Aita Iesu i tia noa ˈtu i mua i te tahi taata ia penihia aore ra ia nanaˈohia to ˈna hohoˈa. Aita roa ïa hoê noa ˈˈe hohoˈa no Iesu. Noa ˈtu râ, te itehia ra oia i nia e rave rahi hohoˈa hamanihia e te taata i te roaraa o te tau.

Aita te feia hamani hohoˈa i ite mai te aha mau na te hohoˈa o Iesu. E pinepine, ua pee ratou i te mau peu o to ratou fenua, te mau haapiiraa a te haapaoraa e te mau titauraa a te feia hoo no te hamani i te hohoˈa o Iesu. E nehenehe râ te reira e faahuru ê i te manaˈo o te taata no nia ia Iesu e ta ˈna mau haapiiraa.

Ua peni e ua hamani vetahi i te hohoˈa o Iesu mai te hoê taata paruparu e rouru roa e te umiumi aore ra e te mata peapea. I nia i te tahi atu mau hohoˈa, e mana taa ê to Iesu e e taoˈa anaana to nia i to ˈna upoo. Area i nia i te tahi atu, ua faahohoˈahia Iesu mai te hoê o tei faataa ê ia ˈna i te taata. Mea tano anei ta tera mau hohoˈa e faaite ra no Iesu? E nafea ia papu? Te tahi ravea, e hiˈopoa i te parauhia ra i roto i te Bibilia. E tauturu mai te reira ia maramarama aˈe no nia i te hohoˈa o Iesu e te parau mau no nia ia ˈna.

Na Iesu i faahiti i teie mau parau na roto i te pure, e au ra i te taime o to ˈna bapetizoraa. (Hebera 10:5; Mataio 3:13-17) Mai te aha te huru o tera tino? E 30 matahiti na mua ˈtu, teie ta te melahi Gaberiela i faaite ia Maria: “E hapû oe e e fanau oe . . . No reira atoa te aiû o te fanauhia mai e parauhia ˈi moˈa e Tamaiti a te Atua.” (Luka 1:31, 35) E taata tia roa ïa o Iesu mai ia Adamu i te haamataraa. (Luka 3:38; Korinetia 1, 15:45) E tino pautuutu maitai to Iesu e eita e ore ua hohoˈahia o ˈna i to ˈna metua vahine ati Iuda ra o Maria.

Eita to Roma e vaiiho ia tupu to ratou huruhuru taa. Area te mau ati Iuda e peu ïa na ratou, mea tura e e faaturahia te taata e umiumi to ˈna. E ere râ te reira i te mea roa e te haapaoraa ore. I te mea e ati Iuda o Iesu, e umiumi atoa ïa to ˈna. Mea papu, mea haapao oia i to ˈna huruhuru taa ma te tâpû maitai i te reira, hoê â huru no to ˈna rouru. O te feia anaˈe o tei faataahia no te riro ei Nazira mai ia Samasona te ore e tâpû i to ratou rouru.—Numera 6:5; Te mau tavana 13:5.

I te 30raa o to ˈna matahiti, ua matauhia Iesu mai te tamuta, aita râ ia ˈna te mau matini o teie tau. (Mareko 6:3) Papu roa, e tino pautuutu maitai to ˈna. I te omuaraa o ta ˈna taviniraa, o Iesu anaˈe iho te tiahiraa “i te taata atoa e ta ratou mamoe e puaatoro i rapae i te hiero, hue atura i te moni a te feia taui moni e huri atura i ta ratou mau amuraa maa.” (Ioane 2:14-17) E taata puai e te itoito te nehenehe e rave i tera huru ohipa. Ua faaohipa Iesu i te tino ta te Atua i faaineine no ˈna no te faatupu i tei faauehia ia ˈna ia rave: “Ia faaite atoa vau i te parau apî oaoa o te Faatereraa arii a te Atua i te tahi atu mau oire e tia ˈi, no reira hoi au i tonohia mai ai.” (Luka 4:43) Ua titauhia te itoito taa ê no te haere na avae ati aˈe ia Paretetina no te faaite i tera poroi.

Eita e ore, ua putapû roa te feia i rohirohi e tei teimaha i tera titau-manihini-raa. Eaha te tumu? E mata mǎrû e e huru mahanahana mau to Iesu. (Mataio 11: 28-30) Ua haapapu to ˈna mǎrû e to ˈna hamani maitai e tamahanahana mau oia i te feia e farii i ta ˈna haapiiraa. Ua tae roa te mau tamarii i te hinaaro e tapiri atu ia Iesu, te na ô ra te Bibilia: “Tauahi ihora Iesu i te mau tamarii.”—Mareko 10:13-16.

Noa ˈtu ua mauiui mau Iesu i to ˈna poheraa, e taime oaoa atoa ta ˈna i fanaˈo a ora ˈi oia i nia i te fenua. A hiˈo na, ua taui Iesu i te pape ei uaina ia tupu maite te oroa faaipoiporaa ta ˈna i haere i Kana. (Ioane 2:1-11) Ua haere atoa oia i te tahi atu mau tamaaraa e ua horoa i te mau haapiiraa o te ore roa e moˈe i te taata.—Mataio 9:9-13; Ioane 12:1-8.

Hau roa ˈtu â, ua tauturu ta Iesu ohipa pororaa i te feia o tei faaroo ia ˈna ia fanaˈo i te tiaturiraa oaoa o te ora mure ore. (Ioane 11:25, 26; 17:3) I te faatiaraa ta ˈna na 70 pǐpǐ i ta ratou pororaa, ua na ô Iesu: “A oaoa . . . ua papaihia to outou iˈoa i te raˈi.” I taua taime ra, “oaoa roa ihora Iesu.”—Luka 10:20, 21.

Ua imi te mau tia haapaoraa i te tau o Iesu i te mau ravea ia hiˈohia ratou e te taata e ia faateiteihia no to ratou tiaraa. (Numera 15:38-40; Mataio 23:5-7) Area Iesu, ua faaue ïa i ta ˈna mau aposetolo eiaha ia “faatere” ia vetahi ê. (Luka 22:25, 26) No reira Iesu i faaara ˈi: “A ara i te mau papai parau, mea au na ratou e hahaere ma te ahu roa, ia arohahia ratou ma te faatura na te mahora.”—Mareko 12:38.

Mea taa ê roa Iesu ia ratou, e haere hoi oia i rotopu i te nahoa e i te tahi taime, aita i taahia o ˈna tera. (Ioane 7:10, 11) Aita atoa i itehia o vai Iesu i rotopu i ta ˈna na 11 aposetolo haapao maitai. No reira te pǐpǐ taiva ra o Iuda i horoa ˈi i “te hoê tapao,” e apa oia ia ˈna no te faaite o Iesu tera.—Mareko 14:44, 45.

Aita tatou i ite i te mau mea atoa no nia ia Iesu, ua papu râ ia tatou e ere roa ˈtu oia mai te faaite-pinepine-hia i nia i te mau hohoˈa. Aita tatou i ite mai te aha mau te hohoˈa o Iesu. Te mea faufaa râ, mai te aha ta tatou hiˈoraa ia Iesu i teie nei.

Tau hora i muri aˈe Iesu a faahiti ai i tera mau parau, ua pohe e ua hunahia o ˈna. (Ioane 14:19) Ua horoa Iesu i to ˈna ora “ei hoo no te taata e rave rahi.” (Mataio 20:28) I te toru o te mahana, ua faatia mai te Atua ia ˈna “ei varua” e ua farii “ia ite te taata ia ˈna” mai te tahi o ta ˈna mau pǐpǐ. (Petero 1, 3:18; Ohipa 10:40) Mai te aha te hohoˈa o Iesu i to ˈna faraa ˈtu i ta ˈna mau pǐpǐ? E au ra mea taa ê i to ˈna hohoˈa matamua no te mea aita to ˈna mau hoa piri roa i taa oioi o ˈna tera. Ua manaˈo Maria Magadala e taata tamâ aua o ˈna. Area no na pǐpǐ e piti i nia i te purumu e haere atu i Emausa, ua manaˈo ïa e ratere oia.—Luka 24:13-18; Ioane 20:1, 14, 15.

Mai te aha ta tatou hiˈoraa ia Iesu i teie mahana? Hau atu i te 60 matahiti i muri aˈe i to Iesu poheraa, ua ite orama ta ˈna aposetolo here ra o Ioane ia ˈna. Aita Ioane i ite i te hoê taata o te mauiui ra i nia i te satauro. Ta ˈna i ite, o te “Arii o te mau arii e Fatu o te mau fatu,” na ˈna e faatere ra i te Faatereraa arii a te Atua. Fatata roa oia i te upootia i nia i te mau demoni e te mau taata o te patoi i te Atua. E hopoi mai Iesu i te mau haamaitairaa mure ore i nia i te huitaata.—Apokalupo 19:16; 21:3, 4.