1. Eaha te haamaitairaa ta tatou e fanaˈo nei?

 E HAAMAITAIRAA ia amui e to tatou mau taeae e tuahine no te haamori ia Iehova i roto i te amuiraa ma te hau e te oaoa. E tuhaa anei ta oe i roto i te amuiraa?

2. Eaha te faahohoˈaraa ta te aposetolo Paulo i faaohipa e rave rahi taime i roto i ta ˈna mau rata?

² Mea rahi ta tatou e haapii mai i te hoê faahohoˈaraa ta te aposetolo Paulo i faaohipa e rave rahi taime i roto i ta ˈna mau rata. Ua faahohoˈa Paulo i te amuiraa i te tino taata. Ua faaau oia i te mero tataitahi o te amuiraa i te mau tuhaa e rave rau o te tino.—Roma 12:4-8; Kor. 1, 12:12-27; Eph. 4:16.

3. Eaha na manaˈo e toru ta tatou e hiˈopoa mai i roto i teie haapiiraa?

³ I roto i teie haapiiraa, e hiˈopoa mai tatou e toru manaˈo faufaa o ta Paulo faahohoˈaraa. A tahi, e parahiraa * to te taata tataitahi i roto i ta Iehova amuiraa. A piti, eaha ta tatou e nehenehe e rave ia manaˈo tatou aita to tatou e faufaaraa i roto i te amuiraa. E a toru, no te aha mea titauhia ia rave noa i ta tatou tuhaa i roto i te amuiraa.

4. Eaha te manaˈo faufaa e matara mai ra i roto i te Roma 12:4, 5?

⁴ Te manaˈo faufaa matamua e matara mai i ta Paulo faahohoˈaraa, e faufaaraa ïa to te taata tataitahi i roto i  ta Iehova amuiraa. Ua parau na mua Paulo: “E rave rahi hoi mero to te tino hoê ra, e ere râ hoê â ohipa ta te mau mero atoa, oia atoa tatou, rahi noa ˈtu â tatou, ua riro râ tatou ei hoê aˈe tino e te Mesia atoa, e ua tuatiatihia tatou te tahi i te tahi.” (Roma 12:4, 5) Eaha te manaˈo ta Paulo i hinaaro e faaite? Noa ˈtu e tuhaa taa ê ta te taata tataitahi i roto i te amuiraa, e faufaaraa to tatou paatoa.

5. O vai ta Iehova i ho mai ei ô i roto i ta ˈna amuiraa?

⁵ Ia anihia mai ta vai ma te tuhaa faufaa i roto i te amuiraa, oioi paha outou i te manaˈo i te mau taeae e aratai ra i te amuiraa. (Tes. 1, 5:12; Heb. 13:17) Parau mau, na roto ia Iesu, ua horoa mai Iehova i “te taata ei ô” no te maitai o te amuiraa. (Eph. 4:8) I rotopu i teie mau taata ta Iehova i ho mai ei ô, te vai ra te mau mero o te Tino aratai, te mau taeae tauturu i te Tino aratai, te mau mero o te Tomite amaa, te mau tiaau haaati, te mau taeae faaineine o te mau Haapiiraa Kerisetiano e rave rau, te mau matahiapo e te mau tavini tauturu. Ua faatoroahia teie mau taeae atoa e te varua moˈa no te aupuru i te mau mamoe here a Iehova e no te faaitoito i te amuiraa.—Pet. 1, 5:2, 3.

6. Ia au i te Tesalonia 1, 2:6-8, eaha ta te mau taeae faatoroahia e tutava i te rave?

⁶ Ua faatoroahia te mau taeae e te varua moˈa no te amo e rave rau hopoia. Mai te mau mero e rave rau o te ohipa no te maitai o te tino, mai te rima e te avae anei, e ohipa puai atoa te mau taeae faatoroahia e te varua moˈa no te maitai o te amuiraa taatoa. Eita ratou e imi i to ratou iho hanahana, e patu râ e e faaitoito ratou i te mau taeae e tuahine. (A taio i te Tesalonia 1, 2:6-8.) Te mauruuru mau nei tatou ia Iehova no teie mau taeae itoito o te imi ra na mua i te maitai o vetahi ê!

7. Eaha te mau haamaitairaa ta te mau tavini taime taatoa e fanaˈo ra?

⁷ Te tavini nei vetahi ei mitionare, pionie taa ê aore ra tamau. Ua maiti teie mau taeae e tuahine na te ao i te poro e i te faariro i te taata ei pǐpǐ na te Mesia ma te taime taatoa e e rave rahi taata ta ratou i tauturu. Noa ˈtu mea iti ta ratou faufaa, ua haamaitai rahi Iehova ia ratou. (Mar. 10:29, 30) Te here mau nei tatou i teie mau taeae e tuahine e te mauruuru atoa nei no te ohipa ta ratou e rave ra i roto i te amuiraa.

8. No te aha e faufaaraa to te mau taata poro atoa?

⁸ E ere te mau taeae faatoroahia e te mau tavini taime taatoa anaˈe te mea faufaa i roto i te amuiraa. No te Atua e no te amuiraa, e faufaaraa to te mau taata poro atoa. (Roma 10:15; Kor. 1, 3:6-9) Hoê o te mau ohipa faufaa roa ˈˈe a te amuiraa, o te faariroraa ïa i te taata ei pǐpǐ na te Fatu ra o Iesu Mesia. (Mat. 28:19, 20; Tim. 1, 2:4) Te tutava nei te feia poro atoa o te amuiraa, bapetizohia aore ra aita, i te tuu i tera ohipa i te parahiraa matamua.—Mat. 24:14.

9. No te aha tatou e here ai i to tatou mau tuahine?

⁹ E tuhaa faufaa atoa ta Iehova i horoa i te mau tuahine i roto i te amuiraa. Te here nei oia i teie mau vahine, mama, vahine ivi e tuahine faaipoipo-ore-hia o te tavini nei ia ˈna ma te haapao maitai.  Pinepine te mau Papai i te faahiti i te mau vahine ta te Atua i mauruuru. E hiˈoraa maitai ratou i te pae o te paari, te faaroo, te itoito, te aau horoa noa e te mau ohipa maitatai. (Luka 8:2, 3; Ohi. 16:14, 15; Roma 16:3, 6; Phil. 4:3; Heb. 11:11, 31, 35) Auê tatou i te mauruuru ia Iehova no teie mau tuahine o te faaite atoa nei i taua mau huru maitatai ra!

10. No te aha tatou e here ai i to tatou mau taeae e tuahine paari?

¹⁰ Te oaoa atoa nei tatou e rave rahi feia paari to roto i te amuiraa. Ua tavini maoro vetahi o ratou ia Iehova ma te haapao maitai. Mea apî paha vetahi feia paari i te haapiiraa i te parau mau. Te faaruru nei râ ratou paatoa i te fifi e rave rau no te matahiti rahi e mea iti paha ta ratou e rave i roto i te amuiraa e i roto i te pororaa. Te rave nei râ teie feia paari i tei maraa ia ratou i roto i te taviniraa a faaohipa atoa ˈi i to ratou puai no te faaitoito e no te faaineine ia vetahi ê. Te faufaahia nei tatou i to ratou hiˈoraa. Mea nehenehe mau teie mau taeae e tuahine paari no Iehova e no tatou!—Mas. 16:31.

11-12. Mea nafea te feia apî o te amuiraa i te faaitoitoraa ia outou?

¹¹ E rave rahi atoa feia apî o te faaruru nei i te fifi a ora ˈi ratou i roto i teie ao faaterehia e te Diabolo ra o Satani e tei î atoa i te mau haapiiraa tia ore. (Ioa. 1, 5:19) E itoitohia tatou paatoa ia ite i te feia apî ia pahono i te mau putuputuraa, ia apiti i te pororaa e ia faataa ma te itoito i ta ratou e tiaturi ra. Oia mau e te feia apî, e tuhaa faufaa atoa ta outou i roto i ta Iehova amuiraa.—Sal. 8:2.

¹² Te manaˈo nei vetahi taeae e tuahine aita to ratou e faufaaraa i roto i te amuiraa. Eaha te tauturu ia tatou tataitahi ia papu e tuhaa iho â ta tatou i roto i te amuiraa? E hiˈopoa anaˈe i te reira.

13-14. No te aha vetahi e manaˈo ai aita to ratou e faufaaraa i roto i te amuiraa?

¹³ Te piti o te manaˈo faufaa o ta Paulo faahohoˈaraa, o te hoê ïa fifi o te ite-pinepine-hia nei i teie mahana: Te manaˈo nei e rave rahi aita to ratou e faufaaraa i roto i te amuiraa. Ua papai Paulo: “Ia parau mai te avae, ‘No te mea e ere au i te hoê rima, e ere ïa vau i te hoê tuhaa o te tino,’ no te reira anei e ere ai teie avae i te hoê tuhaa o te tino? Ia parau mai te tariˈa, ‘No te mea e ere au i te hoê mata, e ere ïa vau i te hoê tuhaa o te tino,’ no te reira anei e ere ai teie tariˈa i te hoê tuhaa o te tino?” (Kor. 1, 12:15, 16) Eaha te manaˈo faufaa ta Paulo e faaite ra?

¹⁴ Ia faaau outou ia outou i te tahi atu i roto i te amuiraa, eita outou e ite i to outou iho faufaaraa. Mea aravihi paha vetahi i te haapii i te taata, i te faanaho maite i te ohipa aore ra i te faaitoito. E manaˈo paha ïa outou eita to ratou aravihi e roaa ia outou. Te faaite ra outou i te haehaa e te aau faahaihai a manaˈo ai mai tera. A haapao maitai râ. (Phil. 2:3) Ia tamau outou i te faaau ia outou i te feia aravihi, e toaruaru outou a manaˈo atu ai aita to outou e faufaaraa i roto i te amuiraa. Eaha te tauturu atu ia faaea i te manaˈo mai tera?

15. Ia au i te Korinetia 1, 12:4-11, eaha te titauhia ia tatou ia farii?

¹⁵ A feruri na, ua horoa Iehova i te tahi mau Kerisetiano matamua i te mau ô faahiahia maoti te varua moˈa, e ere râ hoê â ô e te aravihi ta ratou i fanaˈo. (A taio i te Korinetia 1, 12:4-11.) Noa ˈtu râ, e faufaaraa to te Kerisetiano tataitahi. Aita te varua moˈa e ohipa semeio faahou ra mai i tahito ra. I teie atoa mahana, mea taa ê te aravihi o tera e tera  Kerisetiano, e faufaaraa râ to tatou paatoa i te aro o Iehova.

16. Eaha te aˈoraa te titauhia ia tatou ia haapao?

¹⁶ Eiaha tatou ia faaau ia tatou i te tahi atu Kerisetiano, e haapao anaˈe râ i teie aˈoraa a te aposetolo Paulo: “Ia hiˈopoa te taata tataitahi i ta ˈna iho ohipa, e na reira hoi oia e oaoa ˈi ia ˈna iho, eiaha râ no te mea ua faaau o ˈna ia ˈna i te tahi atu.”—Gal. 6:4.

17. E nafea tatou e faufaahia ˈi i te aˈoraa a Paulo?

¹⁷ Ia pee tatou i ta Paulo aˈoraa e ia hiˈopoa tatou i ta tatou mau ohipa, e ite paha tatou e aravihi to tatou ta vetahi e ore e fanaˈo ra. Ei hiˈoraa, e ere paha te tahi matahiapo i te mea ite roa i te horoa i te oreroraa parau, mea aravihi râ o ˈna i te faariro i te taata ei pǐpǐ na te Mesia. E ere paha te tahi i te mea ite roa i te faanaho maite i te ohipa mai te tahi atu mau matahiapo, mea aravihi râ o ˈna i te faaitoito e mea ohie atoa no te feia poro ia faafatata ˈtu ia ˈna no te ani i te tauturu. E ua matau-atoa-hia paha o ˈna ei taata farii maitai. (Heb. 13:2, 16) Ia ite papu tatou i to tatou iho aravihi, e oaoa tatou i te rave i ta tatou tuhaa i roto i te amuiraa. E eita tatou e pohehae i te mau taeae e aravihi ê atu to ratou.

18. E nafea tatou ia aravihi atu â i roto i te amuiraa?

¹⁸ Noa ˈtu eaha ta tatou tuhaa i roto i te amuiraa, e hinaaro tatou paatoa e tutava noa i te tavini i te Atua e i te aravihi atu â. Te faaineine nei Iehova ia tatou na roto i ta ˈna faanahonahoraa. I te putuputuraa o te hebedoma, e horoahia te mau aratairaa o te tauturu mai ia aravihi atu â i roto i te taviniraa. Te haafaufaa ra anei outou i tera tauturu?

19. E nafea outou ia apiti i te Haapiiraa no te feia poro i te parau apî oaoa o te Basileia?

¹⁹ Te tahi atu faaineineraa faahiahia mau, o te Haapiiraa ïa no te feia poro i te parau apî oaoa o te Basileia. Tera haapiiraa, no te mau taeae e tuahine ïa e 23 e tae atu 65 matahiti e tei roto i te taviniraa taime taatoa. E manaˈo paha outou eita e raea ia outou tera fa. Eiaha râ e tiatonu i nia i te mau tumu e ore ai outou e nehenehe e apiti, a tapao râ i te mau tumu e hinaaro ai outou e apiti atu. Ia oti, a faaî i te mau titauraa. Maoti te tauturu a Iehova e i ta outou mau tutavaraa, e raea ia outou tera fa!

20. Eaha ta tatou e haapii mai i te Roma 12:6-8?

²⁰ Te toru o te manaˈo faufaa o ta Paulo faahohoˈaraa, tei roto ïa i te Roma 12:6-8. (A taio.) I roto i teie mau irava, te parau faahou ra Paulo e aravihi taa ê to te taata tataitahi i roto i te amuiraa. Tera râ, te faaite papu atoa ra oia e titauhia ia faaohipa i to tatou aravihi no te patu e no te faaitoito i te amuiraa.

21-22. Eaha te haapiiraa e huti mai i te tupuraa o Robert e o Felice?

²¹ A feruri na i te tupuraa o te taeae Robert. * I tavini na oia i te fenua ê, ua tonohia râ Robert i muri aˈe i te Betela o to ˈna fenua. Noa ˈtu ua haapapuhia ˈtu e ere teie tauiraa no te hoê hape ta ˈna i rave, te na ô ra Robert: “E rave rahi avaˈe to ˈu manaˈoraa e hape ta ˈu i rave. I te tahi taime, ua hinaaro roa vau e vaiiho i ta ˈu taviniraa i te Betela.” Eaha tei tauturu ia ˈna i roto i tera tupuraa? Ua haamanaˈo  atu te tahi matahiapo ia ˈna e faaineine Iehova ia tatou i roto i te tahi taviniraa ia nehenehe tatou e ohipa maitai atu â i roto i te tahi atu taviniraa. Ua taa ia Robert eiaha o ˈna ia hiˈo faahou i muri, e titauhia râ ia ˈna ia tiatonu i nia i te ohipa ta ˈna e nehenehe e rave i teie nei.

²² Hoê â tupuraa ta taeae Felice Episcopo i farerei. I 1956, ua faatuitehia raua ta ˈna vahine i te Haapiiraa no Gileada e ua tavini oia ei tiaau haaati i Bolivia. I 1964, ua fanau raua i te tamarii. Te parau ra Felice: “Ua peapea roa mâua i te vaiihoraa i ta mâua taviniraa. Hoê matahiti te maoro to ˈu faahapa-noa-raa ia ˈu. Maoti râ ta Iehova tauturu, ua faatitiaifaro vau i to ˈu feruriraa e ua tiatonu i nia i ta ˈu hopoia apî ei metua.” Te taa ra anei ia outou i te huru o Robert e o Felice? Ua toaruaru anei outou no te mea ua taui ta outou taviniraa i teie mahana? Mai te peu e e, e oaoa aˈe outou ia tiatonu outou i nia i ta outou e nehenehe e rave i teie nei no te tavini ia Iehova e i te mau taeae e tuahine. Ia rahi noa ta outou ohipa i roto i te taviniraa e a faaohipa i to outou aravihi no te tauturu ia vetahi ê. E oaoa ïa outou i te patu i te amuiraa!

23. Ia feruri maite tatou i te aha e eaha ta tatou e hiˈopoa i roto i to mua ˈtu haapiiraa?

²³ E faufaaraa to tatou tataitahi i te aro o Iehova. Te hinaaro ra oia ia papu ia tatou e tuhaa iho â ta tatou i roto i ta ˈna amuiraa. Ia feruri maite tatou i ta tatou e nehenehe e rave no te faaitoito i to tatou mau taeae e tuahine e ia rave tatou i ta tatou tuhaa, eita tatou e manaˈo aita to tatou e faufaaraa i roto i te amuiraa! E nafea râ tatou ia hiˈo ia vetahi ê i roto i te amuiraa? E nafea tatou ia here e ia faatura ia ratou? E hiˈopoa tatou i te reira i roto i to mua ˈtu haapiiraa.