Te porohia ra te parau apî oaoa o te Faatereraa arii a te Atua na te ao atoa nei, mai ta Iesu i tohu. (Mataio 24:14) Te faaite ra te buka Bibilia Daniela e na te Atua tera Faatereraa. I te pene 2 o tera buka, te vai ra te hoê parau tohu e faaite ra i te haereraa i mua o te tahi mau faatereraa taata rahi, mai te tau o Babulonia i tahito ra e tae atu i to tatou tau. Ma te tohu eaha te tupu i muri iho, teie ta te irava 44 e parau ra:

“Ia tae i te anotau o taua mau arii ra, e faatupu ai te Atua o te raˈi ra i te hoê basileia [aore ra Faatereraa arii], o te ore roa ïa e mou, e ore roa hoi e riro ia vetahi ê; e hope roa hoi taua mau basileia [aore ra faatereraa] ra i te parari e te pau, e vai tera e a muri noa ˈtu.”

Ia au i teie e te tahi atu mau parau tohu Bibilia, e mono te Faatereraa arii a te Atua i te mau faatereraa taata atoa. E haamauhia te hoê faatereraa papu e te naho maitai i nia i te fenua nei. Eaha te huru o te oraraa i raro aˈe i te Faatereraa arii? Teie vetahi o te mau parau fafau faahiahia mau o te fatata roa i te tupu.

• 

  E ORE ROA TE TAMAˈI

  Salamo 46:9: “Ua faaore [te Atua] i te tamaˈi e tae roa aˈenei i te hopea fenua! ua ofati oia i te fana, e ua tapûpû i te mahae, e ua tahuhia te mau pereoo tamaˈi ra i te auahi.”

  A feruri na eaha te huru o te ao nei mai te peu e faaohipahia te mau taoˈa atoa e te aravihi no te tauturu i te mau taata ia faufaahia ratou i to ratou oraraa, eiaha faahou râ no te hamani i te mau mauhaa tamaˈi! E tupu tera parau fafau i raro aˈe i te Faatereraa arii a te Atua.

• 

  E ORE ROA TE MAˈI

  Isaia 33:24: “E ore hoi to reira e parau e, Ua paruparu vau i te maˈi.”

  A feruri na i te hoê ao aita faahou te taata e mauiui no te maˈi mafatu, te mariri ai taata, te maˈi omaha tihota aore ra te tahi atu maˈi. E ore roa te mau fare maˈi e te mau raau. E fanaˈo te taata i te ea maitai roa i nia i te fenua nei.

• 

  E ORE ROA TE ERERAA I TE MAA

  Salamo 72:16: “E riro hoi e maa sitona tei te fenua i nia i te tupuai o te mau mouˈa ra, e tei tupu ra.”

  E navai te maa e tupu i nia i te fenua no te taata taitahi e e fanaˈo te taata atoa i te reira. E ore roa te ereraa e te navai-ore-raa i te maa.

• 

  E ORE ROA TE MAUIUI, TE OTO E TE POHE

  Apokalupo 21:4: “E tamǎrô [te Atua] i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”

   E fanaˈo te taata i te oraraa mure ore e te tia roa i nia i te fenua o te riro ei paradaiso! Tera ta to tatou Atua poiete î i te here, o Iehova, e fafau ra.

E moemoeâ noa anei tera mau parau fafau atoa? Te hinaaro mau ra te rahiraa o te mau taata i tera huru oraraa fafauhia i roto i te Bibilia. Tera râ, no e rave rau tumu, mea fifi no e rave rahi taata ia taa eaha te ora mure ore. E ere roa ˈtu i te mea maere inaha aita hoê aˈe taata i ora aˈenei e a muri noa ˈtu.

Ua faatîtî te hara e te pohe i te huitaata. A tau matahiti i teie nei te faaruru-noa-raa te taata i te oto, te mauiui e te fifi. Ua farii roa ïa e rave rahi i teie huru oraraa. E au ra e tera iho â te oraraa. Mea ê roa râ te opuaraa o to tatou Atua poiete ra o Iehova no te huitaata.

No te tauturu ia tatou ia taa e mea mau ta ˈna mau parau fafau atoa, te haapapu ra te Atua no nia i ta ˈna mau parau: “E ore e hoˈi faufaa ore noa mai ia ˈu nei, e tupu râ tei opuahia e au ra; e noaa hoi te mea i faaue atu ai au ra.”—Isaia 55:11.

Ia au i te Bibilia, ua riro o Iehova ei Atua o “te ore e nehenehe e haavare.” (Tito 1:2) Ua fafau oia i tera mau ohipa faahiahia mau no a muri aˈe. Mea maitai ïa ia feruri i nia i teie mau uiraa: e nehenehe iho â anei te taata e ora a muri noa ˈtu i nia i te fenua te riro ei paradaiso? Eaha te mea titauhia ia rave no te fanaˈo i ta te Atua mau parau fafau? I to muri nei mau tumu parau o teie vea, e ite outou i te mau haamaramaramaraa faufaa mau no te pahono i tera mau uiraa.