E NEHENEHE te ahoaho e faateimaha i to tatou aau. (Mas. 12:25) Ua ahoaho ê na anei outou i roto i to outou oraraa? Ua tupu anei te manaˈo e te huru aau ahoaho mai te huru ra e aita e haere faahou ia faaoromai? Mai te peu e e, a haamanaˈo e tera atoa ta e rave rahi i faaruru. Ua rohirohi, ua ahoaho e ua hepohepo paha vetahi no te mea ua haapao ratou i te hoê mero utuafare tei maˈihia, ua pohe tei herehia, ua faaruru ratou i te ati natura aore ra i te tahi atu mau tupuraa fifi mau. Eaha te tauturu mai ia faaoromai tamau i te taime ahoaho? a

Mea rahi te haapiiraa ta tatou e nehenehe e huti mai i te hiˈoraa o te arii Davida. Ua faaruru o ˈna e rave rahi tupuraa fifi mau e te atâta. (Sam. 1, 17:34, 35; 18:10, 11) I te taime i ahoaho ai Davida, eaha tei tauturu ia ˈna ia faaoromai tamau? E nafea ia pee i to ˈna hiˈoraa?

E rave rahi fifi ta Davida i faaruru i te hoê â taime. A feruri na i tei tupu a horo ê ai o ˈna i te arii Saula tei hinaaro e haapohe ia ˈna. I to Davida e to ˈna mau taata hoˈiraa i Zikelaga, ua oti roa ratou no te mea ua eiâ te mau enemi i ta ratou mau taoˈa, ua tutui i to ratou mau fare e ua haru i te mau mero o to ratou utuafare. Eaha to Davida huru i mua i tera tupuraa? “Auê aˈera ïa Davida e to ˈna mau taata e rohirohi noa ˈtu ratou i te auêraa.” Hau atu, ua hinaaro to ˈna mau taata tiaturihia “e pehi ia ˈna i te ofai.” (Sam. 1, 30:1-6) E toru ïa fifi rahi ta ˈna i faaruru i te hoê â taime: Ua haruhia to ˈna utuafare, ua hinaaro to ˈna mau taata e haapohe ia ˈna e te imi noa ra atoa Saula ia ˈna. Papu maitai, ua ahoaho roa Davida.

Eaha ta Davida i rave i muri iho? Ua imi oioi o ˈna i te faaitoitoraa no ǒ mai “ia Iehova to ˈna Atua.” Mea nafea? Ua ite tatou e ua matau Davida i te pure ia Iehova no te ani i te tauturu. Ua matau atoa o ˈna i te feruri maite i nia i ta Iehova i rave no ˈna na mua ˈtu. (Sam. 1, 17:37; Sal. 18:2, 6) Mea faufaa no Davida ia imi i ta Iehova aratairaa. Ani atura ïa o ˈna ia Iehova eaha te rave. I muri iho, ua haa oioi Davida ia au i ta Iehova aratairaa. Ei faahopearaa, ua haamaitai Iehova ia Davida e to ˈna mau taata. Ua faaora ratou i to ratou utuafare e ua noaa faahou mai ta ratou mau faufaa. (Sam. 1, 30:7-9, 18, 19) Ua tapao anei outou i na toru ohipa ta Davida i rave? Ua pure o ˈna ia Iehova no te ani i te tauturu, ua feruri maite i nia i ta Iehova i rave no ˈna na mua ˈtu e ua haa o ˈna ia au i ta Iehova aratairaa. E nafea ia pee i to Davida hiˈoraa? E hiˈopoa anaˈe e toru ravea.

1. A pure. I te taime ahoaho, e nehenehe tatou e pure ia Iehova no te ani i te tauturu e te paari. E nehenehe tatou e faaoti i te hoê pure poto i roto i to tatou aau, mai te peu tera noa te nehenehe e rave i taua taime ra. Aore ra e ite tatou i te maitai a faaite ai ia Iehova i te mau mea atoa e haapeapea ra ia tatou. I te mau taime atoa e imi ai tatou i ta Iehova tauturu, te parau ra tatou mai ia Davida: “O Iehova to ˈu mato  e to ˈu haapuraa e na ˈna e faaora ia ˈu. O to ˈu Atua to ˈu mato, e haapu vau ia ˈna ra.” (Sal. 18:2) E tauturu iho â anei te pure? Te parau ra Kahlia, te hoê pionie: “I muri aˈe i te hoê pure, e ite au i te hau. E tauturu mai te pure ia tu to ˈu manaˈo i to Iehova e e puai atu â to ˈu tiaturi ia ˈna.” Papu maitai, e ô faufaa roa te pure no ǒ mai ia Iehova o te tauturu mai ia faaoromai noa ia ahoaho tatou.

2. A feruri maite. A feruri ai i to tatou oraraa, te vai ra anei vetahi mau fifi ta tatou i faaoromai maoti noa ta Iehova tauturu? Ia feruri tatou i ta Iehova i rave no tatou e no ta ˈna mau tavini i tahito ra, e itoitohia tatou e e tiaturi atu â tatou ia Iehova. (Sal. 18:17-19) Te parau ra Joshua, te hoê matahiapo: “Ua tapaopao vau i te mau aniraa atoa ta Iehova i pahono mai. Ua tauturu mai te reira ia haamanaˈo i te taime i ani ai au i te hoê ohipa taa maitai e i horoa ˈi Iehova i ta ˈu i hinaaro mau.” Papu, a feruri ai i ta Iehova i rave no tatou, e itoito atu â tatou no te faaruru i te ahoaho.

3. A haa. Hou a faaoti ai eaha te rave, e faaohipa tatou i te Parau a te Atua no te ite i te aratairaa papu roa ˈˈe. (Sal. 19:7, 11) E rave rahi o te rave i te maimiraa i nia i te hoê irava Bibilia. E taa ˈtu â ïa ia ratou e nafea ia faaohipa i te reira i roto i to ratou oraraa. Te faataa ra Jarrod, te hoê matahiapo: “Maoti te mau maimiraa, e ite au i te mau tuhaa atoa o te hoê irava e e taa ia ˈu eaha ta Iehova e hinaaro ra e parau mai. E tauturu te reira ia ˈu ia tiaturi atu â i ta ˈu i taio a haa ˈtu ai ia au i ta Iehova aratairaa.” A imi ai i ta Iehova aratairaa i roto i te Bibilia e a haa ˈi ia au i te reira, e puai atu â tatou no te faaruru i te ahoaho.

I te taime ahoaho, ua taa ia Davida e no te faaoromai tamau, e titauhia ta Iehova tauturu. Ua mauruuru roa o ˈna i te turu ta Iehova i horoa ˈtu. Ua parau roa o ˈna: “Maoti te puai o te Atua e nehenehe ai au e pauma i nia i te hoê patu. Na te Atua mau e vehî ia ˈu i te puai.” (Sal. 18:29, 32) E au paha ta tatou mau fifi i te hoê patu eita e nehenehe e pauma ˈtu i nia. Maoti râ ta Iehova tauturu, e nehenehe tatou e faaoromai i te reira. Ia pure tatou ia Iehova no te ani i te tauturu, ia feruri maite tatou i nia i te mau mea atoa ta ˈna i rave no tatou e ia haa tatou ia au i ta ˈna aratairaa, e horoa mai o ˈna i te puai e te paari hinaarohia no te faaoromai tamau i te taime ahoaho!