1-2. E nafea tatou ia haapao i te aˈoraa i roto i te Maseli 4:25? A horoa i te hiˈoraa.

 A FERURI na i teie mau tupuraa: Te manaˈonaˈo ra te tahi tuahine paari i te mau taime oaoa o to ˈna oraraa. Noa ˈtu te fifi ta ˈna e faaruru ra, te tamau ra oia i te tavini ia Iehova ia au i te maraa ia ˈna. (Kor. 1, 15:58) I te mau mahana atoa, e feruri oia ia ˈna e te feia ta ˈna i here i roto i te ao apî. Te haamanaˈo ra te tahi atu tuahine ua haamauiui te tahi hoa Kerisetiano ia ˈna, ua faaoti râ oia i te ore e inoino. (Kol. 3:13) Te haamanaˈo ra te tahi taeae i te mau hara ta ˈna i rave na mua ˈˈe, mai teie nei â râ, e tutava oia i te tapea i to ˈna haapao maitai.—Sal. 51:10.

² Eaha te tuatiraa i rotopu i teie na Kerisetiano e toru? Te haamanaˈo ra ratou i te ohipa i tupu na mua ˈˈe, aita râ te reira i tapea ia ratou ia “hiˈo tia ˈtu . . . i mua.”—A taio i te Maseli 4:25.

3. No te aha e titauhia ia “hiˈo tia ˈtu . . . i mua”?

³ No te aha mea faufaa ia “hiˈo tia ˈtu . . . i mua”? Eita te hoê taata e nehenehe e haere afaro a hiˈo noa ˈi i muri. Eita atoa tatou e tavini hope roa ia Iehova ia tamau tatou i te manaˈo i te ohipa i tupu aore ra i ravehia na mua ˈˈe.—Luka 9:62.

4. Eaha ta tatou e hiˈopoa i roto i teie haapiiraa?

⁴ I roto i teie haapiiraa, e hiˈopoa tatou e toru marei e tia ia ape ia ore tatou ia manaˈo rahi roa i te mau mea i tupu i tahito. A tahi, te manaˈonaˈo-noa-raa i te oraraa ta tatou i vaiiho i muri. Te piti, te inoino, e te toru, te faahapahapa-noa-raa ia tatou. E horoa-atoa-hia te tahi mau faaueraa Bibilia o te tauturu mai ia ore ia tâuˈa faahou i  “to muri,” ia tapi râ i “to mua.”—Phil. 3:13.

5. Eaha te marei ta te Koheleta 7:10 e faahiti ra?

⁵ A taio i te Koheleta 7:10. Aita tera irava e parau ra mea ino ia uiui: “Eaha te mea i maitai ai tei mutaaihora anotau.” Maoti Iehova e nehenehe ai tatou e haamanaˈo i te mau taime oaoa. Tera râ, te na ô ra te irava: “Eaha te mea i maitai ai tei mutaaihora anotau i teie nei anotau?” Te marei e titauhia ia ape, o te faaauraa ïa i to tatou oraraa tahito i to teie mahana a parau atu ai mea ino roa te mau mea i teie nei. I roto i te tahi atu Bibilia, ua hurihia tera irava mai teie te huru: “Eiaha roa e ui, ‘No te aha mea maitai aˈe te oraraa i tahito ra?’ E uiraa maamaa hoi!”

6. No te aha mea maamaa ia manaˈo noa mea maitai aˈe to tatou oraraa i tahito ra? A horoa i te hiˈoraa.

⁶ No te aha mea maamaa ia manaˈo noa mea maitai aˈe to tatou oraraa i tahito ra? No te mea o te mau taime oaoa anaˈe ta tatou e haamanaˈo e e moˈehia te mau fifi ta tatou i faaruru. A feruri na i te mau Iseraela. I muri aˈe i to ratou faarueraa ia Aiphiti, ua moˈe oioi ia ratou i to ratou oraraa fifi i reira. Ua manaˈonaˈo noa ratou i te mau maa maitatai ta ratou i amu na. Ua parau ratou: “Te manaˈo nei hoi tatou i te iˈa ta tatou i amu noa i Aiphiti ra; e te tutama, e te meleni, e te hezira, e te oniani, e te sumi.” (Num. 11:5) Ua moˈehia râ ia ratou i to ratou oraraa fifi ei tîtî i Aiphiti. (Exo. 1:13, 14; 3:6-9) Ua maiti ratou i te manaˈo noa i te mau mea maitai o mutaa iho ra, eiaha râ i ta Iehova i rave no ratou. Aita Iehova i mauruuru i to ratou huru!—Num. 11:10.

7. Eaha tei tauturu i te tahi tuahine ia ore e manaˈonaˈo noa i to muri?

⁷ E nafea tatou e ape ai i tera marei? Teie te tahi hiˈoraa, ua haamata te hoê  tuahine i te tavini i te Betela i Brooklyn i te matahiti 1945. I muri aˈe, ua faaipoipo oia i te hoê taeae e tavini atoa ra i reira e ua ohipa amui raua e rave rahi matahiti i te Betela. Tera râ i te matahiti 1976, ua maˈihia ta ˈna tane. A fatata ˈi oia i te pohe, ua horoa te taeae i te tahi mau aˈoraa maitai no te tauturu i ta ˈna vahine ia faaoromai tamau. Ua na ô oia: “E faaipoiporaa oaoa to tâua, mea varavara roa i teie mahana!” Ua parau atoa râ oia: “Eita e moˈe ia oe te mau taime oaoa ta tâua i fanaˈo, eiaha râ e tiatonu noa i nia i te reira! Na te tau e tamǎrû i to oe aau. Eiaha e toaruaru e e oto noa, a haamanaˈo i te mau taime oaoa a tavini amui ai tâua ia Iehova. . . . E ô te reira no ǒ mai ia Iehova!” E ere anei i te aˈoraa paari?

8. Mea nafea to tatou tuahine i te peeraa i te aˈoraa paari a ta ˈna tane?

⁸ Ua poihere maite te tuahine i tera mau parau. Ua tavini oia ia Iehova ma te haapao maitai e tae noa ˈtu i to ˈna poheraa i te 92raa o to ˈna matahiti. Ua parau oia tau matahiti na mua ˈtu: “A feruri ai i na 63 matahiti i roto i te taviniraa taime taatoa, ua oaoa vau i to ˈu oraraa!” No te aha? Te faataa ra oia: “Te tumu e oaoa mau ai tatou, no te mea ïa e fetii taeae faahiahia mau to tatou e te tiaturi nei tatou e ora e o ratou i roto i te paradaiso i te fenua nei a tavini noa ˈi i to tatou Atua poiete, te Atua mau ra o Iehova, e a muri noa ˈtu.” * Auê hiˈoraa maitai roa, ua tamau to tatou tuahine i te hiˈo tia ˈtu i to mua!

9. Ia au i te Levitiko 19:18, i teihea taime mea fifi atu â ia faaea i te inoino?

⁹ A taio i te Levitiko 19:18. Mea fifi  paha i te tahi taime ia ore e inoino, mai te peu iho â râ e taeae aore ra tuahine, e hoa piri aore ra e fetii tei haamauiui mai. Ua pari te tahi tuahine i te tahi atu tuahine i te eiâ i ta ˈna moni. I muri aˈe, ua tatarahapa te tuahine i pari, ua tamau noa râ te tahi atu i te inoino. Aita paha tatou pauroa i farerei i tera tupuraa, e ere iho â râ i te mea ohie no te rahiraa ia faaea i te inoino.

10. Eaha te tauturu mai ia faaea i te inoino?

¹⁰ Eaha te tauturu mai ia faaea i te inoino? E haamanaˈo anaˈe te ite ra Iehova i te mau mea atoa, te mau mea ta tatou e faaruru ra e te ohipa tia ore e ravehia i nia ia tatou. (Heb. 4:13) E mauiui Iehova ia haamauiuihia tatou. (Isa. 63:9) E ua fafau oia i te faaore i te mau mauiui atoa.—Apo. 21:3, 4.

11. Eaha te maitai e noaa ia faaea tatou i te inoino?

¹¹ A haamanaˈo atoa o tatou te maitaihia ia faaea tatou i te inoino. Tera ta te tuahine i parihia i te eiâ i te moni i ite. Ua faaea o ˈna i te inoino e ua taa ia ˈna ia faaore tatou i ta vetahi ê hara, e faaore atoa mai Iehova i ta tatou. (Mat. 6:14) Aita o ˈna i tapo i to ˈna mata i mua i te ohipa ta te tuahine i rave, ua maiti râ oia i te faaea i te inoino. Oaoa faahou maira oia e tamau atura i ta ˈna taviniraa ia Iehova.

12. Eaha te haapiiraa e huti mai i te Ioane 1, 3:19, 20?

¹² A taio i te Ioane 1, 3:19, 20. E faahapa iho â tatou ia tatou i te tahi taime. E faahapa paha vetahi ia ratou no te ohipa ta ratou i rave hou a haapii ai i te parau mau. Area te tahi atu, no te tahi ïa mau hape ta ratou i rave i muri aˈe i te bapetizoraa. (Roma 3:23) E hinaaro iho â tatou e rave i te maitai, te hapa nei râ “tatou paatoa e rave rahi taime.” (Iak. 3:2; Roma 7:21-23) E nehenehe te manaˈo faahapa e tauturu ia tatou ia faatitiaifaro i to tatou haerea e ia ore e tapiti i ta tatou hapa.—Heb. 12:12, 13.

13. No te aha eiaha tatou ia tamau i te faahapa ia tatou?

¹³ E nehenehe atoa râ tatou e tamau i te faahapa ia tatou noa ˈtu ua tatarahapa tatou e ua faaore Iehova i ta tatou hapa. Mea ino tera huru faahapa. (Sal. 31:10; 38:3, 4) A feruri na i te hoê tuahine o tei tamau i te faahapa ia ˈna no te tahi hara tahito. Te na ô ra oia: “I manaˈo na vau mea faufaa ore ta ˈu e rave i roto i te taviniraa no te mea eita Iehova e farii i te reira.” Mea rahi atoa tei manaˈo mai teie tuahine. E ara anaˈe eiaha tatou ia topa i roto i te marei o te faahapa-noa-raa ia tatou. E oaoa roa ïa Satani na tatou iho e faarue ia Iehova!—A hiˈo atoa i te Korinetia 2, 2:5-7, 11.

14. Noa ˈtu e hapa pinepine tatou, e nafea ia papu te here noa ra Iehova ia tatou?

¹⁴ E ui paha tatou, ‘E nafea vau ia papu te here noa ra Iehova ia ˈu?’ Te manaˈo-noa-raa i tera uiraa, e haapapuraa ïa e nehenehe Iehova e faaore i ta tatou hara. E rave rahi matahiti i teie nei, ua parauhia i roto i Te Pare Tiairaa: “E topa e e hapa [paha] tatou e rave rahi taime no te tahi peu ta tatou i ore i manaˈo ua aˈa roa i roto ia tatou. . . . Eiaha e manaˈo eita ta oe hara e faaorehia. Tera mau ta Satani e hinaaro ra. Na to oe iho manaˈo faahapa e tatarahapa e haapapu  ra e ere oe i te taata ino e e farii Iehova i te faaore i ta oe hara. A tamau i te faaite i te haehaa e i te ani ia faaore te Atua i ta oe hara, ia fanaˈo oe i te manaˈo haava maitai e ia tauturuhia oe. Mai te tamarii e haere i to ˈna metua, eiaha e taiâ i te faafatata ia Iehova noa ˈtu e hapa pinepine oe, e tauturu noa iho â oia ia oe no to ˈna hamani maitai rahi.” *

15-16. Eaha te huru o vetahi a taa ˈi te here noa ra Iehova ia ratou?

¹⁵ E rave rahi i roto i to Iehova nunaa tei tamahanahanahia a ite ai te here noa ra Iehova ia ratou. Tau matahiti aˈenei, ua putapû roa te hoê taeae i te tahi aamu o te tumu parau “Ua taui te Bibilia i to ˈu oraraa.” Te faatia ra hoi te tahi tuahine no to ˈna huru oraraa na mua ˈˈe, aita oia i tiaturi e nehenehe Iehova e here ia ˈna. Ua tamau te tuahine i te manaˈo mai tera e rave rahi matahiti i muri aˈe i to ˈna bapetizoraahia. A feruri ai râ i te tusia taraehara o Iesu, farii atura o ˈna te here mau ra Iehova ia ˈna. *

¹⁶ Mea nafea te taeae i te faufaaraahia i te tupuraa o te tuahine? Te na ô ra oia: “I to ˈu apîraa, matau na vau i te mataitai i te hohoˈa faufau, e mea fifi roa no ˈu ia faaea. Aita i maoro aˈenei, ua topa faahou i roto i tera peu. Ua imi au i te tauturu a te mau matahiapo e ua roaa ia ˈu i te faaore i tera peu. Ua haamanaˈo mai te mau matahiapo i to Iehova here e aroha hamani maitai, noa ˈtu râ pinepine au i te manaˈo mea faufaa ore au i te aro o Iehova. Ua tauturu mai râ te aamu [o tera tuahine]. I teie nei, ua taa ia ˈu ia manaˈo vau eita Iehova e faaore i ta ˈu hara, mai te huru ra te parau ra vau eita te tusia taraehara o ta ˈna Tamaiti e ravai no te tapoˈi i ta ˈu mau hara. Ua tâpû vau i tera tumu parau ia nehenehe au e taio e e feruriruri i te reira ia hiti noa mai te manaˈo faahapa.”

17. Mea nafea te aposetolo Paulo i te aperaa i te marei o te faahapa-noa-raa ia ˈna?

 ¹⁷ Te haamanaˈo mai ra te reira i te aposetolo Paulo. Hou a riro ai ei Kerisetiano, e rave rahi hara ta ˈna i rave e ua haamanaˈo Paulo i te reira, aita râ o ˈna i tiatonu noa i to muri. (Tim. 1, 1:12-15) Ua farii oia ua horoa-atoa-hia te tusia taraehara no ˈna. (Gal. 2:20) Aita Paulo i topa i roto i te marei o te faahapa-noa-raa ia ˈna, ua tiatonu râ oia i nia i ta ˈna e nehenehe e horoa ia Iehova.

18. Eaha ta tatou i haapii mai?

¹⁸ Eaha ta tatou i haapii mai? A tahi, e ere i te mea ino ia feruri i te mau mea i tupu na mua ˈˈe, eiaha râ e haamoˈe mea maitai aˈe te oraraa i roto i te ao apî. A piti, e haamauiui mai paha vetahi ê, ia maiti râ tatou i te faaore i te hapa, e tiatonu noa ïa tatou i nia i te taviniraa ia Iehova. E a toru, ia tamau tatou i te faahapa ia tatou, eita tatou e oaoa faahou i te tavini ia Iehova. No reira mai ia Paulo, e tiaturi papu anaˈe e faaore Iehova i ta tatou mau hara.

19. Eaha te haapapu ra eita tatou e haamanaˈo faahou i te mau mea tahito?

¹⁹ Te tiaturi nei tatou e ora e a muri noa ˈtu i roto i te ao apî. Eita tatou e haamanaˈo faahou i te mau mea i haamauiui ia tatou. Te parau ra te Bibilia: “E ore hoi tei mutaaihora e manaˈohia.” (Isa. 65:17) A feruri na ua tavini maoro vetahi o tatou ia Iehova e ua ruau i teie nei, i mua nei râ, e apî faahou tatou! (Ioba 33:25) No reira, e faaoti papu anaˈe i te ore e tâuˈa faahou i to muri, e hiˈo tia anaˈe râ i to mua!