te mau fifi atoa ta ˈna e ta to ˈna mau taeae i faaruru. I muri iho, ua papai oia: “E upootia roa tatou i nia i taua mau mea atoa ra na roto ia ˈna tei here mai ia tatou.” (Roma 8:35-37) Te auraa ïa, e nehenehe Iehova e tauturu ia tatou ia faaruru i te fifi. E hiˈo mai tatou mea nafea Iehova i te tautururaa ia Iosepha ia manuïa e e nafea o ˈna e tauturu atoa ˈi ia tatou.

3. Mea nafea te oraraa o Iosepha i te taui-taue-raa?

³ Ua faaite roa ˈtu Iakoba e mea here roa na ˈna i ta ˈna tamaiti o Iosepha. (Gen. 37:3, 4) No reira to ˈna mau tuaana i pohehae roa ˈi ia ˈna. Ei faahopearaa, ua hoo ratou ia Iosepha i te feia hoohoo no Midiana. Afai roa ˈtura taua feia ra ia Iosepha i Aiphiti, tau hanere kilometera atea i to ˈna nohoraa, e hoo atura ia ˈna ia Potiphara ra, te raatira o te mau tiai a Pharao. Mea na reira te oraraa o Iosepha i te taui-taue-raa. E ere faahou ïa o Iosepha i te tamaiti herehia  e Iakoba, e tîtî râ oia i Aiphiti i teie nei!​—Gen. 39:1.

4. E nafea tatou e faaruru ai i te hoê â fifi e to Iosepha?

⁴ Te na ô ra te Bibilia: “E roohia [tatou] pauroa i te taime e te tupuraa manaˈo-ore-hia.” (Koh. 9:11) Te faaruru nei tatou paatoa i te hoê â fifi i faaruruhia e te taata atoa. (Kor. 1, 10:13) E nehenehe atoa tatou e mauiui no te mea e pǐpǐ tatou na Iesu. Ei hiˈoraa, e faaruru paha tatou i te faaoooraa, te patoiraa e te hamani-ino-raa no te mea te tavini ra tatou ia Iehova. (Tim. 2, 3:12) Noa ˈtu eaha te fifi ta oe e faaruru ra, e nehenehe Iehova e tauturu ia oe. Mea nafea Iehova i te tautururaa ia Iosepha?

5. Eaha ta Potiphara i manaˈo i te iteraa e ua manuïa Iosepha? (Genese 39:2-6)

⁵ A taio i te Genese 39:2-6. Ua tapao Potiphara e e taata maramarama o Iosepha e te itoito atoa. Ua taa atoa ia ˈna e na Iehova e “haamanuïa ra . . . i te mau mea atoa ta [Iosepha] e rave ra.” b Papu maitai, ua maiti Potiphara ia Iosepha ei tiaau tiaturihia na ˈna e ua faatoroa atoa ia ˈna i nia i to ˈna utuafare atoa. Mai reira mai, haamaitai rahi ihora Iehova i te utuafare o Potiphara.

6. Eaha paha te huru o Iosepha i mua i to ˈna tupuraa?

⁶ A feruri na o tatou aˈe o Iosepha. Eaha te mea ta Iosepha i hinaaro i tera taime? Ia itehia mai anei o ˈna e Potiphara e ia fanaˈo i ta ˈna farii maitai? Eita, ua hinaaro râ Iosepha ia tuuhia o ˈna, ia nehenehe oia e hoˈi i pihai iho i to ˈna metua tane ra o Iakoba. Noa ˈtu ua faatoroahia o ˈna i nia i te utuafare taatoa o Potiphara, e tavini râ o ˈna na te hoê fatu o te ore e haamori ra ia Iehova. Aita o Iehova i turai ia Potiphara ia tuu ia Iosepha. Hau atu, ua ino roa ˈtu â te tupuraa o Iosepha.

7. Mea nafea te tupuraa o Iosepha i te ino-roa-raa? (Genese 39:14, 15)

⁷ Mai tei faahitihia i roto i te Genese pene 39, ua faahinaaro te vahine a Potiphara ia Iosepha. E rave rahi taime to ˈna faaheporaa ia Iosepha ia taoto ia ˈna, aita  râ Iosepha i hema noa ˈˈe. I muri iho, ua riri roa o ˈna ia Iosepha e pari atura e ua hinaaro Iosepha e mafera ia ˈna. (A taio i te Genese 39:14, 15.) I to Potiphara faarooraa, tuu ihora oia ia Iosepha i roto i te fare tapearaa, i reira to ˈna vairaa tau matahiti. (Gen. 39:19, 20) Mai teihea te huru o te fare tapearaa? Te taˈo Hebera ta Iosepha i faaohipa no te parau “fare tapearaa,” e “apoo pape” ïa aore ra e “apoo” te auraa. Ua hinaaro paha o Iosepha e faaite e mea poiri roa i roto i to ˈna fare tapearaa e ua toaruaru roa o ˈna. (Gen. 40:15, nota) Inaha, ua faataa te Bibilia e i te hoê taime, ua taamuhia na avae o Iosepha i te fifi e ua tamauhia to ˈna arapoa i te auri. (Sal. 105:17, 18) Te ino noa ˈtura te tupuraa o Iosepha. E tiaau tiaturihia oia na mua ˈˈe, i teie nei râ, e mau auri oia.

8. Noa ˈtu e ino roa ˈtu â to tatou tupuraa, eaha tei papu ia tatou?

⁸ Ua faaruru aˈena anei outou i te hoê tupuraa tei ino roa ˈtu â noa ˈtu ta outou mau pure? E nehenehe iho â te reira e tupu. Eita Iehova e paruru ia tatou i te mau fifi o teie ao faaterehia ra e Satani. (Ioa. 1, 5:19) E nehenehe râ outou e papu e te ite mai ra Iehova i te fifi ta outou e faaruru ra e te tâuˈa ra o ˈna ia outou. (Mat. 10:29-31; Pet. 1, 5:6, 7) Hau atu, ua fafau oia: “E ore roa vau e vaiiho ia oe, e e ore roa vau e faarue ia oe.” (Heb. 13:5) E nehenehe Iehova e tauturu ia outou ia faaoromai tamau i te hoê fifi e au ra e aita e ravea faahou. E hiˈo anaˈe e mea nafea Iosepha i te faarururaa i te hoê tupuraa mai teie.

9. Eaha te haapapu ra e tei pihai iho Iehova ia Iosepha noa ˈtu tei roto oia i te fare tapearaa? (Genese 39:21-23)

⁹ A taio i te Genese 39:21-23. Noa ˈtu tei roto Iosepha i te fare tapearaa, ua haamanuïa Iehova i te mau mea atoa ta Iosepha i rave. Mea nafea? Ua haamaitai Iehova ia Iosepha ia tiaturihia e ia faaturahia oia e te raatira o te fare tapearaa. I muri iho, horoa ˈtura te raatira o te fare tapearaa e na Iosepha e haapao i te mau auri. Te parau ra te Bibilia: “Aita roa ˈtu te raatira o te fare tapearaa i haapeapea noa ˈˈe no tei horoahia e na Iosepha e haapao.” I teie nei, e ohipa faufaa roa te titauhia ia Iosepha ia rave. E ere anei i te mea maere ia fanaˈo oia i te hoê tiaraa mai teie, e mau auri hoi oia tei parihia e ua tamata i te mafera i te vahine a te hoê tia mana a Pharao? Te faataa ra te Genese 39:23 i te tumu: “Tei pihai iho hoi Iehova ia Iosepha e ua haamanuïa Iehova i te mau mea atoa ta ˈna e rave ra.”

10. A faataa no te aha Iosepha i nehenehe ai e manaˈo e aita oia i manuïa i roto i te mau mea atoa ta ˈna i rave.

¹⁰ A feruri faahou na i te huru o Iosepha i mua i to ˈna tupuraa. A feruri na i te pari-haavare-raahia Iosepha e i to ˈna mauraa i te fare tapearaa, ua manaˈo anei o ˈna e ua manuïa oia i roto i te mau mea atoa ta ˈna i rave? Eaha mau na ta Iosepha i hinaaro i tera taime? E fanaˈo anei i te farii maitai o te raatira o te fare tapearaa? Eita, ua hinaaro râ Iosepha ia faaorehia te parau tei parihia i nia ia ˈna e ia tuuhia mai o ˈna. Ua ani hoi Iosepha i te tahi atu mau auri tei tuuhia ia paraparau ia Pharao no ˈna ia nehenehe oia e matara atoa mai i te fare tapearaa. (Gen. 40:14) Aita râ teie taata i paraparau oioi ia Pharao no Iosepha. Ei faahopearaa, ua faaea Iosepha e piti faahou matahiti i roto i te fare tapearaa. (Gen. 40:23; 41:1, 14) Noa ˈtu  râ, ua tamau Iehova i te haamaitai ia Iosepha. Mea nafea?

11. Eaha te aravihi taa ê ta Iehova i horoa ia Iosepha e mea nafea te reira i te tautururaa ia tupu te opuaraa a Iehova?

¹¹ Tei roto noa â Iosepha i te fare tapearaa e ua faaite Iehova e piti moemoeâ i te arii no Aiphiti. Hinaaro roa ˈtura Pharao e ite i te auraa o na moemoeâ e piti. I te parauraahia Pharao e mea aravihi o Iosepha no te tatara i te auraa o te mau moemoeâ, faaue atura ia tiihia mai o ˈna. Maoti te tauturu a Iehova, ua faataa Iosepha i te auraa o na moemoeâ e ua maere roa Pharao i te mau aratairaa ta Iosepha i horoa ˈtu. A ite ai e tei pihai iho Iehova ia Iosepha, faatoroa ˈtura Pharao ia ˈna no te haapao i te maa i nia i te fenua taatoa o Aiphiti. (Gen. 41:38, 41-44) I muri aˈe, tupu atura hoê oˈe rahi i Aiphiti e i Kanaana te fenua i reira te utuafare o Iosepha e ora ˈi. Ua nehenehe ïa Iosepha e faaora i to ˈna utuafare e e paruru i te huaai o te aratai i te Mesia.

12. Mea nafea Iehova i te haamanuïaraa ia Iosepha?

¹² A haamanaˈo i te mau tupuraa tei taui i te oraraa o Iosepha. A riro ai Iosepha ei tîtî, na vai i turai ia Potiphara ia tapao i to ˈna mau huru maitatai? A riro ai o ˈna ei mau auri, na vai i turai i te raatira o te fare tapearaa ia faatoroa ia Iosepha? Na vai i faaite ia Pharao i te mau moemoeâ e na vai atoa i tauturu ia Iosepha ia tatara i te auraa o te reira? Na vai atoa i turai ia Pharao ia faatoroa ia Iosepha no te haapao i te maa i nia i te fenua taatoa o Aiphiti? (Gen. 45:5) Papu roa, na Iehova i haamanuïa ia Iosepha i roto i te mau mea atoa ta ˈna i rave. I te pae hopea, ua faaohipa Iehova i te opuaraa a te mau tuaana o Iosepha no te faatupu i to ˈna hinaaro.

13. E nehenehe anei Iehova e paruru ia tatou i roto i te mau tupuraa atoa? A faataa.

¹³ Eaha te haapii mai i tei tupu no Iosepha? E nehenehe anei Iehova e paruru ia tatou i roto i te mau tupuraa atoa? Te faatere ra anei Iehova i te mau tupuraa atoa o to tatou oraraa, a vaiiho ai ia faaruru tatou i te fifi no te hoê tumu papu? E ere  tera ta te Bibilia e haapii ra. (Koh. 8:9; 9:11) Ua papu râ ia tatou e ia faaruru tatou i te hoê fifi, te ite mai ra Iehova e te faaroo ra o ˈna i ta tatou mau taparuparuraa. (Sal. 34:15; 55:22; Isa. 59:1) Hau atu, e nehenehe Iehova e tauturu ia tatou ia faaoromai tamau i to tatou mau fifi. E nafea ïa?

14. E nafea Iehova e tauturu mai ai i te taime fifi?

¹⁴ E tauturu mai Iehova ma te tamahanahana e ma te faaitoito ia tatou i te taime tano. (Kor. 2, 1:3, 4) Tera tei tupu no Eziz, hoê taeae no Turkménistan. No to ˈna faaroo, ua faautuahia o ˈna e piti matahiti i te fare tapearaa. Te faatia ra oia: “I taua poipoi ra, a faaruru ai au i tera fifi, ua faaite mai te hoê taeae i te Isaia 30:15 o te parau ra: ‘Tei te vai-hau-noa-raa e te tiaturiraa to outou puai.’ Ua tauturu rahi teie irava ia ˈu ia vai hau noa e ia tiaturi noa ia Iehova. Maoti te feruriruriraa i nia i teie irava, ua nehenehe au e itoitohia i te roaraa o to ˈu tapearaahia.” Te haamanaˈo ra anei outou i to Iehova tautururaa ia outou ma te horoa i te tamahanahanaraa e te faaitoitoraa ta outou i hinaaro mau i te taime tano?

15-16. E nafea Iehova e tauturu mai ai i te taime fifi mau?

¹⁵ Pinepine tatou i te ite mea nafea Iehova i te tautururaa ia tatou i te taime e ore roa ˈi to tatou fifi. Tera ta te hoê tuahine o Tori i tapao. Ua roohia ta ˈna tamaiti o Mason i te mariri ai taata i te roaraa e ono matahiti e pohe noa ˈtu oia. Papu, ua oto roa Tori. Te na ô ra o ˈna: “Aita ˈtu e ati mauiui aˈe no te hoê metua vahine maori râ te iteraa i ta ˈna iho tamarii e mauiui ra. Ua papu ia ˈu e tera atoa te manaˈo o te tahi atu mau metua.”

¹⁶ Noa ˈtu e tupuraa mauiui mau teie no  Tori, ua feruri o ˈna mea nafea Iehova i te tautururaa ia ˈna ia faaruru i te reira. Te parau ra o ˈna: “Ia haamanaˈo vau, e nehenehe au e parau e ua tauturu iho â Iehova ia ˈu. Ei hiˈoraa, i te tahi taime, ua paruparu roa o Mason, aita ïa te mau taeae e tuahine i nehenehe e farerei ia ˈna. Noa ˈtu te atea o te fare maˈi, ua tere noa mai ratou e ua faaea mai no te tauturu ia mâua. Ua aufau e ua hoo atoa mai ratou i te mau mea ta mâua e hinaaro ra. Aita roa ˈtu mâua i ere i te tahi noa ˈˈe mea.” Ua horoa Iehova i te mea ta Tori i hinaaro mau no te faaoromai tamau i to ˈna fifi, ua na reira atoa o ˈna no Mason.​—A hiˈo i te tumu parau tarenihia “ Ua horoa mai iho â Iehova i te mea ta mâua i hinaaro mau.”

17-18. Eaha te tauturu ia tatou ia faaite i te mauruuru no te tauturu ta Iehova e horoa mai i te taime fifi? (Salamo 40:5)

¹⁷ A taio i te Salamo 40:5. Ia faaoti te hoê taata i te pauma i nia i te hoê mouˈa, ta ˈna fa o te tapaeraa ïa i nia roa i te puu mouˈa. Tera râ, e rave rahi vahi e nehenehe ai o ˈna e faafaaea no te mataitai. Hoê â huru no tatou. Ia faaruru tatou i te hoê fifi, e tamau anaˈe i te rave i te taime no te faafaaea e no te feruriruri mea nafea Iehova i te tautururaa ia tatou. I te hopea o te mahana, a ui ia outou iho: “Eaha ta Iehova i rave no ˈu i teie mahana? Noa ˈtu te vai noa ra te fifi, eaha ta Iehova e rave ra no te tauturu ia ˈu ia faaoromai tamau?” A tapao i te hoê ohipa ta Iehova i rave no te tauturu ia outou.

¹⁸ Papu, e nehenehe outou e pure ia faaorehia to outou fifi. E taa iho â ia Iehova, aita outou e hara ra ia na reira outou i te pure. (Phil. 4:6) E tia atoa râ ia tatou ia haamanaˈo i te mau haamaitairaa ta tatou e fanaˈo ra i teie mahana. Te fafau ra Iehova e faaitoito oia ia tatou e e tauturu mai oia ia faaoromai tamau i te reira. Eiaha roa ˈtu ïa e haamoˈe e te tauturu noa mai ra Iehova. E ite ïa outou e nafea Iehova e tauturu mai ai ia manuïa, mai ta ˈna i rave no Iosepha, i te taime atoa a faaruru ai i te fifi.​—Gen. 41:51, 52.