1-2. (1) Eaha te tuatiraa i roto i to tatou tupuraa e to te ati Iuda tei hoˈi i Ierusalema? (2) Eaha te tahi mau fifi ta te ati Iuda i faaruru. (A hiˈo i te tumu parau tarenihia “ Te tau o Hagai, Zekaria e Ezera.”)

 TE HAAPEAPEA ra anei outou no ananahi? Ua erehia paha outou i ta outou ohipa e te feruri ra outou e nafea outou e faatamaa ˈi i te utuafare. E hinaaro paha outou e paruru i to outou utuafare i te mau fifi poritita, te hamani-ino-raa e te patoiraa i te ohipa pororaa. Mai te peu tera ta outou e faaruru nei, e faufaahia outou i te haapiiraa mea nafea Iehova i te tautururaa i te ati Iseraela i to ratou faarururaa i te hoê â fifi.

² E faaroo puai to te ati Iuda tei faarue i to ratou oraraa fanaˈo i Babulonia no te haere i te hoê fenua aita ratou i matau. Ia ratou i tae atu, aita i maoro, te fifi mai nei ratou i te pae faufaa e poritita e te imi hara mai ra te mau nunaa ati aˈe ia ratou. Vahi ê roa ˈtura ïa te feruriraa o vetahi, aita faahou ratou i haapao i te paturaa o te hiero o Iehova. No reira, i te area matahiti 520 hou te tau o Iesu, ua tono Iehova e piti peropheta no te faaitoito faahou i te nunaa, o Hagai ïa e o Zekaria. (Hag. 1:1; Zek. 1:1) Mai ta tatou e ite mai, ua itoito-roa-hia te nunaa i te mau faaitoitoraa a tera na peropheta. Fatata râ e 50 matahiti i muri mai, ua toaruaru faahou te ati Iuda i Ierusalema. O Ezera ïa, te hoê papai parau tei ite maitai i te Ture, tei haere mai i Ierusalema na Babulonia mai no te faaitoito i te nunaa o te Atua ia haafaufaa na mua roa i te haamoriraa mau.—Ezr. 7:1, 6.

3. Eaha te mau uiraa ta tatou e pahono? (Maseli 22:19)

 ³ E nehenehe atoa te mau parau tohu a Hagai e Zekaria e tauturu ia tatou i teie mahana ia tiaturi noa ia Iehova noa ˈtu te fifi o te oraraa. (A taio i te Maseli 22:19.) A hiˈopoa ˈi i te poroi a Hagai e Zekaria e te hiˈoraa o Ezera, e pahono tatou i teie mau uiraa: Mea nafea te ati Iuda tei hoˈi i Ierusalema i te toaruaruraa no te fifi o te oraraa? No te aha tatou e haafaufaa ˈi na mua roa i te hinaaro o te Atua a faaruru ai i te fifi? E e nafea tatou e haapuai ai i to tatou tiaturi ia Iehova i te tau arepurepu?

4-5. No te aha paha i iti mai ai te itoito o te ati Iuda no te patu faahou i te hiero?

⁴ I te hoˈiraa te ati Iuda i Ierusalema, mea rahi ta ratou ohipa. Oioi ratou i te hamani faahou i te fata a Iehova e te niu o te hiero. (Ezr. 3:1-3, 10) Aita râ i maoro, ua iti mai to ratou itoito. No te aha? A turu ai ratou i te paturaa o te hiero, ua hamani atoa ratou i te fare no ratou, ua tanu i te maa e ua faatamaa i to ratou utuafare. (Ezr. 2:68, 70) Hau atu, ua faaruru ratou i te patoiraa a te enemi tei opua e tapea roa i te paturaa o te hiero.—Ezr. 4:1-5.

⁵ Ua farerei atoa ratou i te fifi pae faufaa e poritita. Ua riro to ratou fenua i te hau Emepera Peresia. I te poheraa te arii Peresia ra o Kuro i 530 hou te tau o Iesu, ua opua to ˈna mono ra o Ahasueru e haru ia Aiphiti. A tere ai i Aiphiti, e au ra e ua ani ta ˈna mau faehau i te maa, te pape e te puhaparaa i te ati Iseraela e fifi roa ˈtura ratou. Na Dariu I i mono ia Ahasueru, e i te haamataraa o ta ˈna faatereraa, ua tupu te tatamaˈiraa i roto i to ˈna nunaa. Eita e ore e ua haapeapea roa te ati Iuda tei hoˈi i Ierusalema, ua uiui paha ratou e nafea ratou e faatamaa ˈi i to ratou utuafare. No teie mau arepurepuraa atoa, ua manaˈo vetahi ati Iuda e e ere i te taime tano no te patu faahou i te hiero o Iehova.—Hag. 1:2.

6. Ia au i te Zekaria 4:6, 7, eaha ˈtu â ta te ati Iuda i faaruru e eaha ta Zekaria i haapapu ia ratou?

⁶ A taio i te Zekaria 4:6, 7. Hau atu i te fifi pae faufaa e poritita, ua faaruru te ati Iuda i te hamani-ino-raa. I 522 hou te tau o Iesu, ua noaa i to ratou mau enemi i te iriti mai i te hoê faaueraa mana no te tapea i te paturaa o te hiero o Iehova. Ua haapapu râ Zekaria i te ati Iuda e e faaohipa Iehova i to ˈna mana rahi no te faaore i teie mau faataupupuraa. E piti matahiti i muri mai, i 520, ua faaore te arii Dariu i taua faaueraa mana ra e ua horoa i te ati Iuda i te parau faatia e te tauturu no te patu faahou i te hiero.—Ezr. 6:1, 6-10.

7. I te haapaoraa te ati Iuda i te hinaaro o te Atua na mua roa, eaha te haamaitairaa ta ratou i fanaˈo?

 ⁷ Na roto ia Hagai e Zekaria, ua fafau Iehova i to ˈna nunaa e e turu o ˈna ia ratou ia haapao ratou na mua roa i te paturaa o te hiero. (Hag. 1:8, 13, 14; Zek. 1:3, 16) Itoito roa ihora te nunaa e haamata ˈtura ratou i te patu faahou i te hiero i 520 hou te tau o Iesu. E pae matahiti i muri mai, oti roa ˈtura te ohipa. No te mea ua haapao na mua roa te ati Iuda i te hinaaro o te Atua noa ˈtu te fifi, ua fanaˈo ratou i ta ˈna tauturu i te pae materia e i te pae varua. I te hopearaa, ua  haamori ratou ia Iehova ma te oaoa.—Ezr. 6:14-16, 22.

8. E nafea te Hagai 2:4 e tauturu ai ia tatou ia haapao i te hinaaro o te Atua na mua roa? (A hiˈo atoa i te nota.)

⁸ A piri mai ai te ati rahi, te taa ra ia tatou te faufaaraa ia auraro i te faaueraa e apiti i te ohipa pororaa. (Mar. 13:10) Mai te peu ua fifihia tatou i te pae moni aore ra ua faaruru tatou i te patoiraa i roto i te pororaa, e ere paha i te mea ohie no tatou ia haapao na mua roa i te taviniraa. Eaha râ te tauturu ia tatou ia tuu i te Faatereraa arii na mua roa? O te tiaturiraa ïa e tei to tatou pae “Iehova o te mau nuu.” b E turu oia ia tatou ia haapao tatou na mua roa i te ohipa a te Faatereraa arii, eiaha râ to tatou iho mau hinaaro. No reira, aita e tumu e mǎtaˈu ai tatou.—A taio i te Hagai 2:4.

9-10. Mea nafea na hoa faaipoipo i te iteraa e mea mau iho â te parau a Iesu i roto i te Mataio 6:33?

⁹ Teie te hiˈoraa o Oleg raua Irina, c na hoa faaipoipo e tavini ra ei pionie. Ia raua i faarue i to raua nohoraa no te turu i te hoê amuiraa i te tahi atu vahi, aita faahou ta raua e ohipa no te fifi pae moni i to raua fenua. Noa ˈtu fatata hoê matahiti aita ta raua e ohipa, ua ite noa raua i te here o Iehova e ua tauturu noa mai te mau taeae e tuahine. Ua nafea raua i mua i tera fifi? I te haamataraa, ua hepohepo roa Oleg. Tera râ, te parau ra oia: “Ua tamau vau i te tuu i te taviniraa na mua roa. Ua haapao noa ïa vau i te mea faufaa roa ˈ ˈe i roto i te oraraa.”  Ua apiti noa raua ta ˈna vahine i te taviniraa a imi noa ˈi i te tahi ohipa.

¹⁰ I te hoê mahana, ua hoˈi mai raua i te fare na te pororaa mai, ua faaroo raua e ua tere roa te hoê hoa piri e 160 kilometera no te afai mai e piti pute maa. Te na ô ra Oleg: “I tera mahana, ua ite faahou mâua i te rahi o te here o Iehova e to te amuiraa. Ua papu ia mâua e eita e moˈe ia Iehova ta ˈna mau tavini, noa ˈtu te teimaha o te fifi.”—Mat. 6:33.

11. Eaha te tupu ia haapao tatou i te hinaaro o te Atua na mua roa?

¹¹ E hinaaro Iehova ia haapao tatou na mua roa i te ohipa faufaa roa e faaora i te taata e e faariro ia ratou ei pǐpǐ. Mai tei faahitihia i roto i te  paratarafa 7, ua faaitoito Hagai i te nunaa o Iehova ia haamata apî faahou i ta ratou taviniraa moˈa, mai te huru ra e te hamani faahou ra ratou i te niu o te hiero. Ia na reira ratou, ua fafau Iehova: “E haamaitai au ia outou.” (Hag. 2:18, 19) Ia papu ia tatou e e haamaitai atoa Iehova i ta tatou mau tutavaraa no te haapao na mua roa i te ohipa ta ˈna i tuu mai ia tatou.

12. No te aha i titauhia ˈi ia Ezera e to ˈna mau hoa ati Iuda te hoê faaroo puai?

¹² I 468 hou te tau o Iesu, tei roto Ezera i te piti o te pǔpǔ ati Iuda tei faarue i Babulonia no te hoˈi i Ierusalema. E titauhia ia ratou te hoê faaroo puai no teie tere. E na nia ratou i te purumu atâta ma te tari i te auro e te ario tei pûpûhia no te hiero. Eiaha ïa ratou ia tanohia i te taata eiâ. (Ezr. 7:12-16; 8:31) Ia ratou i tae i Ierusalema, ua taa ia ratou e mea atâta atoa i reira. Aita rea e taata i roto i te oire e ua ino te aua e te mau opani. Eaha te haapii mai i te hiˈoraa o Ezera no nia i te haapuairaa i to tatou tiaturi ia Iehova?

13. Mea nafea Ezera i te haapuairaa i to ˈna tiaturi ia Iehova? (A hiˈo atoa i te nota.)

¹³ Ua ite mata Ezera i to Iehova tururaa i to ˈna nunaa i te tau fifi. Tau matahiti na mua ˈtu, i 484 hou te tau o Iesu, e au ra e tei Babulonia noa â Ezera i te faaueraa te arii Ahasueru ia haapohe-pauroa-hia te ati Iuda i te hau Emepera Peresia. (Ese. 3:7, 13-15) A hiˈo na, mai pohe o Ezera! I mua i tera ati, ua oto e ua haapae te ati Iuda i “te mau fenua atoa” i te maa e eita e ore ua ani ratou i te aratairaa a Iehova na roto i te pure. (Ese. 4:3) A feruri na i te huru o Ezera e to ˈna mau hoa ati Iuda i te hoˈiraa te ino i nia i te feia tei opua e haamou ia ratou! (Ese. 9:1, 2) Eita e ore e ua riro te reira ei faaineineraa ia ˈna no te mau fifi ta ˈna e farerei i muri mai. Ua puai-atoa-hia to ˈna tiaturi e e nehenehe iho â Iehova e paruru i to ˈna nunaa. d

14. Eaha ta te hoê tuahine i haapii i to Iehova aupururaa ia ˈna i te tau arepurepu?

¹⁴ Ia ite tatou i te rima o Iehova ia aupuru ia tatou i te tau arepurepu, e puaihia to tatou tiaturi ia ˈna. Teie te hiˈoraa o te tuahine Anastasia e ora ra i Europa hitia o te râ. Ua faarue oia i ta ˈna ohipa no to ˈna tiaraa amui ore. Te na ô ra oia: “A tahi ra vau i ere ai i te moni.” Na ô faahou atura oia: “Ua vaiiho vau i teie fifi i roto i te rima o Iehova e ua ite au ia ˈna i te aupururaa ia ˈu. Ia ere noa ˈtu vau  i te ohipa, eita vau e haapeapea. I te mea e te aupuru nei to ˈu Metua i te raˈi ia ˈu i teie mahana, e aupuru atoa o ˈna ia ˈu ananahi.”

15. Eaha tei tauturu ia Ezera ia tiaturi noa ia Iehova? (Ezera 7:27, 28)

¹⁵ Ua ite Ezera i te rima o Iehova i roto i to ˈna oraraa. A feruri ai Ezera i te mau taime i tauturu ai Iehova ia ˈna, eita e ore e ua puai atu â to ˈna tiaturi ia Iehova. A tapao na i ta ˈna i parau: “Tei ia ˈu ra Iehova to ˈu Atua.” (A taio i te Ezera 7:27, 28.) E ono taime to ˈna faahitiraa i teie parau i roto i te buka tei topahia i to ˈna iˈoa.—Ezr. 7:6, 9; 8:18, 22, 31.

16. I roto i teihea tupuraa e ite maitai ai tatou i te rima o te Atua i roto i to tatou oraraa? (A hiˈo atoa i te hohoˈa.)

¹⁶ E nehenehe Iehova e tauturu ia tatou ia faaoromai i te tahi fifi. Ei hiˈoraa, ia ani tatou i to tatou paoti i te mahana faafaaearaa no te apiti i te hoê tairururaa aore ra ia faatano i ta tatou tapura ohipa ia ore tatou ia mairi i te mau putuputuraa, te vaiiho ra ïa tatou ia Iehova ia ohipa i roto i to tatou oraraa. E maere paha tatou i ta Iehova e rave. I te pae hopea, e puai atu â to tatou tiaturi ia ˈna.

17. Mea nafea Ezera i te faaiteraa i te haehaa i te tau arepurepu? (A hiˈo i te hohoˈa i te api matamua.)

¹⁷ Ua fariu Ezera ia Iehova no te ani i ta ˈna tauturu. I te mau taime atoa i teimaha ˈi Ezera no ta ˈna mau hopoia, ua fariu oia ia Iehova ma te haehaa. (Ezr. 8:21-23; 9:3-5) Maoti to ˈna haerea, ua hinaaro te feia ati aˈe ia Ezera e turu ia ˈna e e pee i to ˈna faaroo. (Ezr. 10:1-4) Ia haapeapea roa tatou e nafea tatou e faatamaa e e paruru ai i to tatou utuafare, e fariu anaˈe ia Iehova na roto i te pure ma te tiaturi ia ˈna.

18. E nafea to tatou tiaturi ia Iehova e puai atu â ˈi?

¹⁸ Ia imi tatou i te aratairaa a Iehova ma te haehaa e ia farii tatou i te tauturu a to tatou mau hoa Kerisetiano, e puaihia to tatou tiaturi i te Atua. E toru tamarii ta Erika, ua tiaturi noa o ˈna ia Iehova noa ˈtu te ati ta ˈna i faaruru. I roto i te hoê tau poto noa, ua marua ta ˈna aiû e ua pohe ta ˈna tane here. Te parau ra o ˈna: “Aita oe i ite e nafea Iehova e tauturu mai ai. E hitimahuta noa oe i ta ˈna mau raveraa. Ua pahono Iehova i ta ˈu mau pure maoti to ˈu mau hoa, na roto anei i ta ratou mau parau e ohipa. Ia  haamahora vau i to ˈu aau i to ˈu mau hoa, mea ohie aˈe no ratou ia tauturu mai.”

19-20. Aita vetahi ati Iuda i nehenehe e hoˈi i Ierusalema. Eaha te haapii mai i to ratou hiˈoraa?

¹⁹ Aita vetahi ati Iuda i nehenehe e hoˈi i Ierusalema no te matahiti rahi, te maˈi aore ra te tahi hopoia utuafare. E haapiiraa faufaa atoa ta tatou e haapii mai i to ratou hiˈoraa, inaha ua ineine ratou i te turu i te feia tei hoˈi i Ierusalema ma te pûpû atu i te ô. (Ezr. 1:5, 6) E au ra e fatata 19 matahiti i muri mai, ua tamau te ati Iuda tei faaea i Babulonia i te hapono i te mau ô horoa noa na to Ierusalema.—Zek. 6:10.

²⁰ Noa ˈtu mea iti ta tatou e nehenehe e rave i roto i te taviniraa, ia papu ia tatou e mea faahiahia na Iehova ta tatou mau tutavaraa no te faaoaoa i to ˈna aau. Eaha te haapapuraa? I te tau o Zekaria, ua ani Iehova i ta ˈna peropheta ia hamani i te hoê hei arii i te auro e te ario ta te ati Iuda i Babulonia i hapono mai. (Zek. 6:11) E riro teie “hei upoo nehenehe . . . ei haamanaˈoraa” i teie mau ô horoa noa. (Zek. 6:14, nota) Ia papu ia tatou e eita roa ˈtu e moˈe ia Iehova ta tatou mau tutavaraa no te tavini ia ˈna i te tau arepurepu.—Heb. 6:10.

21. E nafea tatou e mau papu ai noa ˈtu te mau fifi o te tiai mai ra?

²¹ Papu maitai, e farerei â tatou i tahi atu mau fifi i teie anotau hopea nei e e ino roa ˈtu â te oraraa i mua nei. (Tim. 2, 3:1, 13) Aita râ e faufaa ia haapeapea roa ino. A haamanaˈo i te mau parau a Iehova i to ˈna nunaa i te tau o Hagai: “Ia puai oe, . . . tei ia outou ra hoi au.” (Hag. 2:4, 5) Ia papu atoa ia tatou e tei pihai iho noa mai Iehova ia faaitoito tatou i te rave i to ˈna hinaaro. Ia faaohipa tatou i ta tatou i haapii mai i te mau parau tohu a Hagai e Zekaria e te hiˈoraa o Ezera, e tiaturi noa tatou ia Iehova noa ˈtu te tau arepurepu ta tatou e faaruru i mua nei.